Deuteronomy 7

Allahdi weiamu nesala Kanaan mutu dorona tep, pepu upu

1Musadi Israel neng tep pepu. “Allahdi, ‘Telep mutu karepkamsene,’ peiamutopu, melipserepa, amutu bena kunkamrume. Amutu bemum dingeda, amutu neitamai kungedi, sun podan neng yuma epkamrume. Dinino, Allah er melipserya deiki di, anesala tep popbisipmumdi, anesala tep dokoteprumpa, yuk mutu bendopkamenge. Anesalada, yala yuk-yuk yoneitam bari kununge.

Sun Israel nesala, sun putoda yambul pua. Ayoneitam bari yala nengda, sun puto weik kununge. Ayoneitam bari yala neng sun sida ake. Het yala neng cap, Girgasi yala neng cap, Amori yala neng cap, Kanaan yala neng cap, Feris yala neng cap, Hewi yala neng cap, Yebus yala neng cap yumada, sun Israel nengdi bena popmumdi, amutu neitamai di dokotepkamrume.

2Tonda, Allah er si Yahweh, er melipserya deiki di, anesala yuma popra gawal dakamrume. Anesala popra gawal dakmum pangeda, Allahdi ayala-yala kunge mutu yuma karepserepa dopropmumdi, amutu kunkamruma tep, amutu kunge nesala yuma poprap gawal dakamrume. Tonda, sun cap, ayala yuk-yuk nesala cap, upu pedidana meme. Ada, ‘Sun cap, nun cap, kikiman kutepe’ tenen, men pedidankamrume. Anesala yuk-yuk yumada, tenpu pe ton bicau tenepra men tapkamrume. Poptapnapu kunkamrume.

3Ange utopu, sun amutu kunkamrum taruda, sundi amutu nerapu ton pio men dopdankamrume. Tonda, sun Israel kaber nerapu cap, kaber neng cap tep nengeda, sundi, ‘Amutu kaber nerapu cap, kaber neng cap, tali dopdankamenge,’ tenenada, pio gume. 4Uda, ‘Sun cap amutu nesala cap dopdana gume,’ pepmasena deiyoda ake. Ada sun ner nyapu amutu nengdi dopmengopda, amutu nesaladi yuk tali keca tep, ‘Nun nai bo Allah’ tenen, si eremenga utopu, ‘Sun ner nyapu tapakrap kupmengedi, tek sisi Allah tep tapnung’ tenen, pepsene. Sun Israel nyapu cap, ner nyapu capdi, yuk tali keca tep, si erepmengopda, Allahdi sun tep, yu weik kuprepa, ila di wenepra menmena popserur tep pepsene.

5Ange tep nengeda, sun amutu bena wekmum taruda, sun nyapu cap, ner nyapu capda, yuk mutu nesala cap dodana gume. Ange gum dinin, amutu nesaladi, sun tali isok si eremengedi, domenge ati yuma cap, isok si eremna tep, gam keca popra pala gel taplakra yakeipuai yuma cap, dakrap dopkamrume. Tonda, ‘Isok aca kurure’ tenen, lyom gel tekra deipinge yuma cap, sun isok si ‘Asyera aca teng yaue’ tenen, tekra ingami lyom coda, sektapra uku dongonkamrume.

Tonda, gel di, sun isok tep nimi urasin utopu ketekepra deiya deriramenge nge cap, dakrap dopkamrume. Co di ketekepra deiami ngeda, uku dongonkamrume. Akeca-keca yuma, si eremenge keca yumada, dakrap dopkamrume. Ange utopu, tali keca si eremenge keca yumada, adipapu uruprapmumdi, uku dongopra gawal dakamrume.

6‘Tali keca si eremenge keca yuma, adipapu urupra uku dongopra gawal dakamrume,’ pepmasena deiyoda ake. Ada, sun nai bo Allah, er si Yahwehdi konum wepra deiamseua tepa. Sunda er mawa nesala cadi, yuk tali keca do, isok do, akeca-keca yuma tep, si men erepkamrume. Allah er sipu eremkamrume. Allahdi nesala mutu ban-ban yuma tep, bicau tenerur dinin, sun Israel nesala tep nengeda, ila di bicau teneseredi, sunpu tep, ‘Ne mawa nesala tek sisa,’ teneserure. Yuk nesala ton gume.” Musadi Israel nesala tep pepu.

