Exo 14 | XteSC | STEP | Israel nesala bisi bei taruda, Allah er si Yahwehdi Musa tep pepu.

Exodus 14

Firaundi, ‘Israel nesala porbenkun’ tenen, keteneipu upu

1 Israel nesala bisi bei taruda, Allah er si Yahwehdi Musa tep pepu. 2 “Kandi Israel nesala tep pepmempa, ukupkamenge. Israel nesala tamupra bengedi, mutu si Pi-Hahirot mutu bena, keana dodin ati dopkamenge. Ada Mikdol mutu atara, laut mokon ortara, aneitamai di keana dodin ati dopkamenge. Ada laut mokon pirman dinin, mutu si ton Bahal-Sepon mutu ortara, atara neitamaida bena domba bol opkal ati dopkamenge. Ange pepmempa ukupkamenge,” Allahdi Musa tep pepu.

3 Upepudi, aupu ton pepu. “Ukupmengopda, Mesir mutu ila deiyo ngebo Firaundi utenepkamre. Erda, ‘Uda, Israel nesaladi, dan bisi betepe do?’ tenen, wang-wang peprepa, laut mokon ortara, nimi men kungai atara, daneitamaida, bisi tep ergiringmangedi, ‘Orbenap, ayanap kemangedi, embanmangaipu,’ tenepkamre. 4 Ukupmenge taruda, ne Allahdi keteneipnepane, Firaun dipru balila kupredi, sun tep domyankamsere. Dinino, nedi ila ngebo Firaun cap, Mesir nesala yuma cap, sun nong deiki ila ikin keca deipkamne. Tonda, Firaun er jen talen neng weike, ne puto deiki di popne pangeda, nimi yumadi ne Yahweh tep, ‘Uo ila mambul ngebo kurure’ tenen, kael kepkamnenge.” Allah er si Yahwehdi upepupa, sun Israel nengdi ange peputopu ukupra bendopi.

5 Firaun er mutu nengdi, “Israel nesala benmange,” pepipa, Firaun cap, er nyapu cap gekepidi, mali kange douprapidi, kange di ton cap tenipetepidi, aupu pepi, “Gume, nun ware kupmap do? Nundi warya tep tapmapa, nun pel tali dona nesala, Israel nesala yuma bendopmang do? Ukutaruda ware kupkup do?” pepi. 6 Upepi dingeda, Firaundi peipupa, er nyapsilipdi, er kuda bisam gipra, tu deiki ban keca, er sida kereta kuda keteneipi. Tonda, er jen talena deiyo neng cap, er nyapu sun jen neng cap, ketenepra tapakrapudi, dubeu.

7 Ukupidi sun kuda bisam gipra, tu deiki bana tep, bungna keca pio telepnge enam ratus kereta kuda (600) keteneipi. Tonda, akecapu dinin, Mesir mutu tu deiki ban keca yuknge cap yuma keteneipi. Tonda, akeca deiyo neng ton keteneipipa, dubeu. 8 Ukupya peda, Israel nesaladi, ‘Amutu tapra bisi neitamaipu bena sekronkamap’ tenen, kwar gum dipapu banmai. Sun banmai taruda, Allah er si Yahwehdi karepupa, Firaun er dipru balila kupudi, ‘Israel neng men tapkune,’ tenepudi, kange mun kwamunge yuma tenepra men kael kepudi, ‘Israel neng tomopkun’ tenen, dombeu.

9 Ange tep nengeda, Firaun cap, Mesir mutu jen talen neng cap, sun kuda cap, tonda buknedi tu deiki bana keca kereta kuda cap, tonda kuda bali tara bukra embanmai neng cap ketenepra, Israel nesala amenda tara di dombei. Banmaiyane, Israel nesala laut mokon pirmanai, mutu si Pi-Hahirot mutu damai dinin, dumsisi Bahal-Sepon mutu bena, keana dodin ati dopra wekmaiyaipu epi. 10 Dombanmai pangeda, Israel nesalada Firaun cap, er jen talen neng weika di amenda tara yakaipa epidi, kware weik kupupa ila di, “Uo, Nun Nai Allah, Nun Nai Allah, Yahweh lyepseo,” pepra mali penmai. 11 Sun kware weik kupka tep, Israel nesaladi Musa tep pepi. “Warya tep, Mesir mutu neitamai di dopra, nesala men kunge mutu neitamai duyanmaserem do? Yakaramepyanen, amutu depkup do? Mesir mutuda depmatepepa, Mesir mutu neitamaipu men peipsetenge do? Mesir mutu neitamai, nimi palinai go men kwamnga tep, amutu duyanmaserem do? Atep kandi dekaramsemumpa, yakapyanen amutu depkupe. Ada, kan peramsemuma deiki di yakaramka depkup do? ‘Ware kupkamser do?’ pepkepe,” pepra, mali penmai. Upepi dingeda, aupu ton pepi.

