Deu 5 | XteSC | STEP | Musadi Israel nesala yuma tep, “Sun yuma bulupra wekrume,” pepupa, bulupi pangeda, anesala tep upepu. “Uo, ne kayapuo, sun Israel nesala yuma tep, ne pepkusen ngeda moupra gekepkurume. ‘Angeda, ukupra-ukupra kunkamrume,’ pen upu cap, tonda ‘Angepu kupbankamrume,’ pen upu yumada, atumi di pepkusene. Ada, apepsen nge nukra, kael kepmumdi, aupupu pio tep moupra talepmumdi kupbankamrume.

Deuteronomy 5

Allahdi, “Angeda kunkamrume, angeda pio men kunkamrume,” pepra deipudi, 10 deiyo upu karepu

1 Musadi Israel nesala yuma tep, “Sun yuma bulupra wekrume,” pepupa, bulupi pangeda, anesala tep upepu. “Uo, ne kayapuo, sun Israel nesala yuma tep, ne pepkusen ngeda moupra gekepkurume. ‘Angeda, ukupra-ukupra kunkamrume,’ pen upu cap, tonda ‘Angepu kupbankamrume,’ pen upu yumada, atumi di pepkusene. Ada, apepsen nge nukra, kael kepmumdi, aupupu pio tep moupra talepmumdi kupbankamrume. 2 Aupuda nun nai Allah Yahweh, Sinai mutu ^{▼▼Sinai mutu – Sinai mutu tep nengeda, yuk Allah upu buku neitamai, ‘Horeb mutu’ seki. Amutuda, si butene perami dinino, amutuda tek sisi tenpua.} deiki di nun tep, “Nedi telep kweipkamsenedi, pio talesenedi men tapkamsene. Sunda ukupra-ukupra kunkamrume,’ pepra, mambul upu pepudi, nun telep kudina tep, pedina upu deiki di peiamseu. 3 Uda, Allah Yahwehdi aupu peamuada, nun apu yapu tepapu men peiamu dinin, nun tupa ataru kunmap nesala cap, tonda dortaru kupbankameng nesala yuma tep, “Nedi telep kweipkamsenedi, pio talesenedi men tapkamsene. Sunda ukupra-ukupra kunkamrume,’ pepra, apedina upu pepra deiamseue. 4 Allah Yahwehdi, apedina upu peipu taruda, nun cap, er cap, meneng damai kunmapkanen, sun urasin deipmarum mutu deiki di, ila uku bu jenmaua kan-kan di, yana tekrapudi, aupuda sun tep peiamseu. 5 Aupu penmau taruda, ila uku bu jenmaupa, sunda ange dinmarumpa, kwar weik kupseua cadi, sunda amutu damai men benamrume. Dinino, sunda atara bulupra gekenmarumnyane, Allah ortara tekra ila uku bu jenmaua kan-kan di penmauanen, sun dana, Allah dana, daneitamaipu tekmasidi, ne dipapu Allahdi penmau upu gekenmasidi, sun tep lape penmasisi. Allah Yahwehdi peiamseu upuda ake.

6 “Neda sun nai Bo Allah Yahweh kunune. Sunda Mesir mutu kuramrumpane, nedi sun doupra amutu damai yanamsisi. Ada, Mesir mutu nengdi, ila ikin pel dimamseipa, kange mun kange doupra, kuramrumdi, dorona gum dipapu, sun Mesir neng pelpu tali doramrume. 7 Atep, sundi ne Allah sipu eremkamnerume. Yuk-yuk isok do, yuk puto keca do, yuk mutu nesaladi, tali-tali keca tep, ‘Nun nai Allah ake,’ pepra, si eremenge ngeda, sundi pio men eremkamrume. Ne tepapu si eremkamnerume. 8 Ange utopu, sun pe kange di, ‘Akecadi melimkamserure,’ tenen, ‘Ukupkupe,’ tenepra, sun pe buru di petupra, yuk keca nimi urasin utopu kupra deipmumdi si men eremkamrume. Ada, im deiki tara kure keca do, tuai mutu neitamai kure keca do, me pumbon neitamai kure keca do, tuai kure keca do, akeca-keca yumada, urasin utopu betaipmumdi, sun si men eremkamrume.

