Eph 6 | XteSC | STEP | Sun nyapu yumada, nun Deiyo Ngebo Yesus cap dipru dukdongopra kikiman kumum taru neitamai yumada, sun nai yapu cap, sun nin yapu cap tep, gispal dopra, sun upu moupra gekepmumdi dombankamrume. Angeda dumsisi kuna tep, ‘Sun ton ukunkamrume,’ pepra deipsene.

Ephesians 6

Sun nyapu yuma, sun nai yapu cap, sun nin yapu cap tep, “Ukunkamrume,” pepra pepu upu

1 Sun nyapu yumada, nun Deiyo Ngebo Yesus cap dipru dukdongopra kikiman kumum taru neitamai yumada, sun nai yapu cap, sun nin yapu cap tep, gispal dopra, sun upu moupra gekepmumdi dombankamrume. Angeda dumsisi kuna tep, ‘Sun ton ukunkamrume,’ pepra deipsene. 2 – 3 Allahdi upepseue.
‘Allahdi, “Sun nyapu yumada, sun nai yapu cap, sun nin yapu cap tep, gispal dopmumdi sun upu gekenkamrume. Ukupra kumum pangeda, Allah melipseredi, puto karepserepa, keteng tamun weika di ton cap gam kunkamrume.
Tonda, akeca-keca yuma teleppu kunkamsere. Sun nai yapu cap, sun nin yapu cap, sun upu men gekeprumyopda, ange men kunkamsere,” Allahdi pepu.’ (Ulangan 5:16)

Uda, Allahdi nimi tep, “Ukunkamrume,” pepra, deiamu upu weik akapmar dinin, arup pepmasen upu deikida, gonga kepudi, “Ukuprumyopda, nedi telep kudinkamsene,” pepra, menmenange pepra deiamseu.

4 Tonda, sun nai yapu tep aupu pepkusene. Sundi sun nyapu tep, weika di wenepra derepmumyopda, sun nyapuda, ‘Uo’ tenen, kange mun kange doupra, dipru pu jerure. Atep, sun nyapu tep, yu kupserepa puto di wenemna meme pepsene. Ange gum dinin, nun Deiyo Ngebo Yesusdi, ‘Ukunkamenge,’ teneseretopu, sundi er upu dopra, sun nyapu nemenge taru yumada, “Ange kunkamrume, angeda men kunkamrum,” pepra, bouna dipu peteremkamrume.

Pel melimna neng cap, pel deiyo neng cap tep, pepu upu

5 Sun co bo deiki kunupsengepa, mesum tep pel domum nesalada, ^{▼▼co bo di kunumenge nesala – Angeda, sun pumun taru ukurami. Isomka nengdi, co bo deiki di, pio kankan kunge nesala kunumami. Konum kunupidi, akankan kunge nesala tep, ‘Nun pel tali dadopso,’ pepnepa, anengdi, kunumna keca dorona gum dipapu, tali pel donapu kurami. Ataruda, tali bung keca kunumapetopu, sunda, ‘Nun ikin pel donkamseng’ tenen, kankan kunge nesala ton kunumami. Tonda, lap pena upu nomor 36 dirume.} sun deiyo nengdi pesenge upuda, moupra gekepmumdi, ‘Nun deiyo nengda pio mambule’ tenen, gispal dopra kunkamrume. Ange yumada, mawa di kuna gum dinin, sun kange dipru dumsisi kuprap teleppu kunkamrume. Ada, ‘Kristus pepsetupa, er upu gekepra dombatepya utopu kunkupe’ tenen, sun deiyo nengdi pesenge upuda, gekepra telep kupra kunkamrume.

