Ecclesiastes 8

“Nimi deiyo ngebo Rajadi perur upuda, gekenkamrume,” pepu upu

1Ila kael kemnung nengda pio telepe. Ware neng ton, sun ila kael neng utopu kunung do? Gume, men kununge. Tonda, ware tali nengdi, ila mambul keca nong neitamai deiyo ngeda, lap pepsetenge do? Gume, sun ila kael kemnung nengdipu, ila nong neitamai ngeda, kael kemengedi, sun dipapu ange lap pepsetenge. Ila kael kemna nengda, sun kange deiprapmengedi, sun sida letamnapu kununge. Ukupra letamengepa, sun urasinda telep kurure. Yu nengdi, sun urasin yu tenena ngeda, utopu men kununge.

‘Nimi deiyo ngebo Rajadi penkamre upuda, moupra tenepmumdi, ange talepra kunkamrume,’ pepu upu

2Ila nimi deiyo ngebo Rajadi, “Ange kunkamrume, angeda pio men kunkamrume,” pepra, deipsere upuda, gekepmumdi, ange moupra talepra kunkamrume. Deiyoda, menop taruda sundi Allah tep, “Nun nai Allah, kandi wepra deipsemum nimi deiyo ngebo, Rajadi penkamser upuda, gekepmepedi, dombankamepe,” pepra, pedina upu deiki di konum peipruma cadi, angepu tek sisi kunkamrume.

3Atep nengeda, nimi deiyo ngebo Rajada, erdi sun mali kunge neng tep, ‘Ukupkune,’ tenepre dingeda, ange yumada adipapu kupkamre ja! Atep, erdi upu pesere taruda, moupra gekepmumdi, pio telep kupra tenenkamrume. Sundi, tali lupra, ‘Ange men gekepkamep’ tenen, menmena di er damai tapra men benkamrume.

Tonda, mali nengdi, ‘ARaja peserur upu pio men gekenkamep’ tenen, er upu yanitamengedi, er tep tamenge neng cap, kikiman men kunkamrume. Pio telep ngeda, aneng er damai di tapra, gopra yukaipu bankamrume. Mali kupmumnyopda, Raja ngebodi yu kupredi, er teneretopu, adipapu sun tep, ila di wenepra popkamsere ja!

4Angeda tali tep men pepsene. Deiyoda, nimi deiyo ngebo Rajadi, “Ukupkamne,” pere upu yumada puto weik kurure. ‘Ukupkamne,’ tenepre dingeda, adipapu angepu kunkamrure. Atep, ware ngebodi, ila nimi deiyo ngebo Raja tep, wenepredi, “Kanda ware kupmarem do,” pepra, erdi perur upu tep, balila di upu sektenge do? Gume, ange men kuptepe.

5Tek sisi ngeda, ware ila kael kemnung neng do yumada, nimi deiyo ngebo Rajadi, “Sunda ukunkamrume, angeda men kunkamrume,” pepra deipsere upuda, adipapu kununge. Aneng tep nengeda, yu men tenenkamra cadi, aneng wenepra men popkamre. Ikin keca sun damai men yankamre. Sun ila kael kemnung nengda, moupra tenepmengedi, ‘E, erdi pepmaser upuda, konum gekepmapa cadi, ukupra-ukupra kunkamepe. Apepmaser upuda, ataru neitamai di kupkamepe’ tenen, moupra tenenkamenge.

6Angeda, tali tep men pepsene. Deiyoda ake. Ware kun keca do yuma, akeca-keca yumada, er go tep nengeda, telep taruda konum akapmare. Tonda, akuna ngeda, er kamo kuna tep telep ngeda, konum akapmare. Atep moupra tenepmum dipapu, Rajadi pesere upu utopu kupra kunkamrume.

Dinino, tuai nesala yumada, tek sisi depkamep dinin, ‘Dan taru di depkamne do?’ teneptepya peda, ware ngebodi, amenda dortaru kupkamser keca tep, ataru di, ‘Amenda taruda ukupkamsere,’ pepra, lap pepsetu do? Gume, men kuptenge. 7‘Amenda taru kupkamre’ tenen, dinung ngeda nimi yuk nesala di ton pio men kael kemnunge ton men dorongedi amenda taru kupkamre nge tepapu ukupkamre penunge. Angeda, amenda ware kupkamre do?