9 Sundi apepmansen keca utopunge tep, si pio men eremkamrume. Tonda, akeca yala-yala yuma tep nengeda, gispal dona tep, sun gutam tu deiki dipdongopra, si pio men eremkamrume. Ne sun nai Allah Yahwehda, akeca utopunge men kunune. Neda, sun nai bo Allah kunune. Neda Yahweh kunune. Sunda ne mawa nesala kuruma cadi, sundi yuk tali keca tep, ‘Angedi melimkamsere’ tenen, si eremrumnyopda, pio mali kange doupra, sun tep yu weik kunkamnere. ‘Ne mawa nesalada, ne tepapu si eremkamnenge,’ tenenuna tep pepsene. Ware neng do yumadi, atali keca tep si eremengedi, ne tep, ‘Nun songe,’ tenepmengedi, ne upu yanipkamneng nesala yumada, pio tep wenepbaramnyanen, sun anesaladi deipmengepa, dadeipdanen, baramenganen, dakunkameng nyapu yuma peda, pio tep wenepbankamne ja. Ada, er nai bodi deiprepa, er midi deipkamre mi, ange midi deipkamre neng, anengdi dadeipkameng nyapu peda, ue weneri ngeda, tonda dumbari ngeda, dortaru kunkameng nesala, sun damai ikin keca deipra wenemnapu kunkamne. Ada, tali tep gum dinin, ne tep, ‘Nun songe,’ tenepmengedi, ne yaninkamneng neng tep pepsene. 10 Dinino, ware neng do yuma, nimi yumadi ne tepapu, ‘Allah erda, nun nai bo sisa kurure’ tenen, ne tep kange deipnengedi, ne peipne upu gekepmengedi, angepu talepra bouna di ne amutarapu kupbankameng nesala yuma tep nengeda, pio men tamkamne. Sun anesala tep nengeda, tamna gum dipapu, pio bicau tenepnedi, melimnapu kusenedi, pio telep kweipkamsene. Tonda, ne mawa nesaladi deipmengepa, dadeipdanen bankameng nesala yumada, denge pio weik men nukmanto, beribu-ribu dortaru kunkameng nesala tep, bicau tenepnedi, pio teleppu kweipkamsene.

11 Tonda, sun nai bo Allah, ne Yahweh tep nengeda, deiyo ton men kwapmarepapu, ne si tali-tali tep, pio men peptamkamnerume. Deiyoda, neda sun nai Allah Yahweh kununa tepa. Ware ngebo do yumada, ne si tali-talipu si penere ngeboda, erda tek sisi pio mali keca kupmara cadi, nedi angebo tep wenepra ponkamne. Ato nesalada, men tapkamne dinin, sun wenemna tep, ikin keca sun nong deikipu derinkamsene. 12 Tonda, neda sun nai bo Allah Yahwehdi sun tep pepsenetopu, ne gispal dona cap, ne si eremna cap tep, pel dona gum dipapu, ne si eremkamnerum tumi neitamai, Sabat tumida, ‘Atumi ila mambul tumi,’ tenepra ketenepra deipmumdi, telep kupra kumumdi, beipye peingnapu kunkamrume. ‘Yuk pel don tumi-tumi yumada, atumi utopunge gume. Atumida pio mambul tumi,’ tenepmumdi, ne tep gispal dopmumdi, ne sipu eremkamnerume. Neda, sun nai Allah Yahwehdi, ‘Atumi tep nengeda, ukupra kunkamrume,’ pepra, deipsisitopu kunkamrume. 13 Sunpe pel yala-yala yuma dona tep nengeda, ue ngangtan bari tumi neitamaida, go weik karepsene.

