Exodus 13

Menmena deipmenge weni nyapu cap, nena gum roti kwaneng cap tep, “Ukunkamrume,” pepu upu

1Allah Yahwehdi, Musa tep pepu.

2“Sundi deiamrum sal nyapu cap, deipkamrum sal nyapu cap yumada, ne tepapu kareryakankamnerume, Ada sun Israel nesaladi menmena derirum sal nyapu yuma cap, tonda, sundi peirum sapi bisam do, domba bisam do, sundi peirum gam keca yala-yala yuma peda menmena deipre jemnge yumada, ne tepapu tamupra kareryakankamnerume. Ada akeca yumada, nengepu kunkamra cadi, ne tepapu kareryakankamnerume.” Allahdi Musa tep pepu.

3Upepupa, Musa tamupra Israel nesala damai yaudi, aupu yuma Israel nesala sun gekena tep, pepu.

Atumida nun nai bo Allah Yahweh, er buru ila puto deiki di, Mesir mutu ikin weik kuramrumya neitamai di, konum loptapra lyepropseue. Ada, Mesir mutu nesaladi ateng koupdongomseidi, ila ikin pel pio weik, sun nong deiki deriramipa, pio ikin pelpu tali doramrum dinin, Allahdi konum loptapra lyepropseue. Atep nengeda, ‘Atumi deiki di, akeca yuma pio tenenapu kunkamep’ tenen, keteng tamun yuma neitamai di, atumi deiki sundi, ‘Gume nunda Mesir mutu kuramupu taruda, ila ikin pel pio weika di doramupupa, Allah Yahweh er ila puto deiki di, loptapra lyepropseudi duyanamseuada, pio tenenapu kunkamepe’ tenen, kunkamrume. Atep angeda, atumi di pio tenimnapu kunkamrume. Akeca tenimna tep, atumi deiki di, roti kwaneng nena ngeda, pio men jenkamrume. “Allahdi upeipmasere,” pepra, Musadi Israel nesala tep pepu. 4Upepu dingeda, aupu ton pepu.

Atep nengeda, keteng tamun, keteng tamun neitamai yuma dinin, war si Abib war, tanggal satu kepre pangeda, ‘Atumida, ila mambul tumi ace’ pio tenenkamrume. Ada, pumun taru dinin, sun Mesir mutu kuramrumanen, awar neitamai, atumi deiki di, Mesir mutu tapra yanamrum tumi tepa. Atep, atumi kupyopda, ‘Nun Mesir mutu neitamai kuramupkanen, tapra yanamupu tumi kupre,’ tenenkamrume. 5Allah Yahwehdi, sun co puna neng tep, “Kanaan mutuda, Het yala neng cap, Amori yala neng cap, Kanaan yala neng cap, tonda Yebusi yala neng cap, sun yuma kunung mutupu, tek sisi karepkamsene,” pepra, pedina upu deiki di peiamseue. Amutu neitamaida akeca-keca yuma weik akapu mutu cadi, ada, mong mokon cap, sapi bisam moum teyung cap, tonda, pio telep sukun tu cap, akeca-keca yuma weik akapu mutu cadi, “Pio telep mutu ada, tek sisi sun tep karepkamsene,” pepra, pedina upu deiki di peiamseue. Atep amutu neitamai konum wekmumnyopda, aketeng tamun, aketeng tamun yuma, war si Abib war konum kupyopda, tanggal satu deiki sundi, ‘Nunda Mesir mutu kuramupupane, Allah Yahwehdi doupra yanamseu atep, atumida, nun ila mambul tumi ace’ tenen, ila kailya kalepra Allah Yahweh er sipu erepkamrume. 6Atep nengeda, ukunkamrume. Komuni yoneitam bari neitamai yumada, sun adipapu nena gum roti kwanengpu jepra kunkamrume. Dinin, ukuramarumnyanen, yoneitam tumi konum kupre pangeda, Allah Yahweh er tepapu, er si erepra gispal donkamrume. 7Ange utopu, sunda tenpu tumi di dipra, yoneitam tumi neitamai yumada, roti kwaneng nena deiyonge, er sida ragi cap tapakra darameng roti pio men jenkamrume. Tonda ayoneitam tumi neitamai yumada, sun kunkamrum mutu neitamai di, roti nena deiyo keca er si ragi men kuptue. Ada roti kwaneng nenange pe, yuk tali keca, nena deiyo keca, er si ragi tapakra keteneipmenge keca yala-yala yuma peda, sun mutu neitamai pio men kuptue. Ada, Allah er ila tumi ketenemna tep nengeda, roti nena deiyo keca, er sida ragi yumada, gum kupra deiprumupa, ayoneitam tumi neitamai yumada, akeca pio men jenkamrume.