Allahdi Israel nesala weiamu deiyonge tep, pepu upu

7Musadi Israel neng tep pepu. “Sun yuma gekepneso. Allahdi sun tep tenepra weiamseua deiyoda, ‘E Israel nesalada, sundi ban-ban yuma ila yala kununga’ tenen, men wepra deipseue. Ange gum dinin, ‘Nesala yala-yala yumada, weik dakunung dinin, Israel nesalada, tek sisa nimi metekapu kununga tep, wepkamne,’ teneramseua cadi, bicau teneramseudi wepra deipseue.

8Allahdi sun tep wepra deipseua deiyoda, ‘Sunda nimi weik kununga cadi, wepkamne,’ men teneramu dinin, deiyoda ake. Ada erdi tupa bicau teneramseudi, erdi sun apu yapu tep, ‘Ukunkamsene,’ pepra pediramseu upu tep, tupa teneredi, sun ataru kurum nesala tep wepseue. Menop taru, ‘Ukunkamne,’ pepra konum peipka tep, Mesir mutu neitamai ikin weik kuramsipa, dopra lyepseue. Mesir mutu ila deiyo ngebo Firaun, er puto weik kupudi, sun tep taleamseu. Ukuramudi, ikin pel weik, sun nong deiki deriramupa, ikin weik kuramrume. Ukupra kuramrum dinin, Allah er ila puto deiki di, doupra yaseudi lyepseue.

9Ange tep nengeda, sun adipapu moupra tenipetepmumdi, kael kepkamrume. Pio tenenkamrume. Allah er sida Yahweh, sun nai bo Allah er tenpu kurure. Yuk ton gume. Allahdi pediramu upu yumada, tek sisi kurure. Er pedisere upuda, tenpu ngeda men tamrure. Ware nesala do yuma, sundi sun kange er deikipu deipmengedi, erdi, ‘Ange kunkamrume,’ pepra, pesere upu moupra talepmenge pangeda, Allahdi sun tep tupa-tupa melimrure. Erdi sun tep, ‘Ukunkamsene,’ pepra, deriserur upu yumada, tenpunge pe men tapkamre. Yuma akunkamre.

Ato nesala tep nengeda, sundi nyapu deipmengepa, dadeipdanen, bankameng nesala dengeda, pio men nukmanto, pio weik kupbankamra peda, pio melimkamre. Sundi nyapu deipmengepa, dadeipdanen, bankameng nesala dengeda, generasi denge weik, seribu kali lipat kupbankameng nesala tep nengeda, Allahdi pio melimkamre. Men tamkamsere.

10Dinino, ware neng do yuma, sundi er tep, ‘Nun songe’ tenepmenge nesala yuma tep, pio wenemrure. Sun mali kupmengetopu, Allahdi, ‘Walito’ tenen, wenepra potamredi, anesala gawal dangrure. Ada, er tep, ‘Nun songe,’ tenenge nesala tep, men kaukepkamrure. Gume, aneng yuma sun wenemna tep nengeda, bouna di gume, menmena wenepra popredi, gawal dakamre. 11Allahda, apepmasentopu kurura tep nengeda, Allahdi, ‘Angeda kunkamrume, angeda men kunkamrume,’ pepra deipseu upu yumada, gekepra bouna di kunkamrume. Atumi di pepsene upu moupra gekepmumdi, angepu talepra dombankamrume.” Musadi, Israel nesala tep pepu.

“Allahdi pere upu gekepmumdi, bouna di er amu kuramrum pangeda, erdi sun tep telep kweipkamsere,” pepu upu

12Upepudi, aupu ton pepu. “Uda, sun nai bo Allah, er si Yahwehdi sun tep, ‘Ukunkamrume, angeda ton men kunkamrume,’ pepra pedisere upuda, men tamkamrume. Pio tupa gekeprap kupmum pangeda, Allahdi sun apu yapu tep, ‘Akeca karepkamsene,’ pediramutopu, sun peda akeca karepkamsere. Ada sun tep tek sisi tupa bicau teneserya tepa.

