Exo 16 | XteSC | STEP | Elim mutu dakuramyane, amenda taru war butenenge neitam dinin, Mesir mutu taprapi taru di nukra, war tenpu deiki di embaramipa, war butene tanggal lima belas (15) konum kupkopda, atumida Elim mutu tapra, nimi men kurami mutu neitamai, mutu si Sin mutu wengbei. Sin mutuda, Elim mutu atara, Sinai mutu ortara, aneitamai kupke.

Exodus 16

Allahdi Israel nesala tep, jen keca cap, ma cap karepu upu

1 Elim mutu dakuramyane, amenda taru war butenenge neitam dinin, Mesir mutu taprapi taru di nukra, war tenpu deiki di embaramipa, war butene tanggal lima belas (15) konum kupkopda, atumida Elim mutu tapra, nimi men kurami mutu neitamai, mutu si Sin mutu wengbei. Sin mutuda, Elim mutu atara, Sinai mutu ortara, aneitamai kupke.

2 Amutu neitamaida, me cap, akeca-keca yuma cap men kwamupa, nimi men kurami mutu cadi, Israel nesala amutu neitamai embaramidi kurami taruda, Israel nesaladi Musa cap, Harun cap tep, jen keca putaramupa, ila di mali perami. 3 Sundi penmai ngeda ake. “Nun tupa Mesir mutupu kuramepu taruda, Allah er si Yahwehdi konum dapopsetue. Mesir mutu kuramepu taruda, jen keca weik kupka cadi, tu keca weik gapra, tali kange doupra lukra jeramepudi, nun putaramseutopu, weika di roti kwaneng cap, akeca yala-yala yuma cap jepra teleppu kuramepu. Mesir mutu ukupra kuramepu dinin, kandi warya tep amali mutu doupra yasemum do? Jen putana deiki di depkamep do?” pepi.

4 Upepra mali penmaipa, Allah er si Yahwehdi Musa tep pepu. “Tek sisa pepne. Im deiki jen keca, er sida mana kwaneng, ne im deiki di mo puru utopu kupra dokotepkamane. Ukupnepa, sun Israel nesala yumadi, tenpu tumipu jenkameng nge tep, bulupra tenpuai deipmengedi jenkamarume. Ukupkamana deiki di, kupetepkamsene. Ada, ‘Israel nesaladi ne pene upu gekepmengedi, apepmantopu kunkameng do, gum do?’ tenen, dipetepnedi kupetepkamasene.

5 Atep, yuk tumi-tumi yumada, tenpu tumingepu bupkamenge. Dinino, ngangtan tumi di jen keca ue butene tumi deiki jenkameng ngeda, bupra deipmengedi jenkamange. Yoneitam bari tumi deiki men bupkamenga tepa.” Allahdi pepu.

6 Allahdi upepka tep nengeda, ataruda Musa cap, Harun capdi, Israel nesala yuma tep peprei.

Atumi sintarada, ‘Allahdi mambul pel dopserepa, sundi, tek sisi, nun nai Allah Yahwehdi, Mesir mutu di doupra, yakaramseu’ tenen, kael kepkamarume.

7 Ange utopu, ambutumi ipnada, sun damai Allah er si Yahwehdi, er puto deiki kupkamar keca kuprepa epmum dingeda, ‘Uo Allahda tek sisi mambule,’ tenenkamarume. Sundi Allah tep derepra mali perumpa, Allah gekeserura tep, er puto deiki di pel dopkamasere. Ne cap, Harun capda, nun buteneda mambul weik neng guma tep, mali pedinmaserumdi deremaserum ngeda, warya tep do? Mali pendinmaserumdi deremaserum ngeda, tek sisi Yahweh tep penmaruma.

8 Sundi Allah tep mali penmarumnge konum gekepmasera tep, Allahdi sintara tu keca karepkamaserenge cap, ipna taru im deiki mana kwaneng karepkamaserenge cap, epmumnyopda, ‘E teka, Allah er si Yahweh, er dipu akeca karepsere’ tenen, kael kepmumdi dipru boun kunkamrume. Sundi ne cap Harun cap tep, mali-mali pepra deremsemum ngeda, warya tep do? Nun buteneda mambul neng gume. Tek sisa sundi Yahweh tep mali penmarume. Nun tep guma. Musadi Israel nesala tep pepu.

