Est 9 | XteSC | STEP | War dua belasnge (12), war si Adar, tanggal 13 konum kupupa, Persia mutu ila nimi deiyo ngebo Raja Ahasyewerosdi sun Yahudi yala nesala yuma tep pepra deiamu tumi, ‘Konum kupmare,’ pepi. Atumida, Persia mutu neitamai kurami nesala, yala yuk-yuk yumada, Hamandi mali upu pepka deiki di, ‘Yahudi yala nesala yuma popra gawal dakamepe,’ tenerami dinin, men kupmanto kupu. Sun Yahudi yala kurami nesala yumadi, sun mar podan nesala yala-yala yuma cap, dana-dana tara di yai nesala yuma cap, adipapu popbisipi.

Esther 9

Yahudi yala nesaladi, sun mar podan mutu neng tep, popbisipya tep, pepi upu

1 War dua belasnge (12), war si Adar, tanggal 13 konum kupupa, Persia mutu ila nimi deiyo ngebo Raja Ahasyewerosdi sun Yahudi yala nesala yuma tep pepra deiamu tumi, ‘Konum kupmare,’ pepi. Atumida, Persia mutu neitamai kurami nesala, yala yuk-yuk yumada, Hamandi mali upu pepka deiki di, ‘Yahudi yala nesala yuma popra gawal dakamepe,’ tenerami dinin, men kupmanto kupu. Sun Yahudi yala kurami nesala yumadi, sun mar podan nesala yala-yala yuma cap, dana-dana tara di yai nesala yuma cap, adipapu popbisipi.

2 Sun Yahudi yala nesalada mutu yuk-yuk neitamai dinin, ila ati arum kota yuk-yuk dakuraminge yuma bupra wekidi, yuk nesala yuma sun Yahudi yala nesala tep yu tenepra kurami neng tep, ‘Nun mar podan nesala porbenkamepe’ tenen, bulupi. Persia mutu yuma talepra ila nimi deiyo ngebo Raja Ahasyeweros taleamu mutu yuma cap, propinsi yuma cap neitamai, sun Yahudi yala nesala keteneipi. Ukuramya tep, mutu ban-ban yuma dakurami nesala, yuk yala nesala yumadi, sun Yahudi yala nesala tep, kware pio weik kuramya cadi, sun anesala men popmanto kupi.

3 Ange utopu, aila pala mutu cap, propinsi yuma cap, talepra kurami nimi deiyo neng cap, Gubernur cap, Bupati cap, sun amutara kungedi pel talepra donge neng yuma capdi, sun Yahudi yala nesala tep melimami. Deiyoda, sun dana-dana tara nesala yumadi, tali nimi deiyo ngebo Mordekai er tep nengeda, kware pio weik kurami. 4 Persia ila pala mutu ban-ban yuma kurami nesaladi, Mordekai tep kael kemami. Tonda, nimi deiyo ngebo Mordekaidi pel doramunge cap, kuramunge cap yumada, yuk nengdi lap peramipa, Persia ila pala mutu neitamai kurami nesala yuma gekenmaidi, ‘Uo, angebo tek sisi ila mambul ngebo kurure,’ tenerami. Mordekaida tupa-tupa pio tapakra puto weika di kupbaramu.

5 Ataru neitamaida, sun Yahudi yala nesala yumadi sun mar podanai yai nesala yumada konum popbisipi. Yahudi yala nengdi doupra, ya yu keca cap, si takke keca cap deiki di, sun yuk mutu nesala yala-yala yuma, ‘Yahudi yala nesala nun song,’ tenerami nesala yuma tep, popra gawal daki. Ukupi ngeda, sun mar podan neng tep, sun Yahudi yala nesaladi, ‘Nun mar podan nesala tep, ukunkamepe,’ teneramitopu kupi. Ukupidi, anesala yuma popbisipra gawal dakeipi. 6 Ange utopu, ila mutu kota Susan neitamaida, Yahudi yala nesaladi, sun podan nesala denge pio weika di, 500 neng popra gawal dakidi, gum kupra deipi.

7 – 8 – 9 Tonda Haman erdi deiamu nyapu, 10 neng ton popi. Yahudi yala nesala yumadi popra gawal dakeipi neng, Hamedata er mi Hamandi deiamu nyapu sun sida ake. Parsandata cap, Dalfon cap, Aspata cap, Porata cap, Adalya cap, Aridata cap, Parmasta cap, Arisai cap, Aridai cap, Waisata cap yumada popi. 10 Hamedata er mi Hamandi deipu nyapuda sepuluh (10) deiamu neng yumada, sun Yahudi yala nesala yuma tep, ‘Nun songe. Yahudi yala nesala yumada, popra gawal daktepe,’ tenerami. Haman erdi deiamu nyapu, sun 10 neng tomopidi ateng koupi dinino, sun Yahudi yala neng dingeda, ‘Haman er nyapu 10 nengdi talerami keca yumada, nun men dopropkupe. Sun keca nun songe,’ teneramya tep, akeca tenpunge peda, pio ton men dopropi.

