Est 8 | XteSC | STEP | Atumi dipapu Raja Ahasyewerosdi nimi deiyo ner Ratu Ester tep Haman er taleamu keca cap, er taleamu mutu yuma cap dopra karepu. Persia mutu neitamai kuramudi Yahudi yala nesala yuma tep, ‘Popra gawal daktene’ tenen, yu pio teneramu ngeboda Haman kuramu. Tonda, Ratu Esterdi Persia mutu ila nimi deiyo ngebo Raja tep, “Mordekaida ne mambo kurure,” pepra lap pepu. Atep Raja ngebodi, “Mordekai cap, er nyapsilip yuma cap, ne ati yana kikiman kunkamepe,” pepu. Ataru di dipdongopra dortara yumada Mordekai cap, Raja Ahasyeweros cap, Ester cap kikiman kurami. Mordekaida amutu nimi deiyo ngebo ton kuramu.

Esther 8

Nimi deiyo ngebo Raja Ahasyewerosdi, ‘Yahudi yala nesala tep melipkamne’ tenen, surat seku upu

1 Atumi dipapu Raja Ahasyewerosdi nimi deiyo ner Ratu Ester tep Haman er taleamu keca cap, er taleamu mutu yuma cap dopra karepu. Persia mutu neitamai kuramudi Yahudi yala nesala yuma tep, ‘Popra gawal daktene’ tenen, yu pio teneramu ngeboda Haman kuramu. Tonda, Ratu Esterdi Persia mutu ila nimi deiyo ngebo Raja tep, “Mordekaida ne mambo kurure,” pepra lap pepu. Atep Raja ngebodi, “Mordekai cap, er nyapsilip yuma cap, ne ati yana kikiman kunkamepe,” pepu. Ataru di dipdongopra dortara yumada Mordekai cap, Raja Ahasyeweros cap, Ester cap kikiman kurami. Mordekaida amutu nimi deiyo ngebo ton kuramu.

2 Raja Ahasyeweros er buru deiki dekdongomu keca er si cincinda, Haman kareamu dinin, Haman popkoi taruda, er buru deiki tamupra kwiriprapudi Mordekai tep karepu. Akupka cadi, Mordekaidi amutu ila nimi deiyo ngebo Raja si deiki di pel doramudi, nimi deiyo talepra kuramu. Ange utopu Ratu Esterdi Mordekai tep, erpu nimi deiyo ngebo kepra deipnedi, Haman erdi taleamu mutu cap, taleamu keca yuma cap dopra, Mordekai tep karepu.

3 Ester utenepudi, kange di ton cap er adipapu, ‘Raja Ahasyeweros damai antapnemedi, mambul keca moropkamne’ tenen, beu. Beu dingeda nimi deiyo ngebo Raja er gispal dona tep, er yan damai tu deiki genepdongopudi, mali kange douna deiki di engepu. Tonda, Raja er gekena tep, Hamanda pio mali kuramu ngebodi Yahudi yala nesala yuma tep yu teneramudi, ‘Sun Yahudi yala nesala yuma popra gawal dakamepe’ tenen, surat sekra dokotepupa, amutu nesala yumadi Yahudi yala nesala yuma popkamenge ngeda, ‘Raja kael kepredi, upu sekamre’ tenen, lap pepu.

4 Ratu Ester engena deiki di Raja damai upepra bena moropupa, Rajadi er pio urasin telep maca kunumna weik keca er si emas di ketekeiami macada, er buru di Ester tekmau tara bupukra deipupa, Ester tekrapudi pepu.

5 “Telepe, ne deiyo ngebo Rajao, kandi, ‘Telepe,’ tenepnememdi, kange deipnemem dingeda, ‘Esterdi pepner upuda telepe cadi, ukupkamne,’ tenepmemnyopda, pio mali ngebo Hamandi peipu upu sekdongopkurume. Ada, Hamedata er mi Hamandi, ‘Persia mutu neitamai dinin, propinsi neitamai yuma kunge Yahudi yala nesala yuma poptapra gawal daknedi, gum kupra deipkamepe’ tenen, sekra dokotepu suratda, kandi upu sekdongopkurume. Ukuna tep nengeda, kandi surat ton sekmemdi, dokotepmemnyopda, ange yuma gum kupkamre. Yahudi yala nesala yuma men popkamsenge.

