Ecclesiastes 5

Ila kael keamu Peteremna Deiyo Ngebodi, “Allah damai yarumudi, upu kapul men pepmum taruda, moupra tenepkamrume,” pepu upu

1Upu kapul men pepmamum taru dipapu, moupra tenenkamrume. Tali lupra pertamnada meme. Tonda, kapul penmarumu taru di, sundi Allah er si eremna ati damai berumudi, Allah tep, “Angeda ukupkamkene,” pepra, pedina upu deiki di tali lupra men penkamrume. Sun kange dipru neitamai akwapmare keca deiki di, menmena di tali lupra pertamna pio meme.

Pio telep ngeda, Allah er ati damai berumu dingeda, ‘Nunda upu pena gum di, sundi penkamseng upu moupra gekenapu kunkamepe,’ teneptumdi, ukupmumnyopda, angeda pio telepe. Sun pio walwalpu kunge nengda, mali kunange yumada men taptenge. Mali kunapu tupa-tupa kununga cadi, sundi Allah tep karenung keca tep nengeda, Allahdi kange men derirure. Mali kunge nengdi, yapi keca popmengedi, Allah tep kareptenga peda, ada tali pua. Ange tep Allahdi kange men derirure. 2Ada, sun si eremrumu Allahda, im deiki kurur ngebo tep, sun upuda tali lupra men penkamrume. Tonda, sunda tali tuai mutu neitamaipu kurum nesaladi upu menmena pena meme. Atep, sundi penkamrum upu yuma tep nengeda, menmena pio moupra tenepmem dingeda, upu meteka dipapu penkamrume.

3Tonda, sundi, ‘Uo, ware kupkamner do, akupmanerada, ware keca deiyo tep kupmaner do?’ tenen, kware weik kupseryopda, lukunda neitamaida, ken mapkamruma deiki di, bamur keca ton katuai kuprepa, kware pio weik kunkamsere.

Tonda, upu pio weika di peramenge nengda, tek sisi walwal nengpu kununga cadi, sundi, ‘Neda, upu weika di pepkune,’ pio men tenenkamrume.

4Tonda, sunda, ‘Allah damai benedi, er tep pertamna upu deiki di peptapkune,’ tenena meme. Sunda menmena adipapu moupra tenenkamrume. Sundi Allah tep, “Naio kan si eremna tep, ukunkamne-ukunkamne,” pepra, pedina upu deiki pepkamrum keca yumada, menmena adipapu akeca tek sisi kupkamrume. ‘E, amenda tarupu ange kupkamne ja,” pepra, aupu kaukemna pio gume.

Deiyoda, Allahdi tenerurada, ‘Tali upu deiki di pertamnenung nengda, ne dabale. Pedina upu pio walwal di penenung neng peda, ne songe,’ tenerure. Ange tep nengeda, Allah tep pedina upu kapul men pepmarumu taruda, menmena di pio moupra tenenkamrume.

5Tek sisi telep ngeda, Allah tep tali pertamna upu deiki di, “Naio, kan tep ukupkamkene, ukupkamkene,” pepra, men penkamrume. Dinino, pio ila mali weik kuna ngeda ake. Ada, sundi, “Naio ukupkamkene,” pepra, tali lupra pedina upu pertamrum dinin, taprumudi, men kupmumnyopda, angeda pio mali weik kurume.

6Ange tep nengeda, sun tali pepmum upu deiki di mali pio men deridankamrume. Atep sun upu tenena gum deiki di, Allah tep, “Naio ukupkamkene,” pepra, pedina upu deiki di, Allah tep konum pepmum pangeda, amenda taru er pel dona tep ngebo, imam ngebo sun damai yaredi, aupu tep asipetepseryopda, sundi tamupra angebo tep, “Gume naio, apeipkesi upuda, walwal di peptapsa tep, ange men kupkamne,” pio men penkamrume.

Deiyoda ake. Ware keca deiyo tep, sundi tali pertamrumu upuda, pio men kupmumpa, Allahdi sun tep ila di derepseredi, wenepkamser do? Allahdi yu weik kuprepa, sun wenemna tep, sun pe buru di pel dorumu keca yumada, popredi, sikke buktapkamre. Ange tep nengeda, sundi, ‘Ukupserur’ tenen, moupra teneprumudi, sun upuda meteka dipu penkamrume. Tali pertamnada pio meme.

7Sun moupra tenenkamrume. Sun kaele, ken mana deiki marumu keca yumada, yala-yala weik akurur dinin, pio er deiyo ngeda ton, pio men kurure. Ange utopu, sunda tali upu weika di pertamrumnge peda, deiyo pio men kupredi, nong men kupkamra cadi, sun upu tali lupra pertamna pio gume. Dinino, Allahdi, “Angeda kunkamrume, angeda pio men kunkamrume,” pepra, pesere upu moupra talerumudi, sun nai bo Allah tep nengeda, kware tenenkamrume. Telep ngeda, akonuma. Tali upu pertamnada, pio gume.

