Esther 2

Amutu nengdi, ‘Nimi deiyo ner Ratu kunkamre’ tenen, Ester wepra deipi upu

1Nimi deiyo ngebo Raja Ahasyeweros yu kupupa, Ratu Wasti tep derepunge yuma, ware kupra taru do, konum mapu dingeda, Ratu Wastidi kupunge tep tupa tenepra kuramnganen, amenda taru, ‘Ukuda, ware kupkun do?’ tenen, tupa tenenapu kuramu. 2Atep, Raja Ahasyeweros er ati neitamai pel melimna nengdi, ila nimi deiyo ngebo Raja tep upepi. “Naio, Ratu Wasti pununa tep, urasin pio telep kaber nerapu erbenkamepe. Epmepyopda, urasin pio telep kaber nerapu dopra, kan ati pumbon deriryakankamepe.

3Tonda, kandi peipmempa, akaber nerapu erterena deiyo neng ton wepra deipkamrume. Kandi talerum propinsi neitamai yuma, deiyo neng ton wepra deipmempa, sundi urasin telep nerapu erterenkamenge. Epra embaramenganen, konum epmengopda, anerapu dopra yangedi, akota mutu Susan neitamai dinin, kan ati pumbon derinkamenge.

Ukupmengopda, kan amutara pel dona deiyo ngebo, er si Hegaidi, akaber nerapu yuma tep, melipra kalengkamre. Akaber nerapu kan ati pumbon kunkameng taruda, sun urasin pio telep kuna tep, me gengna cap, nintong telep me likra derinkameng keca cap, kunkamenge.

4Ange yuma konum kupmengopda, nai Raja Ahasyeweroso, kandi tenepmemdi, kan urasin dina telep kupkerepa, kan kange kupmanto kaber ner ton akwapyopda, wepra deipmempa, nun ila deiyo ner, Ratu Wasti er yo pununa tep kunkamre.” Raja Ahasyeweros er ati pum pel melimna nengdi, Raja tep pepipa, aupu gekepu.

5Ataruda, Persia mutu ila deiyoi kota Susan mutu neitamai, nimi tenpu ton Yahudi yala ngebo, er sida Mordekai kuramu. Mordekai er naida Yari. Yari er naida Simei. Simei er naida Kis kuramu. Sun aneng yumada Benyamin yala neng pua. 6Mordekai erda Persia mutu neitamai kuramu. Dinino, pumun taruda Yerusalem mutu kuramu. Yerusalem kuramu dinin, amenda taru Babel mutu ila nimi deiyo ngebo, er sida Raja Nebukadnezardi Yerusalem mutu popbisipudi, Yudea mutu talepra ila nimi deiyo ngebo er sida Yoyakin cap, Yudea nimi weik ton cap douprapudi, kange di tamupra Persia mutu dubena wenemna ati neitamai deiami. Ukupra dubenami taru, Mordekai peda, wenemna atipu deiami.

7Mordekai er weit bodi deiamu ner mi, er sida Hadasa kuramu. Akaber ner Hadasa, er nai cap, er nin cap deamreipa, Mordekaidi, ‘Aner ne ner mi utopu kunkamre. Ne dipu aner mi melipra kalengkamne’ tenen, er cap kikiman kuramipa, Mordekai er nyapu sisa erdi deipnengatopu kwamu. Hadasada, er urasin cap, er nong cap pio telep kaber ner kuramu. Aner tenpu dinin, er si ton Ester perami. 8Nimi deiyo ngebo Raja Ahasyewerosdi, ‘Ne talenun mutu neitamai yuma kumum nimi, sun nerapu cap, sun nyapu cap yumada, sun nai yapu penge upu pio moupra gekenkamenge.

Urasin telep kaber nerapu yumada ne damaipu doupra duyakankamnerume,’ pepra, surat sekra dokoteramupa, aupu peiputopu urasin telep kaber nerapu weika di doupra yakaramidi, ila kota mutu neitamai, Susan mutu yana bupra deriryakarami. Abulupra deipmaiya neitamaida, Ester ton sun kan-kan neitamai akunmau. Ester peda nimi deiyo ngebo Hegai er amutara kuramu. Ada kaber nerapu yuma melipra kalengamu.

