Ecc 9 | XteSC | STEP | Ange-ange yumada, konum lap pepmasen kecada, tek sisi ne konum tenepsidi kael kepsa cadi, ne dipru neitamai moupra deipsi. Ada, ware neng do yuma, sun moupra tenengedi, pio dumsisi teleppu kunung neng cap, ila kael keami neng cap, anesala yumadi kunge keca yumada, tek sisi, Allah er dipapu talerura cadi, sundi kunkameng ngeda, konum kael kepu. Ange yumada, nong kupkamre do, nong men kupkamre do, telep kupkameng do, sun pel doramengepanen, ange yuma gum kupkamre do? Ange yumada, Allah er dipapu, ange yuma konum tenerure. Nun tuai nesalada, ange yuma men kael keptepe. Nimidi kunge keca deiyoda, yuk neng tep bicau tenenga deiki di kunung do? Agum dingeda, ‘Yuk nesala nun songe’ tenenunga deiki di pel donung do? Ange yumada, nun men kael keptepe. Atep amenda taru kupkamar ngeda, pio men kael kemnunge. Nimi yumada, ‘Ukupkamep’ tenen, piripetenung dinin, sun damai yana kupkamre ikin kecada, nong men kupkamre kecapu, tali-tali keca ton akapkamre.

Ecclesiastes 9

“Tuai nesala yumada, tali dadepkamenge,” pepu upu

1 Ange-ange yumada, konum lap pepmasen kecada, tek sisi ne konum tenepsidi kael kepsa cadi, ne dipru neitamai moupra deipsi. Ada, ware neng do yuma, sun moupra tenengedi, pio dumsisi teleppu kunung neng cap, ila kael keami neng cap, anesala yumadi kunge keca yumada, tek sisi, Allah er dipapu talerura cadi, sundi kunkameng ngeda, konum kael kepu.

Ange yumada, nong kupkamre do, nong men kupkamre do, telep kupkameng do, sun pel doramengepanen, ange yuma gum kupkamre do? Ange yumada, Allah er dipapu, ange yuma konum tenerure. Nun tuai nesalada, ange yuma men kael keptepe. Nimidi kunge keca deiyoda, yuk neng tep bicau tenenga deiki di kunung do? Agum dingeda, ‘Yuk nesala nun songe’ tenenunga deiki di pel donung do? Ange yumada, nun men kael keptepe. Atep amenda taru kupkamar ngeda, pio men kael kemnunge. Nimi yumada, ‘Ukupkamep’ tenen, piripetenung dinin, sun damai yana kupkamre ikin kecada, nong men kupkamre kecapu, tali-tali keca ton akapkamre.

2 Apepmasena deiyoda ake. Ada, ware nesala do yuma, ikin kecada, sun damai yana kunkamre. Dumsisi kunge neng pe, mali kunge neng peda, ikin keca sun damai yana kunkamra cadi, ikin deiki dipu pel dopra kunkamenge. Tonda, amenda sirya taruda, nimi tuai nesala yumada, depkamepe. Atep nengda, mali kunge neng pe, dumsisi kupra telep kunge neng yuma peda, ikin keca sun deiki yankamre. Tonda, gam kuramenganen, amenda taruda depkamenge.

Tonda, angetopu, Allahdi, “Angeda pio men kunkamrume. Akeca kupmumnyopda, ne si eremna tep, ne damai ton men yatume,” pepra, konum lap pepseu. Atep, amem keca tupa kunge nengda, buta palena utopu kununga cadi, Allah damai men yatenge. Amem keca men kunge nengda, buta palena gum neng utopu kununga cadi, Allah damai tupa yatenge.

Ange utopu, Allah karena tep, gam keca popnedi doupra, yana uku dongopnedi karenung neng pe, akeca dopra, men duyana karenung neng yuma peda, ikin keca sun deiki yankamra cadi, amenda taruda sun yuma peda, denapu kunkamenge. Pio telep, dumsisipu kunge neng pe, mali kecapu talepra, mali-mali kunge neng peda, ikin keca sun deiki yankamra cadi, amenda taruda sun yuma peda, depnapu kunkamenge.

