Exodus 15

Allahdi Mesir nesala popupa, Musa cap Israel nesala cap, Allah er si Yahweh erepra mut penmai upu

1Allahdi Mesir mutu jen talen neng popu pangeda, Musa cap, Israel nesala cap, Allah er si Yahweh tep, kange deipra gudin mut penmai. Sun penmai upuda, ake.
Nun nai bo Allah, er si Yahweh tep, er si erepra mut penkamepe.
Allah er puto weik kupredi, akeca-keca deiki tara kurura tep, er si erepra mut penkamepe. Mesir mutu jen talen neng cap, sun kuda deiki bukra embarami kuda cap, Allahdi dopra, ila laut mokon neitamai dokotepupa, mokon di jepropu. Jepropupa, sun yuma depi.
2Allah er si Yahweh, erda ila puto ngebo cadi, ne kange dipru er deikipu derinune. Erdi Mesir mutu neitamai di, nun doupra lyepmasera tep, nedi Allah er si erepra gispal donune. Nun Nai Allah kurura tep, kange deipra mut pepra si eremkamne.
Erda nun Nai Allah, erpu kurura tep, er si erenupe. Erda nun apu yapu tep, kalekra pio meliamnga cadi, er tep gispal dopra er si eremnupe.
3Nun nai Yahweh, erda mar podana ila deiyo ngebo utopu kurure. Allah erda tenpua, er sida Yahweh kurure.
4Nun Nai Allah erdi, Firaun er jen talen neng cap, er kuda gipra tu deiki bukra emban keca cap, deiyo neng cap yuma dopra, ila laut mokon pumbon dongopra popmare.
Firaun er jen talena deiyo neng, pio telepnge yumada, ila laut mokon getepdongopra popupa, mokon jepra gawal daku.
5Yuk nesaladi ila gel dopra mokon pumbon dokotepmengepa, ikin di mokon neitamai dourbaramretopu, Mesir mutu sun jen talen neng, deiyo neng weike, mokon pumbon wekipa mokon jepropu.
6Nun Nai Yahweh, aneng popmaumum tarada, kan buru dumsisi tara pio puto weik kupka cadi, teleppu kurume. Allah kan buru dumsisi tara di, podan neng tep poptapmarem ngeda, ila mambule.
7Kanda pio ila puto deiyo ngebo, tonda pio mambul ngebo kurema deiki di, ‘Er tep bisbisa poptepe,’ teneramkei neng yumada, kan puda, porbisina ngebo kurume.
Ila uku bu di manmaneng cap, akeca-keca yuma cap, jedoramretopu, kan yu kupkeupa adeiki di, Mesir mutu jen talen neng weike poptapmume.
8Kan si puto di, ila laut mokon pung pepmumpa, ame mokon yuma cepra welepudi, dana-dana tengbeu. Dana-dana tara keproudi, tengbeupa, ati dela gat kuramreto kupu.
Ada laut mokon me neitamai dinin, gatpu kupu. Ukupupa nun aneitam bisipu yapu.
9Mesir mutu podan nengdi utenepsei. ‘Domyapedi bena talepdongopra popkupe. Popmepedi, sun keca yuma dopropmepedi, bokra karepdankamepe. Ukupmepedi akeca-keca yuma weika di dopropkamepe,’ tenepsei.
Tonda utenepi, ‘Anesala yuma nun parang ya di poptapkamepe. Nun parang ya di popra, gawal dakamepepa, yuma depkamenge,’ tenepsei.
10Utenepsei dinin, kandi ila kumanya puto pung pepmumpa, ila laut mokon di anesala antapdongopudi jepropu.
Ukupupa, ikin keca, besi keca getepdongopra mokon dongopmengepa, ila laut pumbon wengdongoramretopu, anesala yuma mokon wekipa, mokon jepropu.
11Ware ngebo do? Nimidi, ‘Akecada Allah utopu,’ tenepmengedi, yuk keca si eremenge nge yumada, kan Yahweh kuruma utopu men kuptenge.
Kan kurumatopu, yuk isok, sun pe puto deiki di men kuptenge. Tonda yuk neng yumada, kan kuruma utopu men kununge.
Kan tenpupuda, pio dumsisipu kurume. Pio teleppu kurume. Pio lek ngebo, dirine weik ngebo kumemdi, nimi men kupmanto keca, mambul pel, kunupsek pen pel weik dorume. Ware keca do yuma, kan kumemnya utopu men kununge.
12Kan dumsisi buru bupukmumpa, tuai mutu bongopra dana-dana kepropupa, podan neng yuma abon wekroipa, jepropu.
13Kandi, ‘Anengda ne mawa nesala’ tenen, weiamsemumdi, loptapra lyepsemum nesala, pio bicau tenepra tupa melimserume. Pio men tamserume. Ukumemdi, ‘Tek sisi bisi ace,’ pepra, doupra yakarasemumanen, ukutaru peda dubenkamsereme.
Tonda anesalada, kan puto deiki di pio melimkamrume. Kandi anesala doupra baramumnyane, kandi sun tep keteneiamum mutu, kan kumemyai, mali keca pio men kururai, pio telepaipu deribenkamserume.
14Ukupmem pangeda, nesala mutu-mutu yuma gekepmengedi, kware tep moropsepkamenge. Filistin mutu nengdi, mambul kange doupkamenge.
15Tonda, Edom mutu deiyo nengda, kware weik kuprepa moropsepkamenge. Moab mutu deiyo neng peda, kware tep moropsepkamenge. Tonda, kan tep kware kuprepa, sun Kanaan mutu nesalada, sun dipru kange bounpu kuprepa bendopkamenge.
16Sun yumadi, ‘Uo ware kupkamser do?’ tenen, kware weik kuprepa, kange mun kunkamenge. Allah Yahweh, kan ila puto deiki di, kware dangmengedi, gel tali dimpepra bungamretopu, kunkamenge.
Ada, Allah Yahwehdi anuamu nesala, sun bisipra banmanganen, amutu neitamai benkameng taru, yan dopmenge taru yumada, yuk mali neng yuma porterena gum dinin, gel ikin kuramretopu, tali dimpeprappu bukamenge.
17Allah Yahweh, kandi Israel neng tep anuamumdi, ‘Ne kunkamnai, amutupu bena telep kupra kunkamenge,’ teneramumtopu, Israel nesala doupra dubememdi, kan pe mutu deiki amutara deipmempa, acapu kunkamenge.
Naio, kanda akeca-keca yuma talepra, ila puto weik ngebo kuruma cadi, amutuda, pio telep mutu, kan pe buru di keteneipmum mutu, anesala dopra, dubena deipmempa, sunda amutu neitamai di ati dopra kunkamenge.
18Nun Nai kan si Yahweh, kanda akeca-keca yuma talepra, pio ila deiyo ngebodi kunkamremada, men gum kupkamre.
Kanda akeca-keca yuma talepra, doryankamre taru yuma neitamai di, Raja pio kunkamreme.