6 Angeda, ‘Nun deiyo nengdi epsenge tarupu, sun upu gekepmepedi, telep kupra pel donkamep dinin, men disenge taruda, tapmepedi, talipu kunkamepe,’ tenena gume. Ada, ‘Dipru di pel telep kupra men donkamep dinin, nun deiyo nengdi, disenge taru kange deipkamsetenge,’ tenena gume. Ange gum dinin, sun deiyo nengdi epsenge taru pe, men disenge taru peda, pe deipra teleppu pel donkamrume. Ada sun pel don taru yumada utenenkamrume. Ada, ‘Allahdi teneneretopu, mawa kuna gum di, tek sisi teleppu kunkamne. Kristus er amutara kunedi, er pel melimna ngebo utopu kunkamne’ tenen, sun deiyo nengdi pesenge pel, telep kupra donkamrume.

7 Ware pel do yuma, pel donkamrum taruda, kange bongtona gum di, utenenkamrume. ‘Gume, nedi tali nesala tep, sun pel men donune. Neda, nun Deiyo Ngebo Yesus, er pel tep donune’ tenen, sun deiyo nengdi, dimsenge pel yuma tep, pio pe deiprap, telep kupra donkamrume. Ada, ‘Ne Deiyo Ngebo Yesus er gispal dona tep, apel donune,’ tenenkamrume. 8 Ukupra tenepmumdi, pel telep kupra donkamruma deiyoda, pepkusene. Ada, sun kaele, ware ngebo do yuma, pel telep kupra dopre pangeda, nun Deiyo Ngebo Yesusdi, angebo er pel dopunge tep, menenga keca karepkamre. Ada, co bo deiki kunupmengepa, mesum tep, pel don neng pe, sun pe kange dipu pel donge neng peda utopu, pel donunga kunumna tep, pel doramenga utopu, Yesusdi menenga keca karepkamsere.

9 Uda, sun pel deiyo neng tep nengeda, aupu pepkusene. Arupda, sun pel melimna neng tep, “Ukupkamrum,” pepra sekmasentopu, sun deiyo nengdi sun amutara kungepa, sun pel melipra donge nesala tep, telep kupra kikiman kunkamrume. Sun melimna neng tep, ‘Kware kupkung’ tenen, “Anyapo, ne pepsenetopu, pel men dopnerumnyopda, ikin keca sun nong deiki ukupra deipkamsene,” pepra, wenemna gume.

Aupuda tali men pepsene. Uda, sun kaele, sun amutara tali pel melimna neng cap, sun deiki tara pel deiyo neng kurum nesala cap, sun Ila Deiyo Ngeboda tenpu pua. Erda im deiki kuredi, tuai nesala yuma dipetepra, upu bokeipkamsere ngeda, amsepu kunkamsere. ‘E anengda, ne kayapu neng tep men wenepkune’ tenen, dipru men wilimserure. Ila neng pe, yambul neng peda utopu teneseredi, nun kurameptopu kunumna karenkamsere. ‘Ton nengda mambule, ton nengda mambul gume,’ men teneserure. Nun kurameptopu upu lepsikra bongdiserure.

Kain Jen Ngebo cap, isok-isok capdi, ‘Ne nyapu mali kupra deipsenung’ tenen, Allah er puto deiki di, karesere keca tep, pepu upu

10 Ukuda ne kayapu, asurat gawal dangna tep, yuk upu ton pepkusene. Sun cap, nun Deiyo Ngebo Yesus cap, dipru dukdongopra kikiman kunkamrum taru neitamai di, er puto weik kareserya deiki di, dimpeprap puto di kunkamrume. Puto kunkamrum ngeda, ada Allah er puto deiki dia. 11 Sun jen talen nengdi, gat keca dopra kenekmengedi, porbaramengtopu, Allahdi puto kemdina keca kareserenge yuma dopra kunkamrume. Tenpunge peda tamna meme. Ukupmum pangeda, Kain Jen Ngebodi, mawa di mok upu cap, mali-mali kudisere keca cap deiki di, ‘Mali kuptenge’ tenen, kupetepsetua peda, puto di, dimpeprappu kunkamrume. Mali men kunkamrume.

