Ephesians 5

“Mali kun keca yuma tapra, Allah pio dumsisipu kuramretopu, kunkamrume,” pepu upu

1Allahdi sun yuma tep, ‘Ne nyapu kununge,’ teneseredi, dipru kareserepa, sunda er nyapu konum kuruma cadi, Allah pio dumsisi kuretopu, kael kepmumdi, ‘Nun peda utopu kunkamepe’ tenen, kunkamrume. 2Uda, pumun taru kurami Yahudi nesaladi, ‘Allah nun mali kun keca kaukepseredi, nun moronup upu gekenkamser’ tenen, Allah er gispal dona tep, gam keca popra karena cap, nintong telep keca dopra, uku dongona cap, kuramya utopu, Kristusdi nun tep, bicau tenepra dipru karepseudi, er pedi er pe nong, Allah tep karepudi, nun yo pununa tep depupa, Allahdi kange deipu. Ukupmantoda, imam nengdi, nintong telep keca dopra, uku dongopmengepa, uku jeprepa, nintong telepnge gekepmepedi kange derinuptopu, nun yo pununa tep, Yesus depupa, Allahdi kange deipu. Yesusdi dipru karepseudi, bicau teneseretopu, sundi yuk nesala yuma tep, bicau tenepra makudanapu kunkamrume.

3Uda, sunda, Allahdi wepra deipseupa, er nyapu konum kuruma tep, sun kan-kan neitamaida, tali nyangdana cap, mali-mali kun keca yala-yala yuma cap, ‘Akeca-keca yuma, weika di dopra taleptene’ tenen, dipru engena cap, ayumada meteka peda, pio men kunkamrume. Allahdi, ‘Ne mawa nesala, lek nengpu kunkamenge’ tenen, wepra derirur nesalada, ato mali kun keca pio men kununga cadi, sun peda, amalinge yuma men kunkamrume. Men kumum pangeda, yuk nengdi, sun Efesus mutu kurum nesala tep, ‘Sunda ukupra, ukupra mali kununge’ teneptenga peda, ato upu tek sisinge, men pepsetenge.

4Ange utopu, Allah er nyapuda, dumsisi kun nesala kununga cadi, apepkusen kecada, sun peda, pio men kunkamrume. Ada, lengne pepra derepdamumdi, nesala taingne upu cap, tali-tali upu peptapmengedi, nyek-nyek pen upu cap, ‘Yuk neng autupkung’ tenen, merkem pepra nalemnung upu cap, telep neng men kuptenge keca upu sisingna cap, mali-mali upu pena cap, nimi tep ali dangna upu pena cap, ayumada pio men penkamrum dinin, telep ngeda, Allah teppu, “Nun nai telepe,” pepra, pio penkamrume.

5Amali kun keca yuma, “Men kunkamrume,” pepmasenada, mesum tep men pepsene. Pio tek sisi tenenkamrume. Sun tali nyangdana cap, mali-mali kun keca yala-yala yuma cap, ‘Akeca-keca yuma, weika di taleptene’ tenen, dipru engena cap, kunge nesalada, Allah cap, Kristus cap, kikiman men kutenge. Ada, Allah cap, Yesus cap lyepserengedi, nun dipru taleserengepa, pio telep kupra kunkamnupaida, amali kun keca kunge nesala tenpu peda, wisipra men kunkamepe. Allahdi, amali kunge nesala dopra, bokra pio yukai deiprepa, talipu kunkamenge. ‘Akeca-keca yuma, weika di doproptene’ tenen, dipru engenung nengda, teka tenena gum nengdi, ‘Nun nai bo’ tenen, tali keca cap, isok si eremenge nesala utopu kununge. Akunge nesala peda, Allahdi sirya taru menenga keca karenkamser keca dorona cap, Allah cap, Yesus cap, kikiman kuna tep nengeda, amali kun keca talepra kunge nesaladi, pio men wisipra kunkamenge.

