Ecc 4 | XteSC | STEP | Yuk taru ton, nedi pio moupra dinmasipa, tuai mutu ban-ban yuma neitamaida, ton tara nengdi, yuk tara neng tep, pio ikin keca dopra, sun nong deiki deringepa, anengda kange mun kange doupra kununge. Ange yumada, telep kuna gum keca tep, moupra tenepetepsi. Atenepsi ngeda, pio ila kange mun keca neitamai kunge nesala yuma akeca di sun tep taikra daramrepa ila di engenunge. Mali kange doupra engenung dinin, ikin weik kunmai ngeda, yuk nesaladi ton pio men melimnunge. Yuk nesala yumadi, ‘Anengda, dakwapye’ tenen, kaukemnapu kununga cadi, anengda tupa ikin kange doupra kununge. Nimi tenpu ngebo peda ton, anesala tep, men melimredi, sun dipru men kwadimrure. Tonda, sun ila puto weik nengdi, yu weik kungedi, sun puto boun neng damai yana, ila ikin keca, sun nong deiki deringepa, kange mun kange doupra kunung dinin, yuk nesaladi, men melimnunga cadi, ‘Uo’ tenen, engenapu kununge.

Ecclesiastes 4

Ila kael Peteremna Deiyo Ngebodi, “Angeda tali keca pua,” pepu upu

1 Yuk taru ton, nedi pio moupra dinmasipa, tuai mutu ban-ban yuma neitamaida, ton tara nengdi, yuk tara neng tep, pio ikin keca dopra, sun nong deiki deringepa, anengda kange mun kange doupra kununge. Ange yumada, telep kuna gum keca tep, moupra tenepetepsi. Atenepsi ngeda, pio ila kange mun keca neitamai kunge nesala yuma akeca di sun tep taikra daramrepa ila di engenunge. Mali kange doupra engenung dinin, ikin weik kunmai ngeda, yuk nesaladi ton pio men melimnunge. Yuk nesala yumadi, ‘Anengda, dakwapye’ tenen, kaukemnapu kununga cadi, anengda tupa ikin kange doupra kununge.

Nimi tenpu ngebo peda ton, anesala tep, men melimredi, sun dipru men kwadimrure. Tonda, sun ila puto weik nengdi, yu weik kungedi, sun puto boun neng damai yana, ila ikin keca, sun nong deiki deringepa, kange mun kange doupra kunung dinin, yuk nesaladi, men melimnunga cadi, ‘Uo’ tenen, engenapu kununge.

2 Ange yuma tenepetepsa tep, ukupra tenepsi. ‘Uo, teka, ne kangeda, pumun taru di konum depromi nengda, pio teleppu kununge. Dinino, ataru tupa gam kunge dinin, ikin keca weik kuprepa, kange mun kange doupra kunge nesalada, pio ikin kangepu doupra kununga cadi, angeda mali pua,’ tenepsi. 3 Tonda, ange ton tenepsi. Ne kangeda, pio-pio telep ngeda, kapul men deami nesala puda, pio teleppu kununge. Deiyoda, ila ikin keca, sun damai men yanmanto kurura tep, teleppu kununga tepa. Tonda, kapul men deiami nesalada, tuai mutu ban-ban yuma neitamaida, tali dakunge nesaladi pio mali kun keca yumada, sun kapul men deiami nesalada, pio men dinunga cadi, men kael kemnunga tepa. Atep nengeda, ‘Sunda pio teleppu kununge,’ tenepsi.

4 Tonda, yuk keca ton tenepetepsi ngeda, ake. Ada, ne kangeda, ware nesala do yuma, sun puto di pel donge keca tep nengeda, ukupra tenepsi. Ada, sun pe dipapu, ‘Sun yuk nengdi talenge kecada, ne pe ton taleptene’ tenen, sun kayapu nengdi do, yuk dakunge nengdi do, anengdi talepra kuramne keca tepapu tenengedi, ‘Ne ton akeca yumada taleptene’ tenen, puto di pel donunge. Angepu tenepra kuramenge keca yumada, tali nong kuna gum ngepu tenenunge. Ukupmantoda, kumanya puto di pung peprepa, ‘Ange talepkun’ tenen, sepdaro dombatenga peda, kumanyada men talepmanto cadi, atenenange cap, puto di pel donungange capda, nong men kupkamre ja! Akeca utopu keca yumada, tali pua.

5 Tonda, akeca ton tenepetepsidi, kael kepsi. Ada, ‘Amenda taru ware kupkamner do?’ tenena gum dipapu, sun pio walwal kunge nengda, tali kange dopra, sun pe buru getepra talepdangedi, pel pio men donunge. Ukupmenga deiki di, jen putaramtua peda, ange tenena gum dipapu tali kange doupmengedi, tali dim pepra bungnunga cadi, amenda taruda, jen putana deiki di depkameng ja! Angeda sun pedi, sun pe tep, podanange utopu kununge.

