Ecc 1 | XteSC | STEP | Abuku neitamai kapu upuda, ila kael keamudi, moupra tenena ngebo, Peteremna Deiyo Ngebo, Raja Dauddi deiamu ngebo, kuramu. Angeboda, er nai bo Daud tep, yo punuprapudi, ila ati arum kota Yerusalem talepra, Raja kepu ngebodi pepu.

Ecclesiastes 1

Ila kael keamu ngebo, Peteremna Deiyo Ngebodi teneamunge tep, pepu upu

1 Abuku neitamai kapu upuda, ila kael keamudi, moupra tenena ngebo, Peteremna Deiyo ^{▼▼Peteremna Deiyo Ngebo – Abuku seku deiyo ngeboda, nunda yambulanun walwal kunupe. Dinino, Ibrani upu ila di kael keami deiyo nengdi, ‘Raja Daud, er mi Salomodi, abuku sekra deiamu,’ tenepmengedi penunge. Tonda, Ibrani upu deiki di, ‘Quohelet’ seki. Angeboda, nun walwale dinino, Ibrani upu ali besar, ila kael nengdi, ‘Ada Salomo tep, aupu seki,’ pepra, peterepra penunge.} Ngebo, Raja Dauddi deiamu ngebo, kuramu. Angeboda, er nai bo Daud tep, yo punuprapudi, ila ati arum kota Yerusalem talepra, Raja kepu ngebodi pepu. 2 Peteremna Deiyo Ngebodi, er pe kange deiki dipapu aupu pepu. “Ware upu do, ware kun keca do yumada, keana kecapu kurura cadi, er nong deiyo neitamainge ton pio men kupmasera cadi, ange yumada tali keca pua,’ teneptepe. Erdi, ‘Ware keca do yuma, tuai nengdi kunge keca cap, tenenung keca capda, deiyo neitamainge ton pio men kupkamsera cadi, keana kecapu kurura cadi, ange yumada tali keca pua,’ teneptepe,’ tenepudi pepu. Tonda, ‘Nun gam kunupada, tali tepapu kunupe, ayumada, deiyo neitamainge ton, men kupkamra cadi, akeana tep kunup keca yumada, tali keca pua,” pepu.

3 “Ukupmantoda, nun tuai kunup nesala yumada, tupa gam kunup taru neitamai yumada, keteng komuni neitamai yuma, ikin pel donupa deiki di, nun puto yumada, tali tepapu tamnupe. Dinino, nun pel doramepenge tep, wareto keca doproptepya deiki di, telep kweipsetu do? ‘Pel ton dopnepa, nong telep keca dopropkamne,’ tenepe ngeda, dan do? Gume, ange yuma deiki di telep kweipsetu kecada men kwapmare,” pepu. 4 Tonda, ‘Nimi kunange tep nengeda, tenpu taru neitamai deipdanen yakarami nesala ton nepra kunmange pangeda, ton deipdanen bangepa, kunkameng neng peda, sundi ton gum kudorure. Dinino, tuai mutuda, pio tep utopu tupa akapkamre,’ tenepudi pepu.

5 Tonda ketengda, tumi-tumi yuma tupa tengyakarure. Ange utopu, ketengda tumi-tumi yuma tupa dangbarure. Ne kangeda, ‘Keteng erda, meneng abisipu tupa-tupa tamupra yanapna, sepdaro ortara benapna kemdoredi, pio dabal kurure,’ tenepudi pepu. 6 Tonda, kumanya utopu kurure. Kumda pung pepredi, doupra iknapi tara, (arah selatan) tara barure. Atara di kepra beredi, ka tamupra dapu tanada (arah utara) bena kange di belerure. Abisipu pio benmaryane, yanmaryane, ayanap, orbenap kemdoredi, meneng bisipu tamotorure. Tumi-tumi yumada, atara di, ortara ton embaryopda, akonuma.

7 Ange utopu ton, ila embaramre me yumada, popredi doupra, beredi ila laut mokonpu dongoprepa, derirbarure. Dinino, me mokon derirbarurai ila laut mokonda, ame di men diningselangrure. Me pu tara di, oprabaredi, dopra me dari tarapu embaredi, tupa-tupa me meneng bisipu tamutorure. 8 Uo, ware keca do yuma, akeca yala-yala yumada, utopu kuredi dabal kuserure. Ada, dabal kuserur ngeda, nundi men nukra kael kepmanto, tonda men pepmanto kuserure. Tonda, nun asuru di tupa-tupa angepu dipedi, amenda taru dabal weik kuserure. Utopu tonda, nun amol di tupa-tupa angepu gekepmepedi, nun dabal weik kuserure.

