Exodus 10

Allahdi Mesir mutu sul po weik karepu upu

1Allah er si Yahwehdi Musa tep pepu. “Kandi, Firaun kundam berume. Nedi, er nong ketekeiamsa tep, ukutaru nedi karepsipa, er cap, er pel dona deiyo neng cap, sun dipru balila kunge ngeda, ada ne dia. Deiyoda, Mesir nesalada, ‘Uo Allahdi tek sisi pel dopsere, tenepmengedi kael kepkameng’ tenen, sun kan-kan neitamai nimi men kupmanto keca pel dopnepa, kael kepkamnenge. ‘Utenepkameng’ tenen, dipru gat kuna deiyo keca, Firaun tep karepsi.

2Tonda, ‘Sun Israel nesala epra kael keprumdi, sun nyapu cap, amenda taru sun nyapudi deipbankameng nyapu cap tep, ne kupsi keca lape penkamrum’ tenen, kupsi. Sundi sun nyapu yuma tep, ne kupsi keca lape penkamrume. Ada, Mesir mutu nesala mali kupipa, ne puto di kange mun keca weik, sun nong deiki deriramsidi, nimi men kupmanto keca cap, kunupsek pen pel cap, Mesir mutu neitamai di pel doramsi. Ange yuma lap peprumpa, sun nyapu gekepmengedi, ne kune keca kael kepkamnenge. Tonda, sun yumadi, ‘Uo, Allah Yahwehda, ila deiyo ngebo er tenpu kurure’ tenen, kael kepkamrume,” Allahdi Musa tep pepu.

3Upepu pangeda, Musa cap, Harun cap, sun Firaun damai bereidi peprei. “Nun Ibrani nesala talepra makusere Allah, er si Yahwehdi, upepmakere. ‘Ware kuprap taru ton, dipru boun kuna gum di, balilapu kupmemdi, ne amutara men kunkamrem do? Ne nyapu Israel nesaladi, ne si erepkamneng’ tenen, kandi sun tep loptapmempa, yukai benkamenge, pepkene. 4Ange tep nengeda, kandi, ‘Sun anesala tupa men benkamenge,’ pepmemnyopda, ambutumida, nedi sul po weika di, sun mutu neitamai dokwetepnepa, weik kupkamare.

5Sul po weik karepnepa, sun mutu neitamai yuma, sul po weika di amupredi tuai yuma dinipkamare. Ukuprepa amutu tu yuma, nimidi men epmanto kupkamenge. Sul podi akeca-keca yuma jepropkamre. Ada nimidi kourami keca cap, co cap, mutmuta cap, ila es mul duduya sakudi, akeca yuma sikke buktapmaupane, yambulanun tupa akupmau ngeda, sul po yaredi ange peda jepropredi gawal dakamre,” pepu.

6“Sul po pio weika di ati yuma dinikamre. Kan ati cap, kan pel dona deiyo neng sun ati cap, Mesir mutu nesala sun ati cap, yuma dinikamre. Akupkamre ngeda, men di utopu men kuramupa, Mesir nesala men dirami. Akecada kan cap, kan apu yapu cap, sun kapul men deiamsei taru di dipra, ange utopu men kuramupa, men dirami dinin, Firaun kan kael kepkamrume.” Musadi upepu dingeda, adipapu Firaun damai di tapra beu.

7Musa beuopda, Firaun er pel dona deiyo nengdi pepi. “Ware kuprap taru di, angeboda nun kan-kan di, pena youramre utopu kupkamser do? Nundi er tep dabal weik kupsere. Ange tep nengeda, Israel nesalada kandi tapmempa, dabenkamenge. Dabengedi sun Allah, er si Yahweh tep, er si erepbankamenge. Yahwehdi nun amutu yuma popmaserpa, pio mali kupmaser ngeda, men dirum do? Kange mun kupser ngeda, kan men tenipmaremdi do?” pepi.

