Ephesians 4

“Nun teka tenenup nesala yumada, kange yuk-yuk tenena gum di, tenpu kange douprap, telep kupra amsepu kunkamepe,” pepu upu

1Uda, ne kayapu. Nun Deiyo Ngebo Yesus tep, pel doramsipa, yu nengdi tomopneidi, ateng koupra wenemna ati dongopneipa, acapu kunune. Nedi sun tep upepsene. “Allah teka teneprumpa, konum lyepseua cadi, Allahdi sun tep, ‘Ne nyapu kunkamenga tep, ukupra, ukupra dumsisipu kunkamenge,’ teneamseua utopu, adipapu angepu tenepra kunkamrume,” pepra moropsene. 2Tali-tali kuna gum dipapu, yuk neng sun amutara bukra, dipru boun kuseredi, teleppu kunkamrume. Yuk neng tep menmena dabal kuprepa, deremna cap, wenemna cap gum dinin, sundi mali kupsenga peda, ‘Dakwapye’ tenen, bicau tenedamumdi, bouna di makudanapu kunkamrume.

3Allah er Lek Sambala nun dipru wekseudi, nun yuma tep dipru dukdongopseupa, nong tenpu utopu kupra deipseupa, kikiman kunupe. Atep, ‘Dipru dukdongopra teleppu kunupada, mali kupmepepa, bokra yuk-yuk kupmepedi, dipru wilimdanapu kunup’ tenen, pio pe deipra piriptereprumdi, yuk neng yuma tep, bouna di telep kupra kikiman kunkamrume. Allah er Lek Sambala dipru dukdongopseupa, tenpu nong utopu kuruma deiki di, nimi weik dakurum dinin, tenpu kange doupra, dipru dukdongopra, teleppu kunkamrume.

4Nun teka tenenup nesala yumada, dipru dukdongopra nong tenpu utopu kunupe. Allahdi er Lek Sambala karepseu ngeda, tenpu ngebopu kurure. Nun yumadi, aLek Sambala dopropmupke. Atep, Allah er Lek Sambaladi tenpu nong utopu kupra deriserure. Ange utopu, Allahdi nun tep, ‘Anesala lyepkamne’ tenen, upupseupa, teka tenepmupudi ukutaruda, ‘Er dipapu doryaserepa, er cap kikiman pio kunkamepada, dan taru di doryankamser do?’ tenen, ange teppu ketenepra deiya dinapu kunupe.

5Nun Ila Nimi Deiyo Ngebo Yesusda tenpu ngebo kurure. Nun teka tenepra talenup upuda, tenpupu kurure. Teka tenepmepepa, Allah gispal dona tep me mokon dongosenungada, tenpu kurure. 6Nun teka tenenup nesalada, nun nai bo Allah tenpu kuserure. Er dipapu nun yuma lyepseudi, tenpu nong utopu kupra deipseua tep, nun nai bo Allah, er tenpu kurure. Nun nai bo Allahda, akeca-keca yuma talepra deiki tara kurure. Akeca-keca yuma talerya deiki di, akeca-keca yuma neitamaidi, er pel yala-yala yuma dorure. Nun teka tenenup nesala yumada, nun dipru neitamai kuserure.

7Uda, nun yumada nong tenpu utopu kunup dinino, Kristusdi teneamseutopu, bicau tenepseudi, ‘Mambul pel telep kupra donkameng’ tenen, er puto deiki di mambul pel dona deiyo keca yala-yala yuma bokra, erdi teneamseutopu, yuk-yuk bokra kareserure. Atep, nun yumadi, mambul pel dona deiyo keca yuk-yuk talepra kunupe. 8Ukupra kareserya tep nengeda, Allah upu neitamaida, aupu ton seki. Aupuda ake.
‘Allahdi upepu. “Erda im deiki welepu taruda, er menmena beupa, er puto di konum bisbisa kapra yaniptapu neng yumada, er amnyo tara banmai.
Wareto keca do yuma, nimi talepra, bisbisa kapra, tomopserur keca yumada, er dipapu akeca yuma popra bisbisa kapudi, ateng koupdongopra deipu.
Im deiki welepu dingeda, sun tuai kunge nesala tep, mambul pel dona deiyo keca yuk-yuk bokra karepu,” pepu.’ (Mazmur 68:18)

9Aupu pepka neitamaida, “Welepu,” pepka deiki di, konum katuai kupsere. Ada, im deiki ka tamupra kapul men welepu taruda, menmena taru, tuai mutu kwerepu. 10Tuai mutu kwerepu ngeboda, yuk ngebo gume. Ada, im deiki welepu ngebo Yesus Kristus pua. Ka di tamupra im deiki tara welepka deiyoda, ‘Mutu ban-ban yuma cap, im deiki cap, aneitamai kure keca yuma cap, talepnedi, akeca-keca yuma deiki tara ne akunyopda, akeca yuma, ne amutara kupyopda, akeca-keca yuma telep kunkamre’ tenen, im deiki welepu.

