Ecclesiastes 2

Ila kael keamudi, Peteremna Deiyo Ngebodi, ‘Ila kael kemna keca cap, yambul walwal deiki di tenenange cap yumada, tali pua,’ pepu upu

1Uda, ne kange neitamai di utenepsi. “Ne pepu telep kange doupra, kange deipdanedi, ware kun keca do yuma, kange deriserur keca yala-yala yuma talepra kunkamne tenepsi. Utenepra kuramsidi, ange yuma piripeteramsi dinino, konum kupsi dingeda, ange yuma ka di ton tenepsidi upepsi. “Gume, kange deridanange yumada, talipu kurure. Angepu tenepra kuramepya peda, dorkunkamre taruda, kange deipra teleppu men kunkamepe. Akeca peda, nong gum kupkamrenge, pio tali-tali kun kecapu kurure,” pepsi. 2Nedi beta moupra tenepetepsi ngeda ake. “Gume, ‘Autupra kuramsi ngeda, ne walwal di kuramsa’ tenen, kael kepsi! Ne kange telep kupra deriramsi keca yuma peda, tali-talipu kuramsi. Abutene deiki di, deiyo ton men kupka cadi, nong gum kupkamre.

3Nedi piripeteramsi ngeda ake. Tenpu ngeda, ne kange teneramsa deiki di, ‘Kange yawaramre anggur me, weika di jepnedi, ila kalya kalepra jena deiki di, tek sisi kange deipra, teleppu kunkamne do, gum do?’ tenepetepsi. Nedi atenepsi taru neitamaipu, ila kael keamsinge di, tupa pirirterenapu kuramsi. Tonda, ‘Tali-tali kun kecapu talepra kupmepyopda, angedi tek sisi kange deipra, teleppu kunkamtepe do, gum do?’ tenepsi. Tonda, ne tenepsada, ‘Nun tuai nesala yumada, keteng im neitamai kurepa, nunda tuai mutu deiki kunkamep taruda, keteng tamun pio denge weik, gam men kunkamepa cadi, nun yambulanunpu tupa gam kupe taru neitamaida, wareto keca kuptepya deiki di, kange deipra telepepu kunkamtepe do?’ Tek sisi nong telep kupra deipkamser kecada, wareto keca do?’ tenepsi.

4Ukupra teneramsa tep, ataru neitamaida, ila-ila mambul pelda, nedi konum doramsi. Ada, ne kun keca cap, pel dona cap, tonda, ati-ati weika di doramsi. Tonda, ne pe anggur du dakra jena cap, anggur me ketenepra jena cap tep, ne wa pepra, awai neitamaida, nedi anggur tapu du yal keca kouramsi. 5Tonda, tali beipye peingna cap, tau pen jen keca jena cap tep, awa neitamaida telep du mouramre keca yala-yala yuma kouramsipa, du mouramu. 6Awa yuma konum telep kupra deipsopda, ‘Awa neitamai koupsi keca cap, du mouramre co cap, ware kupra me gweptenedi, akeca yuma deiki dingdongoptene do?’ tenen, ‘Telep me mokon deiptu’ tenen, mokon weika di palipra deipsipa, mokon deipudi, ameda ne wai cap, co palpal cap, yal keca yala-yala kounai capda, amepu gwepra dingdongoramsipa, akeca yuma telep kuramu.

7Ne melipra pel dona nesala tep nengeda, ne co bo deiki di kunumamsipa, ne pel doramnei neng cap, nerapu cap, weik kurami. Tonda, apel don nerapu kunuamsingedi, ne ati pumbon kuramidi derirami neng capda, pio weik kurami. Tonda, ne pein keca domba bisam, cap sapi bisam cap, denge pio weika di kunuamsi. Ada, menop taru Yerusalem mutu deiyo kepra kurami Raja nengda, sun peda gam keca ton, yambulanun peirami dinin, neda denge pio weika di, kunuamsidi peiramsi.

