Est 5 | XteSC | STEP | Ester u weneri deiki di jen si tepra, Allah moronapu kuramnganen, konum kupkopda, adipapu sun Persia mutu ila deiyo nerapu Ratu nerapu kenengameng opkal kenekrapudi, ila nimi deiyo ngebo Raja Ahasyeweros ati pum dinin, Raja bungamu ati bisi buplan damai bena teku. Ada, ‘Nimi deiyo ngebo Raja Ahasyeweros, er ila bungna keca deiki bukredi dinkuner’ tenen, bena teku.

Esther 5

Ratu Esterdi, Persia mutu ila nimi deiyo ngebo Raja Ahasyeweros damai beu upu

1 Ester u weneri deiki di jen si tepra, Allah moronapu kuramnganen, konum kupkopda, adipapu sun Persia mutu ila deiyo nerapu Ratu nerapu kenengameng opkal kenekrapudi, ila nimi deiyo ngebo Raja Ahasyeweros ati pum dinin, Raja bungamu ati bisi buplan damai bena teku. Ada, ‘Nimi deiyo ngebo Raja Ahasyeweros, er ila bungna keca deiki bukredi dinkuner’ tenen, bena teku. 2 Bena tekmaupa, nimi deiyo ngebo Raja Ahasyewerosdi, Ratu Ester bisi buplan damai bura tara tekmaupa epudi, Ester tep kange deipudi bicau kupu. Er adipapu bicau kupupa, er emas maca er buru di talepra douramunge urup tarada, Ester er tekmau tara deipu. Ukupupa Ester adipapu amaca urup deipmau tarapu tengbeudi, amaca urupai talepu.

3 Nimi deiyo ngebo Raja Ahasyewerosdi, Ratu Ester tep asipetepu. “Kanda ware keca putanmakerpa, ne damai mororyanmarem do? Ware tenepmarem di do? Uo, Ratu Ester, ware keca do yuma, kan moropkunerem kecada, men tapkukene. Tek sisi karepkamaken ja. Moropnememnyopda, ne taleamsi mutupu, ‘Neitamai di bokra amutu yuma karepnerume,’ pepra moropnememnya peda, ne talenun mutu neitamai di boknedi, amutu neitamai dopra, tek sisi kan tep karepkamakene,” Raja Ahasyewerosdi Ester tep pepu.

4 Upepupa, Esterdi tamupra pepu. “Uo, ne nai bo, kandi upepmanerema tep, ‘Telepe,’ tenepmemnyopda, atumi lukundada, kan cap, Haman cap, ne nai yapu sun butene ne ati yankurume. Ada, nedi kan tep ila kailya kalepra ketenepra deipkamakene,” pepu. 5 Upepu pangeda, Persia mutu ila nimi deiyo ngebo Raja Ahasyewerosdi er melimna neng tep pepu. “Adipapu ne amutara pel dore ngebo, Haman kongpepkurume. Erda menmena yarepa, nun buteneda, Esterdi kailya kalepra keteneipmasera tep, er damai benkamneme,” pepu. Konum kongpepupa, konum yau pangeda, ila nimi deiyo ngebo Raja Ahasyeweros cap, Haman cap, sun butene neng Esterdi peryanmau kailya kalepra deipmauai berei.

6 Berei dingeda, Esterdi anggur du me ketenepra deipmaunge dopra jenmarei. Ame sundi jenmarei taruda, ila nimi deiyo ngebo Raja Ahasyewerosdi Ester tep asipetepu. “Ukutaru kanda ware tenepmaremdi ne damai moropmanerem do? Kan moropkunerem kecada pepnetumpa, tek sisi karepkamken ja. Moropnememnyopda, ne taleamsi mutupu, ‘Neitamainge ton karepnerume,’ pepra moropnememnya peda, ne talenun mutu neitamai di boknedi, amutu neitamai dopra, tek sisi kan tep ton karepkamakene,” Raja Ahasyewerosdi Ester tep pepu.