8Upepya tep, Firaundi ka tamupra Musa cap, Harun cap tep, ka di kongpepu. Kongpepupa yarei pangeda, ila ngebo Firaundi, “Jo daberumudi, Allah Yahweh, er si erepbankamrume. Dinino, ware-ware neng tek sisi benkameng do?” pepu. 9Upepupa Musadi tamupra pepu. “Nunda kaber neng pe, wisi neng pe, nun nyapu yuma sal nyapu pe, ner nyapu pe, tonda nundi peinup keca kambing pe, domba pe, sapi pe, yuma doupra benkamepe. Akeca yuma dubenkamepa deiyoda, ila tumi damai kuprepa, Allah er si Yahweh tep, er si erepra, gispal dopkamepa tepa,” Musadi pepu.

10Upepupa, Firaundi tamupra pepu. “Sun nai Allah, er si Yahwehdi, ‘Sun melimkamsere’ tenenune. Dinino, nedi sun tapsenepa, sun nyapu cap, sun yuma benkamrumada, ne konum kael kepmasene. Sunda tek sisi mali kuna tep benkamrume. ‘Firaun tep mali kupkamepe, tenenerume,’ tenepne.

11Ange tep nengeda, sun nimipu benkamrume. Men di moropnemumtopu, berumudi sun nimipu Yahweh er si erepbankamrume.” Firaundi pepu. Upepudi Firaun yu kupupa, er nyapu yumadi Musa cap, Harun cap tep, “Firaun damai di tapra, sun bura bereso” pepra dokotepi. 12Ukupi pangeda, Allah er si Yahwehdi Musa tep pepu. “Kanda Mesir mutu yuma dipra, kan buru di Mesir mutu gwaiptopkurume. Gwaiptopmempa, adipapu sul po weike yankamenge. Yangedi amutu yuma dinipkamenge. Ukupmengedi, Mesir mutu kuramre keca yuma, yana jepropkamenge. Ada men di mul duduya mo di kapul men popmaunge yuma peda, sul podi jepra, gawal dakamenge.” Allahdi Musa tep pepu.

13Upepupa, Musa er maca Mesir mutu tu deiki gwaiptopupa, Allah Yahweh, er puto di, ila kumanya keteng yakan tara di dopra yaudi, atumi komuni taru pe, lukunda taru peda, kumanya ila di kunmauanen, bereku pangeda, keteng yakan tara di, sul po ton cap tapakra duyau. 14Ukupu pangeda, sul po weike yaidi, Mesir mutu yuma dinipu. Dinipudi, Mesir mutu neitamai pio weika di amupi. Ada kapul taru di dipra, ataru neitamai yuma cap, amenda yankamre taru peda, ange kuputopu sul po pio weik men kuramu, ton men kunkamre. Sul po atarupu, Mesir mutu neitamai pio weika di kupu.

15Tuai mutu sul po pio weika di dinipidi, amutu tuai yuma miripupa, akan-kan sul podi amutu kapu keca yuma jepropi. Ada ware keca do yuma, mutmuta cap, co du cap, co cap, wa kouaminge yuma cap, mul duduya mo di popsingipmaupa tupa kapunge yuma peda, jepropi. Embek keca pio meteka pe ton men kapu. Mesir mutu neitamai embek paramu keca yuma jeprapidi, gawal daki.

16Ukupupa, Mesir mutu ila ngebo Firaundi menmena Musa cap, Harun cap, ka tamupra kongpepudi upepu. “Uo ne pio mali kupmane. Ada kan cap, sundi er si eremrum Allahda, er si Yahweh tep, mali kunune,” pepu. 17Ange ton pepu. “Tenpu taru ton cap, ne mali kune keca kaukepnerumdi, sun nai bo Allah, Yahweh tep moropkunurume. Moropnerumupa, sundi er si eremrum Allah er si Yahweh, erdi ne damai kange mun keca kuser ngeda, akeca popkamser keca gum kupra deipsetue. Ada, ‘Sul po gum kupra deipsetu’ tenen, pepne,” Firaundi pepu.