6 Ada ware keca deiyo tep do, gume. Neda pio mambul kange doupne. Persia mutu nesaladi, ne yala nesala, Yahudi nesala yuma popmengopda, ne pio ikin kange doupra kunkamne. Ukupmengopda, ikin kange derina cap, engena cap, dipru bulungsangna cap deiki di, ne peda depkamne ja. Atep nengeda, naio, ‘Kanda upu puto di pepmempa, Hamandi peipu upu deiki di, Yahudi yala nesala yuma popkameng ngeda gum kupkamre’ tenen, moropkene,” pepra, Esterdi Raja Ahasyeweros tep moropu.

7 Upepu pangeda, nimi deiyo ngebo Raja Ahasyewerosdi, nimi deiyo ner Ratu Ester cap, er nai bo Mordekai cap tep pepu. “Tek sisi nedi Haman doprapsidi, lyom co deiki, ikra deipsidi, tapu di er kum getepra konum popsi. Deiyoda, Haman erdi, ‘Sun Yahudi yala nesala yuma tep popra gawal daknedi gum kupra deipkamne,’ peramnga deiki pio mali kupka tep, angebo popsi. Tonda, erdi talepra kuramu keca yuma, nedi dopra Ester kanpu konum karepsi.

8 Ukupsi dinino, neda ila nimi deiyo ngebo Raja kununa cadi, ne si deiki di surat ton sekra ketenepkamrume. ‘Ne talene mutu kunge nesala yuma, tek sisi gekepkameng’ tenen, ne buru deiki dongoramsi dinin, Mordekai tep karepsi cincin di, asurat deiki di peten kemna keca dopra deipkurume.

Ada tali tep gume. Ware surat do yuma, ne Raja si deiki deipne surat yumada, yuk nengdi upu men sektenge. Ne peten kemne keca asurat deiki konum deipnyopda, tek sisi tamupra men doproptene. Ne pepnetopu tek sisi kupkamre. Atep nengeda, ware upu do, sun putaserepa telepe tenerumtopu, ne si cap, ne cincin peten kemna keca cap deiki sekrapmumdi amutu neitamai yuma dokotepkurume.” Raja Ahasyewerosdi, Ester cap, Mordekai cap tep pepu.

9 Upepka tep, atumi dipapu, tanggal 23, ware weneringe, war si Siwan peraminge deiki di, Mordekaidi Raja er amutara mambul keca sengna deiyo neng, sekretaris tep kongpepupa, yai. Yai pangeda, Mordekaidi, “Angeda ukunkamrume, angeda pio men kunkamrume, ukupra sengkurume,” pepra deiputopu, aupu yuma moupra gekepidi seki. Seki dingeda, Persia ila nimi deiyo ngebo Raja taleamu mutu neitamai kurami deiyo neng damai dokotepi. Ada ila pala mutu taleami deiyo neng cap, sun Gubernur neng cap, Bupati capda, seratus dua puluh tujuh (127) propinsi talepra kuramitopu, asurat ton dokotepipa dopropi.

Ada, Raja Ahasyewerosdi taleamu mutu yuma, India mutu di dipdongopra, Sudan mutu yuma kuramitopu dokotepi. Tonda, ‘Amutu-amutu kunge nesala yuma moupra gekepkameng’ tenen, asurat sengna keca neitamaida, sun pe amutu-amutu yuk-yuk kuramidi, perami upu sisa cap, sundi huruf sengami utopu cap deiki dipapu sekra dokotepi. Ange utopu, ‘Yahudi yala nesala peda, moupra gekepkameng’ tenen, sun Yahudi yala neng peda, sun perami upu sisa cap, sundi huruf sengaminge cap deiki dipapu sekamidi dokotemami.

10 Mordekaidi asurat seku ngeda, Raja Ahasyeweros er si deiki di sekra deipudi, Raja er buru dongoramu keca, er sida cincin di peten kemna keca asurat nong deiki deipudi dokotemamu. Tonda, ‘Apala mutu neitamai yuma menmena karerbenkameng’ tenen, deiyo ngebo Mordekaidi nimi wepra deipnedi, Raja ngebo er bukra embana tep pio telep kuda bisam karepupa, asurat dubana tep wepra deipu nengdi, akuda bisam bali deiki bukrapidi, aila pala mutu kuramyai dayuma doupra sepdaro karepembarami.

