Exo 12 | XteSC | STEP | Allah er si Yahwehdi Musa cap, Harun cap tep, Mesir mutu neitamai tupa kunmarei taru di pepu.

Exodus 12

Allah er si Yahwehdi Israel nesala tep, sun weni nyapu men popudi, kaplepra beua tep, pepu upu

1 Allah er si Yahwehdi Musa cap, Harun cap tep, Mesir mutu neitamai tupa kunmarei taru di pepu. 2 “Akunmarum warda, menmena gonga kemna war kepkamsere. Ada ukutaru di gonga kepra, awar menmenange kepredi, awar-awar yuma nukra, tenpu keteng tamun nukra tenenkamrume. Keteng tamun, keteng tamun yuma, menmena warda, awarpu pio tenenkamrume.” Allahdi pepu.

3 Allahdi aupu ton pepu. “Apepsene upuda, sun butenedi Israel nesala yuma tep peprerume. Awar neitamai dinin, tanggal sepuluhda, sun yuk-yuk dinin, sun nimi yumadi, domba bisam mi weni ngepu wepkamrume. Ada akati-akati akuretopu, ati deiyo ngebodi (kepala keluarga) domba tenpu wepra ketenepkamenge. Wepra doupropmumdi, yuk-yuk nimi cap, nerapu cap dopdanamrumutopu, domba peda utopu wepra ketenepkamrume. Sun nyapsilip yuma, ati yuk-yuk akungetopu, domba popra jenkamruma tep pepne.

4 Dinin, sun ati damai dipropdana kuramrumu nesalada, denge meteka dipu kumumnyopda, adipapu sun damai kikiman kurum nesala cap tapakurume. Ada sun metek ati kurum neng cap, sun ati damai kunge neng cap tapakmumdi, domba tenpu dopra popkamrume. Domba nukra keteneipkamrum ngeda, sun denge akuramrumutopu tenepra dopropkurume. Sun nimi yuk-yuk putapserepa, jepkurumnye kikimanpu keteneipkurume. 5 Sundi domba do, kambing do, gemnge keteng tamun tenpungepu wepra, ketenepkamrume. Dinin bol mali ngeda, gume. Keteng tamun tenpu di bol telep kupra neramrengepu ketenepkamrume,” Allahdi pepu.

6 Aupu ton pepu. Sundi tanggal sepuluh deiki domba do, kambing do, nong pio telepnge tenpu wepra, ketenepra peiramumyane, awar neitamai tanggal empat belas (14) konum kupyopda, popkamrume. Ada, atumi ipropredi, keteng orwengbenkure taru konum kupyopda, ada jam lima sore utopu, Israel nesala yuma, sun ati yuk-yuk akuretopu, adipapu domba do, kambing do, gemnge tenpu popkamrume.

7 Domba do, kambing do, abisam konum popmum dingeda, domba yapi yangdin keca di doproprumdi, buplan dam dana-dana co deiki cap, buplan itara sengdin co deiki cap, likipkamrume. Ada ati yuk-yuk bulupra, domba tu akati neitamai jenkamrumtopu, akati buplan dam, domba bisam yapi dopra, gege peprap likipkamarume.

8 Alukunda neitamaipu, domba nong yuma galepraprumdi, uku deiki dapra jenkamarume. Tonda roti nena gumnge cap, malilya yunge cap jepkamarume. 9 Domba embeknge pe, tonda, me bupu gamnange peda, pio men jepkamarume. Ange gum dinin, domba nong yuma sekra, uku deiki dapraprumpa, poprengepu dopra, galemna tenpai yuma bupra deipmumdi, giso cap, yane cap, nong neitamainge cap yuma, uku deiki dapra jepkamarume. Tonda gamna gume.

10 Ukupmum dingeda, abisam galemna kwal deipmamumnyane, ipna bereng tamne men jepkamarume. Ukupmumdi, meteknge pe ton tupa akapre ngeda, adipapu uku dongopra sengpepkamrume. Ukudi akeca yuma jepropredi gawal dakamre. 11 Ange jepra seng pepropmum taruda, bisi benkamruma tep, sun opkal kenekra keteneipkurume. Tonda, sun yantang kenengna keca, er si sandal cap, kenekra, sun taleprum maca buru talepra keteneipkamarume.

