Ecclesiastes 7

“Ila kael kemna ngeda ake, ake,” pepu upu

1Nun tuai nesala kunup taru neitamai yumada, yuk nengdi, ‘E, angeboda, pio tek sisi, dumsisi kuna ngebo kurure,’ pepra, gisal dopsengedi ange pepsengopda, “Angeda pio telepe,” teneptepe. Ukupmantoda minyak me mokon, kunumna pio weiknge, akaptuopda, ‘Angeda yambul telepe,’ teneptepe dinin, yuk nengdi, nun tep, ‘Erda pio dumsisi kuna ngebo kurure,’ pepsetengopda, ‘Angeda pio telepe,’ teneptepe.

Tonda, ne kangeda, nun nin yapudi deipsei tumida, yambul telep tumi dinin, amenda taru nun depkamep tumida, ‘Ila telep tumi kurure, teneptepe,’ tenepne. Tonda ange utopu, nun derina taruda, yambul telep dinin, nun dena taruda pio telepe, tenepne.

2Ange utopu, pio telep ngeda ake. Nimi depmangepa, deipmange atida bemumdi, aneng cap engenada, pio telepe. Dinino, ange utopu gum dinin, tali kailya kalemangedi, jen jepra tali kange doupra kunmangaida, bemum dingeda, angeda yambul telepe pua. Deiyoda, nun yumada amenda taru depkamepa cadi, ‘Ange kapul men kupsere taruda, gam tupa kunup nengdi, ‘Nun amenda taru depkamepnge moupra teneptepe’ tenen, kutepye. ‘Sun ton ukuptuma’ tenena tep, aupu lap pepsene.

3Ne kangeda, auturamep taruda, yambul telep dinin, pio ila telep ngeda, ikin kuserepa, kange mun kange doupra engenup taruda, ila telepe tenepne. Deiyoda, mambul kange doupra kunup taru neitamaida, nundi, ‘E, telep kuna ngeda ake, ake’ tenen, moupra tenenupe. Atep, kange mun kange doupra kupe taruda, nun kange dipru puto kuna cap, ila kael kemna cap, kemdiserure. Dinino, autunapu kupe taruda, mambul keca moupra men tenenupe. Tali kecapu tenenupe.

4Tonda, ne kangeda, nimida, tenpu ati bulupmengedi, tali kange doupra kungedi, autunapu kunge taruda, pio walwal nengdi ange tep, kange deipra kununge. Sunda ato ati wengbana tep, pio piripra puto di dombanunge. Sun kange dipru neitamai yumada, ila mambul keca tep, moupra tenena ngeda, men kurura tepa.

Dinino, sun ila kael keami nengda, nimi depmengepa derinung ati bena kungedi, ‘E, nun yuma depkamepa cadi, gam tupa kunkamep taruda, telep kunange dan do, mali kunange dan do?’ tenen, moupra tenepmengedi, kael kemkamenge. Atep nengeda, ne kangeda, pio telep ngeda, nimi depmangepa, derinung ati banada, telep pua.

5Ange utopu ton, pio moupra tenerur ngebodi wenemkamser taruda, moupra gekenkamrume. Erdi penkamser upuda, ila mambule tepa. Dinino, walwal kange doupra, mali kuna ngebodi, mut penkamre ngeda, moupra men gekenkamrume. Erdi penkamre ngeda, mambule gume. Tali upupu penkamre.

6Deiyoda ake. Sun mali kuna nengdi penkameng upu cap, kunkameng keca capda, nong men kunkamre ngepu kurure. Atep, sundi penkameng upuda, gekena gume. Ukupmantoda, pio kolupu co do, gelal semu takke keca do, akeca deiki uku ipmepepa, uku jedoredi, lelim peramrenge gekeptepya peda, adeiki di mambul upu men gekenkamepe. Alelimda, tali lelim pua. Sun walwal nengdi penge upu peda, alelim utopu kurura cadi, sundi penge upuda, nong tek sisi men kupkamra cadi, aupuda gekena gume.

7Tek sisi upu pepsene. Ila kael keami neng kunung dinin, sundi mok upu pepmengopda, sun peda, konum walwal neng utopu kununge. Sundi yuk nesala tep, sun nong deiki ikin keca dopra deipmengopda, akunga deiki di, sun pedi, sun pe tep, walwal kudidanunge. Tonda, ware neng do yuma, mali kuna tep, bul kemna co bo karemengepa, dopropmengopda, adeiki di, sun kange dipru neitamai yumada, malipu kemdidanunge. Atep dortaruda, dumsisi kunangepu, telep kupra men tenenkamenge.

