Ecclesiastes 10

Nimidi, walwal kuramenga deiki di, mali kurur keca tep, pepu upu

1Nintong pio telep kuramre minyak akaptua peda, deibumdi akeca deiki amuramrepa, ame mau pumbon lyuramredi, tong peramredi, mali kuramretopu, nimidi ila kael keamengdi, pio telep pel doptengepa, yuk neng yumadi, ange tep, ‘E, angeda pio telepe,’ pepra, gispal doptenga peda, walwal nengdi, sun yambulanun mali kunga deiki di, ange yumada, mali kweipmengedi, lumdongonunge. Ukutaruda, yambul malipu kununge dinin, ukununga deiki di, ila kael kemna keca yumada, lumdongonunge.

2Teka pio telep kunung nengda, tek sisi dumsisi tara utopu kupra, pel donung ngeda pio telepe. Dinino, sun pio walwal nengdi, mali kun kecapu talepra kununga cadi, tebalal tara utopu kepra kununga cadi, sunda pio malipu kununge. 3Sun mali kun kecapu talepra kunge nesalada, telep karayong bisi deiki embange taru peda, sunda, moupra men tenepmanto neng kungedi, pio walwal nengpu kununga cadi, sun walwal kunge keca deiki di, katuai kuprepa, yuk nesala yuma epmengedi, konuma, ‘Uo, anengda, pio tek sisi walwal nengpu kununge,’ tenepmengedi, kael kemnunge.

4Ange ton kael kepsi. Amenda taruda, sun mutuda, ila nimi deiyo ngebodi, sun tep yu weik kuprepa, wenepseryopda, sundi er tep melipra pel dona tep nengeda, tamna gum di, tupa telep kupra pel donapu kunkamrume. Deiyoda, ake. Sundi, ‘Uo’ tenen, kange tenimtona gum di, tali kange doupra, pel telep kupra tupa donmarumpanen, amenda taruda, erdi ange epyopda, er yu gum kuprepa, sun tep kange di ton cap, kange derinkamsere. Sundi mali weik kuramumnya peda, adipapu bouna di, “Uo ne mali kuamsi,” pepmemdi, bouna di kuna cap kumemdi, dim pepra pel donkamrume. Ukunmamumnya deiki di, erda, ka tamupra sun tep kange derinkamsere.

5Tonda, yuk ila mali kunange ton, tuai mutu neitamai kurami nengdi kunge ngeda, nedi konum epsa deiki di kael kepsi. Aepsi ngeda ake. Sun nimi upu pena ila nimi deiyo nengdi, ila mali kuptengapa, mambul weik kuramtua utopunge tep epsi. Ada, ake.

6Pio walwal neng kunung dinin, ‘Deiyo-deiyo neng kunkameng’ tenen, awalwal neng erepmengedi, yuk nesala deiki tara deipmengepa, ila mambul pel talepra donung dinin, mali kemdinunge. Tonda, sun ila kael keamidi, isomka weik kunge nengda, amutarapu deipmengepa, mambul gum, tali pelpu talepra donunge. Animi deiyo nengdi, walwal nengpu erepra derinung dinin, kael neng cap, isomka neng cap, amutarapu derinungada, mali weik kununga tep pepsene.

7Ange utopu, yuk nengdi, ‘Nun ikin pel donkamseng’ tenen, akeca-keca men kael keami neng dinin, co bo deiki kunupmengepa, ikin pel dimengepa, donung dinin, amelipra pel dona nengdi, kuda bisam deiki bukra embanunge. Tonda, ila nimi deiyo kepra kurami nengdi, deiami nyapuda, kuda bisam bali deiki buktengedi, embaramtenge dinin, ange gum, tuai bisi yo deikipu yanipra embanunge.

Tek sisi ngeda, co bo deiki di kunupmengedi, tali pelpu melipra donge nengda, bisi yo deikipu embaramtenge dinin, sunda kuda bisam deiki bukra embanunge. Ange yumada, telep kunange gum dinin, mali kuna ngepu ukupra kunmaipa epsi.