Ukupmum dingeda, domba tu cap, akeca yuma cap, ‘Adipapu menmena benkamep’ tenen, menmena di jepra seng pepkamarume. Ange yumada, ne si Yahweh, ne Allahdi peipsentopu kunkamarume. Ada sun weni nyapu pona gum dipapu, sun ati kaplepra benkamna tep, akeca jepkamarume. Allahdi pepu.

12 Upepu dingeda, aupu ton pepu. “Uda atumi lukunda neitamaipu, ne Allahdi Mesir mutu yuma embenedi, Mesir mutu weni nyapu yuma cap, sun peinung gam keca, weninge yuma cap, popkamne. Tonda, Mesir mutu isok si eremenge keca yumada, ne Allahdi wenepnedi ikin weik keca, sun deiki deipkamne. Ne si Yahweh, ne Allahdi pepsena tep, ange tek sisi kupkamane,” Allah er si Yahwehdi pepu.

13 “Dinino, sun Israel nesalada, sun domba yapi doupra, sun buplan deiki cap, buplan itara cap, likrapmumdi, peten kemna keca deipmum ngeda epkamasene. Sun ati epne dingeda, sun atida kapleptenedi, ila kange mun keca men karepkamasene. Ada, sun weni nyapuda men popkamne. Dinino, sun ati buplan deiki domba yapi men likipmange nesala, Mesir mutu nesalada, sun weni nyapu cap, gam kun keca weninge cap, yuma popkamne.”

Nena Gum Roti Kailya jena tep, pepu upu

14 Atumi kupkamanye tep, sundi atumi pio tenenkamrume. Sundi, ‘Atumida Allah Yahweh er ila tumi kurure,’ tenepra, orketeng tamun, orketeng tamun yuma, akailya pio kalepbenkamrume. Ada ne si Yahweh, ne gispal dona tep, akailya pio men tapkamrume. Keteng tamun yuma, pio Kaplemna Kailya kalepbamumdi ne si erepbankamrume.” Allah er si Yahwehdi pepu.

15 Allahdi pepu. “Kaplemna Kailya taruda, ukunkamrume. Sundi ue yoneitam bari tumi mapra, nena gum roti jenkamrume. Tonda, gonga kemna tumida, adipapu roti nena deiyo keca, er sida ragi yuma dopra, sun ati pum di bura donokamrume. Ange tali men pepsene. Ware ngebo do yuma, gonga kemna tumi di dipra, adine yoneitam bari tumi neitamai yumada, roti nenange cap jepre ngeboda, Allahdi angebo dopra, sun kan-kan di dokotepra poptapkamre,” Allahdi pepu.

16 Upepu dingeda, aupu ton pepu. “Sundi menmena tumi cap, tonda yoneitam bari tumi cap tep, ‘Atumi buteneda, ila mambul tumi,’ tenepra, sun yuma bupra tenpai bulupkamrume. Ada, ne gispal dona cap, ne si eremna cap tep, bulupkamrume. Ange tep nengeda, apepmasen tumi, tumi buteneda (tanggal 1 dan 7) sundi tali lupra ikin pel men donkamrume. Atep, sundi jen keca jenkamrum ngepu, keteneiptenge. Yuk pel yala-yala yumada pel dona meme.