8Tonda, ware neng do yuma, ware ngebodi, kumanya tep, “Aceipu pung penkamrume, aceida, dim peprapu kunkamrume,” pepra, kumanya tep, upu sektu do? Gume angeda, men kupmanto. Ange utopu, tonda nimi dena keca yatu pangeda, ware ngebodi, “Dakwapye, angeda men talepkamnera cadi, neda men depkune,” peptua deiki dipu, tupa gam kutu do? Gume, angeda men kuptepe.

Ange utopu, nimi podana tep taruda, tenpu ngebodi, ‘Gume, ne kware tep, adipapu tapra, ne mutu tamupra benkamne’ tenen, podanai tapra, gopra yukai bendoptu do? Gume, ange men kuptenge. Tonda, ware nesala do yuma, mali kun keca talepra, mali-mali kunga deiki di, ikin weik kunkamengai di tapra, sun pedipapu sun pe tep, loptapdatengedi, lyepdatenge do? Gume, mali kunga deiki di, tek sisi men lyepdatenge.

Nimi telep kunung neng cap, mali kunung neng cap tep, pepu upu

9Ange-ange yumada, nimi tuai nesala ban-ban yuma neitamai di kunge keca yumada, nedi moupra dinmasidi epsi ngeda, amutu neitamai kurami nesala yumadi kurami keca epsi. ‘Ange yumada, deiyo neitamainge dan do?’ tenen, moupra teneramsi. Tonda, nedi epsi ngeda, ton neng dingeda, nimi deiyo kepmengedi, sun amutara kunge nesala tep, “Ukunkamrume, ukunkamrume,” pepra, ila puto kemdiramengedi, upu penunge. Ukunga deiki di, sun amutara kunge nesala tep, ikin keca dopra, sun nong deiki deipmengepa, kange mun kange doupra kununge.

10Tonda, akeca yuma kael kemna tep dirpeteramsidi, eramsi taruda, ange ton epsi. Ada, ne asuru di dinmasipa, mali keca talepra kuramidi, ila yupu kurami neng ton depipa, konum tu palipi. Dinino, sun nengda, men taruda sundi ton, Allah er si eremna ati damai yakaramidi, Allah tep karen keca kareramipa, sun kurami mutu tupa gam kunge nengdi aneng tep, ‘Uo, sunda mambul neng kurami,’ pepra, gispal donmaipa, epsi. Atep, ne kangeda, akunmainge yumada, pio nong kuna gum, tali ngepu kunmai.

Ukupmantoda, kumanya puto di pung peprepa, tenpu ngebodi, ‘Ange talepkun’ tenen, sepdaro dombatua peda, kumanyada men talepmanto cadi, ange yumada nong pio men kupkamra cadi, ‘Akeca yumada, talinge pua,’ tenepne.

11Ange ton epsidi kael kepsi. Ada ware keca deiyo tep, tuai nesala yumadi, sun kange dipru neitamaida, ‘Mali kunange cap, yu di mali kunange capda, tali lupra kutepe,’ tenen, kununga deiyoda ake. Ada, sundi mali weik kupmengepa, deiyo nengdi aneng tomopra, nimi upu bongdinaida, menmena di men dubanunge. Tonda, sun mali kuraminge wenemna tep keca yumada, ‘Ukupkamsepe,’ pepra, tali pertamnung dinin, tek sisi ngeda, menmena adipapu sun nong deiki ikin keca men derinunge. Atep, sundi tali lupra, malingepu tupa kununge.

12Ukupra kunung dinino, nedi kael kepsi ngeda ake. Sun mali keca talepra kunge neng kan-kan di, tenpu ngebodi mali kun keca yuma kurur ngeda, denge pio weik seratus di mali kuptudi, tupa gam kurure. Tonda er kuna tep goda, pio weika di kupbankamre. Dinino, ne kaele, amenda sirya taruda, ila ikin keca, er nong deiki yana kupkamre ja!