8Tonda, ne taleamsi mutu neitamai, Propinsi deiyo neng cap, tonda, yuk karen mutu datalepra kurami neng, Raja-Raja neng capdi, ne damai doupra kareryakaramnei telep kunumna weik kecada, emas cap, perak cap kareramneipa, nedi akeca yuma bupra deriramsi. Tonda, ne pe kange deridana tep, mut pena nimi cap, nerapu cap, dopra deipsipa, sundi mut peramya deiki di ne tep kange telep kupra deriramnei. Angepu gum dinin, tonda ne putaramneupa, ne dipapu teneramsitopu, nerapu peda, denge pio weika di doramsa deiki di, ne pe kange derirdanamsi.

9Ange-ange yuma kuramsa deiki di, tek sisi, men taru Yerusalem mutu talepra kurami deiyo nengda, ne kuramsi utopu neng ton men kurami. Sundi akeca-keca yala yuma talerami dinino, neda akeca-keca yala yumada, pio weika di, men nukmanto taleramsa cadi, sunda yambulanun pua. Ukuramsi dinino, nedi ange yuma kuramsi taru neitamaida, nedi moupra tenenange cap, ila kael keamsinge capda, tupa akamneu. Ange yuma men lupramsa cadi, tupa tenenapu kuramsi. 10Ataru neitamai yumada, nedi, ‘Angeda ukupkamne, angeda kunupra talepkamne, angeda epmandi kange deipmanera cadi, ange peda dopropkamne,’ teneramsi keca yala-yala yumada, ateneramsitopu dopra taleramsi. Ataru yumada, ‘Ne kange deipnetue’ tenen, putapneu ngeda, ‘Ange ton tapkune,’ pio men teneramsi. ‘Atenepman nge yumada, kupna pua,’ tenepmananen, kange deipra kuramsi. Tonda, nedi pel doramsinge yumada, ne kange telep kuramneu. Kange telep kupnepa, apelda doramsa deiki di, menenga utopu keca dadoramsada, ada kange deipra kuramsa tepa.

11Ange yuma konum kuramsi dingeda, amenda yuk taruda, ton cap tenipetepsi. Ada, ‘Ne pel yala yuma konum domsinge cap, tonda apel yala yumada, ne puto di doramsipa, beipye tapneuange capda, karikra beta dipetepsidi tenipetepsi. Ukupsidi, akeca yuma epra, beta kael kepsidi, tenepsada, ‘Gume, ange yumada tali tepapu pel doramsi. Nong pio men kupkamre deiyoda, pio ton gume. Ukupmantoda, kum pung pepra emberepa, nimidi, ‘Ange tomopra taleptene’ tenen, pirirameng utopu kuramsa,’ tenepsi. Keteng im neitamai dakuramrepa, nimi tuai mutu deiki kunupai ban-ban yumada, dortaru di telep kupra deipsetu kecada, nong men kupkamre. Men kapmara tepa.

12Ange konum epra kael kepsidi, akeca yuma tapsidi, yuk kecapu tenepetepsi. Ukupsi dingeda, nedi gonga kepra, ila kael kemna deiyonge cap, walwal di kunange cap, mali keca talepra kunange cap yumada, kange di ton cap moupra tenepetepsi. Deiyoda ake. Ada, ne tenepsada, ‘Gume, amenda taru ne punupneredi, amutu yuma talepra, Raja kepkamre ngeboda, erdi wareto yuk keca ton doptu do?’ Gume, yuk kun keca ton men kurura cadi, menop taru di nimidi konum kurami kecapu, angepu kupkamre. Tonda ne pedi kupsingepu, er peda kupbankamre,’ tenepsi.

13Ange yuma tenepetepsi taruda, ‘Teka, ukuda ne kaele. Ila kael kemna deiyo keca kael keptepyopda, ange puda telepe. Dinino walwalpu kunada, tali-talipu kurure. Angeda mali pua. Ange utopu, dirineda pio telepe, dinin kunungnada, pio malipu kurure. 14Ada, ila di kael kepre ngeboda, erdi, ‘Telep kuna ngeda, abisi benkune,’ tenepre bisida, epra kael kepredi barure. Dinino, walwal ngeboda, kunungna bisipu baramra utopu kurure. Dinino, ange peda ne kaele. Ila kael ngebo pe, walwal ngebo pe, nun yuma peda, siriyada utopu kupkamsere. Ada, ila kael di kurameng neng pe, walwal dipu kurameng neng peda, dakunmapyanen, siryada utopungepu kupra, adipapu denapu kunupe.

