Est 4 | XteSC | STEP | Hamandi asurat konum dokotepupa, amenda taru Mordekaidi, ‘Akupkamape, atep, sun Yahudi yala nesala yumada, popra gawal dakamepe,’ penmai upu yuma gekepu dingeda, adipapu er deiki kenekmau opkal teraktaprapudi, karung bol opkal kenekropu. Ukupudi, er nong deiki yuma sikke butepu amupu. Ukupunge deiyoda, yuk nesala yuma epnengedi, ‘Uo, erda mali kange doupmardi bicauto kunmara, tenepkamneng’ tenen, kupu. Atep, er giso deiki sikke bute dopra deipudi ila di engeprapudi, amutu bisi neitamai embanmau.

Esther 4

Mordekaidi Ester tep, “Melipsetume,” pepra moropu upu

1 Hamandi asurat konum dokotepupa, amenda taru Mordekaidi, ‘Akupkamape, atep, sun Yahudi yala nesala yumada, popra gawal dakamepe,’ penmai upu yuma gekepu dingeda, adipapu er deiki kenekmau opkal teraktaprapudi, karung bol opkal kenekropu. Ukupudi, er nong deiki yuma sikke butepu amupu. Ukupunge deiyoda, yuk nesala yuma epnengedi, ‘Uo, erda mali kange doupmardi bicauto kunmara, tenepkamneng’ tenen, kupu. Atep, er giso deiki sikke bute dopra deipudi ila di engeprapudi, amutu bisi neitamai embanmau.

2 Ukupra amutu neitamai embanmau taruda, Persia mutu ila nimi deiyo ngebo, Raja Ahasyeweros bungne ati bisi buplan damaipu aopkal bena tapu. Ada tali tep gume. ‘Ato mali opkal kenekmange nengda, akati neitamai men wengbenkamenge,’ pepra peraturan peramya tep, akati pumbon pio men weku.

3 Tonda, Persia mutu neitamai yuma, apropinsi yuma neitamaida, sun Yahudi yala nesala amutu neitamai dana-dana yuk-yuk dakurami nesala yumada, ila nimi deiyo ngebodi seku surat dokotepipa, asurat sun damai duyai taruda, mali kange doupmaidi, engena weik kunmaiya tep, sun nong deiki tara kenekami opkal kwiriptapra, mali opkal karong bol utopunge kenekra, sikke cap, tu but cap, sun giso deiki deipra marami. Tonda akurami taru yuma, ila di engenapu kuramidi, ‘Uo, ware kuptepe do?’ tenen, jen pio men jerami.

4 Mordekai er mali kange doupra engenapu kunmau ngeda, Ratu Ester er melimna nerapu cap, er pel melimna neng cap epidi, Ester damai lap perbei. Lap pepipa Ester gekepudi, ‘Uo, ne nai bo Mordekai amali opkal kwiriptapredi, yuk telep opkal kenekur’ tenen, telep opkal ketenepudi, er nai Mordekai damai dokotepu dinino, Mordekai erdi, ‘Gume, aopkalda ne men kenekamne’ tenen, men dopropu. 5 Ukupu pangeda, Esterdi er melimna ngebo ton, er sida Hata tep kongpepupa yau. Angebo erda, nimi deiyo ngebo Raja Ahasyeweros er pel don ngebo kuramu. Tonda, angebodi Ratu Ester ton melimamu. Esterdi angebo dopra deipudi, “Mordekai tep asimberume. Erda, ‘Ware keca kupmara tep, mali opkal kenekmaremdi, engenapu kunmarem do?’ pepra, Mordekai damai bena, er tep asipetepkurume,” pepu.

6 Esterdi Hata tep upepra deipu pangeda, Hatadi Mordekai tep erbeu. Mordekaida, kota Susan neitamai dinin, ila lapangan bisaida, nimi deiyo ngebo Raja Ahasyeweros er ati dam bisi banai buplan damai, kunmaupa epu. 7 Ataruda, Mordekaidi aupu yuma nukra penmau. “Hamandi, ‘Yahudi yala nesala yuma popkamepa tep, kunumna weik keca uang perak kilo weika di, 340.000 kilo dopra, nimi deiyo ngebo er co bo mawa derina ati dongopkamne. Konum kupnyopda, amutu neitamai kunge Yahudi yala nesala yuma popkamepe,’ pepka tep, ne cap, nun Yahudi yala nesala yuma cap, mali kange doupra engenmape,” pepu. Tonda aupu cap dukdongopra pepu.

8 “Hamandi, ‘Yahudi yala nesala yuma popkamepe,’ pepupa, kota Susan mutu di sekeipi suratda adano,” pepra, Mordekaidi Hata tep lap pepu. Lap pepudi, aupu ton cap dukdongopra pepu. “Asurat dopra, Ratu Ester damai doupra bemempa, epre dingeda, erdi ila nimi deiyo ngebo Raja Ahasyeweros damai beredi, ‘Uo nun Rajao, Yahudi yala nesala yuma tep, bicau teneptumdi, men poptapkamrume,’ pepra mororbenkurure.” Mordekaidi, Ester er melimna ngebo Hata tep, upepra deipu di, asurat ton karepu.