Miryamdi gonga kepra, Allah si eremna mut penmai upu

19Ataruda, ila laut mokon cepropudi, laut mokon neitamai di tu bokropudi, tu kalkal pepkaipu, Israel nesala goupra bei dinin, Mesir mutu deiyo ngebo Firaun cap, er jen talena deiyo neng cap, kuda deiki bukra embarami neng cap, kuda gipra tu deiki embaramu keca, kuda kereta cap yumada, ‘Tu kalkal pemu bisi deiki bankup’ tenen, bandenkap, bisi neitamai banmai. Banmaipa, Allah er si Yahwehdi tenepra karepupa, me mokon dana-dana tara tekra deipu ngeda, ka tamupra sun banmai bisipu me antapdongopra popudi, me jepu. Jepropupa, sun yuma depi. Mesir mutu neng yuma depi dinin, Israel nesalada, tali kange doupra, kalkal pemu bisipu yanipra beipa, telep kupi.

20Ange yuma kupupa, atep ngeda tenpu ner, er si Miryamdi mut pepu. Allahdi lap peramupa, Miryam gekeramudi, Allah er upu lap pena ner kuramu. Miryamda, Harun er du ner kuramu. Erdi gonga kepra, lelim pen keca, er sida rebana douprapudi, buru di bongopra mut mepra penmaupa, Israel nerapu yuma kange deipra mut penmai. Sun yumadi rebana keca dopra, buru di bongoprapidi, mut penmai.

