Deuteronomy 6

Musadi Allah peiamu upu pepkou taru tep, menmena pepu upu

1Musadi Israel nesala tep pepu. “Sun nai bo Allah, er si Yahwehdi ne tep, ‘Ange ukunkamrume, tonda angeda men kunkamrume,’ pepra pediramneu upu yuma, nedi sun tep pepkusene. Ada Allahdi, ‘Aupu peterepkamrume,’ peipneutopu pepkusene. Allahdi ukupu karepkuser mutu, Yordan me goupra ortara mutu bena dopropmumdi, sun amutu pio talepra kunkamrum taruda, nedi pepkusen Allah upu ada, ‘Pio talepra kunkamrum’ tenen, pepkusene.

2Tonda sundi sun nai bo Allah, er si Yahweh tep, ‘Uo, erda pio mambule, er sipu eremkamepe, tenenkamrum’ tenen, aupu peterepkusene. Tonda, Allahdi ‘Ange ukunkamrume, angeda men kunkamrume,’ pepra, er upu peiamu ngeda, ‘Sundi moupra talepmumdi kunkamrum’ tenen, pepkusene. Tonda, sundi deipmumpa deipdanen bankameng nesala yumada, ‘Sundi Allah er upu tep, teka tenepmengedi, moupra kunkameng’ tenen, pepkusene. Ukupmum pangeda, Allahdi sun gam kunkamrum taruda, keteng tamun umur lyoma di karepserepa, pio kunkamrume.”

3“Sun Israel nesalao, ne upu moupra gekepneso. Apepkusen upu yumada, moupra gekepnerumdi, pio talepra kunkamrume. Ukupmum pangeda, amutu neitamai kunkamrum taru yumada, akeca-keca yuma teleppu kunkamsere. Tonda, sun nai bo Allah, er si Yahwehdi, sun apu yapu tep pediramutopu, sun yala neng amutu weik kupmengedi, isomka neng weik kunkamenge. Ada Allahdi domon upu pepka deiki, amutuda sapi bisam weik kuramrepa, moum teyung weik kupkamre. Tonda, mong mokon cap karepsenepa, jepmum dingeda, kange deipra kunkamrume. Adomon upu deiyoda, amutu neitamai kupkamre keca yumada, weik kupredi, pio teleppu kunkamra tep pepsene.” Musadi Israel nesala tep pepu.

Allahdi, ‘Ukunkamrume,’ pepra, peiamu upu deiyonge tep, menmena pepu upu

4Musadi Israel neng tep pepu. “Ne kayapu Israel nesalao, moupra gekepso. Sun nai bo Allah er si Yahweh, Yahweh er tenpu kurure. Yuk Allah ton men kurure. 5Ange tep nengeda, sundi Allah tep, sun kange dipru neitamai yuma dopra, er deikipu derinkamrume. Ukupmumdi, ‘Allah er puda ne dipru ngebo kunerure, er tenpuda mambule, yuk ton gume,’ tenenapu kunkamrume. Ange utopu, sun kunkamrumnya yuma deiki di, Allah tep gispal dopra er sipu eremkamrume.

6Atep ataru cap, doryankamre taru yuma cap, apepkusen upuda, lumdongona gume. Sun kange dipru neitamaida, pio tenenapu kunkamrume. 7Atumi pepkusen upuda, sundi aupu gekepmumdi, sun nyapu yuma tep tupa peteremkamrume. Ada, sun ati bukmumyai cap, bisi embamumyai cap, beipye peingnai cap, mapkumum taru cap, mapmumnya bukromum taru cap, ataru-ataru yuma aupu sisikmumdi, talerdankamrume. Ada, sun cap, sun nyapu cap tep, pio peteremdankamrume.

8Tonda apepkusen upu, sundi pio tenimnapu kunkamruma tep, aupu sekrapmumdi sun buru banai cap, sun aso deiki cap, getedongonkamrume. Ada, ‘Allah er upuda, pio mambule’ tenen, ‘Pio tenenkamrum’ tenen, pepsene. 9Ange utopu ton, sun buplan co deiki cap, buplan dana-dana tekre co deiki cap, sun ati beilya buplan dam cap, Allahdi pesere upu sekeipmumdi epmumnyopda, pio tenenkamrume.” Musadi Israel nesala tep pepu.