12 Angeda, tali men pepsene. Nun nong deiki ikin keca deipsengedi, nun kange dipru mali kudina tep, kurpeteserya deiyo kecada, nimidi gume. Tonda, nun tep popmanto kuserur ngeda, nimidi gume. Ange gum dinino, mali kure keca yuma talepra, deiki tara puto kurya deiyo ngebo Kain Jen Ngebo cap, tonda Kain Jen Ngebo er amutara kunung dinin, im cap, tuai cap ban-ban yuma bokra, talerya deiyo isok-isok cap, pio mali tuai kunungna mutu neitamai puto kure isok cap, asuru men dinup dinin, im neitamai kurur isok yala-yala yuma cap, aisok-isok yumadi, nun teka tenenup nesala tep, ‘Bisbisa kapra, poptepe’ tenen, yana kurpetesenunge. Atep, kurpetesengepa, ikin kurserenge ila deiyoda, nimidi gume, ada Kain Jen Ngebo dia.

13 Ange tep nengeda, ‘Kain Jen Ngebodi sun kange dipru mali kupra deipserepa, mali kupnup’ tenen, Allahdi nun kange dipru puto kemdina tep, karesere keca yumada, doronkamrume. Tenpunge peda, tamna gume. Ada, jen talen nengdi, ‘Nimi podana taru di popsenung’ tenen, sun nong deiki gat keca kenengamengtopu, Allahdi nun kange dipru puto kemdina tep, karesere keca dopropmumdi, ketenem dinkamrume. Akeca yuma dopra keteneiptumtoda, dan taru di do yuma, mali keca yaredi, kurpeteserya peda, kwar dangna gum di, pio dimpeprap, puto di kunkamrume. Ketenemna gum dingeda, puto men kutume. Mali keca di bisbisa kapseredi, mali kudiserepa, mali kupbankamrume.

14 ‘Ukupserur’ tenena tep, pio dimpeprap puto di kunkamrume. Allahdi kareserepa, kenengkamrum kecada ake. Ada, jen talen nengdi deiyoteng deriramengtopu, Allah er tek sisi upu gekepmumdi, moupra talenkamrume. Allah er upuda, sun deiyoteng utopu kunkamsere. Tonda, jen talen nengdi, taram deiki teng kenengamengtopu, Allah er kwirye kuretopu, nun tep, ‘Dumsisi nesala kunkameng’ tenen, telep kupra deipseryopda, sun peda dumsisipu kupbankamrume. Dumsisi kunada, sun taram deiki teng kenengamengtopu kupbankamrume. 15 Jen talena nengdi, sun yan deiki gat sepatu kenengamengtopu, Allah er kai telep upu, nimi lyemna tep, er telep upu kael kemumya deiki di, ketenem dinkamrume. Er kai telep upu gekepmepya deiki di, er cap antaipserepa, kange deipra kunupe. Er kai telep upuda, sun yan deiki gat sepatu utopu kupkamsere.

16 Ange yuma doprap keteneipmum dingeda, jen talen nengda, ‘Nun pona tep neng, mar di popsenung’ tenen, kelapi, tonda er si perisai dopra, sun urasin tara talepra baramengtopu, pio puto di, Allah tep teka tenenkamrume. Kain Jen Ngebodi, nun tep, ‘Sun dipru mali kupra deipnepa, mali kunkameng’ tenen, kurpetesere kecada, mar uku dopnedi, doramengtopu kurure. Sundi Allah tep, teka tenepmumya deiki di, isok er mar uku tapmumdi, akurpeten keca yuma popbisiptume. Atep, sundi Allah tep, puto di teka tenenkamrum ngeda, ada sun kelapi utopu, tonda er sida perisai utopu kunkamsere.

17 Jen talena nengdi, ‘Nun giso deiki popsenung’ tenen, gat topi galuramengtopu, sun kange tenenange kalengna tep, Allahdi konum lyemseryada, pio tenenapu kunkamrume. Tonda, Allah er Lek Sambala er parang ya utopunge, Allah er tek upuda, moupra kael kepmumdi, talepra kunkamrume. Sun giso galuna utopu ngeda, ada Allahdi lyemserure tenena tepa. Sun parang ya utopu ngeda, ada Allah er tek sisi upu tepa.

