Ecc 12 | XteSC | STEP | Uda kan kaber kunkamrem taru, ikin keca kan damai men yanmakere keteng tamun dipapu, kan ketekepra deipkeu ngebo, Allah tepapu tenenkamrume. Ada, kan konum wisi deipmem taruda, ‘Gam kuna ne dabale,’ tenepmemdi penkamruma tep, pepkene. Atep, Allah tepapu pio tenenkamrume.

Ecclesiastes 12

“Allah tepapu pio tenenkamrume,” pepu upu

1 Uda kan kaber kunkamrem taru, ikin keca kan damai men yanmakere keteng tamun dipapu, kan ketekepra deipkeu ngebo, Allah tepapu tenenkamrume. Ada, kan konum wisi deipmem taruda, ‘Gam kuna ne dabale,’ tenepmemdi penkamruma tep, pepkene. Atep, Allah tepapu pio tenenkamrume.

2 Amenda taru ikin kupkamkera tep, pepkene. Ikin kupkere pangeda, kan asuru pupkere taruda, keteng asuru cap, war cap, kuru cap, sun dirin ton telep kupra men epkamreme. Ataru yumada, pio kunuknapu kupkamkere. Tonda, dua bum topdoua embare taruda, mo du doupra yakarure. Akunkamre ngeda, ‘Ne popnerur’ tenen, kan kware pio weik kunkamkere.

3 Kan kaber kunmarem taruda, puto weik kurum dinin, konum wisi deipmem taruda, puto boun kupkeredi yo berber penkamkere. Ukupmantoda, nimi kaber kunge taruda, ila puto di ati kalenga neng kunung dinin, wisi konum deipmengopda, puto boun tep apel men doptenge. Ukuramengtopu kupkamkere. Tonda, ila puto ngebo kurum dinin, kan wisi konum deipbamem taruda, nong geipdongopkamkere.

Tonda pumunda, kan jen weika di jeramum dinin, kan si yuma lukra sakropkeredi, gum kupkere taruda, kan jen keca weika di men jenkamrume. Tonda, wisi deipmem taruda, jendela bon bisi dipetepkamrem dinin, asuru pupkamkera tep, jenek men epkamreme. Lelim-lelim penkamkere.

4 Ange utopu, kan ati buplan dekdongopkamrem taruda, jagung du taingne keca di taingmengepa, lelim weik penkamra peda, men gekenkamreme. Ada kan amul kinipkamkera tepa. Dinino, ma upu peramre taru kuprepa, ma upu peryopda, adipapu gekepmemdi bungdongonkamreme. Tonda, ma upu pen taru kuprepa, upu pengopda, telep kupra men gekenkamreme. Tonda, kan upu sisingkumem taruda, berber pemem dipapu sisingkamreme. Atep kan pedi, mut men penkamreme.

5 Ukupkamre taruda, kan ila mutu dup welerbana tep, mambul kupkeredi, kware weik kunkamkere. Tonda, kan nongda, walwal pepdanen bamemdi, ‘Saknun’ tenen, kware weik kunkamkere. Tonda, kan kul potong papkere taruda, co kait popredi, kururamretopu kupkamkere. Ukupkere pangeda, sul po depkure taru, teiya deriramretopu kunkamkere. Pio wisi deipmemnyopda, ‘Amenda taru ukupkamne, ange kupkamne,’ tenena ngeda, men tenenkamreme. Ange utopu ‘Ner cap kikiman maptene,’ men tenenkamreme.

Ange yuma konum kupserepa, nun yuma nimi depmengedi wengbanung mutu benkamepe. Ukupmepepa, sun gam tupa kunkameng nengdi, nun tep tenengedi, ila bisai yuma engepembankamenge.

6 Ange yuma men kwamkere taru dipapu, kan ketekepkeu ngebo, Allah tepapu moupra tenenkamrume. Gat keca perak di, rantai tapu ketekepunge kapul men bulukre taru cap, tonda, ila buk mau emas deiki ketekepunge, kapul men copre taru dipapu, tamupra Allah tepapu tenenkamrume.

Tonda, me gwendam deipmange mau, kapul men bongopmare taru cap, bunkwan me paliamengai tapu dokotepra, me gwena tep keteneiamenge men bukure taruda, Allah tepapu tenenkamrume. Tonda, tapu gidona tep deipra dorameng keca er si roda, kapul men dakre taruda, Allah tepapu tenenkamrume.

7 Ange utopu, nun nimi nongda tamupra tupu kapul men dakamepe taru cap, nun sambala tamupra er karepseu ngebo, Allah damai kapul men benmape taruda, nundi Allah tepapu tenenkamepe.

Aupu yuma pepmakenada, tali tep gume. Ada, ‘Ne wisi deipne ja’ tenena gume, gam tupa kunmamem taru dipapu, Allah teka tenepra er si erememdi, ‘Allah tepapu tenepra, ketenem dinkamrume’ tenen, pepkene.

