Exodus 1

Mesir mutu neitamai Israel neng ikin pel dorami upu

1Pumun taruda, Israel nesala yuma Mesir mutu bei. Ada, Yakub er nyapu cap, Mesir mutu bei nesala sida ake. Er nyapu yumada, sun nerapu cap, sun nyapu cap, kikiman Mesir mutu bei. 2Sun si ace. Ruben, Simeon, Lewi, Yehuda cap, 3Isakar, Zebulon, Benyamin cap, 4Dan, Naftali, Gad, Asyer cap bei.

5Sunda Yakub er nyapu ada, denge yoneitam bari (70) nesala Mesir mutu bei. Sun yuma Mesir mutu bei taruda, Yusup menmena di konum bena dakuramu. 6Sun yuma dakuramipane, Yusup er kiklip neng cap, er pe Yusup cap, sun ataru du nesala kurami neng yuma cap depi.

7Dinino, sundi derirami nyapuda, ada Israel nesala Mesir mutu kurami taruda, nyapu weik menmena deipdanen beipa, nimi weik kupu. Israel nesala pio weik kuramya cadi, Mesir mutu neitamai yuma nimi weik kupu. 8Ukupi taruda, Mesir mutu neitamai ila nimi deiyo ngebo tenpu, Raja ukupu ngebo tekudi, Mesir mutu yuma taleamu. Ateku ngeboda, Yusup er si cap, nong cap men kael keamu.

9Angebodi er amutara kurami nesala tep upepu. “Sun ton diso. Israel nesala, denge pio weik konum kupmanga cadi, sun puto weik kupmenga deiki di, nun yanipkamsenge.

10Ange tep nengeda, nundi sun Israel nesala tep, ‘Ware kuptepya deiki di, sun yambul kupra deiptepe do?’ tenen, pio moupra tenenkamepe. Ada, ‘Sun pio weik ton cap kupmengedi, amenda podana taru kupseryopda, aneng poptaptepe,’ tenesenung nesalada, Israel nesaladi aneng cap kikiman bulupmengedi, nun tep popbisipkamsenge. ‘Popbisipsengedi, sun yuma nun mutu tapra bendopsenunge,’ tenepne. Ange tep nengeda, Israel nesala tep, moupra tenepmepedi, ila kaele di kunkamepe,” pepu.

11Mesir mutu ukupu Raja, Firaundi peipupa, er nyapsilipdi pel dona deiyo neng, yu neng dopra deipi. Ada, ‘Sun Israel nesala kalengmengedi, ikin keca sun nong deiki deipkameng’ tenen, deipi. Ukupipa, ayu nengdi, Israel nesala puto di taleprapidi, sun nong deiki ikin pel pio weik deipipa, mambul kange doupra, ila ikin pelpu dorami. Ada, Israel nesaladi Firaun er mawa keca derinai tep, kota si Piton mutu cap, Ramses mutu cap, pio ikin pel doramya deiki di, akota butene domi.

12Mesir mutu nengdi ikin keca weik, Israel nesala nong deiki deiami dipunen, ikin weik kuramitopu, Israel nesaladi nyapu weik deipra dadeipdanen beiya deiki di, amutu neitamai bena kuramya di, denge pio weik kupupa, Mesir mutu nesaladi sun tep, kware weik kupu.

13Ange tep nengeda, Mesir mutu nesaladi Israel nesala tep, bicau tenena gum deiki di, pio ikin pel weik ton cap tapakra dimamipa, pel weik doramidi mambul kange douami. 14Mesir mutu nengdi, ‘Israel nesala, sun kange mun kange doupra kunkameng’ tenen, wa pel yala-yala yuma cap, batu tehel ketekemna tep, ikin pel weik ton cap, sun nong deiki deriramya deiki di, Israel nesala kange mun kange doupra kuramidi, engena weik kurami. Ukurami dinin, Mesir mutu nesaladi, sun tep bicau pio men teneramidi, ikin pelpu tapakra dimami.

15Mesir mutu talepra kuramu deiyo ngebo, Firaundi nyapu derin taru melipra kweten nerapu butene, Israel nerapu sun si Sipra cap, Pua cap tep, upepu. 16“Uda, sundi Ibrani nerapu mi derina tep melimkamrerum taruda, Ibrani nerapu mi derina taru neitamai dipreprerumdi, sal nyapu deipkunge dingeda, anyapu adipapu potamkamrerume. Ner nyapu dingeda, ‘Dakwapye’ tenen, taprerumpa, ner nyapu gampu kunkamenge,” pepra deipu.

17Firaundi upepupane, anerapu buteneda, Allah tep kware kupupa, ‘Allah erda mambule,’ teneramreia tep, Firaundi, ‘Ukuprerume,’ peiputopu tapra, Israel nerapudi deiami nyapu yumada, tamamreipa gampu kurami. 18Ukuramreipa, Firaun kael kepu dingeda, anerapu butene tep tamupra upepu. “Warya tep sal nyapu yumada tamrerumpa, gampu kunung do?” pepu.

19Firaundi aupu pepu pangeda, anerapudi tamupra iniptapreidi upeprei. “Gume naio, sun Ibrani nerapuda, Mesir nerapu utopu men kununge. Gume. Sunda puto weik cadi, nun men yanmaneme taru di, menmena deridonunge,” peprei. 20Upepreiya tep, Allahdi sun nyapu derin kwetena nerapu tep, kange deipra telep kupra deipupa, Israel yala nesala nyapu weik deipra, dadeipdanen baramya tep, denge pio weik kupu. Pumun taru, weik akwamu dinin, ukutaruda Israel nesala denge pio weik kupbarami.

21Tonda, sun kwetena nerapu Allah tep, kware kupupa, ‘Erda mambule,’ teneramreia tep, Allahdi anerapu tep meliamupa, sun peda mundu douamreidi, nyapu weik deriramrei. 22Amenda taru, Firaundi er amutara nesala yuma tep, aupu pepra karepu. “Ibrani nerapu sal mi ton deipmengopda, adipapu sundi anyapu dopra, ila me si Nil me dongombankamrume. Ner nyapu dingeda, dakwapye. Ner nyapu pona gumedi, tapmumpa, gampu kunkamenge,” pepu. Firaundi upepra deipu.