9 Ware keca ton, konum kuprepa akuamyopda, akecapu, angeda ton cap kange di tamupra kupkamrure. Tonda, ware keca ton kuamepyopda, kange di akecapu ton cap tamupra kunupe. Atuai mutu neitamaida, men di kuamre kecapu, kange di tamupra kurure. Nimidi kapul men kurami keca cap, kapul men diramidi, men gerkerami keca capda, ton pio men kurure. Keteng amutara kuramre keca yumada, men di akwamu, tonda amenda taru peda utopu akupkamre ja!

10 Sun moupra tenipetepso! Ton tara nengdi, “Sun beta dipetepso! Ada ukupu keca aca akupmara cadi, diryaso!” peptenga peda, teka men tenepkamrume. Gume, akurur keca yumada, nun kapul men deiamsei taru di, konum kuamu kecapu dinin, ukutaru di tamupra kurure, tenepne. 11 Tonda, pio men taru di gam kurami nesalada, ukutaru kunge nimidi, ton tamupra, anesala tep tupa men tenenunge. Ange utopu, dortaru kunmange nengda, sun kunkameng taru dinin, dordi, amenda taru ton kunkameng neng dadi, anesala ton tupa men tenenkamenge. Nimi cap, akwapre keca cap, nimidi kunge keca cap yumada, doryankamre taru kunkameng nesala yumada, ‘Ange kwamu ngeda, ton ace,’ pio men tenepkamenge. ‘Nimidi akeca-keca yumada, lumdongonapu kunupe.’ Ila kael keamu Peteremna Deiyo Ngebodi pepu.

Moupra tenena ngebo, Peteremna Deiyo Ngeboda, er kuramunge tep, lap pepu upu

12 Peteremna Deiyo Ngebodi pepu.

Neda pio moupra tenepnedi, Peteremna Deiyo Ngebo kunune. Nedi sun Israel nesala yuma tep, nimi deiyo ngebo Raja keprapsidi, ila ati arum Yerusalem mutu neitamai talepra kunune. 13 Neda, sun Raja ngebo kuramsi taru yuma neitamaida, tuai mutu neitamai akurur keca yala yumada, pio moupra dipetepnedi, ila kael keamsa deiki di, ange yuma deiyoda, pio beta kael kepkamne,’ tenepsi. Allahdi nun tuai nesala yuma tep, ‘Ukupra moupra dipetepmengedi, akeca-keca yuma deiyo ngeda, kael kepetepkameng’ tenen, ‘Ketenepra deipseu ngeda, tek sisi kange mun kange doupra kuna ngepu kareamseue,’ tenepne. 14 Nedi nun tuai mutu nesala yala yuma kunup ngeda, pio moupra dinune. Ne kangeda, nundi akunupnge yumada, tek sisi tali tepapu kunupe. Ada ukupmantoda, kum pung pepra emberepa, nimidi ‘Kumanya pung peramrenge taleptepe’ tenen, sepdaro ayanap, orbenap pirirameng utopu kunupe. Deiyo guma tep, tali-talipu kunupe.

15 Ukupmanto ngeda, pepsene. Ada, gwaliamre ngeda, tamupra men dumsisiktepe. Tonda, suktalerur nge cap, gum kwamtunge capda, tamupra eprapnedi, men nuktepe. Ada men kupmanto. 16 Ne kange neitamai di upepdasi. ‘Gume, kael kemna deiyo ngeda, weika di konum kael kepsi. Tonda nedi konum kael kepra tenepsi ngeda, men taru Yerusalem mutu talepra kurami nimi deiyo nengda, ange utopu men kael kemami. Sunda yambulpu kael kemami. Dinino, ne puda weika di kael kepsi. Tonda, neda ila kael kemna deiyo keca cap, ‘Telep kuna ngeda ake,’ tenenange cap, ange dopropsa deiki di weik kael kemnune,’ tenenune.

17 Tonda, ne kange neitamai di, neda, ‘Ila kael kemna deiyonge deiki di, telep kuna ngeda ake,’ tenenange cap, walwal kuna ngeda, moupra tenena nge cap, tonda lup kange dounupnge cap, pio mali kunange capda, ange yuma moupra tenipetepnedi, kael kepkamne,’ tenepsi. Dinino, neda konum tenepsi. ‘Akeca kael kepkun’ tenen piripetepsi ngeda, ukupmanto kumanya di, kum pung pepra, emberepa, sepdaro tomopra taleptepe’ tenen, pirirameng utopu kunune. Ada men kupmanto.

18 Deiyoda, nun nimidi ila kael kemna deiyo keca, weik kael kepbapyopda, akael kemna deiki di, nun dipru neitamai di, kange mun keca ton yakarure. Angetopu, ware neng do yuma, moupra tenepmengedi, kael kemna deiyo kecada, weik kael kemnung nengda, pio kange mun kemdidangedi, dipru buluksangredi, engenapu kununge.

Ila kael keamu Peteremna Deiyo Ngebodi pepu.