8Sun yuma moupra tenepkurume. Ware ngebo do yuma, ‘Yuk neng ton popkun’ tenen, erdi tu pumbon neitamai palipra derirur ngeboda, amenda taru, ukurura deiki dipapu, er pe apalipu tu pumbon neitamaipu sakamre. Ange utopu, nimidi, sun ati do, sun wa penai do yumada, ‘Yuk nengdi upula dopkupe tenepmengedi, weksenung’ tenen, tembok deipra dopinge tep, mali kuna ngebodi, ‘Oloktaptenedi, wekra upula dopropkun,’ tenerur ngeboda, yuk neng sun tembok do, wa penai beilya do, uruptapredi wekyopda, adipapu yu baldi angebo si toprepa depkamre. “Atep ukunada meme,” pepsene.

9Ange utopu, sun ware nesala do yuma, sundi, ‘Ila gat gel bongopnedi, ange dopra ati dopkamne’ tenen, apel donung nengda, agelpu besi keca di bongoprepa, paupra yana sakredi, aneng sun nong deikida, dila kepra deipkamre. Tonda ange utopu, ware ngebo di do yuma, co tourur ngeboda, amenda taruda, poipdankamre gum daca.

10Atep, apel donkamrum taruda, moupra tenenkamrume. Ada, sunda co tourum taruda, sun kapak ya men ketepmumpa, si men kupseryopda, men ketepmumnyopda, sun pel donkamrumada, sun pe ila puto deiki dipapu paleprapmumdi, pel donkamrume. Ange utopu, ‘Gat gel bongopnedi, yambul gel dopra ati beilya wipkamne,’ tenepmumnyopda, menmenada agel bongona tep besi kecada, tek sisi telepngepu ketenepkamrume. Gum dingeda, pio ikin pel dona deiki dipu, agel bongonkamrume.

Atep, pel kapul men donmarumu taru dipapu, menmena di sun kange tenena ngeda, pio telep ngepu tenepmumdi, ketenepkamrume. Dinino, kapul taru dipapu, ila di kael keamtumtoda, ange deiki di apel-apel yumada, kanam kupkamre ja.

11Uda, yu baldi, ‘Si topserur’ tenen, ila kael keami nengdi, mambul pel dopmenga deiki di, abalda konum boun kepra deipmengopda, animi pon baldi, dipru boun kuprepa, nimi men si tonkamsere. Dinino, apel dona gum dipapu, ayu bal talepmumpa, abaldi si konum topseryopda, yu bal boun kemna kael nengda, ‘Menmena yarumudi abal boun kepra deipsetume,’ men penkamrume. Gume, konum topseryopda, dadepkamrume.

12Ange ton kael kepsi. Nimi ton, ila kael kemengedi, pio dumsisi kangepu tenepra kurur ngebodi, kael upu pepre pangeda, yuk neng gekepmengedi, ‘E, angebodi pesere upuda, pio telepe,’ tenepmengedi, angebo tep, gispal donkamenge. Dinino, pio walwal kuramre ngebodi perur upuda, erdi awalwal upu perura deiki di, akonuma, er pe tep mali kudidarure. 13Sun pio walwal kunge nengdi, sun upu pena gonga kemnung taruda, sun upuda tali sisa nong gum upupu gonga kepra pengedi, tali pertamamengepanen, sun apenunga deiki di, amenda taruda, mutana nengdi kuramengtopu, mali kecapu kununge.

14Ukupra kunung dinin, sun moupra tenena gum di, walwalpu kunge nesalada, tali upu pio weika di tupa-tupa penunga cadi, pio men dim penunge. Tonda, tek sisi pepsene. Amenda doryankamre taru kupkamser kecada, ware ngebodi lap pepsetu do?

Gume, nimi tuai nesalada, amenda dorkunkamre taru kupkamser keca yumada, pio men kael kepmanto kunupa tep, tenpu ngebo peda, tek sisinge men lap pepsetue. Ange yumada, inimdongona utopu kurura tep, nundi yuk neng tep, dorkunkamre taru kupkamser keca tep, tek sisi pio men lap peptepe.

15Ange ton kael kepsi. Sun pio walwal nengda, ‘E, ne ati bana tep bisida ake,’ pio men tenenunge. Sun walwalpu kununga cadi, sun pe ati bana tep bisi peda, men kael kemnunge. Pio walwal nengpu kununga cadi, sundi pio pe deipra, puto di pel donunga deiki di, sun nong puto gum kupbaramrepa, men kupmanto kununge.