17 Awar, atumi deiki peda, nedi sun Israel nesala yala-yala yuma lyeprapnedi, Mesir mutu neitamai di doupra, dubenkamasena tep, orketeng tamun orketeng tamun yumada, ange pio tenenkamrume. Ormapbankamrum taru yumada, Nena Gum Roti Kailyada ^{▼▼Nena Gum Roti Kailya – Akailya deiyoda ake. Ada, Allah Yahwehdi, sun Israel nesala dopra, Mesir mutu neitamai ikin pio weik kuramiyai di loptapra dubenamu taruda, upepu. “Alukundada, roti kwaning yuk-yuk tumi yuma jerum ngeda, men dapra jepkamrume. Menmenada, Mesir mutu taprumudi, adipapu bendopkamaruma tep, nena gum rotipu dapra jenkamrume. Tonda, ‘Allahdi loptapseudi, Mesir mutu neitamai di dubenamseu lukundada, pio mambul taru tep, ange tupa tenenkamrum’ tenen, keteng tamun, keteng tamun yumada, awar er si Abib, tanggal 14 deiki di, ila kailya kalepra, nena gum rotipu dapra jenkamrume. Akailya er sida, Nena Gum Roti Kailya, pio tep perumudi jenkamrume,” Allahdi pepu. Atep nengeda, sun Israel nesaladi, akailya pio jeramitopu, tupa jenunge.} pio men tamkamrume. Tenepra kalepbanapu pio kunkamrume. Sun kunkamrum ngeda, atara di dipra, dukdongopra keteng tamun, keteng tamun yuma kalepbankamruma tepa. 18 Atep menmena gonga kemna war neitamai, tanggal 14 tumi deike, keteng wengbenkure taruda, ataru di gonga kepra, ortumi neitamai dinin, denge yoneitam bari tumi deiki ton cap, nena gum rotipu jenkamrume. Ada atumi dinin dukdongopra, tanggal 21 tumida, keteng wengbenkure taruda, akonuma tep pepne. Ataru neitamai yumada, nena gum rotipu jenkamrume.

19 Apepmasentopu, yoneitam bari tumi neitamai yumada, roti nena deiyo kecada, er si ragi, sun ati pum derina gume. Ada ware ngebo do yuma, nimi bo neng do, Israel neng sisa do yuma, roti nenange ragi deipredi jepre ngeboda, Israel nesala neitamai di doupra, bura dokotepra poptamkamrume,” Allahdi pepu. 20 “Sun kunkamrumai mutu-mutu yuma, apepmasen taru neitamai yuma tep, roti nenange men jepkamrume. Sun Israel yala nesala pio gume, roti nena gum ngepu jena telepe.” Allahdi Musa tep pepu.

Musadi Israel nesala tep, “Kalya keteneipso,” pepra deipupa, gonga kepi upu

21 Allahdi Musa tep upepupa, Musadi Israel nesala sun deiyo neng wisi neng tep pepu. “Sun bemumdi, domba bisam kungai neitamai di, metek jem domba bisam dopropkamrume. Ada sun cap kikiman kurumu nesala akwapretopu nukra, domba mi keteng tamun tenpunge (umur 1 tahun), adomba mi doupra bemumdi, akailya tep popra kalepkamarume. 22 Ukuprum taruda, sundi domba yapi yangdin keca pumbon yamupdongopmumdi, co bo sisa paramre keca, er si hisop, hisop co bo koupna tenpu ton dopra wiproprumdi, domba yapi cap tapakrapmumdi, sun buplan dam co dana-dana cap, itara cap likipkamarume. Ukuprumu dingeda, alukunda neitamaida, sun ati tapra, bura tali men embandankamarume. Ati pumbonpu kunkamrume. Ukupra mapmarumnya berekyopda, buplan pakra bura tara bana telepe.

23 Ati pumpu kunkamruma deiyoda ake. Ada alukunda neitamaida, Allah er si Yahwehdi, ‘Mesir mutu kunge nesala, sun weni nyapu popkaman’ tenen, Mesir mutu neitamai yuma embendankamare. Emberedi, sun ati diserepa, sun ati buplan dam dana-dana cap, buplan deiki tara cap, yapi likipmamumpa epre dingeda, akati deiki tara kaplepra tali lupra benkamare. Ada, Allahdi, ‘Gume’ peprepa, nimi pona deiyo malaikatdi, sun ati men wekredi, sun weni nyapu men popkamare. Dinin, sun yapi keca men deipmenge atida, men kaplepra benkamare. Akatida wekra, sun weni nyapu popkamare,” Allahdi pepu.

