Ephesians 3

Paulusdi, “Yahudi yala gum nesaladi, ‘Allah tep teka tenenkameng’ tenen, pel donune,” pepu upu

1Ne kayapu, arup pepmasentopu, Allahdi nun yuma tep, Kristus pel dopseua deiki di, nong tenpu utopu kupra, dipru dukdongopseua tep nengeda, nedi sun Yahudi yala gum nesala tep, Allah morosenune. Ukutaruda, nedi sun Yahudi yala gum nesala tep, Yesus Kristus er upu peteremamssisipanen, yu nengdi ne tomopra, ateng koupra wenemna ati pumbon dongopneipa, kunune. 2Uda, ne kangeda, ne pepkusen upuda, yuk nengdi konum lap pepipa, konum gekepra kael keamnerume. Ada, Allahdi sun Yahudi yala gum nesala tep, bicau teneamseudi, er kange dipapu, ‘Anesla ton melipra lyepkamne’ tenen, keteneipseu ngeda, ‘Angebo Paulusdi aupu dopra peterembenkamre’ tenen, erdi ne wepra deipneupa, er kai telep upu, nimi lyemna upu dopra, sun damai peteremyasisi. 3Angeda, asurat neitamai di metekanun konum sekmasene. Ada, Allahdi, ‘Ukunkamne,’ teneamu keca, menop taru iniamupa, nimi yuma men kael keami dinin, ne dipru tamopneudi, katuai di lap pepneupa konum kael kepsi.

4Atep, ne konum sekmasen upu dopra, nukra penkamruma deiki di, moupra gekepmumdi, kael kemkamrume. Ada, Allahdi, ‘Ukunkamsene,’ teneamseudi, Kristus depupa, mambul pel dopseua deiki di, konum keteneipseu dinin, iniamseu keca, ‘Deiyo ake’ tenen, moupra kael keamsitopu, asekmasen upu nukra perumupa, ‘Sun peda kael kemkamrume’ tenen, pepsene. 5Allahdi Kristus karepseupa, er pel dopseua deiki nimi lyemna deiyo keca konum keteneipseu ngeda, pumun taru kurami nesala yuma tep, katuai di lap men peramnga tep, sundi men kael kemami. Dinino, ukutaruda, Allah er upu dopra peterembana tep, gonga kemna deiyo neng cap, er upu lap pepra peteremna nabi-nabi neng cap tep, Allah er Lek Sambaladi, aupu yuma katuai di sun dipru neitamai lap peramupa, aneng yuma moupra kael kemnunge. Adeiyo neng yumada, Allahdi wepra deiamnga cadi, sunda mali kuna gum di, pio telep mengne neng kununge.

6Allah iniamu dinin, er Lek Sambaladi katuai lap peserur upuda ake. Ada, ‘Allah er kai telep upu, nimi lyemna upu gekepra teka tenepmenga deiki di, sun Yahudi yala gum nesala peda, Allah dopropredi, melipra talenkamre. Sun peda er nyapu kunkamenge’ tenen, Allahdi Yahudi yala nesala, Israel nesala tep, “Ukunkamsene,” pepra deriramunge yumada, sun Yahudi yala gum nesala, yala-yala nesala yuma peda doronkamrume. Sun cap, Israel nesala cap, Yesus cap, dipru dukdongopra, nong tenpu utopu konum telep kupra deipseue. Tonda, Allahdi, “Kristus pel dopseua deiki di ukupra kunkamsene,” pepra derirsere keca yumada, sun cap, nun cap, Yesus tep teka tenepmepyopda, adeiki di amsetopu doronkamepe. Ange yuma doronkamepa deiyoda, ada er kai telep upu, nimi lyemna upu teka tenenupa deiki di, kareserepa doronupe.

7Uda, Allahdi nimi lyemna tep, er kai telep upu peteremna, pel dona deiyo ngebo keipneunge deiyoda, lap pepkusene. Ada, Allah bicau tenepneudi, er kange dipapu, apel dona deiyo keca mesumpu karepneue. Allah er puto di, pel dopneua deiki di, ‘Ne kai telep upu peteremna deiyo gonga kemna ngebo kunkamre’ tenen, konum wepra deipneue. 8Ne kangeda, Allah er nyapu yumada, mambul weik kunung dinin, ne Paulusda, mambul pio gum ngebo kunune. Neda, mambul pio gum ngebo kununa peda, Allah er kange deipneudi, ‘Paulusda, Nimi Lyemna Upu, Kristus er pio telep upu dopra, Yahudi yala gum nesala peterembenkamre,’ tenepneudi, wepra deipneue. Allahdi Kristus deiki keteneipseudi, er cap dipru dukdongopra kupepa, karenkamserenge yumada, men nukmanto. Ange yumada kapul men teneptepe.

9Tonda, Allahdi tenepneue. ‘Paulusda, ne upu lap pepra peterenkamre,’ tenepneue. Angeda ake. ‘Nesala yuma moupra gekenkameng’ tenen, Allahdi nimi lyemna tep, bicau teneseredi, er kange dipapu pel donkamsere ngeda, ‘Paulusda “Allahdi ukuprap, ukuprap kunkamsere,” pepra, peteremkamre’ tenen, wepra deipneue. Allahdi akeca-keca yuma ketekeipra deiamu deiyo ngebodi, nimi lyemna tep teneamseu ngeda, iniamudi erpu kael keamu. Ange yuma iniamu dinin, Allahdi ne tep, ‘Ange katuai pepnepa, Paulus gekepra kael kepredi, anesala yuma tep, lap pepra peterembenkamre’ tenen, wepra deipneue. Ne Paulusdi pepne.

