Est 7 | XteSC | STEP | Nimi deiyo ngebo Raja Ahasyeweros cap, Haman cap, ‘Sun kikiman jen jenkameng’ tenen, Esterdi ketenepra deipu kailya jen ati yana wekreidi, jen keca cap, me cap keteneipmaunge yana jenmarei.

Esther 7

Esterdi, nimi deiyo ngebo Raja Ahasyeweros tep, Hamandi mali tenepunge tep lap pepupa, er nong deiki ikin keca deipka tep upu

1 Nimi deiyo ngebo Raja Ahasyeweros cap, Haman cap, ‘Sun kikiman jen jenkameng’ tenen, Esterdi ketenepra deipu kailya jen ati yana wekreidi, jen keca cap, me cap keteneipmaunge yana jenmarei. 2 Sun kikiman jen keca cap, anggur du me cap, Esterdi keteneipmaunge yana jenmarei taruda, Raja Ahasyewerosdi nimi deiyo ner Ester tep asipetepu.

“Kanda ware keca putanmakerpa, ne tep moropkamnerem do? Ware keca, ‘Moropkamane,’ tenepmarem di moropkunerem do? Uo, Ratu Ester, ware keca do yuma, kan tenepmaremdi moropkuneremada, men tapkukene. Tek sisi karepkamaken ja. Ada, kandi moropnememnyopda, ne taleamsi mutupu, ‘Neitamainge ton bokra karepnerume,’ pepra moropnememnya peda, ne talenun mutu neitamai ton boknedi, amutu neitamai dopra, tek sisi kan tep karepkamakene,” Raja Ahasyewerosdi Ester tep pepu.

3 Upepupa, Ratu Esterdi tamupra pepu. “Uo, kanda ne ila deiyo ngebo, kandi ne tep, ‘Telepe,’ teneptum dingeda, ne men popkamnerume. Tonda, ne yala nesala yuma peda, kan mutu neitamai kunge nesalada, potamna gume, ‘Pio gampu kunkameng’ tenen, moropkene,” pepra moropu. 4 Upepudi aupu ton cap dukdongopra pepu. “Ne nai Rajao, kan cap kikiman upu pedarum nengdi, kan talerum mutu neitamai kunge, ne yala nesala yuma tep nengeda, tenpu ila deiyo ngebodi, ‘Anesala yumada popkupe,’ tenepudi, moropkeupa, popkamsenge. Angebodi, ‘Anesala kunupnedi popra gawal dakamne,’ pepra moropkeupa, ‘Telepe,’ pepmuma tep, ukuda amutu nesaladi nun yala nesala tep popra gawal dakamsenge.

Ukupmantoda, yuk nengdi, ne yala nesala yuma tep, ‘Anesala yuma kunupmepedi, nun ikin pel talipu pel donkamsenge. Ukupra nun amutarapu kunkamenge,’ tenepra kunupsetenga peda, telepe pua. Ukupsetengopda, ne yala nerapu cap, nimi capdi, sun ikin pel talipu doptepe. Tonda, nedi ne nai Raja tep, tali dimpepra kuramtepe.

Ukupra kutepe dingeda, nun deiyo ngebo Raja, nedi kan kunkamremai ton yana men dum terenkamketene. Dinino, tenpu ila deiyo ngebodi, ne yala nesala yuma tep utenerure. ‘Nundi tenepmepe tumida, anesala yuma popmepedi, gawal dakra gum kupra deipkamepe,’ teneserure naio.” Ratu Esterdi Raja Ahasyeweros tep lap pepu.

5 Ataruda, nimi deiyo ngebo Raja Ahasyewerosdi nimi deiyo ner Ratu Ester tep asipetepu. “Ware nesala ton balila kuptupa, alap penmanerem utopunge kuptu do? Ange utopu, ware ngebo balila weik kuptupa, ‘Ester yala nesala yuma poptapra gawal dakamepe,’ tenen, mali weik kurur do? Angeboda, dan mutu neitamai kurur do?” pepu.

