Eph 2 | XteSC | STEP | Ne kayapu, sun Efesus mutu kurum nesalada, pumun taru sun mali-mali kuramrumai cap, Allah er upu yaniptapmarumai cap, ukupra kuramruma deiki di konum deameng nesala utopu kuramrume.

Ephesians 2

Allahdi pio gam kuna deiyo keca karepseunge tep, pepu upu

1 Ne kayapu, sun Efesus mutu kurum nesalada, pumun taru sun mali-mali kuramrumai cap, Allah er upu yaniptapmarumai cap, ukupra kuramruma deiki di konum deameng nesala utopu kuramrume. 2 Pumun taruda, sun Yesus tep teka tenena gum nesaladi, mali-malipu kuramengtopu, sun Efesus mutu kurum nesala peda, utopu mali weik kuramrume. Asuru men eptepe dinin, im neitamai embarameng isok-isok, sun tep talepnepa, sun ila deiyo ngebo Kain Jen Ngebo, er upu gekepra kuramrume. Uda, Allah er upu yanitamenge nesalada, Kain Jen Ngebo, er dipapu sun dipru talerepa, mali weik kununge.

3 Pumun taru, teka kapul men tenemepu taruda, nun yumadi amali kunge nesala cap wisipra kuramepudi, tali kange doupra, nun kange dipru neitamai teneamepunge cap, mali keca putaramseunge cap deiki di, tali lupra mali-mali kuramepu. Amali tenena cap, mali kuna capda, tuai kunge nesala yumadi utopu kununge. Allah er kure kecada, pio men tenengetopu, nun peda pumun taru men teneramepu. Ukupra kuramupka deiki di, mali-mali kurameng nesala utopu, Allahdi nun nimi yuma tep, ‘Anesala mali kunga tep, ne song’ tenen, ‘Yu weik kupnerepa, amali kunge nesala yuma wenepra poptapkamne,’ teneamseue.

4 Mali-mali weik kuramepunge cap, mali tupa kunup nge cap tep, adipapu tali lupra wenepra poptapsetue. Tek sisi konum popmasetue. Dinino, Allahdi nun yuma tep, pio weika di bicau tenepseudi, lyepseue. Lyepseudi, Kristus cap dipru dukdongopseua deiki di, konum depi neng gam bukra derina utopu, telep kupra deipseudi lyepseue. Allahdi nun mali kuna tep, konum poptapmasetu dinin, ‘Uo, sunda bicaue’ tenen, kaukepra bouna di dipru kareseryada, yambula dipu gume. Weika di bicau teneseredi, dipru kareserure. 5 Nundi er upu yaniptapra mali-mali kuramupka deiki di, konum depi nesala utopu kuramepu dinin, Kristus cap dipru dukdongopseua deiki di, gam bungdina utopu, telep kupra deipseudi, lyepseu. Allahdi lyepseuada, yuk deiyo deiki di gume. Er bicau teneamseudi, er kange dipapu tali meliamseua deiki di lyepseue. Nun telep kuna tep gume.

6 Kristus popipa, Allahdi Kristus gam bukra deipka deiki di, Kristus cap dipru dukdongopseua cadi, nun peda gam bukeipseue. Ange utopu, Allahdi Kristus dopra, im deiki dubena, erepra deipupa, buku. Ange deiki di, Kristus cap konum dipru dukdongopseua cadi, nun peda im deiki bukra deipseue. Ange yumada, Yesus Kristus cap dipru dukdongopra kikiman kunupa deiki di kuserure. 7 Uda, Allahdi Kristus cap dipru dukdongopra gam bukeipseudi, im deiki tara bukra deipseua deiyoda ake. Ada, Allahdi uteneamu. ‘Anesala lyepnedi, gam bukra im deiki deipnyopda, ataru di dipra, amenda doryankamre taru, sirya taru kunkameng nesala yuma, kael kepnengedi, upenkamnenge.’

“Gume, nun lyemna tep, Allah bicau teneseredi, er kange dipapu melipra karesere ngeda, men nukmanto. Pio weika di dipru kareserure. Nun lyemna tep, Allahdi Kristus karepseupa, er pel dopka deiki di, lyepseue. Angeda konum katuai kupseua tep, ange konum kael kepmepe,” pepra, ‘Ne si eremkamneng’ tenen, Allahdi ange yuma kupseudi, lyepseue.

8 Allah er kange dipapu lyepseue pepmasenada, tali tep men pepsene. Deiyoda ake. Sundi Allah tep, konum teka tenepruma deiki di, Allah er kange deiki dipapu lyemserure. Angeda, sun telep pel dopra, dumsisi kuruma deiki di men lyemserure. Ange pio gum dinin, Allah er kange dipapu bicau tenepseudi, lyepseue. Er kange dipapu lyemserurada, ‘Mesum dipapu teka tenena deiyo keca karenepa, anesaladi teka tenepnetenge’ tenen, karepseudi, kange deipra lyepseue. Ange utopu ton tupa kuserure. 9 Nunda telep pel doramupka deiki di men lyepseua tep, ware ngebo do yuma, sundi, “Gume, ne telep pel doramsa deiki di, Allahdi lyepneue,” pepra gemena upu men peptenge. Ada men pepmanto keca tepa. 10 Allah er kange dipapu lyepseudi, telep kupra deipseua cadi, Kristus cap dipru dukdongopseua deiki di, ukupu nesala utopu kupra deipseupa, kunupe. Lyepseudi, ukupu nesala utopu keipseua deiyoda, ake. Ada, menop taru Allahdi nun teka tenenup nesala tep, ‘Telep kun keca yala-yala yuma pel dopra kunkamenge,’ teneamseua tep, Kristus deiki di ukupu nesala kupra deipseupa, kunupe. Ne Paulusdi pepsene.