13Allahdi sun tep, bicau tenepseredi, sun damai akunkamsere. Tonda telep kweipseredi, akeca-keca weika di karenkamsere. Ada, sun nyapu weike karepserepa, weika di deipdanen bankamenge. Tonda, sun wa pepra kounkamrum keca, weika di melipserepa, du weika di mouprepa, kinkamrume. Uda, gandum cap, anggur tapu du cap, anggur me cap, minyak zaitun co du cap, weika di karenkamsere. Tonda, sun sapi bisam cap, domba bisam cap, kambing capda nyapu weik derinkameng. Ada Allahdi, ‘Amutu karepsenedi, akeca-keca yuma weika di karepkamsene,’ pepra, nun apu yapu tep pediramutopu, karepkuser mutu neitamai di karenkamsere.

14Akecada yuk mutu ban-ban yuma kunge nesalada, yambulanun akapmar dinin, sun Israel nesalapuda, weika di karenkamsere. Yuk mutu nesala akapmarenge utopu gume. Sunda yambul pua dinin, Israel nesala ngeda, pio weike. Ange utopu, sun nerapu yumadi, nyapu derinkamenge. You nerapu men kunkamenge. Sun nimida nyapu weik derinkamenge. Sun peirum gam kecada, domba bisam do, sapi bisam do, kambing do, akeca yuma nyapu weika di derinkamenge.

15Tonda, Allahdi sun tep, sun pon keca do, pu keca yala-yala yuma do, ‘Mali kun keca yaredi pu jepsurur’ tenen, er puto di sun tep kalekra melimkamsere. Ukupserepa, akeca yuma karenai bendopkamre. Tonda sundi dinmarumpa, Mesir mutu nesala, sun wenemna tep, sun nong deiki ila mambul pu jena deiyo keca, pirin keca deiamu ngeda, sun Israel nesala, sun damai ton pio men kunkamsere. Allahdi, ‘Ne nyapu mali keca yakarur’ tenen, kalekra melipkamser atep pepsene. Sun damai ton, kange mun keca weik men derinkamser dinin, yuk mutu nengdi, sun Israel nesala tep, ‘Anesala nun songe,’ tenenge neng tep nengeda, Allahdi, sun nong deiki akange mun keca yuma derinkamre ja,” Musadi Israel nesala tep pepu.

Allahdi, “Mali kunge nesala yuma popkamrume,” pepu upu

16Musadi, Israel neng tep aupu ton pepu.

Uda, Allahdi sun tep er puto sun deiki deipserepa, sun wengbenkurum mutu, yuk mutu nesala porbenkumum dingeda, anesala yuma portamumdi, gawal dangkamrume. Amutu nesala tep, bicau tenepra tamna gume. Tonda, sun isok si eremenge keca yumada, tenena gume. Akeca si men erepkamrume. Ukupmumnyopda, pena youramretopu kupkamsere.

17Yuk taruda sundi anesala tep, ‘Uo, nunda yambul gung cadi, nun puto bounpu kunup dinin, sunda denge weika di kununga tep, ware kupra poptaptepedi, sun keca doproptepe do? Gume, angeda tek sisi men kuptepe,’ tenena gume. ‘Tek sisi amutu yuma dopronkamepe,’ tenenkamrume. 18Sundi amutu kunge nesala tep, kware dangna gume. Sundi dirarumpa, Mesir mutu ila deiyo ngebo Firaun cap, er nyapu yuma cap, sun wenemna tep, Allahdi aneng yuma poptamu ngeda, angepu pio tenimkamrume.

