Ecc 11 | XteSC | STEP | Sun talerum keca yumada, neitamai di bokra, nimi yuk neng tep bicau teneprumudi, weika di kareprumu pangeda, tek sisi menenga keca, amenda taru sun damai tamupra yarepa, weika di doronkamrume.

Ecclesiastes 11

Kael ngebodi, ‘Ukupkamrume,’ pepra deipu upu

1 Sun talerum keca yumada, neitamai di bokra, nimi yuk neng tep bicau teneprumudi, weika di kareprumu pangeda, tek sisi menenga keca, amenda taru sun damai tamupra yarepa, weika di doronkamrume. ^{▼▼Pumun taru Ibrani upu deiki sekami ngeda, uperami. ‘Sun roti jen kecada, embaramre me deiki deipmempa, duberyopda, amenda taru sun damaipu ka tamupra yankamre ja.’ Uperami ngeda, domon upu deiki perami dinin, aupu nong neitamai ngeda konum sekmepu.} 2 Sun talerum keca neitamai di bokra, nimi yoneitam bari utopu cap, tonda nimi ban bari utopu cap, bokra karenkamrume. Ukunkamrumnya deiyoda, ake. Ada, amenda taru ila ikin kupkamser kecada, ‘Ataruda, aikin keca yankamre. Yuk taruda, ange yankamre’ tenen, men kael keptuma tep pepsene. Ada, sundi sun pe keca bokra yuk neng tep, makupra karepmum pangeda, amenda taru anengdi sun ikin keca dopropkamrum taru, sun kareramum nengdi melipkamsenga tep pepsene.

3 Ukupmanto ngeda, im deiki di mirin dua kupre dingeda, aca di mo men gedorure. Konum men gepropre dingeda, ila mo yaredi, tuai mutu yuma cemrure. Tonda, ila co er pedi lekre dingeda, itara do, utara do, er dupbenamre tarapu, dourberedi, acapu kurure. 4 Ware ngebodi ton dua cap, mo cap tep, ‘Ange ware kupkamner do? Ange gum kuptudi dou maptupa, yal keca boloktene,’ tenen, pio dirur ngeboda, men koupkamre. Men koupyopda, nonge kipra men jenkamre.

5 Ange tep nengeda, akeca yumada, Allah dipapu tenerurtopu kurura cadi, nimidi er tenepra kurenge yumada, men kael kepmanto kunupe. Ange utopu, nerapu mumun douamenga mi, nong kemne taru peda, men kael kemnupe. Tonda, nerapu mumun douamenge taruda, ami isin yakare bisi peda men kael kemnupe. Ada Allahdi teneputopu kurura tepa. Ange tep nengeda, yambul ikin keca men kael kemnuptopu, Allahdi tenepra pel dorurnge yumada, nimidi tenepra neitamainge moupra men kael kemnupe.

6 Tonda, ipna taru di kan yal keca bolongmamempane, sintara kepra peda, tamna gume, dukdongopra bolongkamrume. Abolokmamem ngeda, waretonge telep kupra puruktupa kael keptepe do? Tonda, ipna bolokmamemnge pe, sintara bolokmamemnge peda yuma, teleppu kupra bongoptu do? Angeda, nun walwal cadi, men kael keptepya tep, pio pe deipra pel donapu kunkamrume.

Kaber tupa kunup taru cap, wisi deipserur taru cap tep, pepu upu

7 Ipna taru keteng yaredi dirine weik katuai kupre taruda, pio teleppu kurure. Ukuprepa aketengda, dirin katuai deipre pangeda, ataruda nesala yumadi, pio telep kange douprapmengedi, sun kange deipra kununge. 8 Ware nesala do, sun yumadi, pio kange deipra kungedi, ‘Telepe,’ penkamenge. Tonda, sun anesala kankan di, sun gam kuna tep taruda, go ton cap tamakra karerura deiki di, keteng tamun weikanun kunge nesala peda, sun kange pio derinunge. Dinino, sun peda moupra tenenkamenge.

Ada, sun amutu neitamai gam tupa kunkamrum taruda, yambul weik akapmar dinin, depmengopda, amenda taru pio kunungnaipu kunkamrum taruda, denge pio weik, men nukmanto kunkamre. Tonda, tupa gam kunkamrum taru neitamai, sun damai yakankamrenge yumada, tali nong men kupkamre kecapu yankamsere.

Ukupmantoda, kumanya puto di pung peprepa, tenpu ngebodi, ‘Akumanya talepkamne’ tenen, puto di sepdaro embetua peda, akumanyada men talepmanto keca cadi, angeda nong pio men kupkamre. Talipu kurure.

Sun kaber nesala moupra kuna tep, pepu upu

9 Atep nengeda, sun kaber nesalapu tupa kurum nengda, sun kaber nesalapu kurumu nengda, sun tupa kaberpu kunkamrum taruda, kange deipra kumumdi, pingping kange doupra kunkamrume. Sun kange dipru neitamai di, ‘E, angeda kunkamne, angeda ton piripetepkamne’ tenen, tenenkamrum keca yumada, dombankamrume. Tonda, sun asuru di epmumdi, ‘Uo, ange ton taleptene,’ tenemum keca yuma peda, ‘Talepkun’ tenen, dombankamrume.

Ukunkamrum dinino, kange mouprapmumdi, tenenkamrume. Sun kaber tupa kunkamrum taru neitamai kunkamrum keca yuma tep nengeda, Allahdi, sun mali kunkamrum keca yuma tep, dipetepredi, upu bokeipseryopda, wenepkamsere. ‘Dakwapye’ tenen, tali kaukemnapu men kunkamre. Atep, pio moupra tenenkamrume.

10 Atep, sun kaber neng cap, kanam nerapu capda, wisi kapul men deiprumu taru neitamai yumada, sun dipru neitamai di, ‘Uo, ware kupkamner do? Tonda, sun dipru neitamaipu, ‘Ne tenemsinge yumada, amenda taru dato-dato di gum kupkamner do?’ tenemumnge cap, tonda, ‘Uo, ne nong neitamai pu jenerur ngeda, warya tep do?’ tenemumnge yuma capda, enepra dokotepmumdi, tupa tenena gume. Dinino, ange ton tenenkamrume. Sun kaber tupa kunkamrum taruda, menmena di gum kupbankamsere. Ange yuma peda, nong men kupkamre keca, ‘Kumanya embarepa, telepe’ tenen, sepdara dombana utopu, pio tali kecapu kurura tep, pepsene.