Ecclesiastes 3

“Akurur keca yumada, Allahdi er taru kaprepapu kurure,” pepu upu

1Tuai mutu neitamai kurur keca cap, nimidi kunge keca yuma capda, Allah er dipapu, ‘Ataru ake, atumi ake, atanggal ake,’ teneretopu karerepa, akeca yuma kurure. Ware keca do yuma, nimidi kunge keca yumada, im amutara kurur keca yuma, Allahdi teneretopu, kareprepa kurure.

2Ange pepsentopu, nyape derinung taru cap, nimi denup taru cap, tonda koun keca kounup taru cap, kinup taru cap, kwenetamna taru cap yumada, Allahdi teneretopu, go kareserepa kunupe. 3Tonda, pona taru cap, kwetena taru cap, urumtamna taru cap, lepsisikra dona taru cap, Allahdi teneretopu, go kareserepa kunupe. 4Tonda, engena taru cap, autuna taru cap, engeplulup pena taru cap, kange deipra mut semna taru cap yumada, Allahdi teneretopu, go kareserepa kunupe.

5Tonda, gel donongne taru cap, gel bumdin taru cap, tonda irindana taru cap, iridana gum dinin, tali kun taru cap yumada, Allahdi teneretopu, go kareserepa kunupe. 6Tonda ergiringna cap, yawaraptapmepedi, ‘Dakwapye’ tenen, yamdongon taru cap, mawa derina taru cap, karepra gawal dangna taru cap yumada, Allahdi teneretopu, go kareserepa kunupe.

7Tonda, gwelen taru cap, gwelepmarenge widongomne taru cap, upu dimpepra kun taru cap, upu pen taru cap, Allahdi teneretopu, go kareserepa kunupe. 8Tonda, nimidi bicau tenedana taru cap, ‘Akecada nun song’ tenen, tamna taru cap, mar podan taru cap, antamdana taru cap, Allahdi teneretopu, go kareserepa kunupe. Ange-ange yumada, Allahdi keteneipseretopu kuserure.

9Nimidi donup pel yumada, ikin pel dopmepedi, konum gawal dakmepyopda, ‘Tek sisi wareto mambul keca doronup do? Ware keca deiyo tep, aikin pel donup do? Angeda tenerum do?’ tenenupe. 10Ne gam kuramsi taru neitamaida, diramsidi ne kael keamsi. Allahdi tuai neng tep, ila ikin keca karesere ngeda ne dinune.

11Akeca-keca yuma, ikinge pe, kanamnge peda, Allahdi, ‘Akeca yumada, ataru telep kupkamre taruda ake,’ teneramre tarupu, telep kudiserure. Allahdi tuai nesala yuma tep, putana deiyo keca kareserepa, nundi, ‘Uo, dorkunkamre taru, ne peda dena gum dipapu, gam pio kutene’ tenen, putaserure. Er dipapu kael kemne keca karepserepa, kael kepkamepe dinino, Allahdi ketekepu taru di dipdongopra, amenda gawal dakamre taru, pel dorenge yuma tep nengeda, ‘E, tek sisi apel dorure, er deiyoda ake’ tenen, pio betapra men kael keptepe.

12Ne kaele, nun tuai nesalada, gam kunup taru neitamai yumada, ila telep ngeda, ake. Ada, Allah karesere keca dopropmepedi, kange deipra dumsisipu kunkamepe. Gam kunup taru neitamai yumada, telep kun kecapu kutepetoda, ange telepe pua. 13Atep, Allah er kange dipapu, nun tuai nesala tep, ila telep kecada talipu karesere kecada ake. Ada, nimi tuai nesala yuma, jen cap, me cap, jepra kungedi, sundi pel donge keca nonge dopropmengedi, ‘Kange deipra kunkameng’ tenen, Allah dipapu tali yamupra kareserure.

14Ne kaele, Allahdi pel dorenge yumada, pio tep akunkamre. Atep nengeda, nun nimidi er pel dore ngeda, men gum kweiptepe. Tonda, nun dipapu men tapaktepe. Allahdi ukurya deiyoda, nun nimi yuma, er tep ila kwar kuserepa, er amutamnapu kunkamepe.

15Tonda, ne konum diramsidi kael keamsi ngeda, ukurure. Menmena kuamu ngeda, kange di ton cap tamupra ukutaru kurure. Tonda, dortaru kupkamre ngeda, menmena di ketenepra deiamnga tep, menmena kuamunge tamupra amenda kupkamre. Allahdi konum keteneiamnga tep, er dipapu tenere taru konum kupyopda, menmena kuamu ngeda, kange di tamupra ukutaru kupkamre ja.

