Ephesians 1

Paulusdi, ‘Telepe,’ pena tep, pepu upu

1Telepe, ne kayapu, ne Paulusdi asurat sekeipsene. Allahdi ne tep teneamneudi, wepra deipneutopu, Yesus Kristus er upu dopra peterembana tep, gonga kemna deiyo ngebo, Rasul ngebo kunune. Asuratda, sun Efesus mutu kumumdi, Allah tep teka tenepmumpa, erdi wepra deipseu nesala tep sekeipsene. Sunda, Yesus Kristus cap dipru dukdongopra kumumdi, pio tamna gum di, erpu talepra kumum nesala tep, asurat sekeipsene. 2Nedi sun tep Allah morosenun kecada pepkusene. Nun nai bo Allah cap, nun Deiyo Ngebo Yesus Kristus cap, sun butene di, sun Efesus mutu teka tenerum nesala tep, bicau teneserengedi, sun kange dipapu mambul pel dona deiyo keca melipra kareserenge keca cap, tonda, ‘Yu tenedana gum di, kange deipra teleppu kikiman kunkameng’ tenen, kareserenge deiyo keca cap, kareserunge. ‘Ange yumada, tupa-tupa weika di tapakra karenkamsereng’ tenen, sun Efesus mutu kurum nesala tep Allah morosenune.

Allahdi Yesus Kristus deiki keteneipseunge yuma tep, Allah er si erepra, “Telepe,” penupe

3Nun Ila Deiyo Ngebo Yesus Kristus, er nai bo Allah tep, “Telepe,” pepra pio penkamepe. Allahdi Kristus cap dipru dukdongopseua deiki di, konum telep kupra deipseue. Ada, nun kange dipru telep kudina tep putaserur keca yala-yala yumada, im deiki di konum ketenepra deiamseudi, kareserure. 4Apepmasen upuda, tali tep men pepne. Deiyoda, Allahdi akeca-keca yuma kapul men ketekeipu taruda, nun tep wepra deiamseudi, ukupra teneamseue. Ada, ‘Anengda, Kristus cap dipru dukdongopnepa, er deikipu kungopda, ne Allahdi sun tep tenenkamsene taru yumada, anengda, mali kuna gum dipapu, mengne nengpu kununge,’ tenenkamsene. Ada Kristusdi pel dopseua deiki dipapu tenenkamserada, ake. Ada, ‘Anengda, mali kunange gum di, pio dumsisi kun nesalapu kununge,’ tenenkamsere. Tonda, ware nengdi do, nun tep, “Anengda, sun mali kun keca ake-ake,” pepra, Allah tep men peptenge. Ange pepmasentopu, Allahdi nun tep, ‘Ukunkamenge,’ teneamseudi wepseue.

5Tonda, Allah pio bicau teneamseua tep, nun nai yapudi kapul men deipsei taruda, menop taru Allahdi ukupra teneamseue. Ada, ‘Anengda, ne nyapu sisa kunkameng’ tenen, ‘Yesus Kristus pel dopkamra deiki di gwanamkamsene,’ teneamseudi, wepra deiamseu. Ukupseuada, er kange dipapu dipru karepudi, nun tep kange deipseudi, wepseue. 6Ange yuma konum kupseua tep nengeda, nimi yuma kael kepmengopda, “Uo, Allahda, bicau teneseredi, er kange dipapu melipra karesere kecada, ila mambul weike. Allahda pio teleppu kurure,” pepra, er si ila di eremkamenge. Allah bicau tenepseudi, er kange dipapu melipra kareserenge yumada, er Mi Sisa Yesus deiki di kareserure. Allahdi er Mi Sisa Yesus tep nengeda, dipru karepra pio kange derirure.

7Er mi Yesus, yu nengdi popipa, er yapi embeua deiki dipu, nun mali kunup keca yuma kaukepseudi, gum kupra deipseue. Nun mali kuna tep adipapu poptapsetu dinin, nun pununa tep depseue. ‘Anesalada, ne nyapu kunkameng’ tenen, nun mali keca ateng kouamseua neitamai di, loptapra kunupseudi, lyepseue. Ukupseu ngeda, yambula dipu gume. Allah er bicau teneserenge cap, er kange dipapu melipra kareserenge cap, ila di akuretopu, weika di kareamseudi, tupa kareserure. Ada, nundi er upu yanitamnapu kuramepupanen, nun mali kecada men nukmanto kapseu dinin, ange yuma gum kupra deipseudi lyepseue. 8Allah bicau tenepseudi, er pe kange dipapu nun lyemna keca tep weika di melipra karepseuada, men nukmanto. Ila weika di bicau teneamseudi, lyepseue. Tonda, ila kaele kemna cap, akeca-keca yuma tep, ‘Deiyo ake’ tenen, pio moupra teneamunge cap deiki di lyepseue.