24 Atep sundi, ‘Atumi ila mambul tumi’ tenen, pio talepmumdi ketenem dinkamrume. Sun cap, sun nyapu yuma cap, sundi deipmumpa, dadeipdanen bangedi kunkameng nesala peda, ‘Allahdi peipseu ngeda, tek sisi kupkamepe. Ada pio ila tumi tepa’ tenen, apepmasen utopu pio tupa kunkamrume. 25 Amenda taru peda, ne Yahwehdi sun tep, ‘Ukupu mutu karepkamsene,’ pediramsisi mutu bena wekmumnyopda, ‘Atumida ila tuminge,’ tenepra, tupa tenepra, angepu tupa kumumdi, neda Allah, ne si Yahwehpu eremkamnerume. 26 Ukupra ukuramumpane, sun nyapudi, ‘Aila tumi deiki mambul keca kunmapa ngeda, deiyoda ware deiyo keca tep kunup do?’ pepra asipsengopda, sundi tamupra upepkamrume.

27 ‘Adomba popra jenmapange deiyoda, pumun taru Allah er si Yahwehdi Mesir mutu neitamai di, Israel nesala nun ati deiki tara kaplepra beu dinin, Mesir neng ati wekra, sun weni nyapu poamu dinin, nun yuma loptapra Mesir mutu neitamai di dubesua tep, ange yuma tenepra kaplemne kailya kalemnupa,’ pepra lap penkamrume. Musadi sun Israel deiyo neng yuma tep pepu. Upepu pangeda, Israel nengdi gutam tu dipra, Allah er si erepra gispal dopi.

28 Ukupi dingeda, amenda taru, sun Israel nesala beidi, Allah er si Yahwehdi Musa cap, Harun cap tep, ‘Angeda ukupkamrume,’ pepra deipupa, gekepreidi lap pepreitopu, sun Israel nesala yuma peda utopu kupi.

Allahdi Mesir mutu nesala sun weni nyapu cap, sun peirami keca weninge yuma cap popu upu

29 Alukunda neitamaida, Allah er si Yahwehdi, Mesir nesala sun weni nyapu yuma popu. Tenpu pe ton men tapka tep, Mesir mutu ila deiyo ngebo Firaun peda, mambul bungna keca deiki bungamu dinin, er weni mi ton popu. Tonda, amutu wenemna ati pumbon dongopipa kurami neng ton, sun weni nyapu ton popu. Ange utopu, amutu neng, sun sapi cap, sun peirami gam keca yuma cap, weni ngeda, Allahdi popupa depi. 30 Popu pangeda, alukunda neitamaida, Firaun cap, er pel dona deiyo neng cap, Mesir mutu nesala yuma cap, alukunda neitamai bukra dipetepidi, sun weni nyapu yuma konum depinge dinmaipa, mali pepra pio engepi. Engepi ngeda, tali tep guma. Ada Allahdi Mesir nesala, sun weni nyapu yuma popupa, depya tepa.

Allahdi Mesir mutu nesala sun weni nyapu popupa, Israel nesaladi Mesir mutu tapra bei upu

31 Alukundapu Firaundi, Musa cap, Harun cap tep, kongpepu. Kongpepupa yarei pangeda, erdi pepu. “Sun menmena bukrorerumdi, Mesir mutu nesala kan-kan di, kan cap, Israel nesala yuma cap, adipapu wisipra berume. Ukuprumudi, men di moropnemumtopu, karen mutu bemumdi, sun yuma Allah Yahweh, er si erepbankamrume. 32 Tonda, sun bankumumnyopda, sun kambing cap, domba cap, sapi cap yuma doupra, ‘Doupra benkamepe,’ peamrumtopu doupra beso. Dinino, sundi akeca dopra, sun Allah tep karepkomumnyopda, ‘Sun nai bo Allahdi telep kupra deipnetu’ tenen, Allah tep moropnerume,” Firaundi Musa tep pepu.