12 “Pumun taru, nun Mesir mutu kuramupu taru di pepmupu ngeda konuma. “Konum kupre, nun mali kange doupmepe. Atep, kan nun ton cap dumna gume. Mesir nesala sun pel melimne nengpu kutepe, dakwapye,” pepmepu. Telep ngeda, Mesir nesala sun tali pel don neng kunmatepe dinin, kandi duyanmaserempa, nimi men kunge mutu neitamai depkamepada, mambul weik kupsere. Uo, warya tep do?” pepi.

13 Upepipa, Musadi tamupra sun tep pepu. “Sun kwar dangna gum di, sun tekmumdi dinkurume. Atumida, Allah er si Yahwehdi sun lyemna tep kupkur keca epra kael kepkurume. Ange tep nengeda, sundi Mesir nesala atumi epmarumada, sundi yuk taru ton cap men epkamrume. Yuma depkameng ja,” pepu. 14 “Allah er si Yahwehdi sun tep, Mesir nesala yuma popra bisbisa kapkamare. Er dipu akeca yuma kudiserura tep, sundi ware tenepra kuptum do? Gum tep, sundi dimpepra dinapu kunkurume.” Musadi Israel nesala tep pepu.

Ila laut mokon goupra bei upu

15 Allah er si Yahwehdi Musa tep pepu. “Kan ware deiyo keca tep, upu ila di ne tep penmanerem do? Kandi Israel nesala tep pepmempa, banapu kunkamenge. 16 Ange tep nengeda, kan doupmum maca dopra, me deiki bupukmempa, laut mokon cepra dana-dana kepropredi, tu kalkal peprepa, anesala akalkal pepreya deiki bendopkamenge.

17 Ukupne dingeda, ‘Mesir nesala balila kupredi, Israel nesala benkunge bisipu amenda bankup’ tenen, ne Allahdi karepnepa, sun dipru gat kuprepa, men kael kepmengedi, laut mokon neitam bisipu benkunge. Sun bengopra, nedi wenepra poptapkamane. Ada nedi ila ngebo Firaun cap, er jen talen neng cap, er kuda gipra tu deiki ban keca, kereta kuda cap, akeca deiki bukra yanmang neng cap, ne puto deiki di popkamne. Konum popnyopda, amenda taru yuk nesala yuma gekepmengedi, ne si erepra, ‘Uo Allahda pio mambule,’ pepkamnenge,” Allahdi pepu.

18 “Firaun cap, er jen talena neng cap, er kuda gipra tu deiki ban keca, kereta kuda cap, kuda deiki bukra yanmang neng cap, yuma popkamane. Aneng yuma popkaman deiki di, Mesir nesala yuma gekepmengedi, ‘Uo, Allah er si Yahwehda, Ila Deiyo Ngebo tek sisa kurure,’ tenepkamnenge.” Allahdi pepu.

19 Ange konum pepu dingeda, Israel nesala ban bisi urasin tara baramu malaikat, Allahdi dokotemu malaikatda, mepropu. Allah er malaikat mepropudi, Israel nesala banmanga amnyo tara kepbaramupa, sun mepra benmai. Ange utopu, ila dua sun urasin tara mepra baramu ngeda, goprapudi sun amnyo tara kepra banmau. Atep, Allah er malaikat cap, ila dua capda, Israel nesala sun amnyo tara yan kikipra lelipra tekreipa, banmai. Ukupupa, Israel nesala mepra banmai.

20 Ange tep nengeda, Mesir mutu jen talen neng ortara banmai dinin, adua cap, amalaikat cap, neitamai tekmareipa baramya tep, Israel nesala atara banmai ngeda, Mesir nesala amenda tara yakanmaidi men epmai. Alukunda neitamai yumada, Israel neng pe, Mesir neng pe barami dinin, men epdanmanto kurami. Mesir mutu neng barami tarada, ipropudi kunukupa, men epdanmanto kupmai dinin, Israel nesala banmai tarada, dirin weik kupupa, dinmaidi banmai. Alukunda neitamai yumada men antapi.