18 Ange yuma doupra, kunkamrum taru neitamai yumada, Allah er Lek Sambaladi, sun kange dipru taleseredi, er puto deiki peseretopu, Allah morona yala-yala yuma cap, sun putan keca tep, Allah morona cap, pio kunkamrume. Atep, ‘Allah er Lek Sambala puto kareserya deiki di, Allah moronkamepe’ tenenapu kumumdi, tali kange doupra, dabal kuna gum dipapu kunkamrume. Tonda, tamna gum, pio pe deipra, Allah tep pio moronkamrume. Allah moronkamrumada, ake. Ada ‘Allahdi wepra, er nyapu keipseu nesala yuma tep, Allahdi makunkamsere’ tenen, sundi Allah moronkamrume.

19 Tonda ne kayapu, ne tep Allah moronkamnerume. Ada, ‘Paulusdi upu penkamre taru yumada, Allahdi telep upu karerepa, telep kupra peteremkamre’ tenen, Allah moronkamnerume. Tonda, Paulusdi, ‘Aupu tep derepkuneng do?’ tenen, ‘Kwar dangna gum di, kika deipra, Allah er kai telep upu, telep kupra petereptue’ tenen, sundi ne tep Allah moronkamnerume. Allahdi er kai telep upu deiyo ngeda, menop taru iniamu dinin, ukutaru konum katuai lape peipseua tep peteremnupe. 20 Ne Paulusdi aupu dopra peterembaramsa tep nengeda, yu nengdi, ‘Aupuda nun song’ tenen, tomopneidi, ateng koupra, wenemna ati dongopneipa, acapu tupa kunune. Ukunun dinin, aupu kai pena peteremna deiyo ngebo tupa kunune. Tek sisi telep ngeda, sundi, ‘Paulusda, kwar dangna gum dipapu, kika deipra, puto di peteremkamre,’ tenen, Allah moronkamnerume.

Asurat gawal dangna tep, pepu upu

21 Uda ne kayapu, nun weit utopu ngebo Tikikus, nun Deiyo Ngebo Yesus cap, dipru dukdongopra kuredi, tamna gum, pio pe deipra, Yesus tep pel dorure. Tikikusdi ne kune keca cap, ikin kunere keca cap yumada, sun gekena tep, sun damai yaredi, lap pepserepa gekerumnyopda, ne kune keca yuma kael kepkamrume. 22 Nedi Tikikus dopra, sun damai dokotepnenge deiyoda, ange pua. Yuk ton gume. Erdi sun Efesus mutu kurum nesala tep, sun damai yana, nun kuserenge cap, nun kunup keca cap, lap pepserepa, kael kepsemumnyopda, ‘Ange deiki di, sun dipru kwa dipkamre’ tenen, sun damai dokotepsene. 23 Telepe, sun teka tenepya tep, nun weit yapu utopu nesala yuma tep nengeda, Allah moronun keca pepkusene.

Ada, ‘Nun nai bo Allah cap, nun Deiyo Ngebo Yesus Kristus cap, sun butene di sun yuma tep, mambul keca karenkamsereng’ tenen, Allah morosenune. Karenkamsereng ngeda, ake. Ada, yu tenedana gum di, yuk neng cap kange deipdana, bouna di kikiman kuna deiyo keca cap, yuk neng tep bicau tenepra makudana deiyo keca cap, Allah tep ila di teka tenena deiyo keca cap, ‘Adeiyo keca yuma kareserengopda, pio teleppu kunkameng’ tenen, sun teka tenerum nesala yuma tep nedi Allah morosenune. 24 Tonda, ware mutu nesala do yuma, nun Deiyo Ngebo Yesus Kristus tep, sun kange er deikipu deipra, erpu talepra kungedi, pio men tamenge nesala tep nengeda, Allah moronun keca pepkusene. Ada, ‘Allah bicau teneseredi, er kange dipapu pel dona deiyo keca melipra karesere keca, weika di kareseredi, telep kupra deipkamser’ tenen, Allah morosenune.

Telepe akonum pepsene.

Ne Paulusdi acapu deipsene.