Est 6 | XteSC | STEP | Atumi lukunda neitamai yumada, nimi deiyo ngebo Rajada mana pio gum di buknapu kupmau. Buknapu kupmaua tep, erdi tamupra moropu. “Pumun taru dipra aneitam taru nimidi kurami keca nungna buku sekra deiami ngeda, dopra ne damai duyarume. Duyamumpa, nimi ton abuku nukrepa, neda ila nimi deiyo ngebo Raja gekenkamane,” pepu. Upepupa, abuku dopra duyaipa, tenpu ngebodi nukbanmaupa, nimi deiyo ngebo Raja gekenmau.

Esther 6

Ila nimi deiyo ngebo Raja Ahasyewerosdi, Yahudi yala ngebo Mordekai tep, kange deipu upu

1 Atumi lukunda neitamai yumada, nimi deiyo ngebo Rajada mana pio gum di buknapu kupmau. Buknapu kupmaua tep, erdi tamupra moropu. “Pumun taru dipra aneitam taru nimidi kurami keca nungna buku sekra deiami ngeda, dopra ne damai duyarume. Duyamumpa, nimi ton abuku nukrepa, neda ila nimi deiyo ngebo Raja gekenkamane,” pepu. Upepupa, abuku dopra duyaipa, tenpu ngebodi nukbanmaupa, nimi deiyo ngebo Raja gekenmau.

2 Asengna keca neitamai akapu upuda, Mordekaidi Biktan cap, Teres cap, Raja Ahasyeweros er ati buplan dam kalengna neng men di kuramrei taru, sundi, ‘Nun deiyo ngebo Raja popkamneme,’ teneramreinge cap, Mordekaidi ateneprei keca lap pepka deiki di Raja Ahasyeweros lyepunge cap yumada, asengna keca neitamai kwamunge yuma nukudi lap pepra deipupa, Raja Ahasyewerosdi gekepu.

3 Buku neitamai sekeiaminge, tenpu ngebodi nungmaupa, ila nimi deiyo ngebo Raja Ahasyeweros gekepu dingeda asipetepu. Er ati melipra kuramrei neng tep, sun ila nimi deiyo ngebo Rajadi asipetepu. “Angebo Mordekaidi, sun mali neng teneprei upu lap peipneua deiki di lyepneua tep, nundi er menenga keca tep, wareto telep keca dopra Mordekai tep karepmepu do?” pepra asipetepu. Upepupa, er pel melipra amutara kuramidi pel dorami nengdi pepi, “Gume, nun deiyo ngebo Raja, nundi angebo Mordekai telep kweipkeunge tep, tenpu keca peda, men karepmepu. Erda yuk keca yala-yala yuma ton pio men dopropu,” pepi.

4 Upepipa, adipapu ila nimi deiyo ngebo Rajadi tamupra asipetepu. “Ware neng do, ne amutara kungedi pel donenung deiyo nengda, ukutaru ne ati damaipu ware ngebo ton akunmar do?” pepra asipetepu. Raja Ahasyewerosdi, aupu pepu taru dipu, er amutara deiyo ngebo Hamandi Raja ati damai yau. Ada tali tep gume. Hamandi, ‘Mordekai poptene’ tenen, ‘Ila nimi deiyo ngebo Raja, er ati weknedi moropnepa, telepe pepnetuopda, angebo Mordekai tamopnedi, nimi pon keca tapu di er kum dam gerekdongopmepedi, dokotepmepyopda popkamape,’ tenepka tep, Raja ati damai tengyanmau. Yanmaupa, Raja ngebodi, “Ware ngebo ne damai yanmar do?” pepra asipetepu.

5 Upepra asipetepupa er melimna nengdi, sun nai bo Raja tep pepi. “Nimi si Hamanda nun nai bo kan tep ton, ‘Raja tep upu moroptene’ tenen, yanmare,” pepi. Upepipa, sun deiyo ngebo Rajadi pepu, “Atep Hamanda sundi pepmumpa, adipapu ne damai yankurure,” pepupa, Haman adipapu sepdaro ila nimi deiyo ngebo er ati wekrapudi er bungna damai beu.

6 Haman nimi deiyo ngebo Raja damai konum beu pangeda, animi deiyo ngebo Rajadi Haman tep tamupra pepu. “Ware keca do yuma, nimi deiyo ngebodi tenepmaretopu kuredi, er amutara pel telep kupra dore ngebo tep nengeda, er angebo gispal dona tep, ware telep keca kuptepe do?” pepu. Upepupa, Haman er dipru neitamai di utenepu. ‘E, ware ngebo tep nun ila nimi deiyo ngebo Rajadi kange deipredi, telep keca karenkamre do? Tek sisi gispal donkamre ngeboda ne pua,’ tenepu.

7 Aupu konum tenepka tep nengeda, Hamandi tamupra Raja tep pepu. “Kanda ila nimi deiyo ngebo Raja kuruma cadi, kandi kange deipker ngebo telep kemdina tep, ukupkurume. 8 Kan men di konum kenengamum urasin pio telep opkalda doprapmumdi, kan kange deipkerepa tenepmarem ngebopu kenekra deipkurume. Tonda, kan Rajada, kan bisi embana tep bukra embaramum kuda bisam ton dopra angebo karepkurume. Akuda giso deikida urasin pio telep keca deiki di, kan si petupra deipmemdi, gerekdongopkurume.