16Uo ware mutu nesala do yuma, sun mutu talepra kurur nimi deiyo ngeboda, tek sisi ila kael keamu ngebo gum dinin, tali pel melipra dorur ngebo kuryopda, sunda bicaue. Ikin kangepu doupra kunkamrume. Ange utopu, ware mutu nesala do yuma, sun mutu talepra kunge deiyo-deiyo nengdi, ipna taru bukmengedi, pel dona gum dinin, adipapu tali kange doupmengedi, ila kailya kalepmengedi, jen keca weika di jepmengopda, amenda taruda, sun amutu kurumu nesala yumada, ikin weik kunkamsere. Atep, sunda bicaue pepsene.

17Ange gum dinin, ware mutu do yuma, sun ila nimi deiyo ngebo, Raja ngeboda, tek sisi pio telep dumsisipu kure ngebo kutu teptoda, sunda telep kunkamrume. Tonda, sun mutu talepra, ila nimi deiyo ngebo Raja amutara, er melipra deiyo-deiyo pel talepra kunge nengdi, tek sisi jen ketengpu, jen keca ketenepra jenge neng kutengopda, sunda teleppu kunkamrume. Ada, sun mutu deiyo-deiyo nengda, moupra tenena gum di, kange deipra, tali-tali kun keca men kununga tep pepsene.

Sun adeiyo-deiyo nengda, ‘Jen keca jepmepya deiki di, ka di ton cap nun puto kupseryopda, nun mutu nesala telep kupra talenkamepe’ tenen, jen keca jen ketengpu, jen kecada jenunge. Sunda, yu me kange yawaramne meda, pio men jenunge. Ukungedi sun moupra kuna ngepu talepra kununge. Atep, sun amutu kurumu nesalada, teleppu kunkamrume.

18Tonda, ange ton kuramupa diramsa tep, kael keamsi. Ware neng do yuma, sundi moupra men tenepmengedi, ‘Ikin pelda ne dabale’ tenepra, kuramengepa, sun ati arum donunga yumada, pun deipra lyupnapu kupkamre. Tonda, ‘Pelda ne songe,’ tenengedi, tali bukmengedi, pel puto di men donge nesalada, sun ati aruma deikida, pun deipra lyupbaramredi bonpu kupbaramrepa, mo cemre taruda, akati pumbonda, mo weik sangrure. Ange yuma ukurya deiyoda, sun pel dona dabal kuna deiki dia.

19Tonda, ne kangeda, ila kailya kalepra jena taruda, akailya jenge nesala yumada, autuna cap, kange deridana cap, kununge. Utopu tonda, anggur me jena taruda, kange pio telep kangepu doupra kungedi, ikin kurur kecada, tenena gum di, adipapu lumdongonunge. Tonda, co bo cap, kunumna keca cap weik talenung nengda, sun putan keca yala-yala yumada, akeca deiki di karepmengopda, akeca-keca yuma kunupmengedi, teleppu kununge.

20Tonda, amambul upu ton pepsene. ‘Ikin kecada, nun damai yana kupserur’ tenena tep nengeda, sundi sun mutu talepra kurur nimi deiyo ngebo tep nengeda, widongona upu pena pio meme. Er tep, widongona upu katuai di pena pe, sun pe kange dipru neitamai di tenena peda, pio men kunkamrume. Sun dipru neitamaipu dakwapkurure, aupu penada gume. Tonda, ange utopu, isomka kunge neng tep, ‘Sunda nun songe,’ pepra, katuai di pena pe, sun pe mana ati pumbon kunkamrum taru peda, ange penada pio meme. Deiyoda ake.

Ukupmantoda, ato upu pepmumnyopda, im alau tara lakra embaramre ma tenpu di, sundi penmarumu upuda, gekepsere dingeda, sundi, ‘Angebo wipdongopkamne,’ tenepmarumu ngebo, er damai bena lap perbankamre do? ‘Ukuprur’ tenena tep, ato upu tenena cap, pena capda, pio meme pepsene.