6 Rajadi upepupa, Ratu Esterdi tamupra pepu. “Gume, apepmaken ngeboda, yuk mutu kurur ngebo gume. Ada abukmar ngebo Haman er puda nimi pona tep, pio yu weik ngebo kurure. Atep nengeda, Haman er dipapu ne yala nesala yuma tep, ‘Song,’ tenena cap, ‘Gum kupra deiptene,’ tenena cap ngebo kurure,” Esterdi pepu. Anerdi upepupa, Hamandi Persia mutu ila nimi deiyo ngebo Raja Ahasyeweros cap, er ner Ratu Ester cap tep, ‘Uo, ware kupkunereng do?’ tenen, sun aso deiki erepra dinada kware pio weik kupu.

7 Ukupupa, nimi deiyo ngebo Rajada yu weik kupu. Yu pio weik kupu pangeda, adipapu er bukmau ngongna keca deiki di tekra, er jenmau anggur du me taprapudi, tekra nimi deiyo ngebo er ati dam tara gupsaka beu. Ukupu taruda, Hamandi, ‘Uo, nun nai bo Rajadi ne tep popkamnernge,’ konum tenepu. Utenepudi konum kael kepu. Atep ngeda Hamanda ila nimi deiyo ngebo er ner Ester cap akati pum tupa kupmarei taruda, upepra moropu. “Uo, ne kanero melipneo. Neda ikin keca dopra ne deiki derinada yapnetume. Raja ngebodi popkamnerada, kandi er tep moroptumpa yapnetue. Neda pona pio gume, gampu kutene,” pepra moropu.

8 Ataru Hamanda, “Uo, ne kaner Ratu Ester melipneo,” pepra Ester er bukmauai, er nong doprapudi maipudi moropu. Ada, ‘Erdi bicau tenepnetue’ tenen, moropu. Moropu dinino, ataru dipapu, nimi deiyo ngebo Raja Ahasyeweros, ati dam tara benmauanen, tamupra Hamandi Ester bukmaua damai maipmaunge yana epu. Epu dingeda, nimi deiyo ngebo Raja ila upu di pepu, ‘Uo, kanda ware kunmarem do? Hamanda warya tep balila deipra, ne ati pumbonpu ne ner Ester talerpetepmar do? Ne akunmana peda, amali ngebodi ne ner Ester tep moum talepetepkur do?’ tenepudi yu pio weik kupu.

Ila nimi deiyo ngebo Raja Ahasyewerosdi, aupu konum pepra gawal dakseng pedongou taruda, adipapu, er pel melimna nengdi Haman taleprapidi, opkal bol dopra, aopkal di er giso yuma getepdongopi. Ada, ‘Pio mali kunmara cadi, nun nai bo Raja er urasin ton cap men eptu’ tenen, kupi.

9 Ukupra getepdongopi dingeda, Raja er amutara pel doramu ngebo er si Harbonadi, Raja Ahasyeweros tep pepu. “Ne deiyo ngebo gekepneo. Haman er ati damaida, ila lyom co ikra deipyada akapmare. Alyom coda, dua puluh dua (22) meter akapu. Acoda, Hamandi, ‘Mordekai tep ateng kouprapnedi deripra deipkamne. Aco deiki angebo er kum dam tapu gerekdongopra dokotepnedi, popkamne’ tenen, ikra dopudi ketenepra deiamu.

Ukuamu dinino, Hamandi, ‘Popkamne,’ tenemu ngebo Mordekaida, kan tep pumun taru melipkeu,” pepu. Upepupa, amutu ila nimi deiyo ngebo Rajadi er nyapu tep pepu. “Atep nengeda, ukutaru sundi Haman doprapmumdi, alyom co ikra keteneipkaipu, tapu koupdongopra deripkotepkurumudi, angebo poptapso,” pepu.

10 Upepupa, sun deiyo ngebo Rajadi peiputopu, Haman er nong doprapidi, ‘Mordekai gerekra deipkamne’ tenen, Haman er pedi co ikra keteneiamngaipu, er pe nong dopra bena deripkotepipa, er kum yo coprapudi depu. Ukupi taruda, Raja Ahasyeweros er yu teneramunge yumada puto boun kupu.