Deu 8 | XteSC | STEP | Musadi, Israel nesala tep pepu. “Allahdi, ‘Angeda kunkamrume, angeda men kunkamrume,’ pepra deipseu upu yumada, gekepra bouna di kunkamrume. Atumi di pepsen upu moupra gekepmumdi, angepu talepra dombankamrume. Ukupmum pangeda, Allahdi sun tep telep kweipkamsere. Ukupserepa, gam pio kunkamrume. Ukupmum dingeda, weika di deiprap tapakbamumpa, sun nyapu pio weik kunkamenge. Tonda, Allahdi sun apu yapu tep, ‘Ukupu mutu karepkamsene,’ pepra pediramu mutupu, bena talepra kunkamrume.” Sun nai bo Allah, Yahwehdi upu peipseu.

Deuteronomy 8

‘Sun nai bo Allahdi, weika di meliamseu ngeda, tupa tenenkamrume’ tenen, pepu upu

1 Musadi, Israel nesala tep pepu. “Allahdi, ‘Angeda kunkamrume, angeda men kunkamrume,’ pepra deipseu upu yumada, gekepra bouna di kunkamrume. Atumi di pepsen upu moupra gekepmumdi, angepu talepra dombankamrume. Ukupmum pangeda, Allahdi sun tep telep kweipkamsere. Ukupserepa, gam pio kunkamrume. Ukupmum dingeda, weika di deiprap tapakbamumpa, sun nyapu pio weik kunkamenge. Tonda, Allahdi sun apu yapu tep, ‘Ukupu mutu karepkamsene,’ pepra pediramu mutupu, bena talepra kunkamrume.” Sun nai bo Allah, Yahwehdi upu peipseu.

2 Moupra tenenkamrume. Allah er si Yahwehdi keteng tamun denge weik, empat puluh tahun deiki di, me pio gum mutu, katuai mutu bisi, Allahdi melipra duyakaramseunge yumada, lumdongona gume. Allahdi sun tep, ‘Sun kange dipru bouna di kunkameng’ tenen, ikin keca kareramseu. Ukuramseunge deiyoda ake. Ada Allahdi, ‘Sun kange dipru neitamaida, ware tenenung do? Sun dipru neitamaida, nedi, “Angeda kunkamrume, angeda men kunkamrume,” pepra peipsi upu, tek sisi talepra kunkameng do, gum do?’ tenena tep, kurpeteramseu.

3 Tonda Allahdi sun tep, kurpetena tep kareramseupa jen putaramseue. Ukuramseupa, Allahdi ka tamupra im deiki di, mana kwaneng karepupa jeramrume. Akwanengda, sun apu yapu cap, sun cap men diramrume. Allahdi kuramu ngeda, sun kael kemna tep peteremamseu. Deiyoda, ‘Nimi yuma tuai kwanengpu jeramenga deiki di, gam men kunkamenge. Allah pesere upu deiki di gam kunkamepe,’ tenepra, ‘Kael kepkamnung’ tenen, Allahdi kurpeteramseu.

4 Tonda, sun keteng tamun denge weik, empat puluh (40) tahun deiki di yakaramrum taruda, sun opkal ton pio men mali kwamseu. Tonda, sun yane ton pio men neramseu. Ange yuma peda, Allah dipapu melipra kuramseue. 5 Moupra tenipso. Sun kaele cadi, sundi moupra tenipkamrume. Nun nai yapudi sun nyapu tep, mouprap peteremsengepa, mali kupmepyopda, wenemamseng utopu, nun nai Allah, er si Yahwehdi moupra peteremserur dinin, mali kupmepyoda, wenemserure. Musadi Israel nesala tep pepu.

Pio telep mutu tep, lap pepu upu

6 Musadi pepu, “Allahdi, ‘Angeda kunkamrume, angeda men kunkamrume,’ pepra pedisere upu, moupra talepmumdi kunkamrume. Tonda, Allah er si Yahwehdi peseretopu, angepu kunkamrume. Ukupmumnyopda, Allah er tep, gispal dopra, ‘Uo Allahda ila mambule’ tenen, er sipu eremkamrume. 7 Angeda tali tep gume. Deiyoda, Allahdi tu telep mutu doupra benkamsere. Amutuda yo me embaramre me cap, bungna me cap, tu pumbon di bungamre me cap, mokon cap, mutu gel bon di bungamre me cap, ayumada weike akurure. Ada ila mutu neitamai cap, ban mutu neitamai cap, tonda yambul mutu buma neitamai cap me weike akurure.

8 Amutu neitamai kwamre kecada, beras cap, gandum cap, akeca yala-yala yuma akurure. Tonda, anggur tapu du cap, kwarang du cap, delima co du cap, zaitun co du cap, mong mokon cap, ayuma pio akapkamre.

9 Amutu neitamaida, kwaneng pio men putapkamsere. Sun putapseretopu jenkamrume. Ton gum men kupkamsere. Amutu neitamaida, tu pumbon palipmum dingeda, gel neitamai cap, mutu buma neitamai capda, palipmum pangeda, gat kunumna weik keca er sida tembaga cap, besi cap akapu atep, sundi akeca palipra doronkamrume. 10 Sundi akeca-keca yuma dopra jemum dingeda, upenkamrume. ‘Allah kan si Yahwehdi telep tuai karepsemume,’ pepra, sun kange deiprap, Allah tep, “Telepe,” penkamrume.” Musadi Israel nesala tep pepu.