Dortaru kupkamrenge yuma cap, upu bongdina deiyonge cap yumada, Allah erngepu kurura tep, pepu upu

16Ne gam kuramsi taru neitamaida, diramsidi ne kael keamsinge ton ake. Ne kaele, tuai mutu neitamai, keteng amutara ban-ban yumada, nimi upu bongdinaida, Allahdi ‘Dumsisipu kungedi, telep kunkamenge,’ tenepseu dinin, nimi tuai mutu nengdi, ange tapra, mok upu pena cap, mali kun keca kuna cap, angepu pio kunupe. Ange utopu, Allahdi, ‘Pio dumsisipu kunkamenge,’ teneramseunge yumada, nimi tuai nengdi, mali kun kecapu kunupe.

17Ukunupa tep nengeda, ne dipru neitamai tenenunada, ‘Allah dipapu wepra, mali nengdi mali kunge kecada ake, telep nengdi, dumsisi kunge kecada ake,’ tenepra bokeipkamsere, tenepsi. Ange tenepsa deiyoda, mesum tep gume. Deiyo ngeda, nun tuai nesala kunup keca cap, nun pel donup keca cap yumada, Allahdi, ‘Ataru ake,’ teneamutopu, er dipapu nun tep upu bokeipseredi, telepnge tep menenga karepkamsere. Malinge tep, wenepkamsere.

18Ne dipru neitamai tenepsidi, pepsi ngeda, ake. Nedi ange ton tenepra kael kepsi. Ada, nun tuai nesala cap, tali gam kure keca cap yumada, yambulanun utopu kunupe. Ada yuma depkamenga tepa. Atep nengeda, Allahdi, ‘Siria taru depkamengada, kael kepkameng’ tenen, nun nimi tuai neng tep, ikin keca kareserya deiki di, ‘Telep kunkameng do, mali do’ tenen, kurpeteserure.

19Nun tuai nesala cap, tali gam kure keca cap, sirya taru kupkamser ngeda, utopu kupkamsere. Ada, tenpunge depre pangeda, tonge peda depnapu kupkamenge. Atep nengeda, nun pe, tali gam kure keca peda, isin kungenge cap, gam kuna deiyonge cap, utopu kuserura tepa. Sun pe, nun pe, puto yambulanunpu kuserure. Atep, nimi tuai nesaladi tenenupada, ‘Nimida, nun gam kuna cap, puto cap, ila mambul’ tenen, kunup dinin, ‘Sun tali gam kure kecada, mambul gume,’ tenenupe. Dinino, tali gam kurenge cap, nun nimi capda, gam kunupa deiyo keca cap, isin kunupa capda, utotopu kuserure. Nun yuma gam kuramepyanen, amenda depkamep ja.

Atep, ne kange dipapu pepne, ‘Akeca-keca yumada, talipu kurure. Nong neitamai ngeda, ila mambul ton men kwapmare,’ tenenune.

20Ange tenenuna deiyoda ake. Ne kange dipapu pepne ngeda, mesum tep gume. Tuai nesala pe, tali gam kure keca peda, sun depmengopda, sun yuma tamupra tenpuaipu banunge. Ada, Allahdi tu dopra nimi pe, gam kure keca peda, ketekepra deiamupane, dakuramenganen, amenda taru depmengepa, tamupra tupu dadorure.

21Tonda apepnenge pepeda, ware ngebodi kael keamtua di, betapra pepsetu do? Nimi depmepepa, nun sambala im deiki welerur do? Tonda tali gam kunung keca, depmengopda, sun sambalada tu pumbonpu banung do? Ne kange dipu pepne. Ange moupra teneptepya peda, betapra men kael keptepe tenenune. Nun yuma betapra men kael kepmepu dipapu pepne.

22Ange yuma tenepetepsidi, men kael kepmanto kupsa tep, ne kange dipu pepne. Nun tuai neng tep, ila telep ngeda, ake. Ada, nun pel domepepa, nong kemrur ngeda, dopropmepedi tali kange deipra kunkamepe. Ange men kupmepyopda, ware keca ton kuptepe do, gum tep, Allah erdi teneramseu ngeda, akonuma tenepne. Yuk ngeda ton men kuptepe. Tonda, konum depmepyopda, ware kuna deiki di, amenda ukupkamser ngeda, ware kupra kael keptepe do? Ada nun men kael keptepya tep, nun pel dope ngeda, tali kange doupra kunkamepe. Penghotbah upu pepra sekeipu ngebodi pepu.