11 Asurat sekamu upu neitamaida upepra sekamu.

Nimi deiyo ngebo Raja Ahasyewerosdi pepu upuda ake. “Yahudi yala nesala kunge mutu yuma cap, ila kota kunge mutu cap yumada, ukupra kunkamenge. Ware mutu nesala do yuma, sundi, ‘Yahudi yala nesala, sun nimi cap, nerapu cap, nyapu cap yumada, popra gawal dakupe’ tenen, sun Yahudi yala nesala damai yangopda, sun Yahudi yala nesala yuma buluprumudi, sun mar podan nesala tep bisbisa kapra, popra gawal dangkamrume. Sun mar podan nesala konum poprumudi, gawal dakra deiprumu dingeda, anesala talepra kunung keca yumada, dalupra dopropkamrume. Ukupra sun Yahudi yala nesala sun tep poryankamseng nesala yuma tep popbisipkamrume. Sun mar podan neng popra, sun nong yumada sesekra buluktapkamrume,” pepu.

12 Raja Ahasyewerosdi aupu pepra deipu ngeda, ake. “Sun Persia mutu neitamai yuma ukupkamrume. Sun Yahudi yala nesaladi, sun mar podan nesala popbisipkamrum tumida, tanggal tiga belas (13) awarda dua belasnge (12), awar si Adar deiki di kupkamrume,” pepra deipu. 13 Rajadi asurat sengna kecada, ‘Menmena di ukupkurume,’ pena upu sekra deipu ngeda, apala mutu neitamai yuma, nimi yala-yala yumadi huruf sengamitopu, tonda upu sisa yuk-yuk peramitopu kupra sekra dokotepi. Ada, aila pala mutu propinsi yuma neitamai, ‘Aupu moupra gekepmengedi, sun mar podan neng porbisina tep, keteneipkameng’ tenen, sun Yahudi yala nesala kurami mutu yuma dokotepi.

14 Asurat yuma konum seki pangeda, Mordekaidi wepra deipu neng, sun surat dopra karerbana tep deiyo nengdi, kuda bisam bali deiki bukra, menmena di amutu-amutu neitamai yuma sepdaro embaramidi, asurat yuma karepembarami. Raja ngebodi, “Tek sisi ukunkamrume,” pepra konum deipka tep, sun aneng adipapu kuda bisam bali deiki bukra sepdaro beidi asurat yuma karerembarami. Tonda, Raja cap, Mordekai cap, Ester cap kurami mutu neitamai, amutu sida kota Susan neitamai ton, aseki surat katuai di tepra deipipa, amutu nesala yuma diramidi nungami.

15 Mordekaidi, ‘Ukupra surat sekurume,’ pepra konum lap pepu dingeda, Raja damai tapra, er tep karepu ati tamupra beu. Ataru dipapu nimi deiyo ngebo Mordekai amutu neitamai ila nimi deiyo neng sun kenengami urasin pio telep opkal keneku. Aopkal er yalada, kunumna weik mirin nge cap, kurun opkal cap keneku. Tonda urasin pio telep lengna keca, nimi deiyo neng sun giso deiki galupra kemami keca er sida mahkota, kunumna weik gat keca er si emas pio telepnge di keteneipinge cap kenekrapudi beu. Ukupra beu dingeda, kota Susa mutu neitamai kurami nesala, sun kange pio telep kupupa, er tep ila di gispal dopra kunmaidi, kailya kalepra jepi.

16 Ange utopu, apala mutu neitamai yuma, sun Yahudi yala nesala yumada, telep kupupa kange pio deiprapidi, ‘Pio telepe,’ tenepra kange deipi. Amutu neitamai dinin, yuk yala nesala yumadi, sun Yahudi yala nesala tep, gispal dorami. 17 Tonda, dan mutu do yuma cap, dan propinsi do yuma cap, ila mutu kota cap, apala mutu neitamai propinsi yuma cap, nimi deiyo ngebo Rajadi, “Ukupkurume,” pena upu lap pepra deipupa, asurat nukmai Yahudi yala nesala yumada, kange pio deipra ila di gispal donmai.

Ukupidi kange telep kupupa, sun anesala kange telep deiki di ila kailya kalepra deipdi, gispal dopi. Tonda, Allah tep, telepe pena tep, ton taruda jen si tepra jen keca men jerami.

Ton taruda, kailya kalepra jerami. Ukurami taruda, yuk mutu neng dinin, sun Yahudi yala kurami neng yuma tep, sun kware pio weik kuramnga cadi, kange deipidi sun dipru telep kupupa, ‘Yahudi yala nesala kuramengtopu, nun peda ukunkamepe’ tenen, Yahudi yala nesala teka tenerami keca talepra kurami. Anesala yuma kailya kalepra jenmaidi gispal donmai.