14 Dinino, ue yoneitam tumida, tali pel dona gum dipapu, beipye peingna tumi cadi, ketenepra deipmamumya di, beipye peingkamrume. Atumi yoneitam bari ngeda, neda sun nai Bo Allah Yahweh tep, ne si eremna tumipu kunkamrure. Atumi neitamaida, nimi tenpu ngebo peda, pel ton men donkamrure. Ada, sun pe, sun nyapu yuma pe, tonda sun pel melimna nesala pe, utopu tonda sundi talepra peirum gam keca pe, tonda, yuk mutu di tengyakankameng nimi bo neng peda tali pel men donkamrume. Ada, sun pe, sun cap kikiman kunkamrum nesala yuma pe tep, pepsene. Ukupra kumum pangeda, sun pe, sun pel don nesala peda, sun beipye peingna tumi neitamaida, pel pio men donkamrume. Sun yumada beipye peingnapu kunkamrumtopu, aneng peda, utopu kunkamnunge. 15 Ange ukunkamruma deiyo ton pepkusene. Ada, sundi pio moupra tenenkamrume. Ada, ‘Pumun taru nunda Mesir mutu kuramepu taru yumada, amutu neng sun amutarapu kuramupupa, ikin weik pel dimamseipa, sun tali pel melimna nengpu kuramepupane, nun nai Allah Yahweh, er ila puto cap, er puto weik buru deiki di doupra yanamseue,’ tenenkamrume. Atep nengeda, nedi sun tep, ‘Ukunkamrume, sun beipye peingna tumi, Sabat tumi keteneipkamnerume,’ pepra deipsisitopu, beipye peingna tumi, Sabat tumi yuk wepra keteneipmumdi, ne Allah tep si eremkamnerume. 16 Sun nyapu yumadi, sun nai yapu yuma cap, sun nin yapu yuma capdi, sun pepmenge upu moupra gekepmumdi ange talepra kunkamrume. Aupuda, nedi sun nai Allah Yahwehdi upepra deipsisitopu kunkamrume. Sundi aupu gekepra kumumnyopda, sun gam kunada keteng tamun ton cap, go weika di karepkamsene. Tonda, sundi aupu gekepra kumumnyopda, sun nai bo Allah nedi, ‘Atelep mutu karepkamsene,’ pepra, pedina upu deiki di peiamsisi mutuda, amutu tu talepra kunkamrum taruda, telep kweipsenepa, telep kange doupra kumumdi, teleppu kunkamrume.

17 Tonda, nimi pona meme, 18 Ner upula nyangna meme, 19 Upula dona meme, 20 Tonda, nimi upu bongdina taruda, deiyo men kwapmarepapu, sun kayapu yuk neng tep, ‘Sunda mali kupmange,’ pepra, mok upu pena meme. 21 Tonda, sun kayapu yuk neng doamenge nerapu tep, kange doupmumdi, ‘Uo, anerda ne ton doptene,’ tenen, kuna meme. Tonda ange utopu, sun kayapu neng, sun ati do, wa tu do, sun ati pel melimna ner do, nimi do, tonda yuk nengdi peirameng gam keca do, ada keledai bisam do, sapi bisam do, ware yala keca yuma, sun kayapu nengdi talemenge keca tep, ‘Uo, ne puda ange doproptene,’ tenena pio meme.

Nun nai bo Allah Yahwehdi, sun Israel yala nesala yuma tep peiamseu.

22 Uda, aupu yumada, sun yuma ila mutu dup Sinai mutu damai bulupra yana wekrum taruda, Allah Yahwehdi sun tep, “Ange kunkamrume, angeda pio men kunkamrume,” peamseu ngeda, adano. Aupu pedinmaseu taruda, dua kan-kan cap, tonda, ila uku bu jenmaua cap, lukunda utopu dinin, pio kunungna neitamai cap, aweneri keca neitamai di, Allah er upuda kulman poramretopu, ila upu deiki di penmaupa, sun ton gekerume. Ada, sun damai upu yuk nge ton men pepra deiamseu dinin, sun damaida, “Ange kunkamrume, angeda pio men kunkamrume,” pena upupu pepra deiamseue. Upepra deipseu upuda, Allah er pe buru di, gel pala butene deiki sekra deipudi, ne Musa damai kareamneu. Musadi sun Israel nesala tep pepu.

Allahda, Israel nesala sun damai yaupa, kware weik kwamunge tep, pepu upu

23 Musadi sun Israel nesala tep, aupu ton dukdongopra pepu. “Ataruda, amutu yuma uku jenmaudi, ila dua kunukmaua kan-kan neitamai di, Allah er upu penmaupa gekeprum taruda, sun Israel nesala yala yuk-yuk kuramrum neng cap, nun Israel nesala yuma tep nimi deiyo talepra kuramrum neng cap yumada, ne damaipu yanamrume. 24 Yarumdi upeamnerume. “Uo, nun nai Allah Yahweh, er ila puto cap, ila dirine cap, ila mambul pel dorurnge capda, konum jenek kupmarepa, epmape. Ataruda, ila uku bu jenmaua kan-kan, Allahdi yana tekudi, upu peipmaseupa, nun gekepmape. Tonda, atumi di, Allah er upu pepmarepa, nimi ton gekepmap dinin, nun gam tupa kunmape. 25 Dinino, ware keca deiyo tep, nunda aca dipu depkup do? Ada amutu neitamaida, ila uku bu jenmara cadi, ‘Auku di jepserepa depnupe’ tenen, kware kunmasere. Tonda, nun nai bo Allah Yahweh, erdi ton cap nun damai yana upu perepa gekepmemyopda, adipapu depnup tepa.