7 Upepupa Esterdi tamupra pepu. “Ne kan nerdi tenepra moropmaken ngeda pepkukene ake. 8 Ne deiyo ngebo er damai yakanuna tep, bicau tenepra ne moropman keca, ‘Ketenepkamaner do, telep tenepnetu do?’ tenenune. Naio, kandi ne tep, kange deipnetumdi, ne moropkamaken keca karepnetumopda, pio telepe pepkene. Atep nengeda, ne moropken kecada ake. Ne deiyo ngebo kan cap, Haman cap sun butene, kange di ton cap ambutumi ne ati yankamarume. Ambutumi lukunda neitamaida, ne ati kan cap, Haman cap tep, ila kailya ton kalepra keteneipkamasene. Ukupnepa, sun butene yarerumnyopda, nedi ne nai bo kan tep, ne tenepmanenge yumada, kan tep moropkamakene,” Ratu Esterdi Raja Ahasyeweros tep pepu.

Haman er dipru erepudi, “Mordekai popkune,” pepu upu

9 Ratu Esterdi, anggur du me cap, yuk jen keca cap keteneipmaunge konum jeprei dingeda, adipapu sun ati tamupra berei. Atumida, Haman er kange telep dipapu beu. Dinino, ila nimi deiyo ngebo er ati bisi buplan damai tupa dinmaupa, Mordekaidi kange di Haman tep, tamupra gispal dona tep, men genepdongopupa, Haman tupa Mordekai tep yu weik kupupa, ila di derepu. 10 Ila di derepu dinino, ayu kupmaupapu upu pena gum di, tamupra Haman er pe atipu beu. Konum ati beudi pepupa, er kayapu neng yuma cap, er ner Seres cap yaipa, sun yuma kikiman bukmai.

11 Bukmai taruda, Hamandi sal nong-nong kamaudi, gemenapu kunmaudi aupu penmau. “Isomka kun kecada pio weik talenune. Tonda, ne nyapu deiamsi neng ngeda, pio weik kununge. Tonda, Raja Ahasyewerosdi ne tep ila di ereipneupa, er amutara yuk nimi deiyo neng weik dakunung dinin, neda sun deiki tara ngebo kunune. Ila mambul neng bungamengai yumada, tali bungnunge, nepuda, ila puto weik ngebo kunune. Sun yumadi, ne tep genepdongopmengedi, gispal donenunge.

12 Tonda, angepu gume. Ratu Esterdi, yuk deiyo neng tep, “Raja Ahasyeweros cap, sun cap nati kalemna kailya tep jeryarume,” men pepu. Ne tepapu pepneu. Ange utopu, ne cap, nimi deiyo ngebo Raja Ahasyeweros cap, nun tepapu, ‘Ambutumi lukunda neitamai di me ketenepra deipmana jeryankamarume,’ pepmaseutopu, er cap ne cap tep ukupkamsere. 13 Ratu Esterdi ange yuma ukupmaseu dinino, ne kange men deiptene. Deiyoda ake. Ne pio dinepa, aYahudi yala ngebo Mordekaidi nun ila nimi deiyo ngebo, Raja, er ati bisi buplan damaipu tupa-tupa bungbarepa, ne dina dabal kunerure.” Hamandi er nyapsilip tep pepu.

14 Upepupa, er ner Seres cap, er kayapu neng yuma capdi, aupu sundi gekepra pepi. “Nun tenepmapada, kandi peipmempa, nimidi lyom co touprapmengedi duyankununge. ‘Aco er lyomda 22 meter toupra duyarume,’ pepmempa doupra yankununge. Ukupmengopda, ambutumi pio berektapra ipna sisa dipapu nimi deiyo ngebo Raja tep, ‘Mordekaida co ikra getepdongopmepedi, im dupai deipkamepe. Er kum damai tapu di gerekdongopmepedi, er nong dokotepmepyopda, kum yo copmepepa depkamre,’ pepra, moropkurume.

Raja ngebodi, ‘Telepe,’ peprepa, angebo Mordekai konum popmengopda, konuma, tali kange doupra kunkamrume. Tonda, Ratu Esterdi keteneipkamker kailya jerbenmamum taru di kan dipru boun kupkamakere,” pepi.

Upepipa, Haman gekepudi, ‘Aupu pepnerum ngeda telepe. Ne tenepmantopu pepmenga’ tenen, kange deipu. ‘Mordekai adipapu popkupe’ tenen, er pel melimna neng tep, “Ukutaru menmena ila lyom co tourbeso. Nimi pon keca doupkunerume,” pepu.