Deuteronomy 9

Israel nesaladi, ‘Kanaan mutu wengbenkameng’ tenen, pepu upu

1Musadi Israel nesala tep pepu. “Uo Israel nesalao, moupra gekepso. Ukutaruda, sun Yordan me gopra ortara mutu, Kanaan mutu wengbenkamrume. Amutu neitamaida, nimi yala-yala weik puto di talepra kununge. Amutu nengda, sun nesala denge weik kungedi, sun puto pio weik dinin, sun Israel nesalada gung cap, puto capda, yambul pua. Tonda, sun wengbenkamrum mutuda, ila kota men di ketenepra domidi akota kununge. Sun ila kota damaida, gel di ila lyom beilya wipra, ongopgenepra domidi wiami beilyada, im bepmanto kurura cadi, tali lupra kanam dipu men wektume. Ukurur dinino, sundi amutu kunge nesalada, bisbisa kapra dokotepmumdi, sun mutu talepra bena kunkamrume.

2Amutu neitamai tenpu yala nesala, sun sida Anakim nesala. Yuk nengdi sun Anakim nesala tep, upu peipipa, sun konum kael keamrume. Ada, sun nongda ila lyom neng kununga tep, yuk neng yumadi sun Anakim nesala teppu penunge. ‘Uo, anengda ware nesaladi sun tep bisiptenge do? Men kupmanto,’ penunge.

3Ukupra penung dinin, ukutaruda kange di tenipetepso. Sun nai Allah, er si Yahwehdi er mepra baredi, ila uku bu jeramretopu kuredi, sun dinmarumupa, Allahdi anesala yuma tep popbarepa, sun yuma ali weik kupmengepane, popra gawal dakyopda, aneng doupra, sun Israel nesala amutara deipkamre. Allahdi ukuramre taru neitamaida, sundi Anakim nesala tep, menmena bisbisa kapra ponkamrume. Anakim nesala bisbisa kapra popmum dingeda, aneng kan-kan dinin, ton nengda, Kanaan mutu neitamai di dokotepkamrume. Ton nengda popra gawal dangkamrume. Ayumada, Allahdi menmena taru peiamseutopu kupkamre.” Musadi Israel nesala tep pepu.

4Upepudi, aupu ton dukdongopra pepu. “Allahdi Anakim nesala popra dokotepre pangeda, sundi, ‘Uda, nun pio telep kupra dumsisipu kunupa tep, Allahdi melipmaserpa, amali neng bendopmangpa, ukutaru nundi telep mutu talepra kunkamepe,’ tenerume. Ada sun dipru eremdanapu kuruma tep pepsene. Tek sisi ngeda, sun telep neng tep gume. Sun yala yuk-yuk nesalada, pio mali nesala kununga tep nengeda, ‘Allahdi bisbisa kapredi, amutu neitamai di dokotepkamre’ tenen, lap pepsene.

5Tek sisi sun dumsisi kuna cap, sun kange dipru telep tenena cap tep, Allahdi amutu nesala men popbisiprepa, sun mutu bena men talepra kunkamrume. ‘Nunda telep neng cadi, Allahdi amutu karepsere,’ tenena gume. Allahdi ukunkamrada, sun tep gume. Allahdi amutu nesala dokotepkamra deiyoda ake. Ada amutu nesaladi mali-mali kun keca weika di kunga tep, Allahdi melipserepa, sundi anesala popra dokotepmumdi, amutu bena wekamrume. Tonda, Allahdi ukunkamra deiyo ton ake. Ada Allahdi sun apu yapu Abraham cap, Isak cap, Yakub cap tep, Allahdi, ‘Ukunkamsene,’ pepra peiamu upu peipka utopu kupkamra tepa. Amutu karepkamsera deiyoda, ange pua.

6Ange tep nengeda, sun tenipetepra kael kepso. Sundi dumsisi kuna cap, sun kange dipru telep tenena cap tep, Allahdi amutu nesala men popbisiprepa, sun mutu men talepra kunkamrume. Ange tenena gume. Ada men kupmanto. Tek sisi, sun Israel nesalada, balila nesala kuruma tepa.” Musadi Israel nesala tep pepu.

Horeb mutu neitamai Israel nesala balila kupra, mali kuraminge tep, pepu upu

7Musadi Israel nesala tep pepu.

Sunda lumdongona gume. Tupa tenimkamrume. Mesir mutu di tapra yakaramrumdi, nimi gum mutu neitamai embaramrumdi, Yordan me damai yana, keteng yakaramre tara, tupa kuramrum taru yumada, balila kupra mali-mali kuramrumdi, Allah er si Yahweh tep gompeteramrumpa, sun tep dabal kupupa, er yu weik kuramu. Ataruda, Musa Yordan me ortara tapra, Yordan me goupra keteng wengbaramre tara kapul men benamrum tara tep pepne. Sundi Allah er si Yahweh, er upu yaniptapra, balila kuramseupa, sun dipru eremdaramumdi, er upu men gekeramrume.