11 Atumi war 12, tanggal 13 deiki dipapu sun Yahudi nesaladi poptapi neng denge weik ngeda, ‘Nimi deiyo ngebo Raja Ahasyeweros gekepkamar’ tenen, er damai lap perbei. Ada, “Kota Susan mutu neitamai di nimi popmainge yumada, ukupra popmange,” pepra lap pepi. 12 Konum lap pepi pangeda, nimi deiyo ngebo Raja Ahasyewerosdi er ner Ratu Ester tep pepu. “Kota Susan mutu neitamaida, Yahudi yala nesaladi denge pio weik lima ratus (500) nesala konum popi. Tonda, Haman erdi deiamu nyapu sepuluh (10) neng yuma ton tapakra tomopidi, ateng koupdongopra deipi.

Ukupi dingeda, ne talenun ila pala mutu propinsi yuma neitamai dakunge nesala neitamaida, ware kupra nesala konum popi do? Tonda, ataruda, kan putapkerepa, moropkunerem keca ton akapmar do, gum do? Kandi tenepmemtopu moropnememnyopda, tek sisi akeca karepkamken ja. Men tapkamkene,” Raja Ahasyewerosdi Ester tep pepu.

13 Upepupa, Ratu Esterdi tamupra pepu. “Nimi deiyo ngebo Raja, kandi, ‘Telepe,’ tenepnetumdi Yahudi yala nengdi, kota Susan mutu kunmang nesala tep pepnetumpa, ambutumi ipnada kange di tamupra atumi kunmangutopu kupkamange. Tonda ange utopu, Haman er nyapu 10 nengda, nimi gemna derina tep ikra deipmepu lyom co deiki, tapu di sun kum damai gerekdongopra, deripkamape,” Esterdi pepu.

14 Upepra moropupa, ila nimi deiyo ngebo Rajadi, “Telepe dakupso,” peipupa, Esterdi moropmautopu kupi. Ila kota Susan mutu neitamai, Raja ngebodi, “Ukupkurume,” pepra sengna keca deiki di, surat sekra deipmaua cadi, apeipmautopu kupi. Ada, Haman er nyapu yumada, 10 neng dopra, bul co di ikra deipyaipu yana deripkotepipa depi. 15 Mapmaiya bereku pangeda, tanggal empat belas (14), war si Adar deiki di, kota Susan mutu neitamai kurami Yahudi yala nesala yumada bupra Susan mutu neitamaipu kurami neng denge pio weik, 300 neng poptapi. Ada, ‘Haman pepseutopu, Yahudi yala nesala popra gawal dakamepe,’ tenerami neng tep poptapi. Ukupra nimi denge weika di 300 neng tapakra popi dinino, anengdi talerami keca yumada, men dalupra dopropi.

16 Atumi dipapu, sun Yahudi yala nesala dinin, Persia ila pala mutu propinsi-propinsi yuk karen mutu dana-dana tara kurami nesala yuma peda, buluprapidi, sun mar podan neng tep, bisbisa kapra popi. Sundi poptapi nengda, denge weik tujuh puluh lima ribu (75.000) nesala ton popi. Ada tali tep gum dinin, sun popi nengda, ‘Yahudi yala nesala nun song cadi, popra gawal dakamepe,’ tenerami neng tep poptapi. Dinino, sun popi nengdi talerami bung keca ton, tenpunge peda dalupra men dopropi.

17 Ange kupu taruda, war si Adar dinin, tanggal tiga belas (13) cap, tanggal empat belas (14) cap kupi. Ange konum kupi dingeda, dukdongopra kupu tanggal empat belas (14) deiki di, sun yuk keca ton pio men kupi. Atumi sintara di dipdongpra idona cap, lukunda cap, beipye peikra, ‘Atumida ila tumi kupmasere’ tenen, kange pio deipra, kailya kaleprapidi, jen jepra gispal dorami.

Yahudi yala nesaladi, ‘Atumida ila tumi pio kunkamser’ tenen, ila tumi si ‘Purim,’ pepra kailya kalepra jerami upu

18 Sun Yahudi yala nesala bura tara neitamai kurami nesaladi, tanggal 14 deiki di beipye peingami. Dinino, ila kota Susan mutu neitamai kurami Yahudi yala nesaladi, sun mar podan nesala tep popi ngeda, awar dua belasnge dinin, tanggal lima belasda (15), ‘Nun ila mambul tumi,’ tenepra kange pio deiprapidi, beipye peikra gispal dorami. Angeda sundi, ‘Nun mar podan neng tep popmepu tumi, tanggal tiga belas (13) cap, tanggal empat belas (14) cap, kupmapa cadi, atanggal lima belas (15) deiki di ila tumi kepmepedi beipye peikamepe,’ tenepidi kupi. Atep, atumi pel dona gum di beipyepu peikra kurami. Tonda, atumi deiki dipu, kailya kalepra jenmai.

