Exo 11 | XteSC | STEP | Allah er si Yahwehdi Musa tep, pepu. “Nedi kurpetena tep kange mun keca, tenpunge ton, Firaun cap, Mesir nesala cap tep karepkamne. Ange ton karepnepa, konum kupyopda, Firaundi sun tapserepa, ‘Nun mutu tapra benkamrume,’ pepra, Mesir mutu neitamai di dokwetepkamsere.

Exodus 11

Allah er si Yahwehdi, Mesir mutu weni nyapu yuma popu upu

1 Allah er si Yahwehdi Musa tep, pepu. “Nedi kurpetena tep kange mun keca, tenpunge ton, Firaun cap, Mesir nesala cap tep karepkamne. Ange ton karepnepa, konum kupyopda, Firaundi sun tapserepa, ‘Nun mutu tapra benkamrume,’ pepra, Mesir mutu neitamai di dokwetepkamsere. 2 Ange tep nengeda, Musa kandi pepmempa, Israel neng yumadi, Mesir nesala sun damai kunge neng tep, moropmengepa amutu nesaladi, kunumna weik keca, gat keca emas cap, perak cap karepkamsenge,” Allahdi Musa tep pepu.

3 Uda ataruda, Allah er si Yahwehdi Mesir nesala tep, sun dipru neitamai pel dopudi, sun kange tenenange tamoipupa, sun Mesir nengdi Israel nesala tep, ‘Telepe’ tenen, kange deipi. Tonda Musada, Mesir mutu kuramu taru di, sun ila ngebo Firaun, er amutara tali kurami nesala yuma cap, Firaun er pel dona deiyo neng yuma cap, sun yumadi Musa tep, ‘Erda telep ngebo cadi, erda mambule,’ teneramidi, er tep gispal dorami.

4 Musadi Firaun tep aupu pepu. “Allah er sida Yahwehdi upepmakere.” “Alukunda neitamaida, ne Mesir mutu neitamai yuma embendankamane. 5 Ukupne pangeda, ware keca do yuma, Mesir mutu weni nyapu salnge yuma cap, nesala peirameng keca gemnge menmena deipinge cap, yuma popnepa depkamange. Ada, Mesir mutu ila ngebo, er bungna keca deiki bungre ngebo Firaun peda, er weni mi peda depkamre. Ange utopu dipdongopra, tali melimna nerapu, gandum larameng nerapu peda, sun sal nyapu weninge ton depkamenge. Ange utopu ton, bisam mi weni deriramrenge cap, ayuma peda depkamenge,” Allahdi pepu.

6 Upepudi, aupu ton pepu. “Sun weni nyapu cap, peirum keca cap tep popnepa depmenge pangeda, Mesir mutu nesala yumadi engenkamenge. Pio mali kange doupra engengkameng ngeda, pumun taru di dipra, dukdongopra aneitam taru peda, akupkamre keca utopunge ton men kwamu. Tonda, pumun taru engerami ngeda, yambul pua. Tonda amenda doryankamre taru peda, engengkameng ngeda, yambul mambulpu kunkamre. Dinino, ne Allahdi ukutaru karepkaman kange mun kecada, pio ikine tep, ila mambule. Tek sisi kange mun kange doupra kunkamenge,” Allahdi pepu.

7 Upepudi aupu ton pepu. “Dinino, ‘Sun Mesir mutu nesala kael kepkamneng’ tenen, Mesir nesala yuk, Israel nesala yuk kepra deipkamne. Ada Mesir mutu neng, sun weni nyapu yuma popnepa depkameng dinin, Israel nesala sun kunge damaida, nimi cap, domba cap, sapi bisam cap yumada, sal nyapu menmena ngeda men depkamenge. Atep, sun kungaida, nimi pon malaikat men yankamara cadi, tenpu kam peda mali pepra men kaipkamre. Teleppu kunkamenge.

Ukupne pangeda, adeiki di, ‘Uo, tek sisi Yahweh erda puto weik ngebo kurura cadi, Mesir mutu nesala wenepredi, sun weni keca popmar dinin, Israel nesala sun ngeda gume. Atep erdi bokra karesere kecada, yuk-yuk pua.’ Uteneprumudi, kael kepkamnerume.” Musadi pepu. Ada Musadi Firaun tep, “Allahdi upepkere,” pepu.

8 Upepudi, aupu ton pepu. “Allahdi ukupre pangeda, Firaun kan pel dona deiyo neng yuma, ne gispal dona tep, ne damai yana genepra bukmengedi, upepkamenge. ‘Kan cap, kan upu gekepra dombakenung nesala, sun Israel nesala yuma cap, nun mutu tapra adipapu berume,’ pepkamnenge. Ukupmenge pangeda, nundi sun tapra bendopkamepe,” Musadi Firaun tep pepudi, yu weik kupupa, adipapu Musadi Firaun damai di tapra beu.

9 Uda, arup taruda, Allah er si Yahwehdi ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} Musa tep konum peipmaue. “Ne Allahdi Mesir mutu neitamai, ‘Nimi men kupmanto keca cap, kunupsek pen pel cap, pio weika di kupkamne,’ tenepsa tep, ne Allahdi Firaun er dipru gat keca karepnepa, balila kupyopda, kan upu men gekepkamkere. Er tupa malipu kunkamre.” Allahdi Musa tep pepu.

10 Aupu peiputopu, Musa cap, Harun cap, sundi nimi men kupmanto keca, Firaun damai kuprei. Dinino, Allah er si Yahwehdi, Firaun tep balila kuna deiyo keca karepupa, tupa men gekepudi, er dipru kange tupa balila kupudi, ‘Israel nesala men benkamenge,’ pepra, Israel nesala men loptapudi, er mutu neitamaipu talepupa, kurami. Ataruda tupa acapu kunmai.