8Tonda, sun Sinai mutu kunmarum taruda, Allah tep mali kupruma tep, dabal kupupa, derepseue. Allahdi sun tep, yu kupupa, ‘Anesala wenepra popkun do?’ tenepu dinin, men popra gawal dakseue. 9Tonda, neda Sinai mutu deiki welepsidi, Allah cap kuramnumudi, erdi ‘Israel cap, ne cap kikiman kuna tep, anesala ukunkamenge, angeda men kunkamenge,’ pepra pediramneudi, butene gel pala deiki aupu sekra karepneu. Aupu dopropsi taruda, ue denge dumbari 40 tumi cap, 40 lukunda cap, Sinai mutu deiki pio kuramsi. Ukuramsi taruda, kwaneng cap, me cap pio men jeramsi. Mesumpu kuramsi.

10Uda, Sinai mutu deiki kuramsi taruda, Allah er upu, er pe buru deiki di, butene gel pala deiki sekrapudi karepneue. Agel pala butene deiki sekeiamseuada, Sinai mutu amutara bulupra diramrumpa, ila uku bu jenmaua kan-kan di peiamseu upu pua, yuk upu gume. Allahdi, ‘Angeda kunkamrume, angeda ton men kunkamrume,’ pepra deiamseue. 11Amutu deiki kuramsanen, ue denge dumbari 40 lukunda cap, 40 komuni cap konum kupupa, Allah er si Yahwehdi arup pepmasen upu, gel pala butene deiki sekeipmaunge dopra karepneue. Abutene gel pala deiki erdi, ‘Sun cap, ne cap kikiman kuna tep, angeda ukunkamrume, tonda angeda men kunkamrume,’ pepra sekeiamseue.

12Aupu karepneudi, upepneu. Ataru dipu kan menmena kwereprume. Sun Israel nesala, Mesir mutu kuramipa doupra yanamum nesala yumadi, ne upu tapidi pio mali kweipdanmange. Nedi, ‘Angeda kunkamrume, angeda men kunkamrume,’ pepra deipsi upu, menmena konum tapmangdi, gat keca dopropidi, sapi bisam urasin utopu keca petupra deipmaidi, atali keca tep, ‘Nun nai bo,’ pepra si eremnunge.

13Tonda, Allahdi pepnue. “Kandi deiamum nesala, kunge keca konum menop taru diramsidi, tupa dinedi kael kemnune. Anesala dipru gat deiki, pio balila kununge. 14Ukununga tep, kanda mepra ortara bemempa, ne Allahdi Israel nesala popra gawal daknedi, gum kupra deipkamne. Ukupnyopda, sun si kiliptapnepa, doryankamre taru neitamai kunkameng nesaladi, sun si ton tupa men tenimkamenge. Im iriamu tara ton yuk nesala, sun si men tenimkamenge. Dinino, kan Musapuda, dopropnedi, telep kweipkenepa, nyapu deipmempa, dadeipdanen, bankameng nesalada, pio weik kupkamengedi, puto weik kupkamenge. Israel nesalapuda, sunda metekanunpu kungedi, sun putoda yambulanunpu kunkamenge.” Allahdi upepneu, Musadi pepu.

15Upepu dingeda, aupu ton pepu.

Allahdi aupu pepneua tep nengeda, uku bu tupa jeramu mutu deiki di, tamupra kwerepsi. Kwerepsi taruda, Allahdi butene gel pala deiki sekeipudi karepneupa, buru doupra kwerepsi. 16Kwerepsidi, dinmasisipa, sundi Allah si yaniramrumdi, sundi tali keca sapi bisam mi, er urasin utopu kupra keteneiprumdi, gat keca di petupra deamrumdi, ‘Nun nai bo,’ pepra si erepramrume. Ukupra kuramrumpa, kael kepsisi. Sunda menmena di, Allahdi, ‘Angeda kunkamrume, angeda men kunkamrume,’ pepra, peterepseunge yuma tapra, yuk bisi bena mali kuramrume.

17Ange tep nengeda, nedi balila deiprapsidi, nedi sun dinmarumai di, Allah pedina upu gel pala butene deiki kwamu ngeda, ne buru butene puto di talepra, tuai tapsipa, olokudi metek kepra sikna buktapu. 18Ukupupa, nedi nun nai Allah damai gutam tu dipdongoprapsidi, menop taru kupsitopu, u denge weik dumbari, 40 tumi cap, 40 lukunda capda, jene cap, me cap, pio men jeramsi. Ukupsinge deiyoda, Allahdi, ‘Amali kunada, ne songe,’ tenerur keca dinin, sundi mali weike kupra kuramrumpa, Allah epseudi er kange yu weike kuramseua tep kupsi.