Tonda, Allah tep, “Naio, kan gispal dona tep, ukupra-ukupra kunkamne,” pepra pedina upu penge neng pe, Allah tep pedina upu pio men penung neng peda utopu, ikin keca sun deiki yankamra cadi, amenda taruda sun yuma peda, denapu kunkamenge.

3 Wareto nesala do yuma, telep kunge neng pe, malipu kunge neng peda, ikin keca yana, sun deiki yakaramrepanen, amenda taruda, denapu kunkamenge. Ne kangeda, tuai mutu ban-ban yuma neitamaida, angeda pio mali kurure. Tonda, tuai nesala yumada, nimi tupa gam kunge taru neitamai di, nimi tuai nesala yuma, sun dipru neitamai yumada, mali kunange tupa kurure. Tonda, sun dipru neitamai yumada, moupra tenena gum di, mutana talena neng cap, walwal kuna neng cap, kurameng utopu neng ton akurure. Tuai mutu nesala yumada, tupa gam kunge taru yuma, ange utopu kupra kunkamenge. Dinino, dakuramenganen, amenda taruda, denapu kunkamenge. Ange yumada, ukuptunge epsidi kael kepsi.

4 Ware ngebo do yuma, gam tupa kunkamre taru neitamaida, ‘Amenda taruda, telep keca ton ne damai yatupa, teleppu kutene’ tenen, Allah tep mororure. Nimi yumadi ange utopu kunupe. Angeda tali tep men pepsene. Deiyoda ake. Ukupmantoda, nun Israel nesaladi, kam tep, kange men derinup dinin, gam tupa kure kamda, tupa gam kurura cadi, tupa telep kurure. Tonda, nundi, bura tara kuramre ila yu pus, er si singa pus tep nengeda, ‘Uo, apusda ila puto weik, mambul keca kurure,’ tenenup dinin, asinga pus konum depyopda, er peda telep men kurure.

5 Sun gam tupa kunung nengda, ‘Uo, amenda taruda, tek sisi depkamne ja’ tenen, konum kael kemnunge. Ukunung dinino, sun konum deami nesalada, akeca-keca yumada tek sisi pio men tenenunga cadi, men kael kemnunge. Sun konum deami nesalada, pel ton men dopmanto kununga cadi, sun menenga keca ton cap tapakra pio men doronunge. Angepu gum dinin, yuk nesaladi, sun konum deami nesalada, sun si ton cap men tenenunge. Aneng yumada, adipapu lumdongonapu kununge.

6 Tonda, sun konum deami nesalada, tupa gam kurami taru neitamaida, bicau tenedanange cap, yuk neng tep, ‘Ne songe’ tenedanange capda, konum gum kupke. Tonda, sundi yuk neng talenge keca cap, kunge keca cap tep, ‘Uo, ne dipapu ange taleptene, angeda, ne dipapu kuptene,’ teneraminge yumada, konum gum kupke. Anengda, konum deamya cadi, tuai mutu neitamaida, yuk nengdi kunge keca cap, tali dakunkamre keca capda, sunda kikiman pio men kutenge. Tuai mutu neitamaida kururnge yumada, sun cap pio men kutenge. Ne kangeda, angeda pio mali pua.

7 Ange tep nengeda, ne kangeda, ‘Pio telep kuna ngeda ake,’ tenenune. Ada, nun yumada, tali kange deipra jen jertamnapu kunkamepe. Tonda, kange deipra, kange yawaramre meda, tali lupra jenapu kunkamepe. Deiyoda, Allah erda sun kunkamrumnge yumada, konum kael keamnga cadi, ‘Dakunkamenge,’ konum tenerure tenepne. 8 Tonda ne kangeda, sun yumadi, kange deiprumudi, sun urasin deikida, pio urasin ^{▼▼urasin – Ibrani upu deiki di, domon upu utopunge seki. Ada, ‘Sun opkalda, kurun opkal kenengkamrume. Sun giso deikida, minyak me dikra likeipdarume.’ Aupu upepra sekinge deiyoda, ‘Pio telep kange deipra kunkamrume,’ tenena tep, angeda seki.} telep kupmumdi, urasin telep opkal kenengkamrume.