8Ataruda, ton konum damai kupyopda, sundi Allah er si eremena tep kailya kalemamrumupa, sun nyapudi, “Naio, ware keca deiyo tep akunmarum do?” pepra asipsengopda, sundi, sun sal nyapu tep upenkamrume. “Gume, atumida, nun Mesir mutu kuramepupa, nun naibo Allah Yahwehdi, mambul pel konum dopseua deiki di, loptapra lyepropseudi, amutu duyanamseua tep, er si eremna tep kunmapa,” penkamrume. 9Aila tumi deiki pel donkamrumnge yuma tep, ukupmanto deiyo ngeda, nimi kouamenge keca tupa tenena tep, buru deiki cap, aso deiki cap, peten kemdirameng utopu kuna tep kunkamrume. Tonda, ‘Allah Yahwehdi ila puto mambul pel dopseua deiki di, Mesir mutu ikin weik kuramepupa, Allahdi lopra lyepramseudi, amutu duyanamseue,’ tenena tep, apel doprumudi, Allah er si eremne tumi neitamai, Allah tep gispal donkamrume. Tonda Allah Yahwehdi sun Israel nesala tep, “Angeda kunkamrume, angeda pio men kunkamrume,” pepra, deiamseu upu tep, ‘Aupu tupa-tupa tenenapu kunkamep’ tenen, aila tumi deiki di apel donkamrume.

10Ange yuma tep nengeda, keteng tamun, keteng tamun neitamai yumada, Allahdi peipseu tumi kepre pangeda, Abib war, tanggal satu konum kupyopda, Allahdi, ‘Ukunkamrume,’ pepra lap peipseu ngepu tenepra, kailya kalepra jemumdi, Allah er si eremkamrume. Allahdi upeipseua tep, ukunkamepe. Musadi Israel nesala tep lap pepu.

“Menmena weni keca yumada, ne Allah Yahweh tep karenkamnerume,” pepu upu

11Musadi, Israel yala nesala yuma tep pepu.

Allah Yahwehdi, sun cap, sun co puna neng cap yuma tep, “Tek sisi Kanaan mutu dubesenedi, amutu karepkamsene,” pepra pedina upu deiki di peiamseue. Atep nengeda, upeaiamseu mutu konum dubeseredi, karepserepa, amutu wekmumnyopda, amutuda tek sisi sun mutu sisa utopu kupra kunkamruma tep, sundi amutu neitamai kunkamrume keca lap pepkusene. 12Ukupmumdi, Kanaan mutu bena kunkamrum taru yumada, sun menmena deipkamrum sal nyapu yuma cap, tonda sundi peinkamrum gam kure keca yala-yala yuma cap, sapi bisam do, domba bisam do, akeca yumadi menmena weni deipkamre jemnge yumada, Allah Yahweh tep adipapu doupra, tamupra kareryakankamrume. Ada tali tep gume. Aweni keca yumada, Allah Yahweh, erngepu kurura tep pepsene.

13Dinino, keledai bisam menmena weni deipkamre jem ngeda, Allah Yahweh damai kareryakankamruma tep, ketenemna tep nengeda, akeca tep er yo pununa ngeda, jem domba bisam mi menmenange tenpu poprumudi, Allah tep doupra kareryakankamrume. Akeledai bisam yo pununa tep, domba bisam mi men kaprepa, men popmanto kupmumnyopda, adipapu sundi keledai bisam weni ngeda, er kum talepra dukepra tamkamrume. Tonda, sun sal nyapu weni nyapu yumada, sun yo pununa tep, domba bisam mi ton popra, Allah tep kareryakankamrume. Sun sal nyapu weni ngeda, men potamkamrume, adipapu domba bisam mi popkamrumnya deiki di, sun weni nyapu yo punupkamrume. Ukuprumudi, Allah tep kareryakankamrume.