19Ataruda, Allah yu weik kupupa, sun wenepra popra gawal dakmanto kupseu. Ukupseupa epsidi, ne pio kware weik kupneupa, yo moropsepneu. Ada, ‘Uo, Allahdi Israel nesala poptapkamar do?’ tenen, kupneu. Ukupneu dinin, sun melimna tep, Allah moropsipa gekepneu. 20Tonda, atarupuda, Allahdi Harun tep ila di derepka cadi, popmanto kupupa, ‘Harun poprur’ tenen, nedi er tep Allah moropsipa gekepneu.

21Ukupsi dingeda, sundi sapi mi urasin utopu keca ketekepra deiamrumdi, si eremamrum kecada, doprapsidi uku dongopsipa, nonge yuma uku jepropudi, dopra taiksipa, sikke buktapu. Sikke buktapkopda, nedi asikke but doprapsidi, amutu embaramu me pumbon dongopsipa, dubeudi, gum kupu. 22Angepu gum dinin, yuk taruda, Tebera mutu cap, Masa mutu cap, Kibrot-Tawa mutu cap, sundi mali kuramrumpa, Allah er si Yahwehdi sun tep yu kupu.

23Ange utopu, Allahdi, ‘Mutu si Kades-Barnea mutu tapra, ukupu karepkamsen mutupu bena kunkamrume,’ pepseu dinin, upeiamseu upu yuma tep, sundi, ‘Nun song,’ tenepra, tonda, ‘Allahdi melimkamsere’ tenen, teka men tenereamrumdi, er upu tapra, pio men gekeramrume. 24Atep nengeda, nedi pepsene. Menmena taru di gonga kepra, balila kuprepa, Allah er si Yahweh tep, tupa-tupa gekena gum di, kurpeteramrumpa, ne konum kael keamsisi. Musadi Israel nesala tep wenepra pepu.

‘Yuk mutu nesaladi, Allah tep mali upu pepra nyek-nyek pepnung’ tenen, Musadi Allah moropua tep, pepu upu

25Musadi Israel nesala tep pepu.

Uda sundi Sinai mutu damai mali-mali kuramrumpa, ataruda Allahdi yu kupupa, ‘Sun popkune,’ pepseupa, gekepsidi, ne Musadi ue denge dumbari, 40 tumi cap, 40 lukunda cap Allah dinmanuai, Allah er gispal dona tep, tuai deiki maramsidi, sun tep Allah pio mororamsisi. 26Ne Musadi Allah moropsi upuda ake. “Uo ne nai Allah, kanda akeca-keca yuma talememdi, pio Ila Eremna Ngebo, kanpu kuruma cadi, kandi, ‘Ukupkamne,’ tenerumtopu kurume. Kanda Yahwehdi akeca-keca yuma ila puto deiki di kurum dinin, kandi wepra deiamum nesala, ‘Ne mawa nesala,’ pepra weiamum nesala, Israel neng tep moropkene. Ada, ‘Kandi, aneng men popkurum’ tenen, moropkene. Kandi, ‘Anesalada, ne mawa nesala kunkameng’ tenen, Mesir mutu neitamai di doupra, kan ila puto deiki di lyepra yakaramum nesalada, men popkamreme, naio.”

27“Tonda naio. Kandi Allah anuamumpa, kan si erepra kan amutara kurami neng, nun apu yapu Abraham cap, Isak cap, Yakub cap tep, anengpu tenenkamrume. Sunpu tep tenepmemdi, ataru kunge nesala, sun mali kuna cap, dipru eremna cap, balila kuna cap yumada, pio men tenimkamrume. Sun kamoda, balila nesala kunung dinin, ‘Angeda kaukepkamrum’ tenen, moropkene naio.”

28Gum dingeda, Mesir mutu nesaladi, upenkamsenge. “Uda diso, Allahda, ‘Israel nesala telep mutu debenkamne,’ pepra debaramnganen, er puto gum tep men kupmanto kupupa, nimi gum mutu neitamai bena popkamare. Erdi sun tep, ‘Ne song,’ konum tenerura tepa.” Uda naio, ‘Sun Mesir mutu nesaladi upepsenung’ tenena tep, moropkene. Deiyoda, ‘Mali nengdi, kan si tep mali-mali penkamkeng’ tenen, upepra moropkene.

29“Naio, Israel nesalada, kandi pio tenipkurume. Allah kandi, ‘Ne nyapu kunkamenge. Ne mawa nesala pio kunkamenge’ tenen, weiamumdi, Mesir mutu neitamai, kan puto deiki di doupra yanamume. Atep, ‘Aneng pio men popkamrume’ tenen, moropkene.” Ne Musadi Allah tep moropsi.

“Upepra moropsa cadi, ataruda ne Musadi sun Israel nesala tep, aupu lap pepsene. Aupu peprapsidi, Allah tep mororamsisi.” Musadi Israel nesala tep lap pepu.