18Upepu pangeda, Musadi Firaun damai tapra beudi, Allah er si Yahweh tep moropu. 19Moropupa, Yahweh er puto di, ila kumanya karepupa, keteng dangban tara di, ila kumanya puto di pung pepupa, kumanya puto di sul po yuma douprapudi, ila laut mokon pumbon dongopu. Alaut mokonda, er si Bi Laut perami. Ukupupa, Mesir mutu neitamaida, sul po tenpunge pe ton, pio men kupu.

20Allah er si Yahwehdi ukupu dinin, erdi karepupa, Firaun er dipru tupa balila kupudi, ‘Israel nesala tapnepa, men benkamenge,’ tenepudi pepu.

Allahdi Mesir mutu ina karepupa, Mesir mutu yuma ipu upu

21Allah er sida Yahwehdi Musa tep pepu. “Kan buru im deiki gweiptopmempa, Mesir mutu neitamai yuma ipkure,” pepu. “Ukupra pio ipkamra cadi, dirineda meteka pe ton men kuprepa, nimidi men epdanmanto kupmengedi, kware weik kupkamange,” Allahdi Musa tep pepu. 22Upepupa, Musadi er buru im deiki erepra maca gweiptopupa, Allahdi ina karepupa amutu yuma ipu. Ukupupa, Mesir mutu neitamai, u weneri tumi deiki di pio ipu.

23Ipupa nimidi men epdanmanto kupidi, er kabodi er kabo tep men epdanmanto kupiya tep, nimi yuma men benmanto kupipa, sun pe ati pumbonpu kunmai. Ada komuni weneri tumi di ipu. Ukupu dinin, Israel nesala sun kungai damaida, dirin deiki pio telepaipu kurami. 24Ange tep nengeda, Firaundi Musa tep ka tamupra kongpepu. “Daberume, bememdi Yahweh er si erepbankamrume. Tonda, sun cap, sun nyapu cap, sun nerapu cap, dopra dubetum dinino, sun kambing cap, domba cap, sapi capda, acapu tapkamrume. Akecada men dubenkurume,” pepu.

25Upepu dinin, Musadi tamupra pepu. “Kandi, ‘Telepe’ pepsemempa, nun peinup keca yumada, doupra benkamepe. Ukuptepe dingeda, agam keca popra nun nai Allah er si Yahweh, er karena cap, gispal dona cap tep, ormutu bena uku dongopkamepe.

26Apeinup keca yuma doupra benapu kupkamepa. Tenpunge pe ton tapmepepa, amutu tupa men kunkamre. Deiyoda, nundi akeca popra, Allah karepkamepa tepa. Ormutu kapul men bepedi, bisi neitamai tup bankamep taruda, Allahdi, ‘Akeca popra karepkamnerum dinin, angeda men karepkamnerume,’ pepra deipkamser ngeda, nun walwale. Nun nai Allah er si Yahweh, er karena tep, ‘Agam keca do, ange do?’ tenen, wang-wang pepserur cadi, agam keca yuma doupra bankamepe,” Musadi pepu.

27Upepu dinin, Allah er si Yahwehdi Firaun tep, kika derin keca karepupa, men gekepudi, dipru balila kuprapudi, “Israel nesala tapnepa, men benkamenge,” pepu. 28Firaundi tamupra Musa tep pepu. “Kan tep nengeda, ne dabale. Kanda ne dinai tapra, yukai pio benkurume. Ne urasin ton cap men epkamnereme. Yuk tumi ton cap ne urasin epdanememnyopda, kan poptapmepepa, kan adipapu depkamreme,” pepu.

29Upepu pangeda, Musadi tamupra pepu. “Jo kandi tek pepreme. Apepmanerem utopu, kan damai ton cap men yankamne. Kan urasinda nedi ton cap men epkamkene,” pepu.