6 Ne kangeda, pio telep ngeda, nimidi talenung keca yuma tep nengeda, tenpu buru di akeca meteka dipapu taleptenga peda, ‘Uo ware kupkamne do?’ tenena gum di, telep kange doptengedi, dim peprappu kutengopda, sunda pio teleppu kunkamenge. Dinino, wareto neng do yuma, anesaladi, ‘Bung keca yala-yala yuma, weika di taleptepe’ tenen, ikin kange doupra, sun pe buru butene di, ikin pel puto di doptenga peda, sundi, ‘Uo ware kupkamner do?’ tenena cap, kware weik tenena cap deiki di, sun ato nengda, konum mali kudidanunge. Ne kangeda, sundi kunge kecada, telep kunange pio gume. Ukuramenge ngeda, deiyo neitamainge ton pio men kupkamra cadi, keana kecapu kurura tep, ange yumada, tali keca pua,’ teneptepe,’ pepsene.

Ukupmantoda, kumanya puto di pung peprepa, ‘Ange talepkup’ tenen, sepdaro dombatenga peda, kumanyada men talepmanto keca cadi, atenenange cap, puto di pel donunga nge capda, nong men kupkamre ja! Akeca utopu keca yumada, tali kunange pua.

7 Tonda, neda yuk mutu neitamaida, ange ton epsidi kael kepsi. Sun anesala kunungada, ukupmantonge tep, keteng dopre taruda, kumanya puto di pung peprepa, ‘Ange talepkup’ tenen, sepdaro dombatenga peda, kumanyada epra men taleptenge. Kumanyada men talepmanto keca cadi, sundi kunge keca yumada, nong men kupkamre ja! Akeca utopu keca yumada, tali kunange pua. 8 Ada, ton nengdi, sun gam kunung taru yumada, sun tenpupu kununge. Sun anengdi, nyapu ton derina gum di, tali you nerapu kununge. Tonda, sun nerapuda, kanam nerapupu pio dakununge. Ange tep nengeda, sundi nyapu derina pio gum di, tali you nerapupu dakununge. Atep, sun nyapu ton men derinunge.

Tonda, sun kayapu neng cap, sun weit yapu cap, du yapu cap, sun nyapsilip capda, pio men kununge. Sun pe yukpu kunung dinin, sunda pio pe deipra, puto dipapu ikin pel tupa-tupa dongedi, beipye men peingnunge. Tonda, sun pel weik donunga deiki di, bung keca cap, kunumna weik keca cap, weika di taleptenga peda, sun dipru neitamai teleppu men kunkamenge. Deiyoda ake.

Ukupmantoda, kumanya puto di pung peprepa, ‘Ange talepkup’ tenen, sepdaro dombatenga peda, kumanyada men talepmanto keca cadi, atenenange cap, puto di pel donung nge capda, nong men kupkamre ja! Akeca utopu keca yumada, tali kunangepu cadi, sun talepra kunung keca yala-yala yuma tep, pio men bourure.

Anesalada, ukupra kupbangedi, ‘Uo, neda, beipye peingna gum di, ikin pelpu dopbanmanpanen, ‘Bung keca weika di dopropteneya peda, ne meneng damai ngebo guma cadi, ware ngebo tep melipra kareptenepa, kange deipkamner do? Gume, atep, ware keca deiyo tep, ikin pel tupa donun do? Apel donunada, nong gum ngepu kurura cadi, talipu kurure,’ tenenunge.

Atep nengeda, nedi pepsene. “Ange-ange yumada, kumanya puto di pung peprepa, ‘Ange talepkup’ tenen, sepdaro dombatenga peda, kumanyada men talepmanto keca cadi, atenenange cap, puto di pel donung nge capda, nong men kupkamre ja! Akeca utopu keca yumada, tali kunangepu kurura cadi, apel donkamna deiki di, kange deipra teleppu men kunkamne,” tenengedi, moupra kael kemnunge.

9 Neda, yuk keca ton moupra tenepsidi, ange kael kepsi. Ada, tenpu ngeboda er pe yuk, pel doptu dinin, erdi yuk ngebo tep, ‘Kikiman pel dopteneme,’ pepra, upu talepdarengedi, sun kikiman kuretengedi, pel kikimanpu dopretenge teptoda, ange deiki di, teleppu kunkamrenge. Sun butenedi, pel dopbaramrengedi, sun doronkamreng kecada, nong weik kupbankamre. 10 Apepmana deiyoda ake. Ada, kikiman kurerungdi, pel donmarenganen, tenpu ngebo ton konum sakyopda, er kapdi, angebo talepredi, erepra kange di tampura telep kupra deipkamre ja. Dinino nimi tenpu ngebo, er pe yukpu pel dore ngeboda, bicaue. Ada, erdi pel donmaryanen, ikin kuprepa, sakyopda, er kabo men kupyopda, angebo pio bicaue. Angebo saktudi poptuopda, er pe dipapu poipdatue. Ada, er tep yuk nesaladi ton men meliptenge. Angeda, ikin weik kunkamre.