33 Uda, sun Mesir nesala yumadi, Israel nesala tep, mali kange doupidi, “Adipapu menmena berumudi, nun mutu tapsetume. Sun men bemumnyopda, nun yuma depkamepe,” pepra, puto di pepi. 34 Upepi pangeda, adipapu sun Israel nesala bankoi taruda, sun roti nena keca kapul dongopi tarupu, roti bun nena gumnye cap, roti kidin keca cap yuma doupra, akeca sun opkal di geteprapidi, sun morokyo deiki deipidi, doupra bana tep ketenepra deipi.

35 Tonda, ukupidi sun Israel nesalada, Musa men di peiputopu, Mesir nesala sun kunumna weik keca, gat keca emas cap, perak cap, telep opkal cap tep, bena moropi. 36 Moropipa, Allah er si Yahwehdi Mesir nesala sun dipru kange tamupupa, akeca Israel nesaladi bena moropi taru karepi. Ukupra karepipa, Mesir nesala sun kunumna weik keca yumada, Israel nesala sun kange deipra, lukdana dopra dubei.

Israel nesala Mesir mutu tapra, doupra dubei keca tep, pepu upu

37 Akeca-keca dopra bei dingeda, Israel nesala bisi yo beidi, Mesir mutu neitamai kupu kota si, Ramses mutu di bena banmaiyane, kota si ton Sukot mutu bei. Sun bei nesala, sun gungda enam ratus ribu (600.000) nimi bei dinin, nerapu cap, nyapu capda men nuki. Atep pio weik ton cap tapakra bendopi. 38 Sun Israel nesala bankoi taruda, sapi cap, domba bisam cap, kambing bisam cap, sun melimna nesala cap, yuk yala nesala weik ton cap tapakra bei. Aneng yumada denge weika di wisipra bei.

39 Sun Mesir mutu neitamai di, nena gum roti kiami ngeda doupra, roti dan keca pumbon dongopra dapidi, nena gum roti dapra jepbanmai. (Kwal kipra bana tep mali kange doupi). Ada, Mesir mutu nesaladi, sun mutu neitamai di dokotepipa, berbera bendopya tep, go gum kupka cadi, dapnepa neramre rotida, men dapmanto kupi. Tonda, yuk jen keca, sun bisi yo neitamai jepbange ton men keteneipi. Ada jen keca ketenepra dana taru go gum kupka tep, menmena bendopi.

40 Uda, Israel nesala, Mesir mutu neitamai kurami taruda, keteng tamun denge weike empat ratus tiga puluh (430) deiki di kurami. 41 Keteng tamun denge empat ratus tiga puluh (430) kupupa, menmena adipapu Allah er si Yahwehdi weamu nesala yuma, Israel nesala yala-yala yuma sun kuramitopu, Mesir mutu tapra bei.

42 Sun bendopi lukunda neitamai dipapu, Allah er si Yahwehdi, ‘Israel nesala Mesir mutu neitamai di melipra dubenkamne,’ tenepudi pio kalekra dipembeudi, alukundapu sun lyeprapudi, Mesir mutu neitamai di yuk mutu dubeue. Ange tep nengeda, angetopu, amenda taru yuma, Israel nesaladi, ‘Alukunda neitamai, Yahwehdi ukuamseue,’ tenena tep, oryankamre taru yuma tupa tenenkamenge. Ada, sun Israel nesala yumadi, ange tep tenepbankamenge. Orketeng tamun yumada, awarpu alukundapu, Israel nesala yumadi, kange di tamupra angepu tenepra kunkamenge. Tonda sundi deipmengepa, dadeipdanen bankameng nesala yuma peda, utopu kunkamenge.

Kaplemne Kailya (Paskah) kalepra jena tep, “Angeda kunkamrume, angeda pio men kunkamrume,” pepra deipu upu

43 Allah Yahwehdi, Musa cap, Harun cap tep pepu. “Kaplemne Kailya (Paskah) neitamai kunkamrum ngeda ake. “Allah si eremna tep, domba bisam popmumdi doupra yangedi, Kaplemne Kailya damai yana kalepmamumdi, Allah tep karepkamrum domba bisam tu, tupa akwapkamre ngeda, yuk mutu nimi bo neng yumadi, atu keca pio men jenkamnunge. 44 Dinino, sun pel melipra dona tep, sun co bo deiki di kunupra deiamumpa kuramenge nengda, Kaplemna tep kailya kalepmamum keca jena telepe. Ada, sun den dam bol deiki tara konum sekamum nengpu jenkamnunge.