6Ne kayapu, tali nengdi, tali-tali upu, nong men kupkamre upu tali peptapmengepa, ‘Mankau di mok keca teka tenenup’ tenen, sun kange moupkamrume. Tali men pepsene. Amali pepmasen keca yuma kunge nesaladi, Allah er upu yaniptamengepa, ukununga tep nengeda, Allah yu weik kuprepa, sun nong deiki ikin keca weik deipredi, ila di wenemrure. 7Atep, atali-tali upu penge nesala cap, mali kunge nesala cap, ange utopu kunge nesala yuma cap, sun Efesus mutu kurumu nesala cap wisipra kuna meme. Sun Yesus tep teka tenerum nesaladi, yuk nengdi mali kunge keca yala-yala yumada, pio men wisipra men kunkamrume.

8Sun mali kunge nesala cap, wisipra kuna meme pepmasena deiyoda ake. Pumun taruda, sun Efesus mutu kurum nengda, pio mali-mali kuramruma deiki di, kunungna utopu nesala kuramum dinino, ukutaruda, nun Deiyo Ngebo Yesus cap dipru dukdongopra kurumnya deiki di, dirin nesala utopu konum kurume. Atep Dirin Deiyo Ngebo Yesusdi er nyapu kuna tep, konum telep kupra deipseua tep, dirin neng kunge utopu, dumsisipu kunkamrume.

9Deiyoda ake. Du mouramre co di er co yala kuretopu, telep du mourure. Du mouramre utopu, dumsisi kuna tep dirin kuserepa, du mouramsere ngeda, pepkusene. Ada, telep kun keca yala yuma cap, Allahda mali keca tenpunge peda men kuredi, kwirye kuretopu, dumsisi kun keca yuma cap, mok pena gum dipapu, tek sisi upupu pena capda, ange yumada, dirin keca utopu kurure. Telep co di, telep du mouramretopu, sunda dirin utopu nesala kuruma cadi, telep kun kecapu kunkamrume.

10Tonda, sun yumadi, ‘Uo, nun ware kutepepa, Allah er kange deipkamser do?’ tenen, pio piripetepra kael kepbankamrume. 11Mali co di mali du mouramretopu, sun mali kunge nesala, sun dipruai kunungna deiki di, nong men kupkamre keca, mali kecapu kununge. Sun kunge keca yuma tep nengeda, pio mepropmumdi, akeca men kunkamrume. Tali kange doupra, anesala cap wisipra kuna gum dinin, sun mali kunge keca tep, katuai di lap peprumdi, tamkamrume. Ada, yuk neng yumada, moupra kael keptengedi, ‘Amali kun keca tapkameng’ tenen, sundi, “Gume, sun mali kun nesalada, kunungna utopu mali kunung kecada ake-ake,” pepra, katuai di lap peprumdi, upu sengdongonkamrume.

12Sun tep, upu sengkamruma deiyoda, ake. Ada sun pio mali kungedi, Allah yaninung nesaladi, yuk neng men dinungai, inipra kunge kecada, pio mali keca cadi, nun telep nengdi, upu deikipu lape pepmepyopda, ali kupsetue. 13Ware keca do yuma, kunungnai di dopra, dirinai deipmepyopda, katuai kuprepa, nimi yumadi, “E, akecada, ukuprap-ukupra kurure. Malinge ake, telepnge ake,” tenepmengedi, moupra kael kemnunge. 14Ware keca do yuma, dirin di akeca deiki deiprepa, katuaipu kurure. Katuai kuprepa, moupra kael keptepedi, ‘Ange telepnge, angeda malinge’ tenen, kael kemnupe. Ange tep nengeda, aupu ton penupe.
“Amio, kan depmum ngeboda gam bukroyo. Kristus er dirin di telep kupra deipkamkere.”