9 Ange tep nengeda, kandi kan ner pio bicau tenerum ner cap, kikiman gam kunkamrum taru yumada, kange deridankamrume. Deiyoda, sun gam kunkamrum taru yumada, tali nong pio men kupkamre keca sun damai yakankamra tepa. Tonda, sun nai bo Allahdi, ‘Anengda ukunkamenge,’ konum tenepseua cadi, amutu neitamai kunkamep taruda, er konum tenemudi, karepseutopu kunkamepe. Atep nengeda, tuai mutu neitamai kunkamep taruda, nong men kupkamre keca, tali kecada, nun damai yakankamsere. Ange tep nengeda, sun tuai mutu neitamai kunkamrum taruda, pio pe deipra, pel puto di donkamrume. Allahdi, ‘Ange kunkamenge,’ konum tenemutopu kunkamepe.

10 Ange tep nengeda, sundi, ‘Apel doptene. Apel talepra piripetepkamne,’ tenepmumtopu, angepu talepra, pio pe deipra, sun pel donkamrum taru yumada, puto weika di pel donkamrume. Deiyoda, amenda taru kan pel dona tep, kan kangeda pio men kupkamkere. Ada konum deiami neng kunung mutu, er si Sheol mutu neitamaida, nimidi tenenung nge cap, pel dona cap, ila kael kemna keca cap, mambul kuna keca tep, ‘Deiyo ngeda ake’ tenen, moupra tenena yuma capda, ton pio men kurure. Tonda, nimi tuai nesala yuma cap, sun capda, amenda taru depmumnyopda, sun peda, ortara bemum dingeda, pio dapu kunkamrume.

11 Tonda, ‘Akeca yuma kael kepkamne’ tenen, epra embaramsi taruda, tuai mutu neitamai kurami keca tep, dipetepsidi kael kepsi. Ada esu pena tep, puto di sepdaro banung taruda, ila puto di sepra banman nengdi, ataru yuma men bisirami. Ange utopu, yuk-yuk mutu nengdi podana tep taru peda, sun ila puto weik nengdi, yuk dakunge mutu neng tep, adipapu men portamnunge.

Tonda, sun ila kael keami nengda, ataru yumada, sundi jen keca dopra men jenunge. Tonda, ‘Deiyo ake’ tenen, mambul keca tep, ila di konum kael keami nengdi, pel weik donung dinin, ataru yumada sundi sun menenga tep, kunumna weik keca cap, bung keca cap ton men doronunge. Ange utopu, pel pio telep kupra donge deiyo nengda, sun pel dona deiyo nengdi, sun tep kange deipra, telep keca men karenunge.

Deiyoda ake. Nundi men tenepmanto keca, nun damai ila ikin keca yankamser taruda, pio men kael keptepedi, men teneptepe. Nun tuai nesala yumadi, ‘Ukunkamepe’ tenen, piripeteptepe dinin, ikin keca nun damai yaryopda, ange deiki di men kupmanto kuserure.

12 Angeda, tali tep men pepsene. Ware nesala do yumada, ‘E, amenda taru neitamai, atumi deiki di, ila ikin keca yankamre. Atumi deiki di kange mun keca ton yankamsere,’ tenen, men kael keptepya cadi, men lap peptepe. Ukupmantoda, tali lakra embaramre madi, men teneptu dinin, mankau kange doupra embandenkap, nimidi ma pena pemenga pumbon wekrepa youramretopu, nun peda utopu kunkamepe.