8Ne kangeda, ware kuna keca do yuma, gonga kemne taruda, yambul teleppu kurure. Dinino, pio telep ngeda, sirya gawal dangna tarupu tenepne. Tonda, nimi kange dipru neitamaida, salnong-nong kemna cap, gemena cap, dipru eremdana capda, pio malipu kurure. Dinino, yuk neng dingeda, ‘Amenda taru ware kupkamser do?’ tenen, bouna di, tali dim pepra kungedi, kange deipmengedi, dinapu kunge nengda, pio teleppu kununge.

9Ange tep nengeda, moupra tenepetenkamrume. Sun dipru neitamaida, menmena di deremna cap, yu tenena capda, meme. Deiyoda, sun walwal kange doupra, mali kuna nengdi, sun kange dipru neitamai tenenungada, yu weik kuprepa, pio malingepu tenenunga tep pepsene. Sun dipru neitamaida, yu tenenangepu tenepmengedi, walwal kunangepu kununge.

10Uda, sundi, ange men penkamrume. Ada asimna tep, “Pumun taruda warya tep pio telep kuramu dinin, ukutaruda, warya tep, malipu kunup do? Ware keca deiyo tep, nunda ikinpu kunup do?” pepra, pio men asipetenkamrume. Deiyoda, sundi ato upu perumu taruda, sun kange moupra tenena deiki di men asimrume. Pio walwal nengdi aupu utopu yana asimnunge.

11Uda gam tupa kunung nengda, tek sisi moupra tenepmengedi, ila di kael kemnung nengda, teleppu kununge. Sunda, moupra tenepmengedi kael kemnung keca, nong kupkamre kecapu penunge. Ukupmantoda, sundi penge upu nongda, mambul keca kurure. Atep, sun nong neng dordi taleami keca dopra, sun deiami nyapu tep karenung mutu kure keca talepra kuramre utopu, sun kael nengdi penge upu peda, pio teleppu kurure.

12Ange pepmasen upu deiyoda ake. Ada, ange utopu, co bo weik talenge nengda, ‘Uo, amenda taru ikin keca ne damai yarepa, ware kupkamner do?’ men tenenunge. Sunda tali kange doupra, dipru bouna di, dim pepra kununge. Ange utopu ton, sun ila di konum kael keami nengdi, ‘Uo, amenda taru ikin kupyopda, ware kuptepe do?’ tenen, men kununge. Ikin keca sun damai yaryopda, sun ila kael keami keca tenepmenga deiki di, telep pel dongedi, lyepdanunge. Ukupmengedi, kange deipra teleppu kununge. Sundi ila kael keami keca deiki di, telep kupra kununge.

13Uda, yuk mambul upu ton pepkusene. Sunda pio moupra tenenkamrume. Ada, Allah erdi pel domu keca cap, tupa pel dorenge cap tep nengeda, pio moupra dimumdi moupra tenenkamrume. Deiyoda, ware ngebo di do? Allah erdi gwalipra deiamtu ngeda, ware ngebo tamupraptudi, moupra dumsisikra deiptu do? Gume angeda, men kuptue.

14Ange tep nengda, Allahdi sun tep, konum telep kupra melimserepanen, akeca-keca yuma weik akapyopda, kange deipra, pingpinga di kunkamrume. Dinino, ikin keca sun damai yarepa, kange mun keca kupseryopda, pio moupra tenenkamrume. ‘Nun nai bo Allahdi abutene keca yumada, ketenepra karepmasera cadi, akonuma. Tali kange doupra teleppu kunkamepe,’ tenenkamrume.

Allahdi ikin keca cap, kanam keca cap, yuk-yuk kareserura deiyoda, ake. Ada, ‘Sun tuai mutu kunge nesaladi, amenda taru kupkamre ngeda, pio walwalpu kunkamenge. Angeda, men kael kepmanto kunkamenga’ tenen, ketekepra deipseue.

15Neda, Peteremna Deiyo Ngebodi pepsene. Ne gam kuramsi taru neitamai yumada, nong men kupkamre keca tep dombaramsi dinin, ataru neitamaida, ila mambul keca weik, yala-yala yuma konum diramsi. Ada ton tara nengda, Allahdi, ‘Angeda kunkamrume, angeda pio men kunkamrume,’ pepra deipseu upu, pio moupra taleramidi, dakuramyanen amenda taru, dumsisi pio teleppu tupa kunmai taruda, adipapu depi. Tonda, yuk neng, sun lyoma di gam kurami dinin, pio mali kun kecapu talepra kurami nesalada, mali-malipu kuramyanen, sun tupa malipu kurami taruda, sun adipapu depi.