15Ange yuma tep nengeda, sun Efesus mutu nesalada, walwal kunge neng utopu tali mankau kange doupra men kunkamrume. Sunda, ‘Walwal di mali kupnup’ tenen, pio kange moupra kumumdi, ila kael nengdi kuramengtopu dumsisipu kunkamrume. 16Ukupra teleppu kumum taru neitamai yumada, ‘Go taru konum gum kupseryopda, telep pel ton men doptepe tep, go tupa akapsere taruda, pio pe deipra teleppu kunkamepe’ tenen, pio moupra teleppu kunkamrume. Ukutaruda, mali-mali kun keca cap, mali weik kunge nesala cap, pio weike akapmara tep, “Sun kange moupmumdi teleppu kunkamrume,” pepmasene.

17Ange tep nengeda, kange douna gum di, tali lupra walwal di men kunkamrum dinin, nun Deiyo Ngebo Yesusdi, ‘Ukunkamenge,’ teneseretopu, angepu moupra kael kepbankamrume. Moupra tenena gumdi, tali walwal di, mali men kunkamrume. Telep kuna keca ton pepkusene. 18Ada, kange yawaramne yu me jepmengepa, sun kange yawaramrepa, tali nyangdana cap, mali-mali kuna cap kununga cadi, me jepnepa, kange yawarapserepa, tali nyangdana cap, pio mali kunange yala-yala yumada, pio meme pepsene. Ange men kunkamrum dinin, Allahdi er Lek Sambala karepseupa, nun dipru wekra kusere ngebodi, ‘Allah er Lek Sambaladi, ne kange dipru talenerya deiki di, er puto dinikamnere’ tenen, er amutarapu kunkamrume.

19Sun yumadi, sun cap kikiman kurum neng cap, Allah upu mut pepra dipru kwa dimdankamrume. Ada, ‘Allah er si ereipkup’ tenen, Allah upu Mazmur deiki sekeipseunge cap, sun kange dipu mut sekra pemumnge cap, Allahdi sun dipru neitamai, ‘Ukupra penkamrume,’ pepra lap peserepa, mut pemumnge cap, amut yala-yala yuma penkamrume. Sun cap, yuk teka tenena neng cap, amut-amut yuma kikiman penkamrum taruda, sun kange dipru neitamai di, Allah er si eremumdi, er tep gispal donkamrume. 20Ukupra kunkamrum taru yumada, nun Deiyo Ngebo Yesus, er si deiki di, nun nai bo Allah tep, “Akeca-keca yuma, akwapsere keca yuma tep nengeda, telepe,” pepra, Allah er si pio eremkamrume.

Nimi cap, nerapu cap dopdangedi, kikiman kunkamenge tep, pepu upu

21Tonda, sundi Kristus tep, ‘Erda mambule, nun Deiyo Ngebo kuserure’ tenen, kumumnya deiki di, sun cap kikiman kumum nesala tep nengeda, sun amutara bukra bouna di kunkamrume. Dipru men eremdankamrume.

22Sun nerapu yumadi, sun neng yapu tep, sun amutara bukmumdi, sun upu gekepra bouna di kunkamrume. Ukupra kunkamrum taruda, ‘E ada, nun Deiyo Ngebo Yesus, er gispal dona tep, er amutara bukmepedi, er upu gekenuptopu, nun dopsei neng, nun nenge yapu sun amutara bukra kunupe,’ tenenkamrume. 23Ukunkamruma deiyoda ake. Ada, Kristusdi nun tep lyepseudi, er tep teka tenenup nesala yumada, dukdongopseupa, er nong utopu kunupa cadi, nun giso utopu kure ngeboda, ada er Kristus pua. Erda, nun lyemna tep Lyemna Deiyo Ngebo kuserure. Ange utopu, sun nerapu yuma, sun neng yapu, sun dopsei nengda, sun deiyo neng kununge. 24Nun teka tenenup nesala yumadi, nun Deiyo Ngebo Kristus tep, er amngai bukra, er upu moupra gekepmepedi, erdi pesere upu gekepra, bouna di kurameptopu, ware kun keca do yuma, akeca-keca yuma tep, sun nerapu yumada, sun neng yapu tep utopu, adipapu sun amngai bukrumdi, sun upu gekepra, bouna di kunkamrume.