9Ukuramupa, Hegai epudi Ester tep pio kange deiamudi bicau teneramu. Bicau teneramudi, Hegaidi Ester tep, ‘Urasin pio telep kupra keteneipdankamre’ tenen, urasin telep kuna tep, me gengna cap, nintong telep me likra derin cap kuramu. Ukupu dingeda, jen keca telepnge yuk kareramu. Kareramupa, Ester dopra teleppu kupbaramu. Tonda Ester er melimna tep, yuk tara nerapu yoneitam bari wepra deipupa, Ester tep melimami. Tonda, Raja Ahasyeweros er ila deiyo ati pumbon dinin, nerapu kuna tep, pio telepai bena deipu. Anerapu yuma tep, Hegaidi karepu pel talepra doramidi, Ester tep melimami.

10Mordekaidi, akaber ner Ester tep, upepu. “Raja Ahasyeweros, ‘Derepkerur’ tenen, kan nai yapu cap, kan nin yapu cap, kan yala nesala cap, adano pepra, pio men lap penkamrume. ‘Ne yalada ake,’ pepra, katuai di men lap penkamrume. Angeda inimnapu kunkamrume,” pepu. ‘Angeda men lap penkamrume,’ pepunge deiyoda, Esterda Yahudi yala ner kuramnga tepa. 11Tonda Mordekaidi, er ner mi Ester tep, ‘Er urasin ware kupkamre do? Akati neng cap, nerapu capdi, Ester tep, telep kupra melimnung do?’ tenen, amutu ila nimi deiyo ngebo er ati dam tupa-tupa asimbaramudi, ‘Ester cap sun kaber nerapu yumada, ware keca kupkameng do?’ tenen, asimtereramu.

12Uda, ‘Akaber nerapu, sun urasin pio telep kunkameng’ tenen, sun urasin telep kuna tep, keteng tamun tenpu deiki di nintong telep minyak er sida kemenyan, sun nong deiki kwemami. Ukurami. Tonda, warda ngantan bari deiki di bokra, yuk nintong telep keca er sida wangi-wangi cap tapakra sun nong deiki kwemami. Ukuramidi, amol di dutara dua belas (12) war deiki di tapakra sun nong deiki nintong telep peramre me yuma kwemamidi lingami. Ukupra kuramiyanen, akaber nerapu yumadi ukupne dingeda, ila nimi deiyo ngebo Raja Ahasyeweros damaipu barami.

13Ukupra sun deiyo ngebo Raja Ahasyeweros er damai barami. Ukuramipa, kaber ner tenpu ila nimi deiyo ngebo Raja damai wekra beu taruda, aner er putapnepa bena moropnetopu, kareramu. Kareramupa, anerapu sun pel dona tep, ila deiyo ngebo Raja er ati pum bena pel talepra dorami.

14Uda kapul ipbanmau taru di, nimi deiyo ngebo Raja er bungna damai wekra kunmauanen, berekupa ipna taru kange di tamupra yuk ati pumbon bena kunmau. Dinino, adipapu tamupra nerapu sun pel don ati butenenge neitamaipu bena kunmau. Akaber nerda adipapu nimi deiyo ngebo damai men benmau. Yuk ati dakunmaupane, Raja ngebodi, ‘Akaber ner tep ne kange deipmanera cadi, anerda, kange di ton cap ne damai yatue,’ tenepnyopda, akaber ner si pepra moropnyopda, asi pepne kaber nerpu ka di tamupra Raja ngebo er damai bena kikiman kuramu. Sun Persia mutu ila nimi deiyo nengdi ukurami.

15Uda, Ester erda ila nimi deiyo ngebo Raja er ati bana tep kongpepi. Esterda, er nai bo Abihail kuramu. Abihailda, Mordekai er mambo kuramu. Abihail depupa, er mi Mordekai dipapu, Ester gwanamudi er nai bo keamu. Er ner mi Esterda erepra deipidi, Raja Ahasyeweros amutara pel dona ngebo Hegai Raja ngebo er nerapu ati deiyo talepra kuramudi, anerapu tep melipra kalengamupa, Raja Ahasyeweros damai bana tep, Ester si pepipa, er ketenemna tep, Hegaidi, “Ukupkurume, akeca dopra dubenkurume,” peiputopu, Ester gekepu.

Yuk keca ton men moropu. Amutu kurami nesala cap, Raja ngebo er ati pumbon kurami neng cap, sun yumadi Ester tepapu moupra diramidi, er tep pio bicau tenerami. 16Ukuramipane, Raja Ahasyewerosdi amutu talepra kuramnganen, keteng tamun yoneitam bari kupupa, ware takol bari (10) kupupa, Ester si pepra, “Raja damai yarume,” pepi. Adeiki di, Esterda ila nimi deiyo ngebo Raja Ahasyeweros er ati bungnai wekra yau.