11Er Kristus dipapu, ‘Amambul pel, yala-yala yuma donkamenge’ tenen, er pe kange dipapu, er puto deiki di, pel dona deiyo keca yala-yala yuma, yuk-yuk bokra, tuai nesala karepseu ngeda ake. Allah upu dopra peterembana tep, gonga kemna deiyo Rasul neng cap, Allah er upu cap, amenda taru kupkamre keca cap, lap tep nabi-nabi neng cap, Allah tep teka men tenenge nesala, ‘Teka tenepkameng’ tenen, Yesus er kai telep upu peterembana deiyo neng cap, Allah tep teka konum tenepi nesala, sun makuna deiyo neng cap, Allah upu sekaminge peteremna deiyo neng cap, apel dona deiyo keca yuma, Yesus er puto deiki di bokra, yuk-yuk karepseupa, apel dona deiyo keca talepra kunupe.

12Ange yuma karepseua deiyoda, ‘Allah teka tenenge nesaladi, telep pel moupra dongedi, yuk teka tenenge nesala yuma tep, melipra peteremengepa, aneng yuma di kael kepmengopda, sun peda Allah tenemseu pel telep kupra donkameng’ tenen, karepseue. Ange utopu, Allah teka tenenge nesaladi, atelep pel yuma donkamenga deiyoda, ‘Teka tenepmengepa, Kristus cap dipru dukdongopra kungedi, er nong tenpu utopu kunge nesala yuma, melipdangedi, sun kange dipru wisiprepa, telep kudidankameng’ tenen, apel dona deiyo keca yala-yala yuma talepra pel donkamepe.

13Ange pio pel dopra melipdapedi, dakuramepyanen, amenda taruda, nun teka tenenup nesala yumadi, tenpu kange doupra, amsepu kupra, Kristus tep teka tenepmepedi, Allah er Mi Sisa Kristus cap, dipru dukdongopra kupedi, er tep ila di kael kemkamepe. Ukupra kupe dingeda, nun dipru wisipserepa, Kristus pio dumsisi kupra kuramretopu, nun peda mumupra, teleppu kweipseredi, dumsisipu kunkamepe.

14Pio mumupra teleppu deipsere pangeda, dumsisipu kunkamepe. Ada, yambul nyapudi, ‘Ange tek do, telel do?’ tenen, tupa tenimtona kuramengtopu, ange tupa men kunkamepe. Ukupmantoda, co kelkela mokon deiki duembanmare taruda, itara kemareanen, utara kemareanen, dopra dubaramretopu men kunkamepe. Ange utopu, ukupmanto ngeda, co bo tu deiki sakmarepa, kumanya dopre taruda, kumanya puto di, ortam benapya, atara yanapya kemaryanen, eremdoramretopu, men kunkamepe. Sun yuk nengdi tali peteremne upu, yala yuk-yuk peterepsenga peda, aupu gekena gum di, pio dimpeprappu kunkamepe. Sun anengdi, ‘Sun amutu nengda, nun tarapu keprosetenge’ tenen, mawa di tali upu peterepsetenga peda, kange boktopseredi, nun kange orbenap ayanap men kemkamsere. Yesus er upupu moupra talenkamepe.

15Ange gum dinin, kange tenimtona gum di, dipru karepdanen, bicau tenedapedi, Allah er tek sisi upupu pepra peteremdankamepe. Ukupra kuramepyanen, Kristus cap dipru dukdongopra kupedi, nun kange dipru wisipserya deiki di, nun kunkamep keca yumada, pio teleppu kunkamsere. Nun Deiyo Ngebo Yesus Kristus dumsisi kuretopu, nun peda dumsisipu kunkamepe. Ukupmanto tep nengeda, erda nun nong giso utopu ngebo kuserure. Nunda, er nong utopu kunupe. Atep nengeda, erdi ‘Ukunkamenge,’ teneseretopu, angepu talepra kunkamepe.