9 Karepu pangeda, Hatadi aupu doupra, Ester damai bena, Mordekai erdi peipmau upuda, Ratu Ester gekenai bena lap penmau. 10 Aupu yuma konum bena lap pepupa, Esterdi Hata tep pepu. “Kanda Mordekai er damai bememdi, ange yuma er kael kemna tep, lap perbenkurume,” pepu.

11 Esterdi tamupra lap pepu upuda ake. “Ada amutu ila nimi deiyo ngebo, Raja Ahasyewerosdi, nimi yuma cap, nerapu cap tep, ‘Yankurume,’ pepra upuna gum dipapu, tali lupra nun ila nimi deiyo ngebo er damai men benmanto. Ware nesala do yuma, ‘Raja damai benkup’ tenen, er ati damai yana wekmengepa, adipapu er jen talen nengdi anesala wepra potamnapu kunkamenge. Angeda, ‘Ukunkamepe,’ pepra, surat sekidi, peraturan konum men di kepi.

Upepra peraturan konum deipi atep, neda tali lupra Raja Ahasyeweros damai men betene. Dinino, nimi deiyo ngebo Raja Ahasyewerosdi, er emas maca deiki di deipre ngebopu, er damai yatue. Rajadi, er emas maca di, er damai yare ngebo deiptuopda, angebo adipapu men poptapkamenge. Dinino, Raja Ahasyewerosdi ne tep, ‘Ne damai yarume,’ pepra, kapul men kongpepnere. Er damai benmasi taru di dipdongopra, tumi 30 deiki di acapu tupa tali kunmana. Rajadi men kongpepneryopda, er damai tali lupra men betene,” pepu. Ada, Ratu Esterdi, ‘Hata, aupu dopra Mordekai damai lap perbenkurure’ tenen, peipu.

12 Esterdi upeipupa, Hatadi Mordekai tep lap perbeu. 13 Aupu lap perbeupa, Mordekaidi Ester tep tamupra pepu.

“Ne ner mi Estero, kanda moupra tenipterepo. Kandi amutu neitamai yuma talepra ila nimi deiyo ngebo Raja Ahasyeweros atipu kurum dinino, kanda Yahudi yala ner kurume. Atep, kandi, ‘Gume, yuk tali Yahudi nesala popkameng dinin, ne tenpuda men popkamnenge,’ tenena gume. Yuk Yahudi yala nesala popkameng taruda, kan peda poptapkamkenge. ‘Er tenpu tep, dakwapye, dakurye,’ pepra men tapkamkenge.” Mordekaidi Ester tep pepu.

14 Upepudi aupu ton cap dukdongopra pepu. “Kandi upu pena gum, tali dimpeprappu kupmemnyopda, nun nai Allahdi, Yahudi yala nesala lyemna tep, yuk neng deiki di lyemna keca karepkamsere. Dinino, Persia mutu nesaladi kan cap, kan nai bo sisa cap, er nyapsilip yuma capda, poptapmengedi, gawal dakamenge. Dinino, moupra tenipetepkurume. Nun walwal dinin, kanda ila nimi deiyo ngebo, er Ratu ner konum kurume.

Akunmarema deiyoda, Yahudi yala nesala ikin doupra weika di kunmange taru, sun lyemna tep akunmarem do, gum do? Atep, ‘Kandi ware kupra kuptuma deiki di, Yahudi yala nesala yuma lyepra deiptum do?’ tenen, pepkene. Dinino, ne pepmakentopu men kupmemdi, dimpepnapu kupmemnyopda, kan cap, nun Yahudi yala nesala yuma cap, poptapkamsenge.” Mordekaidi Ester tep pepu.

15 Upepua, Ester gekepu dingeda, aupu ton tamupra pepu. “Naio, kandi ne melimna tep ukunkamarume. 16 Kandi adipapu aupu doupra perbemempa, Yahudi yala nesala yuma kota Susan mutu neitamai kunge nesala yuma bulupra wekmengedi, ne tep Allah moronkamnenge. Ukunkamnenga tep, ue weneri tumi neitamai yumada, jen keca cap, me cap ton pio men jenkamrume. Ange yuma si tepra ne tepapu Allah moronkamnerume.

Ada lukunda neitamai cap, keteng komuni neitamai cap yuma jen pio men jepmengedi, Allah moronapu kunkamenge. Tonda ne cap, ne melimna tep kikiman pel dopra kunge kaber nerapu cap, nun yuma peda, jen si tepra Allah teppu pio moronapu kunkamepe.

Mororamepanen, tumi weneri konum kupmepyopda, neda ila nimi deiyo ngebo Raja Ahasyeweros damai benkamne. Benkamna peda, ‘Rajadi men kongpepkeryopda, tali lupra er damai pio men yankamrume,’ pepra peraturan deipi upu tek sisi yanipkamne ja. Peraturan upu yanipnyopda, adeiyo nengdi ne tep popkamneng do, gum do, nun walwale. Ange tep nengeda, ne dena peda telepe pua. Tek sisi, Raja Ahasyeweros damai mororbenkamne ja,” Esterdi pepu. Upepra deipu upu tep, Esterdi tamupra, “Mordekai tep aupu perbenkurume,” pepra deipu.

17 Esterdi peipu upu, lap perbeipa, Mordekai gekepu dingeda, Esterdi, ‘Ukunkamrume,’ peiputopu, Mordekaidi aupu gekepudi, adipapu kupu.