Dinino, sun pel melipra dona tep, sun co bo deiki di kunupra deiamumpa, sun pel melipra doramenge nesalada, Kaplemne Kailya kalepmamum keca jena telepe pua. Ada, sun pel melimna nengda, sun den bam bol deiki tarange konum sekamum nengpu, akeca jenkamnunge. Dinino, den bam bol deiki tara sengna gum nengda, pio men jenkamnunge. 45 Dinino, sun mutu neitamai keana tep kunge nimi bo neng cap, keana pel melipra donmangepa, co bo karepkamumnya tep, pel donmasenge neng capda, aKaplemna Kailya kalepmange ngeda, pio men jenkamnunge. 46 Kaplemne Kailya (Paskah) tep, popra kalepkamrum domba bisam, er tu yumada, sun ati pumbon neitamaipu moupra jenkamrume. Ton tarange doupra, bura tara bana pio gume. Tonda, apopra kalepmamum domba bisam, er yo tenpu peda, pio men comtamkamrume.

47 Israel yala nesala yumada, sun adipapu Kaplemne Kailya kalepra jenkamrume. Atumi deikida, tenpu ngebo peda, akailya jenada pio men tamkamrume. Sun Israel nesala yuma, aKaplemna Kailya kalepra jenkamrume. 48 Dinino, sun den bam bol deiki tara sengna gum nengda, ne Allah Yahweh si eremna tep, Kaplemna Kailya kalepmamum jen kecada, pio men jenkamnunge. Dinino, sun mutu neitamai keana tep, sun cap tonpa kuramum nimi bo neng kankan di, tenpu ngebodi, ‘Ne cap, sun cap tonpa, aKaplemna tep kailya jeptepe,’ tenepyopda, er cap, er nyapu cap, angebo er nyapsilip yumada, den bam bol deiki tarange konum sekmumyopda, sun cap kikiman jeptenge. Atep, den bam bol deiki tara sengne nengpu jenkamnunge. Ada, sun den bam bol deiki tara konum sekmum pangeda, nedi aneng tep, ‘Ukutaruda, anengda, sun Israel yala neng sisa, yambulanun utopu konum kununge,’ tenenkamna tepa. Dinino, den bam bol sengna gum nengda, akailya pio men jenkamnunge. Ada pio meme pepsene.

49 Nedi, ‘Ne gispal dona tep, nimi yumada, sun den bam bol deiki tarange sengkamrume,’ pepra deiamsisi upuda, sun Israel yala nesala sisa tep, peipsisinge utopu, sun Israel nesala kankan kikiman kunkameng nimi bo neng peda, utopu kunkamenge. Sun Israel nesala sisa cap, sun damai kunge nesala cap yumadi, aupupu talepra kunkamrume. 50 Ange utopu, ware upu do yuma, ne Allah Yahwehdi, Harun cap, Musa cap tep, “Angeda kunkamrume, angeda pio men kunkamrume,” pepra, deiamsisi upu yumada, sun Israel nesala yuma, aupu moupra gekeprumudi, ‘Teka’ tenen, angepu pio talepra kunkamrume. 51 Lumdongona gume. Kaplemna tep, ila kailya kalepkamrum tumi, Kaplemna Kailya, (tonda er si Paskah) tumida, ne Allah Yahwehdi, ne nyapu sisa Israel nesala yuma, Mesir mutu kuramya neitamai di doupra, dubenamsisi. Atep, sun Israel nesala yumadi, ‘Gume, atumida, Allah Yahwehdi, Mesir mutu neitamai di, nun doupra dubenamseue,’ tenena tep, sun Israel nesala yumada, Kaplemna Kailya tep, kailya kalepmumdi jenkamrume. Angeda pio tep men tamkamrume.