Ecc 6 | XteSC | STEP | Tuai mutu neitamai embaramsi taruda, pio mali keca ton akuramupa diramsi. Akecada, nimi tuai nesala, sun nong deiki ikin kange mun kecada, pio weik kuramupa, ikin kange doupra kununge.

Ecclesiastes 6

Nimi putaramre kecada, ikin weik kuserurnge tep, pepu upu

1 Tuai mutu neitamai embaramsi taruda, pio mali keca ton akuramupa diramsi. Akecada, nimi tuai nesala, sun nong deiki ikin kange mun kecada, pio weik kuramupa, ikin kange doupra kununge. 2 Ange ukuramupa, diramsi kecada lap pepkusene. Ada, ake. Allahdi tuai mutu neng tep, sun isomka kuna kecada, weika di kareamupa, akeca-keca yuma talepra kununge. Ada, bung keca yala-yala yuma cap, co bo weik cap, talengepa, yuk neng yumadi, aisomka neng tep, ‘Uo, sunda ila mambul neng kununge’ tenen, gispal donunge.

Akeca-keca yuma cap, sun putan keca yala-yala yuma cap akwapmarya tep, tenpu keca peda ton men putarure. Sunda, pio tali kange doupra kununge. Allahdi tenemu ngeda, aneng tep karerur dinino, ila mali ngeda ake. Allah erdi sun tep, ‘Ange yuma talepra, kange deipra teleppu men kunkamenge,’ tenerura cadi, nimi yuk neng, sun men kael keami nengdi yana, sun isomka nengdi talerami keca yala-yala yuma doronunge. Ange tep, ange yumada, tali nong pio men kupkamre. Yuk nengdi akeca yuma talepmengedi, kange deipra kunkamenga tepa.

Ange yumada, tali nong men kupkamre keca tep, pio mali kurure. Ange yumada, ukupmantoda, kumanya puto di pung peprepa, tenpu ngebodi, ‘Ange talepkun’ tenen, sepdara dombatua peda, kumanyada men talepmanto cadi, sundi tenenunge cap, puto di pel doraminge capda, nong pio men kupka cadi, akeca yumada, tali pua tenepne.

3 Angepu gum dinin, tenpunge ton pepkune. Ukupmantoda, nimi tenpu ngebodi, keteng tamun denge weik deiki di, gam kuramyanen, er nyapu yumada, denge pio weik, seratus nyapu deiptu dinin, ange-ange yuma tep, kange men deiptuopda, ange yumada, tali keca utopu kurure.

Ada, er gam kuramrepanen er wisi derin keteng tamun baripkamre dinino, er angebo gam kunada kange deipra pio men kunkamre. Tonda er pel doramrenge tep, kange men derirure. Tonda, er konum depyopda, er kayapu nengdi, er nong dopra telep kupra men peipmengopda, ange peda pio mali pua.

Atep nengeda, nedi ato ngebo tenenun ngeda, ake. ‘Nerapudi, gam men kupmanto nyapu, lyun nyapu ukupu deipmenge nyapu yumada, adipapu peinung ngeda teleppu kununge. Dinino, sun alyun nyapuda yambul ikinpu kununge. Aisomka ngeboda, ikin weik kurure,’ tenepne.

4 Deiyoda, ake. Ada, ange ukupu deipmange taru di denung nyapuda, ‘Mambul,’ tenena gume. Ukupra konum depyopda, adipapu peipmengepa, alyun nyapuda menmena adipapu lumdongonunge. Erda kunungnaipu bena kunkamre.

5 Adeipmangepa, adipapu konum depmare mida keteng dirin deipmarya peda, ton pio men dirure. Tonda ange utopu, er amidi, akeca-keca kapul men kael keamu taru, konum depka cadi, ‘Uo, ne gam kunada, warya tep do?’ pio men tenerure. Atep, ne kangeda, anyapu yumada, bouna di dim peprapu manunge. Dinino, isomka weik ngebo, erdi taleramu keca yuma gum kupyopda, erdi bouna di dim pepra pio men marure. Erda, ‘Uo’ tenen, mali kange doupra kurure.

6 Nimi tenpu ton, er gam kuna tep keteng tamunda, seribu kuptua peda, erdi kange deipra men kutuopda, erda tali keca utopu kurure. Ange utopu, kange di tamupra er gam kuna tep keteng tamunda, seribu ton cap kuptua peda, erdi kange deipra men kuptuopda, ‘Erda tali keca utopu kurure,’ tenepne. Ne kangeda, ‘Denung nyapuda, yambul ikin kunung dinin, aisomka ngeboda, ila ikin weik kurure,’ tenepne.