16Ton ukupmanto ngeda, nun buru cap, yan cap, nong deiki kwapseue keca yuma, melmel di dungdongoserepa, nun nong tenpu deiki dipapu, pel telep kupra doramepe. Ange utopu, nun yuk-yuk kunup dinino, nun Deiyo Ngebo Kristus, nun dipru taleseredi, er puto deiki di dungdongosere pangeda, nun pel yala yuk-yuk donupa deiki di, dipru kwa dipra makudanupe. Ukunupa deiki di, nun kange dipru yuma wisiserure. Ataru neitamai yumada, nun yumadi, yuk teka tenenge nesala yuma tep, dipru dukdongopra, bicau tenedapedi, makudankamepe. Akunkamepa yumada, Kristus er deiki dipapu kunkamepe.

“Nun teka tenenup nesalada, Allah er nyapu kunupa tep, er dumsisi kuretopu, nun peda utopu dumsisipu kunkamepe,” pepu upu

17Uda, ne kayapu, apepkusen upuda, tali tep men pepsene. Gume, neda nun Deiyo Ngebo Kristus, er pel melimna deiyo ngebo kununa cadi, er si deiki di, aupu pepra deipkusene. Sun Yahudi yala gum nesalada, teka tenena gum di, sun kange dipru neitamai, tali-tali tenenge kecada, tek sisi nong men kupkamre. Tali keca tenenunga deiki di, mali-mali kuramengtopu, sun Efesus mutu kurum nengda, ange menop taru neitamai di sun peda ukuramrum dinin, ukutaruda, sun tali neng kunge utopu tupa men kunkamrume. 18Sun teka tenena gum nesalada, ‘Allah er kure keca, nun song’ tenen, men gekeramidi, sun kange dipru pio gat konum kupupa, pio walwal nengpu kununge. Ukununga tep nengeda, Allah er kure kecada, moupra men tenepmanto nesala kununge. Ukununga cadi, sun kange tenenange yumada, kunungna utopu konum kupupa, Allah cap dipru dukdongopra kikiman men kupmanto nesala kununge. Deiyoda, sun dipru gat nesala kununga tepa.

19Ukupra kungedi, sun kange dipru neitamaida, ‘E, akun kecada mali cadi, Allahdi wenepserur’ tenen, mali kange doupra men tenipmanto nesala kununge. Ukutaruda, ‘Malinge ace, telepnge ace’ tenen, moupra men tenenunge. Ukupra tali lupra pio malipu kungedi, upula nyangdana keca yala-yala yuma cap, pio mali kun keca yala-yala yuma cap, weika di kununge. Ukungedi, ‘Gume, amali kun keca yala-yala yumada, ka di ton cap kunkamepe’ tenen, ila putanapu kununge. Sun pio mali kunge kecada, pio men taptenge.

20Dinino, ne kayapu, sun Efesus mutu nesalao, sunda pio mali kun keca utopu keca deiki di men peteremamseipa, Kristus cap dipru dukdongopra kun kecada, men kael keamrume. Mali kuramrum keca deiki di, Kristus tep teka men teneramrume. 21Ange pio gum dinin, ne kaele. Tek sisi, Yesus er pe nong cap, er upu cap, er kure keca cap, pio dumsisi kuretopu, peteremna deiyo nengdi, tek sisi upu deiki dipu peteramamseipa, Kristus er upu gekeramrumdi, er tep moupra kael keamrume. Tek sisi upuda, Kristus er upu pua.

22Ada, yuk nengdi sun tep peteremamseipa, kael keamrum ngeda, kange di ton cap pepkusene. Ada, sun pumun taru teka men teneprum taruda, sun kange dipruai mali keca putaramseua deiki di, sun kuramrum keca yuma mali kudidaramrume. Pio malipu kuramruma cadi, “Pun deiamre opkal kwirirtamamengtopu, sundi pumun taru mali kun kecapu kuramrum ngeda, ange yuma taprume,” pepra peteremamsei. Mali kun keca tep, ‘Uo, ne peda ange kuptene’ tenen, ila putana deiki di, dumsisi telep tenena ngeda, gum kupra deipbaramreyanen, gawal dangrure. Ukupseryopda, telep kupra men teneptepe.

23Tonda, aupu peteremamsei. Ada, “Mali opkal tapmengedi, pio telep ukupu opkal kenengamengtopu, Allah er puto deiki di, sun kange dipru neitamai yuma ukupunge utopu kupra deipserepa, ukupu dumsisi kecapu tenepra kunkamrume. Pumun taru mali kuramrumnge yuma taprumudi, Allahdi ukupu nesala utopu kupra deipseu ngeda, kael keprumudi, angepu talepra kunkamrume. 24Angeda, Allahdi utenepu, ‘Gume, mali keca tenpu pe men kunerepa, pio dumsisi kunetopu, ne nyapu peda utopu kupra kunkamenge,’ tenepseudi, ukupu kange dipru karepseue.”