10Ataru yuma neitamai, Allahdi, ‘Ukunkamne,’ teneamseu ngeda, ukuda konum katuai kupsere. Ada ake. Allah lyepseredi, er tep teka tenenup nesala neitamai pel doserenge yuma deiki di, im deiki kungedi, nimi deiyo-deiyo neng cap, im deiki puto weik kunge neng cap epsengedi, ‘Uo, Allahda akeca-keca yuma moupra teneredi, pio ila mambul ngebo, ila kael ngebo kurure’ tenen, kael kemkamenge. 11Ange yumada, tali men kupmasere. Gume. Menop taru Allahdi akeca yuma tep, ‘Ukupra kunkamne,’ konum teneamnga cadi, ange tek sisi teneamutopu, Allahdi nun Deiyo Ngebo Yesus Kristus deiki pel dopseupa, adeiki di konum katuai kupserepa, kael kemnupe. 12Nundi Yesus Kristus tep teka tenepmepedi, er cap dipru dukdongopra kunupa deiki di, nun nai bo Allah tep, er damai yana moroptepe. Tonda, Allah tep moronup taruda, kange tenimtona gum di, ‘Tek sisi Allah gekepseredi, men tapkusere’ tenen, kwar dangna gum dipapu, nun upu tali lupra peptepedi, er tep moroptepe. Angeda, Yesus teka tenenupa deiki di, kunupe.

13Atep nengeda, ne kayapu, sun Efesus mutu kumum nesala, sun makuna tep, pel doramsipa, ne nong deiki ikin keca derinmanengpa, dounmana tep nengeda, sundi, ‘Uo’ tenen, kange mun kange doupra men kunkamrume. Ayumada, sun telep kudina tep kununa cadi, kange deipra kunkamrume.

Paulusdi Efesus mutu neng tep, Allah moropu upu

14Uda, ne kayapu, Allah teneamseudi, pel doramseunge yuma tenepne dingeda, nun nai bo Allah tep, ‘Kanda pio telepe’ tenen, urasin genepdongopnedi, er tep moronune. 15Nun nai bo Allahdi, er nyapu yumada, im deiki kunge nesala pe, tuai kunge nesala peda, ketekepra deiamseua cadi, erda nun nai sisa kuserure. Er sipu eremepedi, er nyapu kunupe. 16Ne Paulusdi sun tep, Allah morosenun kecada, pepkusene. Ada, ‘Nun nai bo Allahdi, akeca-keca yuma taleredi, ila mambul weik ngebo kuretopu, er Lek Sambala kareserepa, melimserya deiki di, er puto weik kareserepa, sun kange dipru ila di kwa dimkamsere’ tenen, Allah morosenune.

17Ukupsere pangeda, sun teka tenepruma deiki di, sun kange dipru neitamai Kristus kuserepa, er cap dipru dukdongopra kunkamrume. Nedi, ‘Ukunkamrum’ tenen, Allah morosenune. Tonda, ila co yaten tu pumbon wekredi, ila nepyopda, aco dimpepra pio telep tengamretopu, Allah bicau teneseredi, melimserenge neitamai kuruma deiki di, ‘Sun yuk neng yuma tep, bicau tenepra makudamumdi, pio telep kunkamrum’ tenen, Allah morosenune.

18Tonda, Allah er puto kareserepa, adeiki di sun cap, Allah er nyapu yuma cap, sun yuma tep, Kristus bicau teneseredi dipru karesere ngeda, ‘Ila di kael kemkamrum’ tenen, Allah morosenune. Kristus bicau teneseredi, ila di melimseryada, pio men nukra lap pepmanto. Nimidi ila mutu buma, er lyom cap, pala cap, er miranai dana-dana cap, amutu buma bukwa lyom cap, tapu deiprap men kunuptenge utopu, Kristusdi bicau teneseredi, er dipru kareseredi, melimsereada, men nukra lap pepmanto kurure. 19Kristusdi dipru kareserya yumada, moupra men kael keptepe dinino, erdi ila di bicau teneseredi, melimsere keca doromumdi, er cap dipru dukdongopra kumum pangeda, amendada, Allah er pio telep kuretopu, ‘Sun peda utopu, pio telep kunkamrum’ tenen, Allah morosenune.

20Nundi Allah tep, ‘Ukupsetue’ tenen, upu deiki moronup keca cap, nun kange dipru neitamai tenenup keca cap tep, ‘Ayumada ila weike’ tenenup dinino, nun nai Allahda, ila mambul ngebo, puto pio weik ngebo kurura cadi, nun moropmantonge cap, tenipmantonge capda, yambulapu kurure. Erdi nun kange dipru neitamai pel dosere puto deiki di, nun men teneptepe keca, ila mambul weik keca, pel dopsetue. Nun kange tenenange dipapu, ‘Allah tep ange moroptene do? Erdi pel dopsetuada, wareto kurur do?’ tenen, men tenepmanto nesala kunup dinin, erdi nun kange dipru neitamai pel doserya deiki di, kunupsek pen pel doseredi, gawal dangrure.

21Nundi Allah tep, teka tenenup nesala, nun neitamai di pel doserepa, telep kunupa cap, uda, Yesus Kristusdi, ila mambul pel doserenge cap, ayuma kael kepmepya deiki di, nun yumadi Allah tep, er si ila di eremkamepe. Ada ataru cap, amenda doryankamre taru yuma cap, “Allah erda pio mambule,” pepra, er si eremkamepe. ‘Angeda, nun cap, nundi deipmepepa dadeipdanen, bankamenge nesala cap peda, Allah er si pio eremkamenge’ tenen, putanerure. Angeda ‘Tek sisi kupkamre’ tenen, ne Paulusdi, “Amin,” pepsene.