“Isomka kuna ngeda, tali kecapu kurure,” pepu upu

8Tenpu tara mutu neitamai embamumdi, dipetepra, ila puto deiyo ngebodi, sun tali kankan nesala yuma tep, sun nong deiki ila ikin keca deipredi, sun anesala keca tep doropyopda, ange tep nengeda sundi, ‘Uo’ tenen, ‘Ware kupmar do?’ tenen, kange tenimtona gume. Deiyoda ake. Amali kuramre nimi deiyo ngebo, er deiki tara ton, nimi deiyo ngebo yuknge ton akurure. Angetopu, angebo er deiki tara peda, yuk deiyo-deiyo neng ton dakununge. Sun yumadi, amali kuramre ngebo kurur keca yumada, konum kael kemnung dinin, sun yumada, ‘Dyo dakwapye,’ tenengedi, kaukemnunge. Atep, sun yumada malipu kununge.

9Sun adeiyo-deiyo neng yumada, mali weik kunung dinin, tek sisi telep dumsisi ngeda ake. Tenpu pala mutu, negara talepra, nimi deiyo kepra kuramre ngebo, sun Rajada, er dipapu amutu yuma cap, amutu wa tu yuma cap, telep kupra kalengkamre. Ukupyopda, awa tu neitamai di, wa pepra kouamenganen, wisipredi, nong kupyopda, kipra deriryange nge yumada, amutu nesala yumadi bena kiptengedi, ange yala-yala yuma jengedi, telep kupra kunkamenge. Raja ngebodi telep kupra kalektuopda, ange utopu kunkamenge. Dinino, amutu-amutu yumada, sun deiyo-deiyo nengdi ange utopu men kununge. Angeda, pio malipu kununge.

10Ware neng do yuma, ‘Co bo ton pio weika di doproptene’ tenen, sun asuru laprapmengedi, eprapmengedi embanung nesalada, sun co bo weika di doropmenga peda, sundi, ‘E, akonuma,’ tenen, sun kange men lonkamre. Tonda, ange utopu, bung keca talena tepapu mutana utopu kupra erur ngeboda, ‘Akecada pio weika di taleptenye’ tenen, erur keca deiki di talere kecada, weik akaptua peda, kange pio men lonkamre. Akeca yumada, tali nong gumpu kudonkamre.

Ukupmantoda, kumanya puto di pung peprepa, tenpu ngebodi, ‘Ange talepkun’ tenen, sepdaro dombatua peda, kumanyada men talepmanto cadi, atenenange cap, puto di pel donange capda, nong pio men kupkamre ja! Akeca utopu keca yumada, tali pua.

11Ange utopu, ware nesala do yuma, sun yumadi bung keca weikanun ton tapakra bulumamenganen, sun talenung isomka kecada, ton cap tamakbarure. Dinino, ukupra tapakbarur keca yumada, sun yuk nesala dipapu yangedi, abung keca pio weik tarada doronkamenge. Atep sun pe nengda ton cap pio weika di ton tamangkamenga peda, yuk nengdi ton tapakra yangedi, doronkamenge. Atep, er aisomka keca talerura deiyo ngebodi, akecada, er asuru di dinkamre dinin, akeca yumada, er pedipapu men talenkamre. Yuk nengdi doronkamenga tep, erda tek sisi isomka ton men kupbankamre.

12Tonda, ware ngebo do yuma, erdi pel talepra, puto di dorura deiyo ngeboda, pel dopmarepanen, lukunda taruda, jen keca weik kipredi, weika di jeryopda, telep kupra marure. Agum dingeda, meteka di jeryopda, pel konum doramrepanen, pio telep kupra marure. Dinino, sun isomka kunge nesalada, ‘Uo, ne isomka keca yumada, yuk nengdi yana dalupra doropnenung’ tenen, kware weik kurura cadi, anengda tek sisi moupra men maptengepa, ueda pio men kurure. Atep, sun anengda, ‘Uo, ware kupkamne do?’ tenenapu kununge.

13Tonda, nedi tuai mutu ban-ban yuma neitamaida, nedi pio moupra dinun ngeda, ne dipru neitamai di, ‘Uo’ tenena ngepu dinune. Ada ake. Nimi tenpu ngebodi, ‘Isomka ngebo kunkamne ja’ tenen, er tapakra deriramu kunumna weik keca, mawa deriramu dinin, amenda sirya taruda, isomka kuramnga deiki di, pio ikin keca er damai yakaramupa, kange mun kange doupra kuramu. 14Ada, akunumna weik keca, weika di tapakra, mawa deriramidi, ‘Amenda taruda, akunumna weik keca dopropnedi, ukupkamne, ukupkamne’ tenemi dinin, sun bung keca yala-yala yuma cap, kunumna weik keca yuma capda, gumpu kupbaramnganen, pio gum kupke.