11 Ange utopu ton, lukunda neitamai dinin, ila bul kuramre taruda, nimi tenpu ngebodi er yuk maptuopda, ware kupra bupu kuptu do? Angeboda, er telep kange telep doupra maptu do? Gume. Dinino, nimi butene ton kikiman makupdana wisipra mapretengopda, bul kuramre taruda, abul kutua peda, kikiman mapretengepa, bupu kupretenge. Atep nengeda, bul kuna gum di, kange deipra marerunge. 12 Tonda, tenpu ngebodi, yuk ngebo tenpu tep, podarengepanen, ton taruda tenpu ngebodi, ayuk ngebo tep, poptue. Dinino, nimi butene kikiman beretengedi, sun pona tep ngebo tenpu yaryopda, sun butenedi, angebo tep, tek sisi adipapu popra tapretenge. Ange utopu ton, weneri tapu di tapakra wipmengopda, atapuda, puto weiknge ton akupkamre. Atapuda, pio men buluktapmanto kupkamre.

13 Ange ton moupra tenepetepsidi kael kepsi. Ada, tenpu kaber ngeboda, bung keca yala-yala yuma talena gum di, pio kankan ngebopu kutu dinin, angeboda, moupra tenepredi, ila di kael kepyopda, erda pio teleppu kunkamre. Dinino, yuk ngeboda, ila nimi deiyo ngebo kuramtu dinin, wisi konum deiprepa, yuk kael nengdi er tep penge upu tupa men gekepmanto kupyopda, erda pio walwal ngebo utopu konum kurure. Angeboda, telep men kunkamre.

14 Tonda, ange kael kepsi. Tenpu ngebo ton, er nin sisadi deiptupa, dakuramreyanen, akeca-keca talena gum di, pio kankan ngebopu kuptu dinin, amenda taruda, nimidi angebo dopra ereiptengepa, ila nimi deiyo ngebo Raja kuptue. Ange utopu ton, tenpu ngebo ton, wenemna ati pumbon dongoptengepa, dakuramrepanen, amenda taruda, angebo gopraptudi, ila nimi deiyo ngebo konum kepyopda, amutu yuma talepra Raja kuptue. Raja neng bungameng kursi, er sida tahkta deiki buktue. Dinino, animi deiyo ngebo Raja konum wisi deiptu taruda, ila kael nengdi penge upu ton cap men gekeptuopda, amenda taruda, ikin kupkamre ja.

15 Ange tep nengeda, nedi epra kael kepsi ngeda, ake. Amenda sirya taruda, amutu neitamai kurami nesaladi, awisi deipupa, telep pena upu men gekepmanto deiyo ngeboda, tapidi, ila kael keamu ngebo, kaber ngebo kuramu dinin, sundi angebo erepra deipipa, erda amutu nesala yuma talepu. Erda, sun ila nimi deiyo ngebo Raja kuramudi, wisi deiamu ngebo punupu. Ukupra punupka tep, amutu kurami nesala yumada, erdi peramu upu gekeramidi, ukupra dombarami.

16 Akaber ngeboda, nimi deiyo ngebo keprapudi, amutu taleramu taruda, erdi talepra kuramu mutu neitamai di, amutu kurami nesala yumada, er peramu upu moupra gekeramidi, er tep dombarami. Er upu gekerami nesalada, dengeda pio weik cadi, men nukmanto kuramipa, epsidi kael kepsi.

Ukurami dinino, sun yuma telep kupra dakuramipanen, amenda taruda, yuk neng ton yakaramidi, akaber ngebo peramu upuda, ‘Nun dabale’ tenen, pio men gekeramidi, angebo tep gispal dona gum di tapi.

Ne kangeda, ange peda, pio tali pua. Angeda pio teka, akecada nong pio men kupkamre tepa. Angeda tali-talinge, nong gum ngepu kurure. Ukupmantoda, kumanya puto di pung peprepa, ‘Ange talepkup’ tenen, sepdaro dombatenga peda, kumanyada men talepmanto keca cadi, akunungada nong men kupkamre ja! Akeca utopu keca yumada, tali keca pua.

Ila kael keamu Peteremna Deiyo Ngebodi, “Allah damai yarumudi, pedina upu tali lupra men penkamrume,” pepu upu

17 Sun yuma moupra gekepneso! Allah Yahweh er si eremna tep ati damai benkumum dingeda, sun adipapu moupmum dipapu bankamrume. Akati benkumumnyopda, tali lupra upu pena gume. Pio telep ngeda, Allah er damai bena kupmum dingeda, ‘Nun nai Allah, ware upu pepkamaser do?’ tenen, moupra gekenapu kunkamrume. Sun pedi tali lupra upu pena gume. Dim pepra bukmumdi, kael kemna tepapu kael kembankamrume. Sundi, ‘E, nun nai gispal dona tep, yapi keca popra dubepedi, uku dongorbana tep nengeda yanmape,’ tenena pio gume.

Angeda, sun walwal nengdi kununga cadi, sundi ukurameng utopu kuna pio meme. Sun awalwal neng dingeda, ‘Angeda pio telepnge, angeda pio malinge akurure’ tenen, moupra men tenepmanto kununga cadi, telepngepu wepmengedi men kununge.