Est 1 | XteSC | STEP

Esther 1

Persia mutu ila nimi deiyo ngebo Raja Ahasyeweros, er ner Ratu ^{▼▼Ratu – Pumun taruda, ila mutu yuma talepra ila nimi deiyo neng tep, Raja perami. Aila nimi deiyo neng, sun domi nerapu tep nengeda, nimi deiyo pel talepra kuramya tep, anerapu tep, ‘Ratu’ perami. Atep aupu Ratuda, ‘Ila nimi deiyo ner kurure’ tenen, perami. Persia mutu taleramu ngebo, er ner sida, Wasti kuramnga cadi, aner tep, Ratu Wasti perami.} Wasti nerdi, er nenge Raja Ahasyeweros tep, yanipu upu

1 – 2 Persia mutu neitamai, permerintah deiyoi mutu, er sida, ila kota Susan kwamu. Persia mutu yuma taleramu deiyo ngebo, er si Ahasyeweros kuramu. Raja Ahasyewerosdi taleamu mutu yumada, pala pio weik mutu cadi, amutu neitamaida, 127 propinsi kwamu. ARaja Ahasyewerosdi taleamu mutuda, India mutu neitamai di dipdongopra, Sudan ^{▼▼Sudan – Amutu tenpu dinin, yuk Alkitab buku neitamaida, amutu si tep Etiopia mutu penunge, tonda Kus mutu penunge.} mutu neitamai yuma taleamu. 3 Ahasyewerosdi Persia mutu yuma taleramu taru neitamai, keteng tamun weneri deiki di, Raja Ahasyewerosdi pepu. “Ne talenun mutu, Persia mutu neitamai, ila nimi deiyo talepra kumum neng yumada, bulupmumpa ila kailya kalepkamepe,” pepu. “Ada Persia mutu cap, Media mutu cap neitamai kumumdi, pemerintah pel talepra domum ila deiyo neng yuma cap, Gubernur neng yuma cap, jen talen neng, sun ila deiyo neng, jen talena deiyo neng panglima cap, amutu nesala deiki tara eremna neng cap, sun yumada bupra yamumpa ila kailya kalepkamepe,” pepu.

4 Akailya kalepra kuramipane, wareda enam bulan neitamai yumada, kailya kalepra kurami. Ataru neitamai yumada, ila nimi deiyo ngebo Raja Ahasyewerosdi, er taleramu keca yuma, kunumna weik keca cap, urasin pio telep keca cap, isomka keca cap dopra katuai deipupa, aila nimi deiyo neng yumadi, diramidi, ‘Uo, Raja Ahasyewerosdi talerur isomka keca cap, erdi pel dorur keca cap yumada, mambul weik kurure. Akeca yumada pio telepe,’ teneramidi, pio kange derirami. Ukupra akeca yuma dirami taru yumada, 180 tumi deiki di diramidi kange derirami.

5 Ukuramipane, wareda enam bulan konum kupupa, aila nimi deiyo ngebo Raja Ahasyewerosdi, ila kailya ton kalepra keteneipu. Ange konum kupu dingeda, er dipapu er amutara kurami nesala yuma tep pepu. “Sun yuma, ila neng pe, tali amutara dakurumu nesala yuma peda, akailya kalepra deipmasenada, jeryarume,” pepu. Ada, Susan mutu neitamai dinin, ila nimi deiyo ngebo, er pio telep ati damai, kait keca kouramnga neitamai, urasin pio telepai bulupra yai. Tumida, yoneitam bari tumi neitamai yuma di kailya kalepra kikimanpu jerami.

6 Akailya kalepyaida, ila nimi deiyo ngebo, Raja er ati dam pirmanai, er bungya damai yumada, kain urasin pio telepnge dipapu kapra deipu. Ada kunumna weik opkal mirin nge cap, kurun nge cap yumada, tapu koupdongopra deipu. Tonda, buru dongorameng keca utopu keca, peraknge di, kunumna weik lyom gel, er sida pualam gel ikrapidi, aopkal gerekra deipipa, pio kwiryepu deipipa, urasin pio telep kupu. Ukupidi, kunumna weik gat keca, er sida emas cap, perak capdi, nimi beipye peingna tep bungna keca, petupra deipipa, urasin pio telep kupu.

Tonda, akeca deipka amutarada, ason pio telepnge keteneipu. Ada, kunumna weik gel, er sida pualam kurun nge cap, hablur binge cap, laut mokon pumbon gat keca er sida, mutiara bol deiki melang peramrenge cap, yuk kunumna weik gel tapakra deipipa akati asonda, urasin pio teleppu kupu.