Dinino, ware nesala do yuma, Allahdi, ‘Angeda kunkamrume, angeda pio men kunkamrume,’ pepra deiamseu upu, moupra talengedi, dumsisi teleppu kupmengopda, amenda sirya taruda, sunda tupa teleppu kunkamenge. Sun anengdi Allah tep, ‘Erda ila mambule’ tenen, kware kununga cadi, amenda sirya taruda, Allahdi sun tep telep kweiprepa, sunda tupa teleppu kunkamenge.

13Dinino, sun mali-malipu kunge nesalada, Allah damai benunga peda, sundi moupra tenena gum di, ‘Erda ila mambul gum ngebo’ tenen, er tep kware men kununge. Ange utenenung neng, sun gam kunada, menmena adipapu kuki gum kupbaramretopu, sun peda gum kupbankamenge. Ange utenenung nengda, sun gam kunada, weikanun ton men kunkamenge. Adipapu menmena depkamenge. Anengda, Allah Yahweh tep kange men derinung neng tepa.

14Tonda, tuai mutu neitamai diramsidi, epsi kecada, ila mali keca diramsada pepkusene. Ada, nong pio men kupkamre tali keca, ila malingeda ake. Ataruda, ton nengda, pio dumsisi kunung dinin, ton deiyo nengdi, aneng tep, ikin keca dopra sun deiki derinunge. Ada, tek sisi mali weik kunung nesala tep wenemamengtopu, dumsisi nesala tep, wenemnunge.

Ange utopu, yuk nimi ton mali kecapu kunge neng tep, deiyo nengdi men wenemnung dinin, anesala tep, telep dumsisi kunung neng tep, ‘Telepe kunmaruma cadi, men wenepkamsepe,’ penunge. Ikin keca sun nong deiki men derinunge. Atep, ange kunmanga tep nengeda, ne kangeda, ange yumada, nong pio men kupkamre kecapu, tali-talipu kununge.

15Nong men kupkamre keca, pio tali-talipu kununga cadi, ne pe kange deiki di, ‘Ukunkamepe,’ tenepmanada, pepkusene. Ada, nesala yumada, moupra tenena gum dipapu, pio kange deipra kunkamenge. Tuai mutu ban-ban yuma neitamai kunge nesala yumadi, tali kange doupmengedi, jen jena cap, me jena cap, tonda tali kange deipdana kunange cappu kunkamenge.

Ukupmenge dingeda, tuai mutu tupa gam kungedi, ikin pel donkameng taru yumada, jen jena cap, me jena cap, kupra kungedi, kange deipdana kunange cap, pio kunkamenge. Allahdi tuai nesala gam kuna tep, go tupa karesere taru neitamaida, ukupra kunkamenge. Ne kangeda, telep kuna ngeda akonuma.

16Nedi, ‘Ila kael kemna keca moupra tenepnedi, kael kepkamne’ tenen, piripeteramsi taruda, tuai mutu ban-ban yuma neitamai, nimidi pel donge keca yumada, dipetepsidi, konum emsi. Epra kael kepsi ngeda, anesala yumada, telep kupra men manunge. ‘Uo, ware kupkamep do?’ tenen, keteng komuni taru pe, lukunda neitamai taru yuma peda, telep kupra men manunge.

17Tonda, nedi, ‘Ila kael kemna keca yumada, moupra tenepnedi, kael kepkamne,’ teneramsidi, pirirpeteramsa deiki di, tek sisi kael kepsi ngeda ake. Ada, tuai mutu neitamai ban-ban neitamai yumada, Allahdi teneretopu, kurure. Dinin, tuai nesala yumada, amenda kupkamre keca tep, ‘Uo ange kael keptepe’ tenen, pio pe deipra, piripetepra kael keptereptenga peda, ange men kael kepkamenge.

Ton neng dingeda, “Gume, nunda ila kael keamupu neng kunupa cadi, amenda kupkamser kecada, nun kaele cadi, ange lap pepsetepe,” pepra, tali upupu pertamnunge. Dinino, ne kaele, pio tek sisi ngeda, aneng peda, amenda kupkamser kecada, sun peda, pio men kael keptenge.