21 Uda, Musadi er buru laut mokon deiki bupukupa, Allah er si Yahwehdi, er puto deiki, ila kumanya karepupa, puto weik keteng yakan tara di pupra, laut mokon deiki yau. Yaudi alukunda neitamai yuma punmaupane, amokon dikemdon, du kemdon kupu. Laut mokon neitam bisaida, mokon cepropudi tu kalkal pepu. 22 Ukupudi ila laut mokon neitamai di bokra, dana-dana tengbenmau. Ukupu taruda, tu kalkal pepka deiki, Israel nesala yanipra bei.

23 Ukunmaipa, Mesir mutu jen talen nesala yuma, kuda bungna keca deiki bukrapidi, Israel nesala domyakanmai. Ada Firaun er kuda deiki bukra banmai neng cap, kudadi gipra tu deiki ban kereta, adeiki bukra banmai neng cap, er kuda deiki bukra yakanmai neng cap, anesala yumada, laut mokon cepropmau bisaipu yana wekidi, ‘Israel nesala tomopra popkup’ tenen, dombei. 24 Konum berekou taruda, Allah er si Yahwehdi ila uku bu cap, dua cap neitamai di, Mesir mutu podana neng banmaiyai epudi, kange wang-wang pena deiyo keca karepupa, sun yuma kange wang-wang pepupa, kange tenimtonapu kunmai.

25 Tonda Allahdi karepupa, Mesir nesala sun kuda bisam deiki bukra embarami keca, yan yuma bental pumbon wekudi, bendi talepupa, yane lukda pepra saku. Saku pangeda, sun tu deiki embana keca yuma ikin kupudi, men benmanto kupupa, Mesir nesaladi pepi. “Nun kange mun kupsere. Allah er si Yahwehdi, ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} ‘Ne nyapudi Mesir nesala popbisipkunge’ tenen, Israel nesala tep melipmare. Atep, Israel neng benmangai tapra, pio yukai betepe. Aneng acapu tapra bendoptepe,” pepra mali penmai.

26 Ataru Allah er si Yahwehdi Musa tep pepu. “Kan buru di laut mokon deiki bupukmempa, mokon dan-dana kepmara tamupredi, Mesir mutu jen talen neng cap, kuda deiki bukra yakanmang neng cap, kuda gipra tu deiki embanmang keca cap, ayuma antapdongopra popkure,” pepu. 27 Upepupa, Musa er buru laut mokon deiki bupukra deipupa, bereng tamne taru di, Mesir nesala bena wekmaiyai, alaut mokon me yuma tamupra, neitam bisipu yau. Yaudi Mesir nesala amokon neitamai sepdara baipa, Allah er si Yahwehdi mokon neitamai di getepdongopra popu.

28 Atarupu ila laut mokon tamupudi, Mesir mutu jen talen neng cap, kuda deiki bukra yakanmai neng cap, Mesir mutu ila ngebo Firaun cap, Israel neng tep dombei neng yuma, laut mokon neitamai depi. Mokon neitamai di getepdongopra popupa, tenpu ngebo peda, gam men kupu. Yuma depi.

29 Dinino, Allah er puto di karepupa, ila laut mokon dan-dana kepra dumsisi tara cap, tebalal tara cap, cepropudi tengbena kalekupa, tu kalkal pepmaua deiki, Israel nesala aneitam bisipu bei. 30 Atumi neitamaida, Allah er si Yahwehdi Israel nesala lyepra deipu. Ada, Mesir nesala talepra kuramya neitamai cap, tonda Mesir mutu jen talen nengdi, ‘Israel nesala tomopra popkupe,’ tenepinge cap, neitamai di lyepropu. Tonda, Mesir nesala laut mokon neitamai depmaipa, sun nong laut mokon pirman kupmai ngeda, Israel nesaladi epi.

31 Ange tep nengeda, Allah er si Yahwehdi, er ila puto deiki di Mesir nesala popmare ngeda, Israel nesaladi epi. Epya deiki di, ‘Uo, tek sisi Allah erda ila puto weik ngebo’ tenen, kael kepidi, Yahweh tep kware weik kupu. Kware weik kupupa, Allah er si Yahweh cap, Allah er pel dona deiyo ngebo Musa cap tep, teka tenepidi gispal dopi.