Est 3 | XteSC | STEP | Akuraminge yuma konum kupu pangeda, Persia mutu ila nimi deiyo ngebo Raja Ahasyewerosdi, yuk ngebo ton, er sida Haman wepra deipu. ‘Hamanda, ila ngebo kunkamre’ tenen, erepra deipupa, mentri pemerintah kepu. Raja Ahasyeweros, er amutara pel dorami neng weik akurami dinin, Hamanda, sun deiki tara kuramudi, ila mambul ngebo kuramu. Haman, er nai boda Hamedata, er yala deipdanen yakarami ngebo, er apuboda Agag kuramu.

Esther 3

Hamandi, ‘Yahudi yala nesala tep, popra gawal dakamep’ tenen, pepu upu

1 Akuraminge yuma konum kupu pangeda, Persia mutu ila nimi deiyo ngebo Raja Ahasyewerosdi, yuk ngebo ton, er sida Haman wepra deipu. ‘Hamanda, ila ngebo kunkamre’ tenen, erepra deipupa, mentri pemerintah kepu. Raja Ahasyeweros, er amutara pel dorami neng weik akurami dinin, Hamanda, sun deiki tara kuramudi, ila mambul ngebo kuramu. Haman, er nai boda Hamedata, er yala deipdanen yakarami ngebo, er apuboda Agag kuramu.

2 Raja Ahasyewerosdi, Haman wepra deipudi, “Haman tep gispal donkamrume. Haman damaida, gispal donkamrume,” pepra deipu. Atep, ware ila nimi deiyo neng do yuma, Haman er damai bendi gutam tu dipdongopra pio gispalpu dorami. Dinino, Mordekaidi, ‘Gume, angebo er damai gutam tu dipdongopra er tep ngeda gispal men donkamne,’ teneramu.

3 Ukupra dakuramnganen, ila nimi deiyo ngebo Raja er pel dorami neng, er deiyo nengdi, Raja Ahasyeweros er ati bisi buplan damai bulupra upu sisingami nengdi, Mordekai tep asipetepi, “Kao, kanda ware deiyo tep, nun nai bo ila nimi deiyo ngebo Raja Ahasyewerosdi peipseu upu bisipmaremdi, Haman tep gispal men donmarem do?” pepi. 4 Uda ataru-ataru yumada, er kupu keca yuma tep, sun yuk deiyo nengdi Mordekai tep, “Ware deiyo keca tep, nun nai Raja Ahasyeweros upu yanitamrum do?” pepra asipetepi dinino, erdi pio men gekeramu.

Tonda erdi, “Gume, neda Yahudi yala ngebo kununa cadi, tali tuai neng tep gutam tu dipdongopra, giso genepdongopra gispal men doptene,” pepu. Upepupa sundi aupu doupra, mentri Haman damai perbei. Aupu lap perbeinge deiyoda, ake. Ada, Mordekaidi, “Neda Yahudi yala ngebo kununa cadi, tali nimi tep gutam tu dipdongopra, giso genepdongopra gispal men doptene,” pepu. Atep nengeda, sundi, ‘Bena pepmepepa, Hamandi aupu kael kepredi, ware upu pepkamre do?’ tenen, perbei.

5 Haman bena dinmaupa, Mordekaidi gutam tu dipdongopra gispal men dopupa, Haman kael kepudi yu weik kupu. Yu kupupa, Mordekai tep ila di derepu. 6 Dinino, ange yuma ukupupa, Haman konum kael kepudi, er Mordekai tep, ‘Teka erda Yahudi yala ngebo cadi, erda pio mali ngebo tep, ne songe,’ tenepu. Tonda, ‘Mordekaipu gum dinino, Yahudi yala nesala yuma Persia mutu Ahasyewerosdi taleamupa, kuramya kan-kan neitamai talepupa kunge nesala yumada, ponapu kunkamepe,’ tenepu. Hamandi utenenapu kuramu.

7 Keteng tamun amul damai di dutara (12) konum kupu pangeda, ware tenpunge tep, Nisan perami war, awar konum kupu pangeda, nimi deiyo ngebo Hamandi, ‘Ware kupkamep do?’ tenen, “Kurpeten keca er sida undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} doryankamrume,” pepu. Persia mutu nesaladi akeca er sida purim perami. Amutu nengdi, “Akeca dipetepmepdi, ‘Atumida ake, awarda ake,’ peprepa kael kepmepedi, ‘Ataru kupkamepe,’ pepkamepe,” pepi. Yahudi yala nesala yuma tep yu tenepmepe ngeda, “Undi erdi pepserenge pua,” pepipa, undi donmaupanen, ware dua belasnge, war si Adar kepu.

8 Ange konum kupkopda, Hamandi ila nimi deiyo ngebo Raja Ahasyeweros tep pepu. “Ne nai bo kan tep pepkukene. Kandi talesemempa, nun amutu kunupa neitamai yumada, yuk mutu nimi bo nesala utopu kununge. Anesalada, nundi kuramep keca cap, tenenup keca cap utopu pio men kununge. Kandi nesala yala-yala weik talerum dinin, ayala nesalada, pio yuk kange doupra kununge.

Tonda, sun keca pio yuk-yuk kununga cadi, kandi, ‘Angeda kupkamrume, angeda men kupkamrume,’ pepra deriserem upuda, anesala gekepra men kununge. Atep nengeda, kandi anesala tep, ‘Dakwapye, sun dakunkamenge,’ tenepmemdi, tapmemnyopda, amenda taru ikin keca nun damai yankamsere. Angeda men kupkamrume. Telep ngeda, anesala wenepkamrume.