19 Atep nengeda, sun Yahudi yala nesala metek kota mutu cap, propinsi neitamai, karen mutu dakurami nesala yumadi, tanggal empat belas (14) war Adar kepne pangeda, ‘Ila tumi konum kupmare’ tenen, kange deipra ila kailya kalepra jerami dingeda, ‘Nun kabo’ tenen, menenga keca ton dopra yuk neng tep telep keca karedarami.

‘Ataruda nun ila tumi’ tenen, kailya kalepra jerami atep, pepi upu

20 Ange konum kupi dingeda, nimi deiyo ngebo er si Mordekaidi sengna keca surat deiki di akuraminge yuma sekra, sun Yahudi yala nesala Persia mutu neitamai kurami nesala yuma cap, tonda meneng damai mutu neitamai akurami nesala cap, tonda ila karen mutu kurami nesala cap, asengna keca sekra sun damai dokotepu. 21 Asurat neitamai sekra dokotepu upuda ake. “Adar war neitamai dinin, tanggal empat belas (14) cap, tanggal lima belas (15) capda, aketeng tamun, aketeng tamun yuma, atanggal war baripyopda, ‘Nun ila tumi ake’ tenen, gispal donkamepe. Beipye peikra, kailya kalepra gispal donkamepe,” pepra asengna keca sekra dokotepu.

22 Akupu ngeda, tali tep gume. Ada, awar atanggal deiki di sun Yahudi yala nesala, sun mar podan neng konum bisbisa kapra popbisipi. Ukupipa, Persia mutu nengdi ikin weik keca sun nong deiki deriraminge gum kupra deipi. Ukupidi, sun kange tenenange neitamai di, ‘Ae,’ tenen, kange deipra kupi. Sun urasin yuk kunange cap, kange telep tenenange cap, pio telep kupu. Atep nengeda, Mordekaidi aupu ton pepu. “Atumi yaryopda, sun Yahudi yala nesala yumadi, ‘Nun ila taru kupsere,’ tenepra, kailya kalepra jena cap, ‘Ne kabo bicau’ tenen, jen keca karedana cap, tonda akeca-keca pio gum nesala tep karedanapu kunkamrume,” pepu.

23 Upepka tep nengeda, sun Yahudi yala nesala yumada, Mordekaidi pepu upu yuma sundi konum kael kepi dingeda, utenepra pepi. “Angeda nun men di talepra kuramepu keca utopu, aketeng tamun, aketeng tamun yumada, awar, atanggal yaryopda, ‘Nun ila mambul tumi,’ tenenkamepe,” pepi.

Ila tumi tep, ‘Purim,’ pepra, ila tumi si deipi upu

24 Hamedata er mi Hamanda, Agag yala nesala dordi deipdanen yakaramyanen deipi ngebo kuramu. Hamandi sun Yahudi yala nesala yuma tep, yu teneramudi, ‘Yahudi yala nesala yuma popra gawal dakamepe,’ teneramu. Uteneramudi, sun Perisa mutu nesaladi kuramitopu, sun kurpetena tep kurteren keca er si pur di kurpeteramu. Ukuramunge deiyoda, ‘Sun Yahudi yala nesala gum kupra derina tumida, ake. Atanggal awar ake, tenepkamne’ tenen, erdi uteneramudi, ‘Yahudi nesala yuma tep gum kupra deiptene,’ teneramu.

25 Dinino, Haman teneramunge gekepu taruda, Esterdi tamupra ila nimi deiyo ngebo Raja Ahasyeweros damai bena lap pepu. Upepupa, nimi deiyo ngebo Raja, erdi surat sengna deiki, Hamandi peipu upu sekdongopu. Upu sekra deipudi upepu. “Haman erdi yu tenepra, ‘Yahudi yala nesala yuma popra gawal dakamepe,’ pepra sekamu ngeda, er pe dipapu ikin keca deipdanmare. Tonda, ‘Er cap, er pe nyapu cap, nimi dopra, tapu di kum gerekra deripkotepkamepe’ tenen, Hamandi ikra deiamu lyom co dupai deripkotepkamape,” Rajadi pepu.