16Ange tep nengeda, ne kange dipapu tenepsi ngeda, pepkusene. Ada, sundi, ‘Uo, neda pio telep kupra, dumsisipu pio kunkamne’ tenen, pio pe deipra pirirterepmumdi, ila puto pelda men donkamrume. Ange utopu ton, sundi, ‘Uo, neda tek sisi ila kael kemna deiyo ngebo kunkamne’ tenen, pio pe deipra pirirterepmumdi, ila puto pelda men donkamrume. Deiyoda, pio pe deipra pirirterepmumdi, ware keca deiyo tep, ila puto pel donkamrumnya deiki di, menmena puto boun kupserepa, depkamrum do? Atep, ukuna meme.

17Ange utopu, pio yu kange doupra, pio mali-mali kunada pio meme. Tonda, pio walwal kange doupra, nong men kupmanto keca kunung nengdi kuramengtopu kunada pio meme. Ware keca deiyo tep, sun dena taru kapul men kupserepapu, walwal kuruma deiki di, menmena depkamrum do?

18Ne kange deiki di tenenun ngeda, pepkusene. Ada, pio telep ngeda ake. Ada, ila kael kemna ngeda, moupra talenkamrume. Walwal kuna ngeda, tapkamrume. Telep kuna ngeda, moupra talenkamrume. Mali kuna ngeda, adipapu tapmumdi gopropkurume. Ukupra kunkamrum taru neitamai yumada, nun nai bo Allahdi, “Ange kunkamrume, angeda pio men kunkamrume,” pepra deipseu upu, moupra talemumdi, Allah tep kware kupseryopda, ukupmumnya deiki di, tek sisi nong kunkamrengepu kupbankamrume. Ukupmumnyopda, Allahdi, telep kudiserepa, teleppu kunkamrume.

19Ukupmanto upu ton pepkusene. Ada, sun ila puto weik neng, sepuluh nengda, tenpu mutu ila ati arum neitamai, kutengedi, kalektengopda, amutuda, yambul puto kunkamre. Dinino, pio telep ngeda, ila kael kemna keca konum kael keami neng, tenpu mutu ila ati arum neitamai kutengedi, telep upu peptengopda, amutuda, tek sisi ila puto mutu kunkamre.

20Tonda, ne kael keamsi. Tuai mutu ban-ban yuma neitamai akunung nesala kan-kan di, ton nengda pio telep dumsisi kunge neng ton kununge. Dinino, atelep kunge neng peda, ton taru ton, ton taru ton, sun peda mali kununge. Tuai mutu neitamaida, mali keca tenpunge peda, men kupmanto ngeboda, pio men kurure. Nimi tuai nesala yumada, mali kun kecapu pio kununge.

21Tonda, sun gam kunkamrum taru neitamaida, nimidi upu penmange nge yumada, pio men gekenkamrume. Deiyoda, ton taruda, tali nengdi, ‘E, angeboda, er pel melimna ngebodi, er deiyo ngebo tep widongona upu pepupa, gekepmupu,’ pepmengepa, gekepra kael kepmemnyopda, ikin kange doupra kunkamrume. Atep, nimidi tali-tali pertamnung upu yumada gekena gume. 22Tonda, sun peda, sun kange dipru neitamaida, sun kaele. Ange utopu sun pedipapu, sun yuk neng tep, yu kupseupa, moupra tenena gum di, sun tep ton widongona upu peiamume.

23Uda, ange-ange yumada, nedi, ne ila kael keamsi keca cap, moupra kange tenena cap deiki di, ange yumada asipetepsi. Ada, tek sisi ware upuda telep kurur do? Dan ngeda tali upupu kurur do?’ tenen, piripetepra tenepetepsi. Tonda, nedi, ‘Uo, ila kael kemna deiyo ngebo kutene’ tenen, putaramneupa, piripetepsi dinin, pio telep kupra men kael keamsi. Yambul walwal kange doun ngepu tupa kunerure. Pio telep ila kael kemna deiyo ngeda, ne damai di, yuk karenai utopu kurura tep, menmena men dopropsi. Ange epne dingeda, asipetepkamne.