Dinino, ukupu deipmange taru dipapu denung nyapu pe, isomka kunge neng pe, gam tupa kunup neng peda, nun yuma konum depmepyopda, tenpu mutupu bena kunkamepe. Konum deami nesala kunungaipu bena kunkamepe.

7 Tonda, ange ton tenemsi. Tuai mutu neitamai kunup nesala yuma, utopu kunupe. Nundi, ‘Pel donup nge deiyoda, ada jen keca kunupmepedi, jen jepmepyopda, gam kunkamepe,’ tenen, pel donupe. Ukupra dakupbaramepepanen, amenda taruda, jen putanada, men gum kupsetua cadi, jen kecada kange di ton cap putanapu kupserepa, jen keca tep pio enupe. Ange peda, tali kunange kurure.

8 Tonda, ange ton tenepsi. Ada, ila kael keami nengdi, ‘E, neda akeca-keca yuma konum kael keamsa tep, nedi akeca-keca ton tapakropkamne. Sun walwal kunge nengda, tenpu keca peda men tapakra taleptenge,’ tenenung do? Tonda, amutu neitamai tali kankan kunung nesalada, ‘Nun cap, yuk neng cap, telep kupra kikiman kuna ngeda, ake, ake,’ tenepra konum kael keami neng dinin, sunda pio telep kupra kunkameng do? Gume, men kunkamenge, tenepne. Ne kangeda, kael weik neng pe, bung keca pio men talenung neng peda, amenda taru dadepkamenga tep, sun butene utopu, kam kuna deiyo keca ton, men tapakra dopropkamrenga tep pepne.

9 Nedi tenepsi ngeda, ake. Pio telep ngeda, nun deiki akwapserengepu, talepra kunup ngeda, kange deiptepedi, teleppu kunkamepe. Dinino, nundi yuk neng nge tep, ‘Uo, ne ton weika di taleptenye’ tenen putanada, pio mali. Angeda pio men tenenkamepe. Ange ukununge yumada, tali nong gum ngepu kununge.

Ukupmantoda, kumanya puto embarepa, tenpu ngebodi, ‘Kumanya talepkun’ tenen, sepdaro dombatua peda, kumanyada men talepmanto cadi, sundi, ‘Uo akeca ton taleptenye’ tenen, putarepa tenenung nge cap, puto di pel donung nge capda, nong pio men kupkamara cadi, ‘Akeca yumada, tali pel donunga,’ tenepne.

10 Tonda, ange ton tenepsidi kael kepsi. Akeca-keca yuma akwapu ngeda, pumun dortaru di konum akwamu. Ataru pe akwapmar keca yuma peda, konum akwapmara tep, nun nimidi akwamu ngeda, kael keamepudi, “Akeca er sida ake,” pepra si konum si pepmupu. Tonda, nun yumadi, tuai mutu neitamai kunge nesaladi kunge kecada, konum kael keamupu. Tonda, sun kange dipru neitamai kwamu keca peda, konum kael kepmupu. Tonda, nun kaele. Ila di kael keami neng cap, ila puto weik kunge neng capda, akunung atep, sundi upu konum pepmengopda, yuk tali-tali dakunge nesala cap, tonda puto bounpu kunge nesala cap yumadi, sun pepmangu upu men sektenge.

11 Tonda ne kaele. Ware neng do yuma, sundi, ‘Upu pio weikanun ton tapakra penkamne,’ tenepmengedi, peptenga peda, ange deiki di, bisbisa men kupkamenge. Upu weika di tapakra pepmengedi, nong kuna gum upu, tali-tali upupu pertamnunge. Ange tep nengeda, ‘Upu weikanun ton tapakra pepnepa, yuk nengdi gekenkamnenge,’ tenena pio gume.

Ukupmantoda, ‘Kumanya tep talepkun’ tenen, piripra dombaramenga utopu kurura cadi, ukuna yumada, tali pua tenepne. Ange peda, nong pio men kupkamra cadi, upu weika di penada, pio men kunkamrume.

12 Tonda ange tenepsi. Ware ngebodi, “Nimi yumadi, tuai mutu neitamai kunkameng taruda, keteng tamun bumpu kunkamenga cadi, sundi telep kunkamenge nge yumada ake, ake,” pepra, telep kupra lap pepsetu do? Gume, tenpu ngebo peda men lap pepsetue. Tonda, keteng wengbere taru, sintarada, kuki katuai kemrur dinin, menmena akeca peda gum kupbaramretopu, nimi tuai nesala peda, keteng tamun denge weik deiki di gam men kunupe. Menmena di denupe.

Tonda, ware ngebodi, nun tuai nesala tep, “Anengo, sun konum depmumnyopda, amenda taru yankamre ngeda, ake-ake,” pepra, tek sisinge lap pepsetu do? “Gume, ange peda men kuptenge. Ange yumada, nong men kupkamre kecapu kurure,” pepsene.