21Miryamdi gonga kepmaupa, sun penmai mutda ake.
“Nun nai bo Allah, er si Yahweh tep, er si erepra mut penkamepe. Allah er puto weik kupredi, akeca-keca deiki tara kurura tep, er si erepra mut penkamepe. Mesir mutu jen talen neng cap, sun kuda deiki bukra embarami kuda cap, Allahdi dopra, ila laut mokon neitamai dokotepupa, mokon di jepropu. Jepropupa, sun yuma depi,” penmai.

Mutu si Elim cap, Mara cap neitamai di, Allahdi yu me telep kupra deipu upu

22Ange yuma ukupi pangeda, Musadi Israel nesala doupra, ila laut mokon Teberau pirman tara tapra, ila katuai mutu neitamai bisi banmaiyanen, me gumai tep, nimi kuna gum mutu, Syur mutu bena weki. Tonda, amutu neitamaida, mo pio men cemrura tep, Israel nesaladi komuni weneri deike, amutu neitamai embanmaipane, me gum tep, epetepra embei dinin, me pio tenpu pe menepi.

23Ukupi dingeda, amenda taru mutu si ton, Mara mutu neitamai wengbeidi, yambul me mokon epi dinin, amutu kwamu me mokonda, pio yu tep men jepmanto kupi. Amutu kwamu me yumada, sisilyapu kuamupa, men jepmanto kupi. Amutuda, yu mepu kupka tep, ataru di gonga kepra, amutu er si Mara mutu pepi. Israel nesala sun Ibrani upu deikida, Mara pepya deiyoda, ada ‘Yu me kure mutu,’ tenena tep pepi. 24Ange tep nengeda, Israel nesaladi men jepmanto yu me tep, pio ila di mali penmaidi, Musa tep pepi. “Nun ware kupra ame jeptepe do?” pepra mali penmai.

25Mali penmai pangeda, Musadi mambul kange doupra, engepudi Allah er si Yahweh tep moropupa, Yahwehdi Musa tep, co balana tenpu benbenepudi, karepu. Aco karepudi pepu. “Kan doupmum co, me mokon pumbon dongopra doropmempa, ameda telep kupkure.” Upepupa, Musa aco dopra, ame neitamai dongopupa, ameda pio telep kupu. Ukupupa, sun yuma ame jepi. Jepipa, ataruda Allah er si Yahwehdi, sun kupbankaminge tep, mambul upu pepra deipu. Ada, ‘Ukupkamrume,’ pepra deipu upu tepa. Tonda, Yahwehdi anesala tep kurpeten upu ton karepu.

26Ataruda, Allah, er si Yahwehdi Israel nesala tep aupu pepu. “Sunda ne Yahwehdi pepkusen keca yumada, pio kunkamrume. Ada nedi pesenun upu moupra gekeprumdi, ne tenenetopu dumsisipu kupkamrume. Ada, nedi sun tep, ‘Angeda ukunkamrume, telep kunkamrum ngeda ake,’ pepra deipnedi, karesenun upu yuma, moupra gekepra dombankamrume. Ange utopu nedi sun tep, ‘Angeda men kunkamrume’ pesenun upu mem upu yuma gekeprumudi, ange yuma men kuprumnyopda, nedi makunkamsene.

Ada, Mesir nesala sun pona tep, ila kange mun keca cap, pu deiyo keca cap karepsitopu, sun Israel nesala tep nengeda, pio men karepkamsene. Apu yala-yala yuma men jepkamsere. Ada neda sun ila nimi deiyo ngebo, Allah kununa tep, ne Yahwehdi sun tep kwetepsenedi, lyepra gam bukra deipkamsene,” Allah er si Yahwehdi Israel nesala tep pepra deipu.

27Ukupra konum pepkopda, sun ka tamupra bisi banmaiyanen, tenpu mutu ton, mutu si Elim mutu wengbei. Amutu neitamaida, me bungna amul di utara (12) kwamu. Tonda, co sida korma co, denge weike yoneitam bari (70) tekamo. Atep nengeda, me kwamnga damai, acapu sun keana dodin ati bena dopra kunmai.