17Persia mutu ila nimi deiyo ngebo Raja Ahasyeweros, er nerapuda weik kurami dinin, Raja ngebodi Ester pio diramudi er tep kange weika di deriramu. Tonda, yuk kaber nerapu yuma tep ton, pio kange men deriramu. Ange tep nengeda, Ester tep bicau teneramudi, pio kange deriramnga deiki di, nimi deiyo neng kepmengedi galupra kenengameng keca, er sida mahkota dopra, Ester er giso deiki galupra deipu. Ada, ‘Ester amutu ila nimi deiyo ner, Ratu Ester kunkamre’ tenen, nimi deiyo kepmengedi, talepra kurameng keca er sida mahkota, Ester giso deiki galupra deipudi, menop taru amutu deiyo ner Ratu Wasti yo pununa tep erepra deipu.

18Ange yuma konum kupu dingeda, Persia mutu ila nimi deiyo ngebo Raja Ahasyewerosdi, “Ester er gispal dona tep, ila kailya kalepkamepa cadi, ne amutara deiyo neng yuma cap, mambul pel don neng cap, pegawai permerintah neng cap, ila neng yuma bulupkurume,” pepu. Upepudi, “Ester gispal dona tep, ne talenun mutu cap, propinsi yuma cap neitamai kurumu nesala yumada, atumi deiki di pel dona gum di, beipyepu peikamrume,” pepu. Upepudi, pio telep keca weika di amutu nesala tep weika di kareramu.

Mordekaidi nimi deiyo ngebo, er nong lyepra deipu upu

19Uda ataru neitamai yuma, Mordekaida ila nimi deiyo ngebo, er pel melipra don ngebo pegawai kemamu. Ukuramnganen, ue butene taru, Raja ngebo er pegawai nengdi, “Kaber nerapu ton, Raja damai yankununge,” pepra kongpepi. 20Ataru neitamai yumada, Esterdi, “Ne nai cap, nanin capda, Yudea tara nesala kuramrei cadi, ne peda Yudea yala ner kunune,” pio men lap peramu. Akuramunge deiyoda, Mordekaidi, ‘Ukunkamrume,’ pepka tep, apeiamutopu pio kuramu. Esterda er nai bo deamupa, er nyapu taru di Mordekaidi dopra gwanaimupa, er nai bo sisa utopu kupra, bouna di er amutara kuramu. Mordekaidi Ester tep, ‘Ukunkamrume,’ pepra pediramu upu yuma gekepra kuramu.

21Ataruda, Mordekaidi amutu neitamai nimi deiyo ngebo bungnai barami bisi buplan damai kunmau. Tonda, nimi deiyo ngebo Raja Ahasyeweros, er pel don neng butene cap kikiman kunmai. Mordekai cap pel dopra kunmai neng sun sida ake: Bigtan cap, Teres cap, sun butene peda buplan damai kalengna nengpu kuramrei. Dinino, sun butenedi, Raja Ahasyeweros tep, yu kupupa, yuk neng damai bena, ‘Angebo Raja poipserume,’ pepra deiprei. Ataruda, sun butenedi mali kange doupra Ahasyeweros pona tep, kalengamrei.

22Sun tenepmareinge, Mordekai konum kael kepu dingeda, er adipapu menmena Ester damai bena lap pepu. Ukupra dakunmaipane, Esterdi nimi deiyo ngebo Raja tep, aupu yuma lap pepu. Ada, “Mordekaidi aupu lap pepneupa, nedi kan tep pepkene,” pepra lap penmau.

23Lap penmaupa, Raja er amutara nengdi, ‘Abutene neng Bigtan cap, Teres capdi kan tep mali kange tenepmainge yumada, tek do, tali do?’ tenen, amutu deiyo nengdi dipetepidi, ‘Uo, tek sisi abutene nengdi, Raja popkamepe,’ teneprei ngeda, tek sisi lap pepseu. Ange yumada, ‘Tek do, gum do?’ tenen, enmaiyanen, tek sisa konum epi dingeda, abutene nengda Bigtan cap, Teres cap, sun wenemna tep co ikrapidi, aco deiki gerekra deripkotepipa, abutene neng deprei. Akupi keca yuma kael kemna tep, nungna buku neitamai sekrapidi, ila nimi deiyo ngebo bungna damaipu sekra deipi.