24Ware ngebo do, ila kael kemna deiyo keca tep epkamre do? Atenena ngeda pio ila karenai utopu neitamai, dakurura tep, tonda nun tali tuai nengdi, akeca men kael kepmanto kurura tep, epeteptepe dinin, kanam dipapu men moupra teneptepe! 25Dinino neda, ‘Adipapu moupra tenepnedi, ila kael kemna deiyo keca tep, moupra kael kemkamne. Tonda, kael kemna kecada enapu kunkamne. Ange yumada nukamne. Ukuramnyanen, atenena ngeda epnedi, kael kepkamne. Ukupnedi ange yuma tep asimkamne ngeda, nuknedi, “Er nomor yumada ukupra kurure,” pepra, lap penkamne,’ tenepsi.

Tonda, nedi kurpetenange konum kael kepnyopda, ‘Tek sisi mali kuna ngeda ake. Pio telep, dumsisi kuna ngeda ake,” pepra lap pepkamne tenepsi. Ne kael kepsi ngeda, ake. Ada, ‘Mali-mali keca talepra kuna ngeda, pio walwal kunangepu kurure. Tonda, moupra tenena gum di, tali lupra walwal di kunge kecada, mutana neng kurameng utopu kununge,’ konum tenepsi.

26Tonda, akeca ton kael keamsi ngeda ake. Ada, nimi konum depmepyopda, ada tek sisi kange mun keca kuserure. Dinino, ila-ila kange mun kuserur kecada lap pepkusene. Ada ake. Nimidi tali nyangdarameng nerapuda, pio mali weik kununge. Anerapuda, ‘Nimi ton tomopkup’ tenena utopu kununge. Ukupmanto ngeda, nimidi, ‘Mekina tomopmepedi, popra jepkup’ tenengedi, yangna keca er sida jala, ketenepmengedi, mokon pumbon dongopmenga deiki di, mekina tomopra ponunge.

Ange utopu, sun tali nyangdarameng nerapu peda, ‘Nimi tomopkupe’ tenena utopu tenenunge. Anerapu sun kange dipruda, bisam pona tep, tapu di, pena deriramengtopu kununge. Sun buruda, rantai tapu utopu kurura cadi, angeda walwal nengdi anerapu cap, antapdangedi iripmenge pangeda, konum ateng koupra deridanunge. Atep anerapudi aneng konum tomopmengopda, loptapra men benmanto kununge.

Ware neng do, sundi Allah er upu tep, moupra gekepmengedi, dombanung nengda, Allahdi aneng tep kange derirure. Ato nengda, dumsisipu kununga cadi, sun tali nyangdana nerapudi, aneng men tomoptenge. Anengda, Allahdi pere upu moupra gekepmengedi, dombanunga tepa. Dinino, sun mali kecapu talepra, mali-mali weik kunge nengda, anerapudi, ato nengda kanam dipapu tomonunge. Atep, ‘Ukupsenung’ tenen, sun yuma moupra tenepmumdi, kalengdankamrume!

27Uda, neda Peteremna Deiyo Ngebodi pepsene. “Ange-ange yumada nedi epkamne. Konum epnyopda, ange yuma nukpetepnedi, ‘Er nomorda ake,’ pepra, lap pepkamne, tenepsi. 28Tonda, ‘Ila kael kemnange deiyoda, epnedi kael kepkamne,’ tenepsi dinin, nedi tupa yuk neng damai di lap penange tep enapu kuramsi dinin, men epsi.

Dinino, angeda epsi. Sun nimi dengeda pio weik, seribu neng kan-kan neitamai dipetepsipa, pio dumsisi, telep kupra kuramu ngeboda, tenpupu epsi. Dinino, sun denge weik seribu (1.000) nesala kan-kan neitamaida, sun damaida, pio dumsisi, telep kupra kuramu nerda, tenpunge peda, ton akunmaupa pio men epsi.

29Dinino, tenpu keca kael keamsi ngeda, lap pepkusene. Ada, ake. Nun nai bo Allahdi ketenepra deipseu taruda, ‘Dumsisi kunkameng’ tenen, pio telep kuprapu, ketekepra deipseue. Dinino, nun tuai nesalada, nun pe kange dipru deiki dipapu, ‘Ware kuprap, nundi mali-mali kecapu taleptepedi, mali kunangepu kuptepe do?’ tenen, mali kange douprapmepedi tali-tali pel dopra, mali kun bisipu embanupe. Atep nengeda, mali kecapu talepra kunupe.