9 Atep ne nai bo, kandi ikin men tenepkamserume. Kandi, ‘Telepe,’ teneptumopda, kandi peipsetumpa, anesala yuma popkamepe. Kandi, ‘Anesala poptapkamrume,’ pepra surat sekrapmemdi, kan talepmumpa kunge mutu yuma dokotepkurume. Ukupmemnyopda, ne Hamandi gel uang er sida perak, pio weik 340.000 kilo ketenepra deipnepa, Yahudi nesala porbenkameng neng tep menenga keca karenkamne. Agat keca perak uangda, kan co bo moupra derinaipu dongopkamkene,” Hamandi, Raja Ahasyeweros tep pepu.

10 Upepra moropupa, Persia mutu ila nimi deiyo ngebo Raja Ahasyeweros gekepudi, er buru du dengdongoramu keca, er si cincinda, ^{▼▼cincin – Pumun taruda, sun ila nimi deiyo nengdi buru du dengdongorami keca, er sida cincin, nimi si sengan tep, tanda tanggan kemamengtopu kuramu. Acincin taleamne ngebodi, er tenepnetopu kuramu. Ada, ‘Raja si deiki di kupne,’ pepnopda, acincin taleamu ngebodi, er tenepnetopu tali lupra kuramu} kwiriprapudi, Haman tep karepu. Ada, ‘Hamandi teneretopu, ne si deiki di kunkamre’ tenen, Raja ngebodi er cincin kwiripra Haman tep karepu. Haman er nai boda, Hamedata erda Agag yala ngebo kuramu. Hamanda Yahudi yala nesala yuma tep, pio yu tenepra kuramu. 11 Raja Ahasyewerosdi, er cincin kwiripra Haman tep karepudi, upepu. “Kao, ‘Yahudi yala nesala ponkameng neng karepkamne,’ tenemem keca, perak gel uangda, ne co bo derinai derina gume. Dakwapye. Ne si deiki di, kandi sun Yahudi yala nesala tep, ‘Ukunkamne,’ tenememtopu, tali lupra kunkamrume. ‘Telepe,’ konum pepkene,” pepu.

12 Uda, ware tenpunge tanggal 13 kupupa, adeiki Hamandi Raja Ahasyeweros taleamupa talepra kuramidi sengna keca sengami neng yuma kongpepupa yaiopda, erdi, “Ukupra sekurume,” pepra deiputopu seki. Aupu seki ngeda, amutu neitamai propinsi yuma upu yuk-yuk peramitopu, tonda, huruf yuk-yuk sengamitopu, aupu deiki di seki. Konum sekyopda, Hamandi pepu. “Surat sekmumdi aupu ton dopropmumnyopda, sun mutu yuk-yuk kunge nimi deiyo neng damai dokotepmumpa, sun atalepra kunge neng yuma dopropkamenge. Asuratda, Persia mutu ila nimi deiyo ngebo Raja Ahasyeweros, er si deiki di sekmumpa, er cincin deiki di peten kepra keteneipmapa cadi, asurat dokotepmepe. Amutu yuma talepra kunge nimi deiyo neng cap, Gubenur neng cap yuma dopropkamenge,” pepu.

13 Tonda, Hamandi yuk surat ton sekrapudi, dokotepu. Asekra dokotepu surat upuda ake. “Raja Ahasyeweros talerur mutu neitamai yumada, ukunkamepe. Tanggal 13 ware 12 nge konum kupyopda, Yahudi yala nesala yumada tenpu ton men tapkurume. Wisi nesala cap, kaber neng cap, tonda nerapu yuma cap, nyapu yuma capda, tenpu taru dipapu popra gawal dakamrume. Ukupmepedi sun anesaladi talenge keca yumada, dalupra dopropkamepe,” pepra sekeipu. Ada, Hamandi asurat sekra amutu neitamai yuma dokotepupa, sun ila-ila neng yuma dopropi.

14 Haman upepra, sun sekretaris neng tep karepupa, anengdi amutu kurami propinsi neitamai yuma, ‘Ukunkamrume,’ pepra, peraturan keprapidi asurat deipembarami. Deiyoda ake. ‘Ukunkamrume,’ pepra seku suratda, ‘Amutu-amutu yuma talepra kunge ila nimi deiyo neng yuma cap, amutu neitamai kurami nesala yala-yala yuma cap, gekepmengedi, adipapu ketenepmengopda, awar 12, atanggal 13 konum yaryopda, tek sisi Yahudi yala nesala yuma popra gawal dakamenge’ tenen, asurat dokotepu.

15 Raja Ahasyewerosdi peipupa, Hamandi asurat sekra karepupa, sun surat karerbana tep wepra deipi nengdi, asurat doupra sun menmena beidi, amutu neitamai yuma karepembarami. Tonda, Persia mutu ila deiyo mutu, kota Susan neitamai ton, asurat katuai deipi.

Konum deipi pangeda, amutu ila nimi deiyo ngebo Raja Ahasyeweros cap, er amutara nimi deiyo ngebo Haman capda, bukrapreidi anggur me weika di jenmarei. Dinino, kota Susan mutu neitamai kurami nesala yumada aupu gekepya deiki di, amutu neitamai yumada, ‘Uo’ tenen, kange boktopnapu kupu.