Tonda mekina youna tep keca, er sida jala, me pumbon deipra gerekmangepa, mekina mankau di barepa, youramretopu kunkamepe. Ange utopu, nimidi, ‘Uo, ikin kecada ataru di nun damai yankamre,’ tenen, akeca kapul men yaramre taru, adipapu men kael keptepya tep, men lap peptepe. Nun tuai nesala yumada, denapu kunkamepa cadi, nun mankau kange doupra kupe taru neitamaida, menmena dipapu, ikin keca yaryopda, kange mun kange doupra kunupe. Ange kapul men kupsere taruda, men kael keptepe.

Ila kael di kunkameng nge cap, tali-tali kunkameng nge cap tep, pepu upu

13 Ne Peteremna Deiyo Ngebodi sun yuma tep, aupu ton pepsene. Tuai tara neitamaida, akeca ton epsidi kael kepsi. Ada, ton tara nesaladi, ila kael kemna keca kael kepi kunmaipa, epsa tep, nedi, ‘Uo, ange ukupra kunmangada, pio telepe,’ tenepsi.

14 Amutu neitamaida, tenpu ngeboda, tek sisi ila di kael keamnga deiki di kupmau ngeda, pio telepe kunmaupa, epsi. Ada, tenpu mutu neitamaida, nimidi metek ati arum domya neitamaida, nesala yambulanunpu akati arum neitamai kurami. Tali kange doupra dakurami dinin, amenda taruda, ila puto weik nimi deiyo ngebo, yuk mutu Raja ngebodi, “Amutu nesala popnyopda, sun bung keca yuma dalupra dopropkamne ja!” pepra, sun damai yau.

Yau dingeda, ‘Amutu dana-dana ongopdongopra wiami gel beilya deiki tara welepnedi, sun mutu neitamai weknyopda, anesala yuma popra gawal dakamne,’ tenepu. Ukupra tenepka tep, tu weika di paliprapudi, sun lyom gel beilya damai deipudi ketenepu.

15 Ketenepu dinin, amutu neitamaida, nimi tali kan-kan ngeboda, akeca-keca yuma pio gum ngebo tenpu kuramu. Angeboda, moupra kael kemna ngebo kuramu. Ukuramnga cadi, er ila di kael keamu keca deiki di, er mutu neng tep melipra, lyepra deipu. Dinino, amutu neitamai kurami nengdi, atali kankan ngebo tep, ‘Telepe,’ pena gum di, er tep, tenpu keca peda, men karepi. Sundi er tep, pio men teneramidi, konum lumdongonapu kurami.

16 Ange yuma epsidi kael kepsa tep, ‘Uo, puto weik kunada mambul kurur dinin, tek sisi pio telep ngeda, ila kael kemna pua. Dinino, atali kankan ngebo, er ila kael keamudi kupu ngeda, sun amutu nengdi, ‘Dakwapye, erda mambule gume,’ tenepidi, er tep kaukemnapu kurami. Tonda, angebodi, “Telep kuna ngeda ake, ake,” pepra lap peramu upu yuma peda, sundi men gekepra kurami.

17 Ange deiki di kael kepsi. Ada, pio telep ngeda, er ila kael kemna ngebodi, bouna di mur-mur peramre upu yumada, mambul weik kurura cadi, nimidi ange moupra gekeptengedi kael kemamtenge. Dinino, tenpu ila nimi deiyo ngebo Rajada, puto weik kuptu dinin, er mutu neitamai, walwalpu kupra kunge neng kunungaida, ila upu di peptua peda, sundi pio moupra men gekepmengedi, men kael kemkamenge.

18 Jen talena nengdi dounung jen cap, mar cap, yuk nimi pona tep keca capda, yambul mambul kurur dinin, ila kael kemna deiyo kecada, tek sisi pio mambul kecapu kurura cadi, pio telep ngeda, akonuma. Tonda, walwal ngebo tenpu, er kangeda wang-wang pepyopda, pio telep kun keca weik akaptua peda, angebodi atelep keca yumada, mali kupra deriserure.