9Tonda, menop taru Allahdi nimi lyemna tep, ‘Kristus deiki di, tuai nesala lyemna keca keteneipkamne’ tenen, kange deipra konum teneamu dinin, akunkamunge yumada, menop taru iniamupa, nimi men kael keami. Dinino, ukutaruda konum katuai di lape peipseu. Allahdi, ‘Ukupkamne,’ teneamunge yuma tep, kange deiamnga cadi, ukutaruda Kristus pel dopka deiki di konum kupseue. 10Allah kange deiamnga cadi, ukupra teneamu. ‘Gume, ne teneamsi taru konum kupyopda, ware keca do yuma, tuai kure keca yuma cap, im deiki kure keca yuma cap, dopropnedi, tenpu Ila Deiyo Ngebo, Yesus Kristus, akeca yuma er amutara deipnepa, teka tenenge nesala yumada, er cap dipru dukdongopra, telep kupra er cap kikiman kunkamenge. Kristusda, tuai kure keca cap, im deiki kure keca cap, akeca-keca yuma deiki tara kuredi, ila nimi deiyo kupra talenkamre,’ Allahdi teneamu. Allah pumun taru teneamudi, ange yuma iniamu dinin, ukutaru konum katuai keipseu ngeda, akonum pepsene. Ne Paulusdi pepsene.

11Uda, Allah erdi, ‘Ukunkamne, ukunkamne,’ teneretopu, akeca-keca yuma taleredi, pel dorepa, akeca yuma erdi teneretopu, apu kurure. Tenpunge peda, men tamrure. Ange utopu, menop taru, nun kapul men deipsei taruda, Allahdi nun tep, wepra deiamseudi utenepseue. Yesus Kristus tep teka tenepmepua deiki di, Yesus cap dipru dukdongopra kunmepyanen, sirya taruda, Allahdi, ‘Akeca-keca karepnepa, pio talenkamenge,’ tenen, keteneipseunge yumada, karepkamsere. 12‘Anesalada, konum lyepnepa, nesala yuma ange epra kael kepmengedi, ne si ila di eremnengedi, “Allahda pio telepe,” pepra, gispal pio donkamnenge,’ teneamseu. Ange teneamseua utopu, Allahdi wepra deiamseupa, nun Yahudi yala nesala kankan di, Kristus tep, ‘Er dipapu lyepkamsere’ tenen, menmena nun kange er deiki deipmepudi, teka tenepmepu. Allahdi konum wepseu nesalada, menmena di er tep teka tenepmepu.

13Uda, sun Yunani nesala, Efesus mutu kurum nesalada, Allah er tek sisi upu peteremamseipa, gekepruma deiki di, Allahdi sun cap, Kristus cap, dipru dukdongopra deipseue. Allah er kai telep upu, nimi lyemna upu gekepmumdi, teka teneprum pangeda, Allahdi, “Ne Lek Sambala karenkamsene,” pepra pediramseu ngeboda, sun tep ton karepseupa, sun dipruai wekseu. Ukupmanto ngeda, nimidi, ‘Yuk dakunge nengdi, ne bisam kael kepkameng’ tenen, amul sengamengtopu, Allah er Lek Sambala dopropruma deiki di, petenkemnange konum keipseupa, er mawa nesala, er nyapu konum kurume.

14Allah er Lek Sambala konum karepseua deiki di, nun kange dipru men teniptoptepe. Gume, ukupmantoda, ‘Wa peramupu keca yuma kiryankamepe’ tenen, menmena weni kwaneng deriramengtopu, Allah er Lek Sambala menmena karepseua deiki di, nun kaele. Allahdi keteneiamseunge yumada, karepserepa tek sisi dopropkamepe. Allahdi nun yuma tep, ‘Ne nyapu kunkameng’ tenen, nun mali kuramupka neitamai di, konum loptapra kunupseu. Kunupseupa, er Lek Sambala cap dakuramepepane, amenda sirya taruda, pio mumupra telep kupra deipseredi, er damai dubenkamsere. Ange yuma tep nengeda, nesala ban-ban yumadi, “Allahda pio telepe,” pepra, er si ila di eremengedi, er tep gispal donkamenge.

Paulusdi Efesus mutu neng tep teneamudi, Allah tep, “Telepe,” pepra, mororamu upu

15Allahdi telep kupra deipkamsera tep, sun Efesus mutu nesala teka teneprumpa, gekepsi taru di dipra, ataru yumada, sun tep Allah morosenune. Ada, yuk nengdi ne tep, “Sun Efesus mutu nesaladi, nun Deiyo Ngebo Yesus tep, konum teka tenepi. Sundi Allah tep teka tenenge nesala, yuk mutu nesala yuma tep, bicau tenepra makunapu kununge,” pepra lap pepnei. 16Upepnei taru di dipra, ukutaru yumada, sun tep tenepnedi, “Ne nai Allah telepe,” pepra, sun tep Allah tupa morosenune.