7 Nimi deiyo ngebo Rajadi, ‘Ne kayapu neng tep, telep keca weika di karepkamne’ tenen, anggur tapu du me mokon, kange yawaramne me weika di ketenepra deiamupa, weika di bupra jerami. Anggur me gwepra jena tep ketenepra deipu mauda, emas di ketekepra deipu. Ajen mau yuma weika di akapu dinin, urasinda yuk-yuk kupu. 8 Ange ukupra keteneipu dingeda, er ati pumbon neitamai pel melimna neng tep pepu. “Nimi bo neng tep anggur me karepkumum dingeda, ‘Akonum jepmarume,’ pena gume. Sun yuk-yuk putanmarepa, ‘Jeptepe,’ tenenmangetopu, tali lupra karepmumpa, weika di jenkamenge,” pepra deipu.

9 Ange utopu, ataru peda, Raja Ahasyeweros, er ner Rastu Wasti, gonga keprapudi ila kailya ton ketenepra deipu. Ada, ila deiyo ngebo Raja Ahasyeweros, er ati pel don nerapu yuma tep, akailya kalepu. 10 Ukupra, akailya kalepra deipmai keca jepra, anggur tapu du me mokon weika di jepra dakuramipane, yoneitam bari tumi konum kupu pangeda, nimi deiyo ngebo Raja Ahasyeweros, anggur me weika di jenmaupane, er kange yambula di yawarapka tep, kange pio telep kupu. Ukupu pangeda, er amutara pel don neng, yoneitam bari neng tep kongpepu. Ayoneitam bari nengda, sun sida ake. Mehuman cap, Bizta cap, Harbona cap, Bigta cap, Abagta cap, Setar cap, Karkas cap tep kongpepupa, er damai yai.

11 Erdi sun aneng yuma tep pepu. “Sundi ne ner Ratu Wasti dopra duyarume,” pepra deipu. Upepka deiyoda ake. Ada, Ratu Wastida, er urasin pio telep ner kuramu. Atep, ‘Ne ati yanmai nimi bo neng yumadi, ne ner Wasti urasin pio telep ner epmengedi, kange deipkameng,’ tenepu. ‘Nimi bo nengdi, ne ner epmengedi, kange deipkameng,’ tenepudi, er amutara pel don neng tep pepu. “Ne ner Wasti, ila nimi deiyo ner kurura tep, er giso deiki derirameng keca er sida mahkota, er giso deiki deipra, ne damai duyankunerume,” pepu.

12 Nimi deiyo ngebo Ahasyewerosdi, er amutara pel don neng tep peipupa, aupu doupra Ratu Wasti ner tep bena pepi. Dinino, Ratu Wastidi er upu gekepudi, mali kange doupudi, “Gume, ne men yankune,” pepu. Aupu pepupa, Raja nimi deiyo ngebo er amutara pel don nengdi, lap perbeipa, Raja Ahasyeweros gekepudi, yu pio weik kupupa, Ratu Wasti tep derepu.

13 Yu kupupa, ‘Uo, ne ner Wastidi, ne upu gekena gum di, yanipmara cadi, ange ukupmara tep, ware kupra wenepkamne do?’ tenen, er amutara pel don neng ton kongpepu. Ada, ila nimi deiyo ngebo Rajadi er amutara nesala yuma tep, “Nun mutu neitamaida, telep kupra kunada ake, mali kuna ngeda ake. Ukupkamrume,” pepra, lap pena deiyo neng, sun ila kael kemami neng tep, kongpepupa, yai pangeda, upepu. “Ratu Wastidi, ne upu yaniptapmanera cadi, ange utopu kuptu pangeda, ware kupra wenepkamne do?” pepra moropu. 14 Raja Ahasyewerosdi upepu dingeda, sun yuk mutu ila nimi deiyo neng, upu moupra pedina tep meneng damai kurami neng kongpepupa, er damai yai. Ayai neng sun sida ake. Karsena cap, Setar cap, Admata cap, Tarsis cap, Meres cap, Marsena cap, yai. Sun anengda, Persia mutu cap, Media mutu cap, pio erepra deiki tara talepra kurami neng yuma yai.

15 Nimi deiyo ngebo Raja Ahasyewerosdi ayoneitam bari ila deiyo neng tep pepu. “Nedi ne pel don neng wepra deipsipa, ne ner Ratu Wasti damai peipi dinin, ne ner Wastidi ne tep, ‘Gume, aupu men gekepkukena tep, neda kan damai men yankune,’ pepra, ne peipsi upu yanipmanerdi, ne damai men yau. Ukupra, ne peipsi upu tep, ‘Ne songe’ tenen, yaniptapneudi, ne damai men yau. Atep nengeda, aner er wenemna tep, ware kuptene do?” pepra asipetepu.

16 Nimi deiyo ngebo Raja Ahasyewerosdi, aupu konum pepkopda, ila kael ngebo tenpu, er si Memukandi, aila-ila neng yuma gekenmaiya neitamai di pepu. “Aner Rastu Wastida, er mali kupmau kecada, ila mambul kurure. Ada, tali men pepkene. Kan damai tepapu mali pepra men deipmakere. Ahasyeweros kandi talemumpa, kunge nesala yuma cap, amutu nimi deiyo talepra kunge deiyo-deiyo neng cap, ila-ila nimi deiyo neng yuma tep, mali kweipmasere,” pepu.