26 Hamandi, ‘Yahudi nesala pon tumi ake’ tenen, peten kemna keca deipu ngeda, er sida, ‘Pur’ perami. Ange tep nengeda, Yahudi yala nesaladi, ‘Dortaru kunkamre keteng tamun yumada, nun ila taru tenepra, mambul tumi si penkamep ngeda, Purim,’ penkamepe. 27 Ange deiki di, sun Yahudi yala nesalada pio kunkaminge cap, tonda sun pe pel tupa donung nge cap, sun pe kun kecapu ketenepra deipra kurami. Ukuramidi, sun peda deipdanen bankameng nesala cap, yuk nesala dinin, Yahudi yala nesala cap kikiman kunkameng nesala cap, kepra deipnedi kupbanange cappu, pio kupbarami.

Atep, aketeng tamun yumada tamna gum di, pio dukdongopra, ‘Nun ila mambul tumi’ tenen, si eremnung tumida, ue butene taru, war si Adar dinin, tanggal 14 cap, tanggal 15 cap keteneipkamepe,’ teneramidi, tupa tenenunge. Ada, nimi deiyo ngebo Mordekaidi, “Ukunkamrume,” pepra deiputopu tupa kununge.

28 Ataru Mordekaidi konum ketenepra deipu dingeda upepu. “Tumi-tumi yumada, aketeneipmap war konum baripyopda, ‘Purim tumida, nun pio ila mambul tumi,’ tenepra, nun Yahudi yala nesala yuma beipye peikra, kailya kalepra jenmapedi, gispal donkamepe. Ada, dan mutu do yuma, ila pala mutu neitamai kunkameng nesala cap, karen mutu propinsi yuk datalepra kunkameng nesala cap, metek mutu dakunkameng nesala cap, ila kota neitamai talepra dakunkameng nesala yuma capda, ‘Atumida, nun pio ila mambul tumi,’ tenepra gispal donkamepe. Apepmasen ngeda, pio men lumdongonkamrume. Pio tenenapu kunkamrume. Sundi deipmumpa, dadeipdanen, benkameng Yahudi nesala peda, men lumdongonkamenge.” Mordekaidi pepu.

29 Ataruda, nimi deiyo ner Ratu Ester, er nai bo Abihail kuramu ner, er si Ester cap, er nai nimi deiyo ngebo Mordekai cap, adipapu sengna keca ue butenenge sekra dokoteprei. Ukuprei dingeda asurat butenenge neitamaida, puto di Yahudi yala nesala tep peprei. “Nun ila tumi yaryopda, ‘Pio gispal donkamepe,’ pepmepu tumida, er si Purim, atarupu beipye peikra, kailya kalepra gispal donkamepe,” peprei.

30 Asurat yumada, Yahudi yala nesala dakurami mutu yumada, Mordekaidi peipupa, surat dubana nengdi, asurat dopra karerbarami. Ukurami pangeda, sun kayapu nengda, dakurami Yahudi yala nesala, damai kurami nesala cap, karenai kurami nesala cap dopropi. Ada Persia ila pala mutu neitamai dinin, seratus dua puluh tujuh (127) propinsi dakurami nesala yuma tep, asurat sekra dokotemamipa, dororami. Tonda asurat neitamaida, Mordekaidi, dipru puto kemdina upu cap, sekudi, “Nun nai Allahdi melimserepa, teleppu kunkamepe,” pepra dipru kwa dimna upu cap, sekra dokotepu. Ada, ‘Sun Yahudi yala nesala yumada, kware gum di, telep kupra dimpeprappu kunkamenge’ tenen seku.

31 Tonda, aketeng tamun, aketeng tamun neitamai yumada, Yahudi yala nesala yuma di, ila tumi ‘Purim’ peraminge, tupa tenepmengedi, beipye peikra, kailya kalepra kunkamenge. Ada, Mordekai cap, nimi deiyo ner Ratu Ester capdi, “Ukunkamrume,” pepra deiamsereitopu, ‘Ukupra kunkamenge. Beipye peikmengedi, kailya kalepra jenkamenge cap, Allah moronkamenge cap, kange deridankamenge cap, engenkamenge cap, si tepra jen men jenkamenge cap yumada, ataru, atanggal kunkamrume, pepnemutopu pio kunkameng’ tenen, asurat sekra dokotepu.

32 Nimi deiyo ner Ratu Esterdi pepu upuda, “Ukutaru di dipdongopra dorkunkamre taru neitamai yumada, nun ila tumi er sida, ‘Purim’ penkamep kecada ake,” pepra deipu ngeda, ila mambul tumi Purim tumi kepra kunkameng ngeda, sun buku neitamai ton sekra deipu. Atep ngeda nun yumadi ataru baripne pangeda, tumi-tumi yuma tamna gum di, ila kailya kalepmepedi, gispal pio dopra si eremkamepe. Ratu Esterdi pepu.