‘Akeca-keca yuma telep kuprepa, Allah tep lupropmengedi yanipnung’ tenen, pepu upu

10Musadi upepu. “Allahdi nun apu yapu Abraham cap, Isak cap, Yakub cap tep, ‘Sun nyapuda ukupu telep mutu karepkamsene,’ pepra, pediramseu mutu bemumnyopda, sun amutu bena dopropmumdi, ila kota yuma, pio telep kota bena kunkamrume. Akota yumada, yuk nengdi domi dinin, Allahdi karepserepa, akota talepra kunkamrume. 11Ange utopu, sun amutu bemumnyopda, pio telep ati weik dopropkamrume. Akati-akati pumbon yumada, pio telep bung keca akapkamre. Sundi, akeca-keca yuma men kunupra deiamrum dinin, akeca yuma bena dopropkamrume.

Tonda, akati damai, mo cepredi mokon derina tep nengeda, sundi ton men paliamrum. Dinin, men di akapungepu dopropkamrume. Yuk nengdi palipingepu Allahdi karepserepa, sundi bena talepra kunkamrume. Tonda yuk nesaladi pel weik doramya deiki di, sun peiamidi kouami wa, anggur tapu du cap, zaitun co du cap dopropkamrume. Awai neitamai akamrengepu bena jepra kunkamrume. Sun putaseretopu tali kange doupra, weika di jerumpa, bounkamsere.

12Atep, arup pepmasentopu, ange-ange yuma kunkamrum taruda, moupra kumumdi ketenem dinkamrume. Sun nai bo Allah tep lumdongona gume. Sunda, Mesir mutu kuramrumpa, sun nong deiki ikin pel deiamseipa doramrum ngeda, talipu pel doramrum dinin, Allah er si Yahwehdi dalupra dopropseudi, lyepra yanamseu ngeda, lumdongona gume. Allah tep pio tenimnapu kunkamrume.

13Amutu kunkamrum taru yumada, sundi sun nai bo Allah, er si Yahweh tep, ‘Uo, erda pio mambule, er sipu eremkamepe,’ tenenkamrume. Allah tep er si erepra gispal dopra, er amutarapu bouna di kunkamrume. Tonda, sundi, ‘Ukunkamne,’ pepra, pedina upu penkamrum taruda, Allah er sipu erepra, ‘Tek sisi ukunkamne,’ pepra, pedina upu penkamrume. Yuk ngebo si ton men penkamrume. 14Tonda, sun amutu bena kunkamrum taruda, yuk upu nesala amutu neitamai kunung nesala, tali keca tep si eremnung dinin, sun Israel nesalapuda, yuk-yuk keca ton men si eremkamrume. Amutu kunung nesala talepra kuramenge keca, sun cap tapakrap men kunkamrume.

15Uda, ‘Yuk tali keca si eremna pio gume,’ pepmasen upu deiyoda ake. Ada mesum tep men pepsene. Sun neitamai kurur Allahda, er si Yahwehdi, sun tep, ‘Ne mawa nesala, ne nyapu sisa kununge,’ teneserura tep, sundi, ‘Nun nai,’ pepra, yuk tali keca si erepmumnyopda, Allah er yu sun nong deiki deipseredi, wenepkamsere. Tuai mutu neitam kunkamrumai yuma, ‘Allahdi wenepra poptapseredi, sun yuma gawal dakserur,’ tenena tep pepsene. Allah erda yuk-yuk keca kuramra utopu kuna gum ngebo.” Musadi, Israel nesala tep pepu.

“Sun nai bo Allah tep kurpetena gume,” pepu upu

16Musadi Israel nesala tep pepu. “Sundi Allah er si Yahweh tep, ‘Akeca tek sisi kuptu do, men kuptu do?’ tenen, men kurpetenkamrume. Ada, mutu si, Masa mutu menop taru kuramepuai, me gum kupupa, mali-mali pepra engeramrumdi, Allah tep kurpeteramrumtopu, kange di ton cap pio men kunkamrume. 17Ange gum dinin, Allah er si Yahwehdi, ‘Angeda kunkamrume, tonda angeda men kunkamrume,’ pepra, pedisere upu yuma, moupra doupmumdi, pio talepra kunkamrume. Tenpunge peda men tapkamrume.