17Sun tep Allah morosene taru di morone kecada, lape pepkusene. Ada, ake. ‘Nun Deiyo Ngebo Yesus Kristusdi si eremamu Allah, er nai Allahda, tonda nun pio mambul nai bo Allahdi, sun tep, melimseredi, sun kange dipru neitamai, ila kael kemna deiyo keca cap, Allah tenere keca moupra gekena deiyo keca cap, karenkamsere’ tenen, Allah morosenune. ‘Akeca kareserea deiki di, Allah er kure keca yuma, ila di kael kepra, er cap dipru dukdongopra kunkamruma’ tenen, Allah morosenune. Tonda, ‘Allah tep kael kemrumu ngeda, tapakra weik kupbankamre’ tenen, Allah morosenune.

18Tonda, ange ton Allah tep morosenune. Ada, Allahdi sun kange dipru neitamai, kael kemna deiyo ngedi dirin kareserepa, erdi keteneamseu keca yuma tep, ‘Pio moupra kael kemkamrum’ tenen, Allah morosenune. Erdi keteneamseu ngeda ake. Ada, Allahdi, ‘Ne cap, sun cap, amenda taru pio telepaipu dipru dukdongopra kikiman kunkamepe’ tenen, upupseupa, sundi ketenepra dinapu kurum keca yumada, moupra kael kemkamrume. Tonda, Allahdi, ‘Ne nyapu tep, pio telep kupra deipnedi, pio teleppu kunkamenge. Ukupmengepa, ne cap kikiman kunkamepe’ tenen, ila weika di ketenepra deiamseunge, ‘Ange yuma kael kemkamrum’ tenen, Allah morosenune.

19Tonda, erdi nun teka tenenup nesala tep, er puto weika di nun dipru neitamai di melipra pel dosere ngeda, ‘Ware kuprap kurur do?’ tenen, men tenepmanto kuserure. Angeda men nukra lap pepmanto kurur dinin, ‘Ayuma moupra kael kepbankamrum,’ tenen, Allah morosenune. 20Allah er puto weika di melipra karesere ngeda, yuk puto gume. Ada, Allah er ila puto deiki di Yesus gam bukra deipu. Aputo deiki dipu nun ton kareseredi melimserure. Yesus Kristus depupa, Allah er ila puto deiki dipu, Yesus gam bukra deipudi, ‘Ila Deiyo Ngebo pio kunkamre’ tenen, Allah er dumsisi tara im deiki dubena deipupa, Yesus acapu buku. Im deiki di, Yesusda Allah er dumsisi tara bukudi, tupa akurure.

21Allahdi Yesus dopra, er dumsisi tara im deiki bukra deipu ngeda, ware puto kure keca do yuma, ware isok-isok do yuma, tonda ware nesala do yuma, er amutarapu kungepa, Yesusda sun deiki tarapu, ila puto weik ngebo kurure. Akeca-keca yala-yala yumada, er dipu talerure. Uda, im deiki kure keca do, tuai kure keca do, dan mutu kure keca do yuma, akeca-keca yuma talepra, ila nimi deiyo utopu keca cap, mali puto kure keca cap, isok-isok yuma capda, Yesus er amutarapu kurure. Ila puto weik ngeboda, Yesus pua.

Adeiki tara kupra, akeca talepra deiyo neng yuma cap, im cap, tuai cap, ban-ban yuma bokra, talenge deiyo isok yuma cap, ila mali puto kure keca yala-yala yuma cap, Yesus erda akeca yuma deiki tarapu kurure. Ila puto kurepa, ila mambul keca tep, nimidi ila si pepra penung dinino, akeca-keca yumada, sun si yambul mambul pua. Yesus er sida, ila puto weiknge kurure. Atep, ila si pepra erepmanto keca yumada, amutarapu kurur dinin, Yesusda akeca yuma deiki tarapu kurure. Erda akeca yuma deiki tara Ila Deiyo Ngebo kunkamrada, ukutarupu gume. Erda amenda doryankamre taru yuma peda, utopu, akeca yuma deiki tarapu pio kunkamre.

22Tonda, Allahdi Kristus tep, ila di erepra deipudi, ware kure keca do yuma, akeca-keca yuma dopra, Yesus er amutara deipu. Yesusda, akeca yuma deiki tara kuredi, akeca yala-yala yuma talerure. Akeca yuma talepra, Ila Deiyo Ngebo kuryada, nundi Allah tep teka tenenup nesala yuma peda, nun Ila Deiyo Ngeboda, Yesuspu kurure.

23Ukupmantonge tep pepkusene. Nun buru cap, yan cap, nong cap yuma dukdongopra tenpu nongpu kupepa, nun nong deikida, giso akapseretopu, nun teka tenenup nesala yumada, Kristus er nong utopu kunupe. Erda, nun deiyo ngebo kuserura cadi, nun giso utopu kurure. Ware keca do yuma, Yesus akeca yuma talepredi, mumupra gawal dakredi, telep kudiramretopu, er tep teka tenepmepedi, er nong utopu kunup nesalada, nun telep kudina tep, nun kange dipru putaserur keca yuma kareserepa, dekpeserure.