25Uda, sun nimi tep upu pepkusene. Ada, Kristusdi, er tep teka tenepmupu nesala tep, pio bicau tenepra dipru karepseudi, nun tep depseutopu, sun nimi peda, sun domum nerapu tep dipru karepserepa, bicau tenepra pio teleppu kunkamrume. 26Kristusdi er tep teka tenepmupu nesala tep, depudi lyepseua deiyoda pepkusene. Ada, erdi uteneamseue. ‘Anengda, ne nyapu kunkamneng’ tenen, ne kai telep upu deiki di, sun mali kun keca gum kupra derina tep, anesalada, me kuna utopu kupra deipnedi, sun mali kun keca yuma daepnedi, gum kupra deipnyopda, anesala pio telep kupra deipnepa, ‘Ne nyapu tek sisi kunkamenge,’ tenepseudi depu.

27Yesus Kristusdi ukupra kupseua deiyoda ake. Ange tenepu. ‘Sun mali kun keca yuma gum kupra deipnepa, mali keca tenpunge peda men kapyopda, ne tep teka tenenkamneng nesalada, pio mengne dumsisi nesala kupra deipnedi, ne mawa nesala kuna tep, anesala dopra deipkamne’ tenen, Yesus Kristus teneamseudi kupseue. Ada, Yesusdi, nun tep, ‘Ne tep teka tenenge nesalada, mali keca tenpunge peda, men kuprepa, pio dumsisipu kunkameng’ tenen, lyepseudi, telep kupra deipseue.

28Ange utopu, sun nimi yumadi, sun pe nong tep, kange deipra telep kudidoramrumtopu, sundi sun dodaramrum nerapu tep, adipapu dipru kareprepa, bicau tenepra, makunapu kunkamrume. Ware ngebo do yuma, erdi doamre ner tep, bicau tenepra makunapu kure ngeboda, akurya deiki di er pedi, er pe tep melimdankamre. 29Sun kaele. Nesala ban-ban yumadi sun pe nong tep, ‘Ne song’ tenen, mali men kudidanunge. Ange gum dinin, jen jepra, teleppu kudidanunge. Atep, sun nimidi, sun dopdarum nerapu tep, bicau tenepra, telep kupra makunkamrume. Ange utopu, nun teka tenenup nesalada, nun putasere keca yumada, Kristusdi melipra kareserure. 30Nun yumada, yuk-yuk kunup dinin, Yesus tep teka tenepmupka deiki di, Kristusdi er cap, nun cap dipru dukdongopseua cadi, er tenpu nong utopu kupra deipseua tep, nun putasere kecada melipra kareserure. 31Allah upu neitamaida, nimi cap, nerapu cap dodana tep, aupu ton sekra deipi. Aupuda ake.
“Ware ngebo do yuma, er nai sisa cap, er nin sisa cap tapra, er ner dopyopda, sun buteneda nong tenpu utopu kupra, dipru karepdarengedi, kikimanpu kunkamrenge,” Allahdi pepu. (Kejadian 2:24)

32Aupuda, nimidi ner donkamenge nge tep, sekra deipsei dinino, aupu neitamaida, ‘Nong tenpu utopu kupkamrenge,’ pepra sekeipseu ngeda, ikin dipapu kael keptepe. Aupu deiyoda, ila kael kemna dipapu moupra gekeptepe. Aupu peseretopu, ne Paulusdi, aupu deiki di, nun teka tenena nesala tep, pepsene. Ada, ‘Kristus cap, er tep teka tenepmenge nesala cap, dipru dukdongopra, nong tenpu utopu kunkamenge’ tenen, Allahdi peipseu. 33Aupu deiyo neitamai ngeda, butene kapsere dinin, tek sisi pepsene. Sun nimi yumada, sun pedi sun pe tep kange deipra telep kudidaramumtopu, sun domum nerapu tep, pio bicau tenepra makunapu kunkamrume. Tonda, sun nerapu yumadi, sun domsei neng, sun neng yapu tep, gispal dopmumdi, sun upu gekepra bouna di kikiman kunkamrume.