15Atep ne tenepetepsi, ‘Uo, moupra tenena gum di, pio walwal di kure ngebo, er damai yakarur ikin kecada, ne peda dopropkamne ja. Ange tep nengeda, neda ila kael kemna deiyonge kael keamsi ngeda dan do? Ange yuma kael keamsinge deiyoda, warya tep do?’ tenepsi. Ukurura tep nengeda, ange yuma tenepetepsidi utenepsi. ‘Gume, ila kael kemna deiyonge peda, amenda dortaruda telep men kweipkamsera cadi, deiyoda pio men kupkamre,’ tenepsi.

16Angeda, tali tep men tenepsi. Deiyoda ake. Ada, ila kael keamre ngebo pe, tonda walwalpu kuramre ngebo peda, konum deprenge pangeda, amenda taru yuk nengdi, sun aneng si ton, pio men tenenunge. Dakupbaramenganen, sun si peda men si penunge. Ware keca do yumada, dorkunkamre taruda, nimidi akeca-keca yuma, adipapu lumdonongnapu kununge. Uo, nun yumada, gam ton men kunkamepe. Ada, ila kael keamre ngebo pe, walwalpu kuramre ngebo peda, nun yumada denapu kunkamepe. Uo, angeda ware deiyo tep do?

17Ange yuma tenipetepsa tep nengeda, utenepsi. ‘Uo, ne gam kununada deiyo ton guma tep, tuai mutu kure keca yumada ne songe. Tali tepapu kunune, yuk ton gume. Akunun nge yumada, dorkunkamre taruda, kange men deipkamnera cadi, tonda deiyo men kwapmara tep, pio tali tepapu kunune. Ukupmantoda, kum pung pepra emberepa, nimidi, ‘Ange tomopra taleptene’ tenen, pirirameng utopu kunune. Angeda ne songe,’ tenepsi. 18Tuai mutu neitamai gam kuramsi taru di, ne pel doramsidi, nong kepra deriramsi keca yala-yala yuma cap, ne doronun keca capda, deiyo ton men kurure. Amenda taruda, nedi pel weik doramsa deiki di, talepra kuramsinge yumada, ne konum depnyopda, yuk ngebodi dopropkamre. Ada, ne punupkamner ngebo, nedi taleamsi keca yumada, er dipapu dopropkamre,’ tenepra kael kepsi.

19Yuk neng dipapu ne taleamsi keca dopropkamenge dinin, ware ngebodi kael keptu do? Ne yo punupkamner ngeboda, ila kael kemna ngebo kunkamre do? Pio walwal ngebo kunkamre do? Dinino, ne gam kuramsi taru puto di talepra konum pel doramsinge cap, ila kael kemna deiki di kuramsi keca cap yumada, er angebo dipapu talepra kunkamre. Ukunkamra peda, dorkunkamre taruda, nong kuprepa, telep kupkamre do? Gume, nun walwale cadi, ‘Ange yuma peda, tali-talipu kurure,’ tenepne. 20Ukupra tenepsa cadi, nedi apel yuma, tuai mutu neitamai di doramsinge yumada, ataru di tenepman ngeda, ‘Uo, ange yumada nong ton men kupkamrepapu, tali-tali tep pel doramsi,’ tenepsidi, mali kange doupra, dipru engenapu kupsi.

21Ukupra tenepsa deiyoda, ake. Ada, nimidi, ila kael kemna deiyo keca kael kemna deiki di, moupra tenepredi, er pel talepra kael kemna cap, puto cap deiki di, pel telep kupra doramrepane, atenepra pel doramya utopu kupra, nong telep kemrure. Dinino, sirik tarada, er aputo di pel talepra doramrenge yumada, adipu tapra denapu kurure. Konum depyopda, ataruda, er pel pio men doramre ngebo, tali ngebodi, ange yumada dopropredi, er dipapu akeca yuma talepra kurure. Atep, ne tenepsada, ‘Apel donupnge yumada, tek sisi dortaru nong telepnge ton men kupkamra cadi, apel donupnge yumada, tali-tali tepapu kunupe. Ange peda, pio mali tenepsi.