9 Tonda kandi ila pala mutu taleruma cadi, amutu neitamai di, kan amutara ila nimi deiyo ngebo ton, pio telep ngebo wepmemdi, akeca butene karepkurume. Ada er bali tara deiki bukra embaramum kuda cap, kan pio telep opkal kenengamumnge cap dopra, adeiyo ngebo tep karepkurume. Karepmempa, adeiyo ngebodi, kandi, ‘Ne kange deipnera cadi, gispal dopkamepe,’ tenepmem ngebo, karepkamre.

Kandi gispal dopra telep kweipkamrem ngebo tep, kan urasin telep opkal kenekra deipmengepa, er tep deiyo ngebo ereipmemdi, amutu nesaladi, ‘Er si pio telepe,’ pepra, gispal donkamenga tep, kan embaramum kuda bali deiki deipmengepa, akuda gerengna tapu doupmengedi, akuda dopra ila kota Susan mutu neitamai di embankamenge.

Tonda ukupmengedi, akota neitamaipu embaredi ila upu pepembankamenge. ‘Nun ila nimi deiyo ngebo Rajadi, kange derirur ngebo akunmarada, ukupra pio teleppu kunkamre. Raja ngebodi, akuda bali deiki bukmar ngebo tep, bicau tenepra kange deipmara cadi, pio telep kupra deipkamre,’ pepra ila upu deiki di pepembankamenge. Ukupmengepa, amutu neitamai kunge nimi yumadi, ‘Uo, angeboda ila nimi deiyo ngebo kurure,’ tenepra dinkamenge.” Hamandi Raja Ahasyeweros tep pepu.

10 Upepupa, ila nimi deiyo ngebo Raja Ahasyewerosdi Haman tep pepu. “Kanda ukupkurume. Menmena ne menop taru di kenengamsi Raja opkal cap, ne men di embaramsi kuda bisam capda dopropmumdi, akeca yumada dopra Yehuda yala ngebo, er si Mordekai dopra karepkurume. ‘Amutu nesala yumadi, Raja er kange deipmar ngebo epmengedi, er tep gispal donkameng’ tenen, lap pepmaneremnge yumada, Mordekai tep kupkamrume. Arup taru kandi, ‘Angebo gispal dona tep, ukuptepe, ukuptepe,’ pepra lap pepmamum ngeda tenpunge peda ton, lumdongona pio gume. Amutu neitamai ne ati ila pala bisi buplan damai apu bungrur ngebo Mordekai tep, akeca yuma kupkamrume,” pepra Raja Ahasyewerosdi Haman tep pepra deipu.

11 Nimi deiyo ngebo Rajadi peiputopu, Hamandi atelep opkal dopra Mordekai tep kenekra deipu. Ukupra kenekeipu dingeda, kuda bisam deiki bukra embana keca cap karepupa, Mordekai kuda bisam deiki welepra bukudi, kota Susan mutu neitamai embanmau taruda Hamandi pepu. “Nun ila nimi deiyo ngebo Raja Ahasyewerosdi, kange deipu ngebo akunmarada, ukupra pio teleppu kunkamre. Raja ngebodi, akuda bukmar ngebo tep bicau tenepra kange deipmara cadi, pio telep kupra deipkamre,” pepra, ila upu di pepembanmau.

12 Upepra embanmareiyanen, konum kupyopda, Mordekai ila kota Susan mutu bisi buplan damai di tamupra beu. Tamupra beu dinino, Hamanda, ‘Uo, amutu nesala yuma epmanengdi, erda tali ngebo pua, tenepkamnenge’ tenen, mali kange doupudi, er urasin yuma genepdongopra, er pe ati tamupra beu.

13 Tonda akupu keca yuma tep, Hamandi er ner Seres cap, er kayapu neng cap sun gekena tep yana nungmau. Ukupra nungmaupa, er ner cap, er kayapu neng cap tep, ‘Ukunkamrume,’ pepra lap pena neng cap yumadi tamupra pepi. “Uo, kanda ataru di gonga kepra, kan puto konum boun kupkeredi, Mordekai puda puto pio weik kupbankamre. Mordekai erda Yahudi yala ngebo cadi, kandi er tep men popbisiptume. Nun ila nimi deiyo ngebo Rajadi, Mordekai tep kange deipmara cadi, erda tek sisi puto pio weik kupbankamre dinin, kanda amu kepra deipkamkere. Mordekai tep, ‘Bisbisa kapkamne,’ tenena meme. Ukupra tenepmemnyopda, amenda taru tek sisi ikin keca kan damai yakankamkere,” pepi.

14 Haman cap, er nyasilip cap, er kayapu neng yuma cap, sun kikiman tupa upu sisingmai tarupu, Mordekai er pel melipra don neng yaidi, Haman adipapu doupra, Esterdi kailya jena tep keteneamau ati doupra derirbei.