26 Angeda tali tep men pepmepe. Deiyoda, ware nesala do, ware gam kunung keca yala-yala yuma do? Allah Gam Kuna Deiyo Ngebodi, ila uku bu kankan neitamai di, er upu peprepa, nimi gekepmengedi gam kuptenge do? Gume, atep, nun peda, ‘Er upu ton peprepa, gekepmepyopda, nun ton adipapu depnup’ tenen, kware kupmasera tep, pepkepe. 27 Ange tep nengeda, ukutaru Musa kanda, Allah Yahweh er damai bememdi, nun nai Allah erdi pepsere upuda, kan dipapu moupra gekepmemdi, nun damai yana peipkamaserume. Ware upu pepkamser do yuma, erdi kan damai peipkamker upu yumada, gekepmemdi nun damai pepkamserume. Upepsemempa, tek sisi aupu yuma, nun gekepmepedi moupra talepra kunkamepe.” Sun Israel nesaladi upeamnerume. Musadi pepu.

28 Upepu dingeda, aupu ton dukdongopra pepu.

Sun Israel nesaladi ne tep aupu pepnerum ngeda, Allah Yahwehdi gekepu. Gekepudi, Allahdi tamupra ne tep peneu. “Anesala sundi kan tep pepmakeng upu yumada, ne konum gekepne. Sun pepmang upu yumada, tek sisi upu pepmange. 29 Uo, sun Israel nesalada, atumi di, ‘Allahdi pepre upu gekepmepedi, moupra talepra pio akunkamepe,’ pepmangada, sundi tupa ange utopu kangepu doupmengedi, tupa kuptengopda, nedi sun tep telep kweipsenepa, sunda pio telep kunkamenge. Ada, ne upu moupra gekepmengedi, ne tepapu, ‘Uo, Allahda ila mambul ngebo kurure’ tenen, kware kuprepa, ne tepapu gispal dopra kungedi, ne cap, ne pepne upu cap tepapu gekepra, bouna di amutarapu kupbange pangeda, sun cap sundi derinkameng nesala yuma capda, pio tep telepepu kunkamenge.

30 Atep nengeda, ukutaru kan adipapu, sun anesala yuma tep, sun damai bena aupu lap perbenkurume. ‘Sun pe opkal bol di deipidi, keana dodin ati yuk-yuk akumumtopu, tamupra besyo,’ pepmempa benkununge. 31 Sun pe ati yuk-yuk tamupra benkung dinino, Musa kanda ne cap kikiman acapu kunkuneme. Aca damaipu tekurume. Acapu kupnemedi, nedi kan tep, ‘Angeda kunkamrume, angeda pio men kunkamrume,’ pena upu cap, ‘Telep kunada, ake, angepu talepra pio kunkamrume,’ pen upu capda, kan damai lap peipkukene. Apeipkene upuda, kandi sun Israel nesala yuma gekenai bena, peterepmempa gekepra keal kepkamenge. Kael kepmengedi, nedi sun tep, ‘Atelep mutuda, karepkamsene,’ pepkamsen mutuda, orbena kunkameng taru peda, aupupu moupra talepmengedi, pio tep kunkamenge.

32 Atep nengeda, apepkusen upuda, kandi, Israel nesala tep lap perbenkurume. Ukupmemnyopda, kan cap, sun Israel nesala yuma cap, ange yuma moupra taleprumudi kunkamrume.” Allahdi Musa tep pepu.

Upepupa, Musadi sun Israel nesala damai bena lap pepu. “Ne kayapu Israel nesalao, nun nai bo Allah Yahwehdi konum peipmaser upu yumada, moupra gekepmepedi talepmepyopda, erdi telep kweipserepa, teleppu kunkamepe. Allah erdi dumsisi upu pedisere ngeda, tapra domopromumdi, ‘Ange-ange yuknge ton kupkun do?’ men tenepra kunkamrume. 33 Sundi er si eremrum Allah, er si Yahwehdi sun tep, “Ange ukunkamrume, angeda pio men kunkamrume,’ pepra deipmaser upu yumada, angepu moupra talepmumyopda, gam kunkamrume. Tonda, Allahdi sun tep ukupu karepkamser mutu bena, amutu yuma bisbisa kapra, talepra kunkamrum taruda, aupupu talepra kupmumnyopda, sun keteng tamun goda weik karepserepa, pio teleppu kunkamrume.” Musadi sun Israel nesala tep pepu.