19Ada, sun pe asuru di diramrume. Allahdi Mesir mutu neitamai, sun Mesir mutu neng tep, pirin keca ila di kareramupa, nun apu yapu tep loptapi. Allahdi ukuramnga deiki di, daluprapseudi, doupra amutu duyanamseua tep, angetopu ka di ton cap kunkamre. Ada, ‘Allah er putoda, ila mambule, er dipapu apel donmasere, tenenkameng’ tenen, nimi men kupmanto pel cap, kunupsek pen pel doramunge cap, pio mambul pu deiyo keca karepunge cap, er puto deiki di ikin keca weik, Mesir mutu nesala sun nong deiki deriramu. Ange yuma deiki di, Allah er puto deiki di sun Israel nesala daluprapseudi, doupra yanamseue. Atep yuk mutu nesala tep nengeda, kware men tenenkamrume. Abenkamrum mutu neng tep, ‘Nun kware,’ tenepmarum dinin, sun nai bo Allah er si Yahwehdi, ato pel dopredi, anesala tep wenepra popkamre.

20Angepu gum dinin, Allah er si Yahwehdi, er yu weike kuprepa, ‘Anesala wenepra popkune,’ tenepre pangeda, adipapu sundi, ‘Uo popsenunge’ tenen, sepdaro yuk mutu bena iniptenga peda, men kupmanto. Ukupmanto ngeda, inipmangepane, mong yaredi, toprepa, men inipmanto kuramengtopu, Allahda, pona deiyo ngebo kurura cadi, Allahdi aneng tep tek sisi poprepa depkamenge. 21Ange tep, sundi yuk mutu-mutu yuma kunge nesala tep, epmumdi kware kupserepa, yo moropsemna gume. Sun nai bo Allah Yahwehda, sun kan-kan akuredi ila puto cap, ila mambul ngebo kurura cadi, sun kwar dangna gume. Allah erda ila mambul puto ngebo. Erda akeca-keca yuma talepra kurur ngebo tep, nimi tuai neng yumadi, er tep, kware kununge.

22Tonda mutu-mutu yuma kunge nesalada, Allah er melimserya deiki di, sundi metek, meteka dipapu, amutu nesala domdongonkamrume. Adipapu tenpu taru dipapu, sun yuma men poptapra gawal dangkamrume. Ukupmumnyopda, amutu tali bura tara gam kuramre keca yumadi, sun damai weike kupkamre. Dana-dana tara nimi gum kupyopda, bura tara keca di popmanto kupserura tepa. 23Allahdi sun podan neng tep, kange tenimtona deiyo keca weike karere pangeda, sun telep kupra men tenipmanto kupkamenge. Ukupra er melimserya deiki di, sundi aneng yuma poptapkamrume.

24Yuk mutu nesala, sun ila deiyo nengda, Allahdi aneng dopra sun tep karepserepa, popkamrume. Anengda, im iriamu tara, tuai mutu neitamai yumada, sun si tenpu ton pio men kupkamre. Tenpu ngebo pe ton, sun tep men popbisipsetue. Sun yumada gam men kunkamenge. Aila neng yuma popra gawal dakamrume. Musadi Israel nesala tep pepu.

Amutu neng, sun isok si eremamya tep, pepu upu

25Musadi, Israel nesala tep pepu. “Amutu neitamai, tali keca dopra nimi urasin utopu petupra, ‘Nun nai bo ake, aisok si eremkamepe,’ peprap, si eremenge keca yumada, uku dongoprapmumpa, uku jere pangeda, gawal dakamre. Sun nimi urasin utopu kupra, petupra ketekemdenge keca, uku jepropre pangeda, akeca deiki kwamu emas cap, perak cap tep, sun ton putapserepa, dorona pio gume. ‘Akeca ton dopropmumnyopda, mali kupmumpa, pena youramretopu kupserur’ tenen, pepsene. Akeca yumada, sun nai bo Allah, Yahwehdi, ‘Isok si eremnada, ne pio songe’ tenerure. Atep, akeca yuma uku dongonkamrume.

26Ange utopu ton, ware keca do yuma, Allah dingeda, ‘Akecada ne songe,’ tenerur keca yumada, isok si eremna keca pe, yuk mali keca peda, sun ati neitamai pio men derinkamrume. Akecada, Allah er kangeda, ‘Ne songe,’ tenerura cadi, akeca tep wenepra gum kupra deipkamre. Ange utopu, sundi, ‘Nun peda wenepra popserur,’ tenena tep, amali keca yuma dopra, sun ati pum dekana pio meme. Adipapu uku dongopmumpa, uku jepropkamre.” Musadi Israel nesala tep pepu.