17 Upepudi, aupu ton cap dukdongopra pepu. “Ada tali tep men pepkene. Deiyoda ake. Ratu Wasti erdi kupmau kecada, amutu neitamai kunge nerapu yumadi konum kael kemnunge. Kael kemengedi, sun neng yapu yuma tep, utenenkamenge. ‘Gume, nun mutu ila nimi deiyo ner Ratu Wastida, er akengebo Raja Ahasyewerosdi pepu upu tep, ‘Ne songe’ tenen, yaniptapudi, er damai men beu. Atep nengeda, nun peda, nun akenge yapudi pesenge upu peda, yanitamnapu kunkamepe,’ tenenkamsenge. Atep naio, kandi tenepmumada, ‘Ratu Wasti ne damai yaredi, ne penkamne upuda, moupra gekepkamnere’ tenen, peipmum dinino, Wasti erda, kan upu yaniptapmakeudi, kan damai men yaue.

18 Atumi peda, Persia mutu cap, Media mutu cap talepra kunge ila neng, sun nerapu yuma, Ratu Wasti nerdi kupmaunge tep, lap pepipa gekepi. Atep nengeda, ataru di gonga kepra, dorkunkamre taru neitamaida, nun nerapu yumadi, sun neng yapu upu bisipsengedi, yanitamnapu kunkamsenge. Ukupra kupsengopda, amenda taru ikin weik kunkamser ngeda, pio men gum kupkamre. Ikin keca nun damai pio weika di yakankamsere.”

19 “Ange tep nengeda, nun nai bo kandi, ‘Telepe,’ tenepsetumpa, nundi pepkukep ngepu kunkamrume. Ada, kandi aner tep, ‘Ukupkamrume,’ peipmempa, nun Persia mutu cap, Media mutu cap neitamai kunup nesala yuma tep, ‘Ukunkamrume,’ pepra derirum mem upu, er sida peraturan ngeda, abuku neitamaipu sengkamepe. Ada kan nimi deiyo ngebo Raja si deiki di peipmempa, sekmepyopda, amem upuda, pio akapkamre. Ware nesala do yuma, asengkamep upu men yaniptaptenge.

Tonda, ange tapra aupu pununa tep, pio men sengkamenge. Kandi, ‘Telepe,’ tenepsememnyopda, apepkukep ngeda, sengkamrume. ‘Ratu Wastida, kange di ton cap, ne Raja Ahasyeweros damai yakana pio meme. Erda, pio yuk kunkamre,’ pepra sengkamrume.

Ukupra sekmem dingeda, Wasti taleamu keca yuma cap, kan cap amutu yuma taleramu deiyonge cap dopra, er pununa tep, yuk ner wepmemdi aner tep karepkamrume. Kandi, ‘Ukupkamepe,’ pepra sengderina deiki di sekeipsememnyopda, kange di tamupra men daktapkamrume.

20 Uda nun nai bo, kandi, ‘Ukupkamre,’ pepmarem upuda amutu yuma pepra deipmempa, doupra embendangedi, weik kuprepa, apala mutu neitamai kunge nerapu yumadi, kware kunkamenge. Kware kupmengopda, sun neng yapu tep, gispal donkamenge. Ada ila isomka nerapu pe, tali kankan kunge nerapu pe yuma tep, kware tenepmengedi, teleppu kunkamenge.” Ila kael ngebo, er si Memukandi, Raja Ahasyeweros tep pepu.

21 Memukandi, Raja Ahasyeweros tep, upepupa, ila nimi deiyo ngebo Raja Ahasyeweros cap, er amutara pel talepra don neng dinin, Persia mutu cap, Media mutu cap yuma talepra kurami ila-ila neng yuma gekepidi, ‘E, erdi pepmaser upuda, telep cadi ukupkupe,’ tenepi. ‘Telepe,’ tenepi cadi, Memukandi, Raja Ahasyeweros tep peputopu, Raja Ahasyewerosdi kupu.

22 Persia mutu yuma talepra ila nimi deiyo ngebo Raja Ahasyewerosdi er taleamupa talepra kurami neng cap, er taleamu mutu neitamai kurami nesala yuma tep, sengna sekra dokoteramu. Ada sun kurami mutu kikiman dukdongopra kuramitopu, ‘Sun yuk-yuk epmengedi, aupu kael kepmengedi, pedankameng’ tenen, seku.

Tonda, ‘Moupra kael kepkameng’ tenen, amutu neitamai kuramu propinsi akwamutopu, tonda sun perami upu yuk-yuk akwamutopu, ‘Nimida, sun nerapu cap, sun nyapu cap yumada, sun nai yapu penge upu moupra gekenkamrume,’ pepra, surat sekra dokoteramupa, amutu neitamai kurami nesala dirami.