14Ukuramrumupanen, doryankamre taruda, sun nyapudi, “Akurumunge yuma deiyoda, ware keca deiyo tep kurum do?” pepra asipsenge pangeda, sundi tamupra sun nyapu yuma tep upenkamrume. “Gume, angeda nun Mesir mutu neitamai kuramepupa, sun Mesir mutu nengdi ila ikin pel dimamseipa, tali pelpu doramepupanen, Allah Yahweh er buru ila puto deiki loptapseudi, leypra doupra Kanaan mutu duyanamseunge tenimna tep kunupe,” penkamrume. 15Tonda upenkamrume. “Ataruda, Mesir mutu ila nimi deiyo ngebo Firaundi, nun Israel nesala tep, pio dipru balila deipra kuramudi, ‘Sun Israel nesalada, yuk mutu pio men betenge,’ teneramseu. Uteneramseupanen, Allah Yahwehdi, sun Mesir mutu nesala menmena derirami sal nyapu yuma cap, tonda sun domba bisam do, sapi bisam do, sundi peirami keca yumada, menmena deiamu jemnge yumada, Allahdi popra gawal dakamu. Allahdi ukupka tep nengeda, angepu tenepmepedi, nun peiramep keca, weni menmena deiprenge yumada, popmepedi, nun nai Allah tep kareryakanupe. Ange utopu, nun sal nyapu weni deipmenge nge yuma, sun yo pununa tep, domba bisam mi ton popra Allah tep kareryakanupe. 16Ange kunupa deiyoda, Allah Yahwehdi, kuamunge tenena tep kunupe. Ada ukupmanto, nimidi sun kouamenge keca tenena tep, buru deiki cap, aso deiki cap, peten kemdiramengtopu, ‘Nun nai Allahdi ukuamseue,’ tenena tep kunupe. Tonda, ‘Nun Mesir mutu neitamai kuramepupa, Allah Yahaweh er buru ila puto deiki di doupra yanamseue’ tenena tep, ukunupe. Ange ton, sun nyapu yuma tep upenkamrume. Musadi sun Israel nesala tep pepu.

17Mesir mutu ila ngebo Firaundi, Israel nesala tapupa bei. Abei taruda, Filistin nesala kuramyai ban bisida, damai akapu dinin, Allahdi abisi deiki men dubeu. Abisida pio damai bisi dinin, Allahdi tenepu. Sun Israel nengda, ‘Uo, nun podan neng bisipu banmapa tep, nun epsengedi popsunung’ tenen, sun kwar kupyopda, ‘Mesir mutupu tamupra betepe,’ tenepnunge. Allahdi utenepka tep, yuk bisi deiki dubeu.

18Ukupka cadi, Allahdi anesala doupra, telep jen me men kwamupa, nimi men kurami mutu, ila katuai mutu bana tep, abisi ila laut mokon, er si Teberau mokon damai abisipu dubeu. Israel nesaladi, Mesir mutu tapra bei dingeda, ‘Yuk mutu nengdi popsenung’ tenen, sun parang cap, jen cap, mar cap yuma dopra bei. Ada podana ketenemna tep, akeca yuma doupra bei.

19Tonda, Israel nesala Mesir mutu neitamai tupa kurami taruda, Yusupdi er weit bo cap, er du yapu cap tep upepu. “Gume, ne kaele. Amenda taru, Allahdi Israel nesala loptapredi doupra, amutu neitamai di dubenkamra cadi, dubesere taruda, ne yo bekin dopra dubenkamrume. Atep, ‘Tek sisi ange kupkamkepe,’ pepra, pedina upu peipkamnerume. Ada, ne konum depnyopda, ne yo derin bekin dopra, dubenkamrume. Ne yo derin bekin, amutu neitamai tapra bana gume,” pepu.

Men di upepka tep, Israel nesaladi, “Jo ukupkamepe,” pepra pedina upu deipi. Upepya tep nengeda, sun Mesir mutu tapra bei taruda, Musadi Yusup er yo derin bekin doupra dubeu. 20Sun bei taruda, Israel nesala Sukot mutu di taprapidi, mutu si Etam mutu bena, ke taru kuna tep, domba bol opkal di keana dodin ati dopi. Etam mutuda, me pio gumai cadi, nimi men kurami mutu, pio katuai mutu pirimanai kuamu.

21Ataruda, Allahdi ukuramu. ‘Israel nesaladi, nun bankamep bisida ace’ tenen, ‘Betapra kael kepkameng’ tenen, Allah er si Yahwehdi komuni taru, ila dua kan-kan wekudi, aduada sun bankoi bisi menepra beupa, sun amenda tara barami. Lukunda tep nengeda, ‘E, nun bankamep bisai ace, tenepkameng’ tenen, ila uku bu karepudi, uku bu neitamai wekra menepra beupa, adirin deiki sun amenda barami.

22Sun barami taru neitamai yumada, tamna gum dipapu, keteng komuni, sun barami bisi, Allahdi ila dua karepupa, sun baramyaipu baramu. Ange utopu, lukunda yumada, ila uku bu karepupa, sun cap barami. Keteng komuni pe, lukunda peda, pio men tamu.