22Ange ton ka di ton cap tenepetepsi. Ada, nimi yuma, gam tupa kuramre taruda, ikin kupmarepapu, kange mun deiki dipapu pel dorure. Erdi, ‘Akange mun kupmarepapu, nong kepkamner ja,’ tenepra pel dorurnge yumada, tek sisi nong kepkamre do, gum do? Gume tenepmana tep, ange yumada tali-tali pua! 23Tuai nesala yumada, ware yala pel don keca yumada, sundi, ‘Nong telep kupra kepkamser ja,’ tenepmengedi, sun gam tupa kuramenge taru di, puto di pel donung nge yuma deiki di, sun pe aneng nong deikipu, pu jena cap, ikin kunange cap, kange mun kemdina cappu kununge. Tonda, sun aneng lukunda taru mapmenga peda, pio men mardaramnunge. ‘Ne pel dopmanada, telep kupkamre do? Tali-talipu pel dopmanu do?’ tenen, tupa tenenapu kununge. Ne tenepmanada, ‘Ange yumada tali-tali tepapu kurure. Dorkunkamre taruda, tek sisi nong telep kupra men kupkamre,’ tenepne.

24Ange yuma tep nengeda, nedi tenepne. ‘Nimidi atenepra donup pel yumada, pio telepnge ton men kunupe. Atep nun kunkamtepe keca, pio telep ngeda, ake. Ada me jena cap, jen jena cap, tonda nun pel dopmapetopu apel donupa deiki dipapu, kange deipra kunkamtepe. Ange dortaruda, nong telep kupkamner do? Ware ngebodi ange yuma dopropkamre do?’ tenena ngeda, gume. Angeda telepe pua cadi, nedi tenepsada ake. ‘Ada yambul peda, nun damai akwapsere ngeda, nun nai bo Allah, er dipapu ange yumada, er buri dipapu kareserure’ tenen, kunkamepe. Utenepmepe dingeda, angepu talepra moupmepedi, dimpepra kunada telepe pua,’ tenepsi.

25Angeda, tali tep men pepne. Deiyoda ake. Nimidi tali jen kecapu jeptudi, kange deipdana kutuada, er dipapu ware kupra ange kuptu do? Gume, Allah er dipapu, bicau tenepseredi, nun nimi tep ange yuma men karepseryopda, ware kupra doproptepe do? Gume men kupmanto, er deiki dipapu, ange yuma doronupe.

26Tonda, Allah tep teka tenepra kurur ngebodi, Allahdi, ‘Ukupkamenge,’ teneretopu kupre ngebo tepapu, Allah er kange deriredi melimrure. Ada, Allahdi, ato ngebo tepapu, ila kael kemna deiyonge pe, moupra tenepnedi, telep kupra pel dona kael kemnange pe, tonda telep kunange pe, kange derina deiyonge pe, ange yumada karerure. Dinino, Allah er tep teka men tenepredi, mali kun kecapu tupa kurur ngebo tep nengeda, Allahdi ikin kuna ngepu karerure.

Ada, ato ngebodi, ikin pel doramredi, bung keca tepapu kange mun kange doupra, ikin kupmarepapu pel dopredi, akeca yuma bulupra derirure. Dinino, angeboda, aderirur ngeda, amenda taru Allahdi dopra, er tep teka tenerur ngebopu tapakra karerure. Allah tep, teka tenena gum di, ikin pel doramre ngeboda, akeca yuma men karenkamre.

Atep, ne kangeda, nimidi tuai keca tepapu ikin kange doupra pel donupnge yumada, tali-tali tepapu pel donupe. Amenda dorkupkamre taruda, tek sisi nong telep kupra men kupkamre ja. Ukupmantoda, kum pung pepra emberepa, nimidi, ‘Sepdaro bepedi, kumanya puto taleptepe’ tenen, kuramengtopu kunupe,’ tenepne.

Peteremna Deiyo Ngebodi pepu.