18Allah er si Yahwehdi, ‘Ukunada pio telepe, tonda ange ton kupmumnyopda ne kange deipkamsene,’ pepra, peteremsere upu yumada, angepu gekepra dombankamrume. Tonda, Allahdi diseryai yuma peda, telep kupra kunkamrume. Ukupmum pangeda, sun kuna yumada teleppu kunkamsere. Akeca yuma teleppu kunkamsere. Tonda ukupmumnyopda, Allahdi nun apu yapu tep, ‘Telep mutu karepsenepa, amutu pio talepra kunkamrume,’ pepra pediramu mutu, sun tep karepserepa, bemumdi kange deipra, acapu tupa kunkamrume.

19Tonda, Allahdi peipseutopu, amutu kungedi, sun podan neng yuma tep, bisbisa kapra popmumdi, anesala tep dokoteprumpa, yuk mutu bendopkamenge. Sun damai men kunkamenge.” Musadi Israel neng tep pepu.

Sun nyapu tep, “Menop taru nun nai Allah meliamseudi, ukupseue, ukupseue,” pepra lape penkamrume, pepu upu

20Amenda doryankamre taruda, sun nyapudi, “Uda nun nai Allahdi, ‘Angeda kunkamrume, tonda angeda men kunkamrume,’ pepra deipseu upuda, ware upu do?” pepra asipetepsengopda, upepkamrume. 21“Gume, pumun taru Mesir mutu neitamai, sun ila deiyo ngebo Firaun, er amutara kuramupudi, nimi bo neng utopu kuramepupa, ikin pel weik nun nong deiki deriramseupa, ikin weik kuramepu. Ukuramepu dinin, Allah er puto deiki di lyepseudi, doupra amutu duyanamseue.

22Allahdi nun tep dalupra dopropseu taruda, nimi yumadi, ‘E tek sisa Allah er dipapu apel dopmasere’ tenepmengedi kael kepkameng’ tenen, nimi men kupmanto pel, er puto deiki di, pio mambul pel ton dopra karepupa, Mesir mutu yuma cap, Firaun cap, Firaun er nyapsilip yuma cap, amutu nesala yuma cap, ikine weik kurami. Erdi akuramunge deiyoda, ‘Mesir mutu nengdi, Allah er puto weik kurur ngebo kael kepkameng’ tenen, kuramu. Allahdi akeca-keca karepu pangeda, nun asuru di diramepu. Nundi akeca yuma epmupu. 23Uda, Allahdi Mesir mutu neitamai di loptapra dekaramseua deiyoda ake. Ada Allahdi nun apu yapu tep, ‘Ukupu telep mutu karepkamsene,’ pepra pediramseutopu, ukutaru konum karepmaserpa, yankunkamepe. Sun nyapudi asipsengepa, aupu pepra peteremkamrume,” Musadi pepu.

24Upepudi aupu ton pepu. “Nun nai bo Allah, er si Yahwehdi, ‘Angeda kunkamrume, tonda angeda men kunkamrume,’ pepra deipseu. Aupu yuma tep ngeda ange ton pepseu. ‘Sun Israel nesala yumadi, ne upu moupra talepmumdi dombankamrume.’ Tonda, nundi Allah tep, ‘Erda ila mambule, er sipu eremkamepe’ tenen, pio kupmepyopda, Allahdi nun tep, akeca-keca yuma telep kweipkamsere. Erdi nun Israel nesala yuma tep, pio kange deipra kunkamsere. Tonda er melimseredi, kalekra diserepa, pio telep kupra gampu kunkamepe. Pumun taru cap, neitam taru cap, ukutaru cap kuseretopu, amenda taru peda tupa kunkamsere.

25Tonda, Allahdi pedisere upu yuma gekepmumdi, ketenepra deipmumdi, moupra talepmumdi kumum pangeda, Allahdi kange deipkamsere. Ukupredi, nun yuma tep, dumsisi nesalapu kupra deipkamsere. Ada, nun nai Allah, er si Yahwehdi, ‘Angeda kunkamrume, tonda angeda men kunkamrume,’ pepra deipseutopu, tek sisi konum kupmepyopda, erdi nun tep, dumsisi kun nesala kweipkamsere,’ pepsene.” Musadi Israel nesala tep pepu.