“Kristus cap dipru dukdongopra kunupa deiki di, tenpu yala neng utopu kunupe,” pepu upu

11 Uda, ne kayapu, Allahdi tenpu nong utopu konum keipseua cadi, ne pepkusen upuda, men lumdongonkamrume. Pumun taru Yahudi yala nengdi, sun Efesus mutu nesala tep, uperami. “Sun Efesus mutu nesalada, sun apu yapuda, Yahudi yala gum nengdi deipsea tep, sunda bura tara utopu neng kununge. Yahudi yala gum nesala kununge. Sunda den bam bol men sengnunga ^{▼▼den bam bol sengna – Aupu deiyo kael kemna tep, lap pena upu nomor 19 dirume.} tep, sunda mali neng kununga cadi, Allah er damai men yatenge,” tenepra peramsei. Aupu perami nesaladi, sun Efesus mutu nesala pe tep uperami. “Nunda Yahudi yala nesalada, yuk neng yuma, ‘Sunda Allah er nyapu sisa kununge tenepkamseng’ tenen, den bam bol sengnupa cadi, nunpuda telep neng kunupe,” pedarami. Uperami dinin, den bam bol sengnada, nimidi, sun pe buru di pel donunga cadi, adeiki di Allah er nyapu sisa men keipdatepi.

12 Tonda, pumun taruda, sundi Yesus kapul men teka teneamruma cadi, sun cap, Kristus cap, dipru dukdongopra kapul men kuramrume. Sun apu yapuda, Israel yala nesala men kuramia tep, Israel yala nesala cap, wisipra amsepu kikiman men kuramrume. Allahdi Israel yala nesala tep, “Ukunkamsene, ukupra karenkamsene,” pepra, pedina upu deriramu dinin, sun Efesus mutu nengda, bura tara nimi bo neng utopu kuramruma cadi, ange yumada, men dopropmanto kuramrume. Sunda, Allah er si tenena cap, er tep teka tenepra kikiman kuna cap, pio men kuramruma tep, ‘Allahdi lyepkamsera tep, ketenepra dinkamepe,’ men teneamrume. Talipu kuramrume.

13 Pumun taruda, Yesus kapul men kael keamrum taruda, sunda pio karen mutu kunge nesala, pio bura tara utopu nesala kuramrum dinino, ukutaruda, gume. Kristus er yapi embeua deiki di, Kristus cap, nun teka tenenup nesala cap, dipru dukdongopra konum deipseua cadi, Allah er tara neng keipseudi, er damai konum dopra deipseue. Ukutaru sun Efesus mutu nengda, sun ton teka konum tenepruma tep, sun peda, Allah er nyapu konum kurume.

“Pumunda, yuk-yuk kuramepu dinin, Kristus deiki di dipru dukdongopseudi, amsepu keipseupa, Allah er nyapu kunupe,” pepu upu

14 Pumun taruda, nun Yahudi yala nesala cap, sun Yahudi yala gum nesala, yuk-yuk yala nesala cap, kikiman kuna gum di, pio yuk-yuk kuramepu. Dinino, ukutaruda, Kristus er nong tenpu karepseudi, depseua deiki di, sun cap, nun cap, Yesus cap, antapra amsepu kupra deipseue. Men di, nun dana tara, sunda dana tara, neitamaida, ila lyom beilya utopu kwamupa, dipru wilipdanamepudi, men antapdanmanto kuramepu. ‘Anengda nun songe,’ tenedaramepu. Ukupra kuramepu dinin, Kristusdi abeilya utopu kupseu ngeda, uruptapudi, tenpu yala nesala utopu konum dukdongopseudi, tenpu yala utopu nesala kweipseue. Ukupseuada, Yesus Kristusdi nun yo pununa tep, depseua deiki di dipru dukgongopra tonpa kweipseue.

15 Nun cap, sun cap, ‘Nun song,’ tenedaramupudi, dipru wilipra pio yuk-yuk kuramepu. Dinino, Allahdi, “Ange kunkamrume, angeda, men kunkamrume,” peipupa, Musadi sekeipseu mem upu kwamu ngeda, Yesus depka deiki di konum sirya gawal daku. Ukutaruda, aupu moupr talepmepya deiki di, Allahdi men lyemserure. Amem upu weik akapupa, nun Yahudi nesaladi aupu talepra, pio pe deipra dombaramepu dinin, Kristus er nong karepseudi, depka deiki di. lyemserura cadi, amem upu yuma deiki di tupa men lyemserure.