Sun anesalada, nyapu weik ton derirami dinin, sun talerami keca yuma gum kupka cadi, sundi deiamipa, dadeipdanen bankankameng nyapu yuma tep, tenpu keca peda, men kareptenge. Sirya taruda, sundi talepbankameng nge ton, pio gum kupka cadi, telep men kunkamenge.

15Ange tep nengeda, sun yumada, sun nin yapudi deiami taruda, tali nong yopu deiami utopu, gam dakuramenganen, sirya taruda, nong yopu depkamenge. Bung keca weik pio men talenkamenge. Atep nengeda, moupra tenepetepso! Anengdi, ‘Isomka keca weika di bulupra derinkamne,’ tenerami ngeda, nong men kupu. Atep, sundi talepra kuramidi, ‘Uo ada mambule,’ teneramidi, mali kange deipra pel dorami keca yumada, sundi ton pio men doupra benkamenge.

Ukupmantoda, kumanya puto di pung peprepa, tenpu ngebodi, ‘Ange talepkun’ tenen, sepdaro dombatua peda, kumanyada men talepmanto cadi, ateneraminge cap, puto di pel doraminge capda, nong pio men kupka cadi, akeca yumada, tali pua. Kumanya utopu keca taleptenga peda, adeiki di telep men kupbankamenge.

16Uo angeda, pio tek sisi bicau tenenange kurure! Tonda, pio malinge kurure. Atep, nun depmepyopda, nun tamupra benkamepa yumada, tali deipseipa, yaputopu tali nong yopu benkamepe. Ange utopu, sun anesala yumadi, dabale kupman dipapu, ‘Uo, uo’ tenen, kumanya puto tepapu domembarami ngeda, er nong dano? Gume, ange yumada tali pua. 17Tonda, ange ton tenepsi. Sunda, ‘Isomka kuptene’ tenen, pio mutana neng utopu kunge nesala yumada, sun gam tupa kurami taruda, lukunda neitamai yuma, telep kupra men marami. Sunda mambul kange doupra engenapu kurami.

Atep sun anesaladi teneraminge yumada, ‘Uo, ne kunumna weik keca gum kupneua tep, ware kupkamne do?’ tenen, sundi ‘Uo’ tenenange cap, ‘Ne dabale’ tenenange cap, sun dipru neitamai di, ‘Uo, yuk nesaladi, ware keca deiyo tep mali kuramnei do?’ tenen, pu jeramupa, apu pio piripra tenerami. Atep, sun anengdi ukuramitopu, pio men kunkamrume.

18Ange tep nengeda, ne adipapu konum moupra tenepsidi, kael kepsi ngeda, pio ila telepnge pepkusene. Ada, ake. Nun nai bo Allahdi, ‘Sun tuai nesala yumada, buma dipu tupa gam kunkameng taruda, ‘Akeca jenkameng’ tenen, kareserur ngeda, akonuma. Allahdi, ‘Ukunkamenge, akeca ton doronkamenge,’ tenemudi kareserur ngeda akonuma.

Atep nengda, pio telep ngeda, ake. Ada, nun tuai nesala tep konum kareserur ngeda dopra, nunda jen jena cap, me jena cap nge pua. Ange utopu, ila telep ngeda, nundi wa pepra nong koupmepepa, nong kuprepa kipra jenup ngeda, akonuma. Tonda, Allahdi karepseupa, pel talepra donup ngeda, akonuma. Ange talepra kupedi, gam tupa kunkamep taru neitamai yumada, kange deipra teleppu kunkamepe. Allahdi, ‘Sunda, angepu talepra kunkameng’ tenen, konum karepseu ngeda, ange pua. Pio telep ngeda akonuma tenepsidi, kael kepsi.

19Ange utopu ton, Allahdi, ‘Angeboda, isomka kunkamre,’ teneamu ngebo tep nengeda, utopu kunkamre. Ato ngebo peda, er isomka kuna keca cap, nimidi talenung bung keca yala-yala yuma cap, Allahdi karepmemeu ngeda, taleptudi, tali kange deipra kunkamre. Er angeboda, ‘E, aisomka kun kecapu talepra kunmanada, Allahdi kareamneua cadi, ‘Ne nai Allah tep, konum telepe,’ pepnyopda, tenimtona gum di, tali kange deipra kunkamne,’ teneptue. Ange yumada, er nai bo Allah er kange dipapu, angebo tep, akeca-keca karerura tepa.

20Allah er dipapu akarepu keca yuma talepra kurur ngeboda, er dipru neitamai di kange pio derirure. Ukurura tep nengeda, angeboda, ‘Uo, neda keteng tamun weikanun ton gam tupa kunkamne do? Bumanunpu kunmanyanen, depkamne do?’ tenen, kware pio men tenerure. Ange yuma peda, Allah dipapu!