“Telep keca yumada, Allah er dipu kareserur atep, lumdongona gume,” pepu upu

11 Musadi Israel nesala tep pepu.

Sunda lumdongona gume. Sun nai Allah, er sida Yahweh tep, pio tenenapu kunkamrume. Tonda Allahdi, ‘Angeda kunkamrume, angeda men kunkamrume,’ pepra pedisere upuda, ‘Luprorum’ tenen, pepsene. Allahdi pesere upu, atumi di pepmasenge yumada, tenpu pe ton men tamkamrume, pio tenepra kunkamrume.

12 Gum dingeda, sun kange dipru erepra pio gemenapu kumumdi, sun nai bo Allahdi persere upuda, lumdongonkamrume. Uda, ware telep kun keca yumada, telep kweipseryopda, ‘E, nunda telep neng kunupe,’ tenena gume. Tonda, sun nai bo Allah tep, lumdongona gume. Uda, ange utopu, sun jen keca jepmumpa konum boupseredi, munduai kupsere pangeda, sun telep ati dopra mankamrume. 13 Tonda, sun sapi cap, domba cap, kambing cap, nyapu deipmengepa, weik kupbankamre. Tonda sun kunumna weik gat keca, emas cap, perak cap tapakra weik kupbankamsernge cap, tonda sun talenkamrum keca yala-yala yuma pio tapakbankamsere. Ukupsere pangeda, sun nai bo Allah tep, pio lumdongona gume.

14 Akeca-keca yuma telep kupsere pangeda, sun kange dipru erepra gemena pio gume. Ange gum dinin, ‘Nun nai Allah lupronup’ tenen, moupra kalekdamumdi, bouna di kunkamrume. Gum dingeda, sun dipru erepdamumdi, ‘Nunda pio telep nesala,’ tenepmumnyopda, sun nai Allah lupronkamrume. Ada Mesir mutu kuramrum taruda, ikin pel weik sun nong deiki deriramipa, tali pelpu dopra, kange mun kange doupra kuramrumpane, Allahdi lyepseue. Atep, sundi pio tenenkamrume, ‘Nun nai Allah, er si Yahwehdi lyepra duyanamseue,’ tenepra pio kunkamrume. Er tep, lumdongona pio gume.

15 Tonda Allahdi meliamseua deiki di, me cap, nimi cap, pio men kwamu mutu neitamai di doupra yakaramseu. Amutu neitamai yakaramrum taruda, nimi pon bal cap, nimi si toramre sul po cap, akwamu dinin, Allah meliamseupa si men toramseupa, teleppu embaramrume. Tonda ukupra embaramrum taruda, amutu neitamaida, me pio men kwamu dinin, Allah er puto deiki di, gat gel neitamai di, me bukra sakupa, jenmarumpane bouamseue.

16 Tonda, amutu neitamaida, wa cap, jen keca cap men kwamu dinin, Allah er puto deiki, im deiki di mana kwaneng kareramseupa jeramrume. Akwanengda, sun apu yapu pe, sun peda men kael keamrume. Allahdi akeca-keca yuma, ikin nge pe, telepnge peda, kareramseua deiyoda, ‘Kurpetepnepa, sun dipru boun kuprepane, telep kweipkamsene’ tenen, sun tep telep kudiramseu. 17 Ange tep nengeda, akeca-keca yuma telep kupseryopda, sun dipru erepdamumdi, ‘E nun pe puto cap, ila kael keamupunge cap di, atelep keca yala-yala yuma weik kupsere. Ada nun deiki dia,’ tenena pio gume.

18 Ange gum dinin, moupra tenepkamrume. Allah er pedipapu menmena gonga kepra, ila kael kemna deiyo keca kareserepa, adeiki dipu isomka keca talepra kunupe. Nun pe puto dipapu gume. Atep, sun nai Allah, er si Yahweh tep pio tenenapu kunkamrume. Allahdi, pumun taru di dipra, ataru peda pio ketenepra melimseretopu, pio karepbankamsere. Ada sun apu yapu tep, ‘Sun cap, ne cap, telep kupra kikiman kunkamep’ tenen, ‘Ukunkamsene,’ pepra pediramseu upu utopu, sun ataru kurum nesala tep melipra karenkamsere. Musadi Israel nesala tep pepu.

“Sun nai Allah lupromumdi, er tep men tenepmumnyopda ikin kunkamsere,” pepu upu

19 Musadi Israel nesala tep pepu. “Uda gekepneso. Sundi sun nai Allah er si Yahweh tep, tali kange doupra, lumdongona gume. Er tep pio men tenipmumnyopda, sundi ka tamupra yuk tali keca tep, ‘Nun nai bo,’ pepra, akeca si erepmumdi, akeca damai gutam tu dipdongoprapmumdi, er sipu erepra gispal domumngopda, ikin weik kupkamsere. Ada, sundi tali keca si tamupra erembemumnyopda, Allahdi sun tep, ila di wenepra poptapserepa, depmumdi sun nong gum kupkamsere.

20 Apepmasenada, sun diramrumpane, Allah er si Yahwehdi yuk-yuk mutu nesala popudi, gum kupra deiamutopu, ‘Sun peda er tep taprumnyopda, Allahdi popserur’ tenen, pepsene. Ada, tali tep gum dinin, er Allah tep lupropmumdi, yuk keca si erepmumnyopda, wenepra poptapkamsere. Atep, bouna di kumumdi, Allah er si Yahweh teppu erepra, er pesere upupu gekenkamrume.” Musadi Israel nesala tep pepu.