Ukupseua deiyoda ake. Ada, ‘Yahudi yala nesala cap, Yahudi yala gum nesala, yala-yala yuma kunge nesala cap, yuk-yuk kunung dinin, ne nong deiki di, anesala yuma dipru dukdongopnepa, nong tenpu utopu kupra deipnepa, ukupu ngebo utopu kunkamenge’ tenen, telep kweipseue. Yesus er nong karepseua deiki di, konuma, nun Yahudi yala nesala cap, sun Yunani yala nesala cap, er Yesus cap, dipru dukdongopra bouna di telep kupra deipseupa, ukutaru amsepu kunupe. Ukutaruda, ‘Songe,’ men tenedanupe. Tali kange deipra, telep kupra kikiman kunupe.

16 Tonda, Yesusdi uteneamu. ‘Ne sengdin co deiki popnenga deiki di, anesala yuma cap, ne cap, dipru dukdongopra telep kupra deipne dingeda, Allah cap, anesala yuma cap, antapra telep kudinkamne,’ teneamseudi, nun yo pununa tep depseu. Sengdin co deiki depka deiki di, nun Yahudi yala neng cap, sun Efesus mutu kurum Yahudi yala gum neng cap, ‘Nun songe,’ tenedaramepu keca deiyoda, konum gum kupra deipseue. Ukuda tenpu nong utopu kupra kunupe.

17 Kristus yaudi, Allah er kai telep upu, nimi lyemna upu peteremamseu. Nimi yala-yala yuma cap, Allah cap, dipru dukdongopra kikiman telep kuna cap, yu tenedan gum di, kange deridana cap tep, er upu peteremamseupa, sun pio bura tara utopu kuramrumdi, Allah damaida, pio karenai utopu nesala, sun peda aupu gekeramrume. Ange utopu, nun Yahudi yala nesala, Allah er meneng damai utopu kunup nesala peda, aupu ton gekeramepu. 18 Aupu karepseupa, gekeramupka deiyoda ake. Ada, sun cap, nun cap, uda nimi yala-yala yuma cap peda, nun nai bo Allah cap, dipru dukdongopra kikiman kuna tep, tenpu bisipu kuserure. Tonda, nimi cap, Allah cap, ‘Song’ tenedana gum dipapu, kange deipra telep kuna tep nengeda, Yesus Kristus depka deiki di konum keteneipseue. Atep, nundi teka tenepepa, Allah er Lek Sambala karesere pangeda, nun yuma cap, Allah cap, kange deipra, teleppu kikiman kunupe.

19 Kristus deiki di, Allah cap, nun yuma cap kunupa tep nengeda, menop taru sun Yahudi yala gum nengda, yuk mutu nimi bo neng utopu, pio bura tara utopu nesala kuramrum dinin, ukutaruda gume. Ukutaruda, sun cap, Allahdi, ‘Anengda, ne nyapu sisa’ tenen, talesere nesala yuma cap, amsepu kupra, tenpu mutu nesala utopu kupra deipseupa, kikiman kunupe. Sun pe, nun peda, teka tenepmepyopda, tek sisi Allah er yala neng, er nyapu sisa kunupe. Sun peda utopu kurume.

20 Ukupmanto upu ton pepkusene. Gel ati dopra dona deiyo nengdi, pio kunkamre gel ati dopkunge taru di, ‘Akati pio akunkamre’ tenen, akati ayumna tep, tu palipra, ila puto gel yakra deipmengedi, adeiki di ati nong dorameng utopu, Allahdi er nyapu nun yuma tep, telep kudiserure. Allah er upu dopra peterembana tep, gonga kemna deiyo neng, Rasul neng cap, Allah er upu cap, amenda kunkamre keca tep lap pepra peteremsenge neng, sun nabi-nabi deiyo neng cap, sunda ati ayumna tep, gat gel yakra derirameng utopu kusenunge. Pio ati dopkunge taruda, ati ku kemnai derirameng gelda, ‘Ati dela yuma kwiryepu kuprepa, akati pio akunkamre’ tenen, mambul gel deipmengedi, agel deiki, akati nong yuma dopra deriramengtopu, Kristus er peda, amambul gel utopu, nun Deiyo Ngebo kuserure.

21 Ati dopmenge taru, ati nong dopbaramenganen, akeca-keca yuma dukdongopra dopmengedi, gawal dangamengtopu, Kristus cap, amsepu kunupa deiki di, Allahdi dipru dungdongoserepa, tenpu ati nong utopu kunupe. Nunda, Allah er pio telep mengne ati utopu kunupe. Erdi, ‘Akati neitamaida, ne pe kunkamne’ tenen, nun dipru neitamai pel doserure.

22 Uda, sun Efesus mutu nesala peda utopu, Kristus cap, dipru dukdongopra kumumpa, Allahdi sun cap, yuk teka tenenge nesala yuma cap dopra, tenpu ati nong utopu kemdiseredi, dungdongoserure. Akati pumbon utopu, ada nun dipru neitamaida, Allahdi er Lek Sambala kareserepa, wekra kuserya deiki di, Allah er peda nun dipruai kuserure.