8 Ne peteremna deiyo ngebodi pepne. Ne kange tenenun ngeda pepkukene. Ada, nun tuai nesala yumadi kunup keca cap, tali tuai mutu kure keca cap yumada, tali-tali kecapu kurure. Deiyo ton pio gume. Tonda, nun tuai nengdi pel donup keca yumada, tali-tali tepapu pel donupe. Nong ton men kupkamsere. Nun tuai nesala yumada, menmena denapu kunupa cadi, aupu pepkene.

Upu sirya gawal dangna tep, pepu upu

9 Kael kemna deiyo keca ila di kael keamudi, amutu nesala tep, peteremna deiyo ngebo kuramudi, pio moupra peteremamu. Erdi, telep kupra kael keamnga deiki di, erdi yuk nesala tep, ‘Telep kupra kunkamenge’ tenen, peteremamu. Ada, ukupmanto domon upu cap, ila kael kemna deiyo keca cap, betapra kael keamnga deiki di peteremamu. Ila kael kemna deiyo keca yumada, ‘Deiyo ace’ tenen, moupra teneramnga deiki di, nong katuai kepu ngepu telep kupra sekra keteneiamudi, peteremamu.

10 Apeteremna deiyo ngebodi pio pe deipra, ‘Upu telepngepu peterepnepa, nesala yuma kange deipmengedi, kael kepkamenge’ tenen, upu telepngepu wepra peteremamu. Erdi wepra peteremamu upuda, pio dumsisi telep kupra kuna upu cap, pio tek sisi upu cappu wepra peteremamu. Mok upu cap tapakra, pio men peteremamu. Tek sisi upupu wepra sekeiamudi peteremamu.

11 Ila kael kemna deiyo keca kael keamenge nengdi penge upuda, pio teleppu kurure. Ukupmantoda, domba bisam peina deiyo nengdi, pio takke maca doupmengedi, sun domba bisam tep, ‘Telep bisipu benkung’ tenen, yambula di enepra, tenpaipu keipnen bangepa, telep bisi baramengtopu, sundi pesenge upu peda, telep kupra derisenunge. Ada, sun pesenge upu deiki di, ‘Tek sisi bisi ake,’ tenen, kael kemnupe.

Ukupmantoda, gat co deiki, paku dakra deiamengepa, takke belemya di, enemdongongepa, pu jepyopda, tenepmare bisi baramretopu, sun ila kael nengdi, pesenge upupu gekepmepedi, telep bisipu banupe. Atep, apesenge upu yumada, Allah erdi pepra deriseretopu pepra peteremsenunge. Atep, angeboda nun yuma tep, telep bisi peteremna deiyo ngebo cadi, nun domba bisam peina deiyo ngebo utopu kuseredi, nun tep, telep upu pediserure.

12 Tonda, apeteremna deiyo ngebodi, aupu ton pepu. Ne nyapo, apepmansen upu yumada, moupra aso deiki deipmumdi, angepu tenepra moupra kunkamrume. Ada, yuk upu cap tapangdona gume. Buku sengna kael nengdi, buku yala-yala yuma, weika di ton cap tapakra sekbankamenge. Angeda, men gawal dakmanto. Pio dukdongopra sekbanapu kunkamenge.

Asengkameng upuda, nesala yumadi, ‘Nong katuai kael keptepe’ tenen, abuku neitamai yumada, pio pe deipra nukmengedi, ‘Kael keptepe’ tenen, pirirpetenkameng dinin, akunga deiki di, sun kange tenenange cap, sun nong cap, puto boun kuprepa, yamdongonkamenge. Ange yumada, pio men gawal dakmanto.

13 Ukutaruda, ne teneamsinge yumada, sun tep konum lap penmasenpa, konum gekenmarume. Dinin, sirya gawal dangnenge tep, tenpu ton cap pepkusene. Aupuda, ake. Abuku neitamai sekeiamsisinge yumada, ‘Ila mambul ngeda, dan do?’ tenen, tenimpeteramsidi, ‘Angeda ila mambule,’ tenepsi ngeda ake. Ada, Allah er tepapu kwar tenepra kunkamepe. Ukupra kupedi, Allahdi nun tuai nesala tep, ‘Ange kunkamrume, angeda men kunkamrume,’ pepra deiamseu upuda, angepu moupra talenkamepe. Angepu talepra doupmepedi dombankamnupe.

Apepsen ngeda, mesum tep gume. Deiyoda, Allahdi, nimi tuai mutu kunkameng nesaladi, ‘Angeda ila mambule, tenepkameng,’ tenesere ngeda, akonuma. Erdi pesere upu moupra gekepmepedi, erdi peseretopu kupra, er amutara kunkamepe. Ila mambul ngeda, akonuma.

14 Aupu yumada, tali tep men pepsene. Nun tuai nesala yumadi pel donup keca cap, tenepra inimnup keca yala-yala yuma cap tep, Allah diseredi kael kemserura cadi, akeca yuma tep, wenepra upu bokeipkamsere. Ada, ‘Mali kurami ngeda ace. Telep kurami ngeda ace,’ tenen, wepseredi, nun pel dopedi kuramepya utotopu, Allahdi menenga karepkamsere. Aupuda, abuku Penghotbah sekamnga deiyo ngebodi pepu.