Upepra peteremamseipa, konum gekepra kael keamruma cadi, dumsisi kun kecapu talepra kunkamrume.

25Ange tep nengeda, Allahdi, ‘Ne kunetopu dumsisipu kunkamenge,’ teneserura tep nengeda, ukupra kunkamrume. Ada, mawa di mok upu peramenge nge yuma tapra, sun kikiman kurum nesala tep, tek sisi upupu penkamrume. Nun yumada, nong tenpu utopu kupra kunupa tep, sun cap, sun damai kunge nesala cap, tek sisi upupu pepra, taledankamrume. Mok upu sisingnada gume. 26Allah upu sekamitopu, apu talepra kunkamrume. Aupuda ake.
‘Tulum kupsere pangeda, tek sisi mali men kudankamrume.’ (Mazmur 4:4)

Tonda, sundi yuk neng tep, yu kupsere taruda, menmena lepsisingdankamrume. Yu tupa kupmaserepane, keteng wengberedi, kunukyopda, pio mali tep, ukuna meme. ‘Mapmepya ambutumi neitamaipu lepsisingkamepe,’ tenena gume. Yu kuprepa, mali kange tenedarumu taruda, menmena lepsisingdankamrume. 27Tonda, mali kuna deiyo ngebo, Kain Jen Ngebodi sun tep, ‘Aneng sun dipru gipropnepa, mali kuptenge’ tenen, diserura cadi, er tep yambul go taru peda, men kaukemdongonkamrume. ‘Kain Jen Ngebodi mali kudiserur’ tenena tep, metek go peda, karena meme. Mali kun keca yumada, pio beipra kunkamrume.

28Men di upula dororami nengda, ukutaru kange di ton cap, upula men doronkamenge. Ange gum dinin, ‘Sun kankan kunge nesala makuna tep, ne talenun keca neitamai di bokra, sun tep melipra karenkamne’ tenen, sun pe buru deiki di, yuk nesala melipmanto pel, telep pelpu adipapu donkamenge.

29Telep pel donkamrum taruda, mawa di mok upu men penkamrume. Tek upupu pepra, telep kupra pel donkamrume. Mali nengdi upu pengepa, yuk nesala gekengedi, mali kange dourameng upu utopu upu yumada, men penkamrume. Ange gum dinin, sundi yuk nesala tep, ‘Sun ikin kupre keca ware keca do? Ware telep upu peptenya deiki di, sun dipru kwa diptene do?’ teneprumudi, nimi dipru kwa dimna upupu penkamrume. Ada, ‘Ne upu telep kupra penkamna deiki di, sun gekepkunge nesala melimkamne’ tenen, kange moupmumdi, telep upupu penkamrume. 30Tonda, sun kumum keca yuma tep, ukupra tenenkamrume. Mali kupnepa, Allah er Lek Sambaladi, gekepra epneredi, ‘Uo, sun mali kunmange, teneredi, mali kange douprur’ tenen, mali kuna gum di, pio dumsisipu kunkamrume.

Allahdi er Lek Sambala dopra, tali tep men karepseu dinin, bisam amul sengamengtopu, Allahdi er Lek Sambala karepseua deiki di, peten kemdina utopu kupseue. Atep, Allah er Lek Sambala nun dipruai wekseua deiki di nun kaele. ‘Konum lyepseudi kunupseua cadi, dakuramepepane, sirya taru ila mambul tumida, pio mumupra telep kupra deipseredi, er damai dubenkamsere’ tenen, kael kemnupe.

31Tonda, tulum kuserenge cap, yuk neng mali kupsengepa, yu kuserenge cap, ila yu kupserepa deremdana cap, upu deiki pangdana cap, ayumada tamkamrume. Tonda, yuk nengdi, ‘Anengda mali neng, tenepkameng’ tenen, lulupra deiya perum upu cap, yu kuserepa, yuk neng tep mali-mali kurum keca yuma capda, tamkamrume. 32Amali kun keca yuma konum tapmum dingeda, sun yumadi, yuk nesala yuma tep, bicau tenepra makudanapu kunkamrume. Ukunkamrum taru neitamaida, yuk nengdi sun tep, mali kusenge keca tep nengeda, ‘Dakwapye,’ tenepra, dipru bouna di kaukemkamrume. Ada Allahdi sun cap, Kristus cap, dipru dukdongopseua deiki di, sun mali kun keca yuma tep, gum kupra deipseudi, kaukemserya utopu, sundi yuk neng tep, utopu kupra kaukepmumdi, bicau tenepra makudankamrume. Ne Paulusdi pepsene.