9 Upepu dingeda, Musadi Harun tep pepu. “Kandi Israel nesala gekenai pepkurume. Sundi mali penmarum ngeda, Allahdi konum gekepmasera tep, adipapu Allah er si Yahweh damai yana bulupkamarume.” Musadi Harun tep pepu. 10 Upepupa, Harundi anesala upupupa yai pangeda, Harundi er upu Israel nesala yuma tep tupa penmau taruda, sun yumadi nimi men kurami mutu, katuai mutu tara tamupra dinmaipa, ila dua neitamai, dato-dato di Allah er si Yahweh, er dirine weika di kupupa epi. 11 Ataru dipapu, Yahwehdi Musa tep pepu. 12 “Israel nesala sundi kange mun kange doupra, mali penmang ngeda, nedi konum gekepmane. Atep kandi, sun Israel nesala tep, upepkurume. Atumi sintarada, tu keca karepnepa jenkamarume. Tonda, mapmamumnya ipna taruda, im deiki kwaneng, er sida mana karepnepa, jenmarumpane, boupkamasere. Ukupmumnyopda, adeiki di, ‘E tek sisa, Allah erda nun Nai Yahweh, nun Ila Deiyo ngebo kuserure,’ tenepra kael kemkamnerume,” Allah er si Yahwehdi pepu.

13 Upepu dingeda apepmautopu, idona taru Allahdi dokotepupa, im deiki di kipnge ma utopu ma, weika di yaipa, sun ati dana-dana tara yuma wekipa diniku. Mapmaiya ipna taruda, Allahdi mo puru utopu keca karepupa, sun ati yuma ongopgenepu. 14 Ukupu pangeda, amo puru keteng bupu di teng-teng pepudi, beleka embanmaudi, mo puru sangmaupa, akatuai mutu tu deiki, me silong kururamretopu kurun keca tuai yuma buku. Akecada, es kamo utopu kurupu.

15 Ukupupa, Israel nesala epi dinin, sun walwal tep, “Akecada ware keca do?” pepra, sun pepu asipdanen embanmai. Upenmaipa, Musadi sun tep pepu. “Akecada, Allah er si Yahwehdi sun jena tep, im deiki di roti utopu keca, er sida mana karepmaser keca adano,” pepu. 16 “Allah er si Yahwehdi, ‘Angeda ukupkurume,’ pepmaserada ake. Sun yuk-yuk kuramrumutopu, akeca yuma bulupra, sun putaseretopu dopra deipmumdi, tenpu ngeboda, liter peramengeda weneri cap, neitamainge cap (3.5) liter dopra jepkurume. Ada, tiga setengah liter per orang nimi nukra jepkurume.” Musadi pepu.

17 Upeputopu, Israel nesaladi yuk-yuk bulupra deipi. Sun yuk-yuk akuramitopu nukra bulupya tep, ton ila gung nengda weika di deipi. Ton metek gung nengda, yambula dipu bulupra deipi. 18 Ange tep nengeda, akeca weika di bulupra deipi nesalada, weike men kupka tep, kwal men deipi. Tonda yambula di bulupra deipi nesala peda, yambul kupka peda men suktalepu. Aneng-aneng yuma, sun putaramutopu bulupra deiya jeramipa, ton cap men putaramu. Ada Allahdi peiputopu, tenpu ngebo ikine butenenge bulupra kipdeipidi nukiya tepa.

19 Musadi sun anesala tep pepu. “Ware nesala do yuma, ajen keca konum jeprumnyopda, tenpu ngebo peda yambulanun ton kwal men deipkamarume. ‘Atumi bulupmanyeda, kwal deipmanya ipna taru ton jepkaman’ tenena gume,” pepu. 20 Upepu dinin, ton nengda Musa pepu upu men gekepidi, balila kupra akecada jenmaiyanen, tapi ngeda, kwal deipmai. Kwal deipmaipa lyupudi, ipna taru tong belepu. Tong belepudi ku pio weik kupu. Ukupupa, Musadi sun anesala tep derepu.

21 Atumi-atumi yuma ipna taruda, sun putapnetopu, akeca bulupra derirami. Bulupi dinin, keteng bupu di teng-teng pepnedi, belekra embaramudi sangdoramu. 22 Ngangtan tumida, kwaneng ue butene taru jenange tep, bulupra deipi ngeda, tenpu ngebo ikine dumbari kipra deipi. Ukupipa, sun Israel deiyo nengdi yana, Musa gekena tep lap pepipa, kael kepu.

23 Ange tep nengeda, ngangtan tumi di, Musadi sun anesala tep pepu. “Angeda Allah er si Yahwehdi pepra deipmasere. Ambutumi yoneitam bari tumida, pel yala-yala yuma men dopkamarume. Ambutumida yuk wepra, beipye peingna tumi kupkamasere. Ada Allah Yahweh, er si eremna tumi tep, wepra keteneipmumdi, dumsisipu kunkamrume.

Atumida, Yahweh er gispal dona tep, ketenem dinkamrume. Ambutumi, yoneitam tumi pel men dopkamruma cadi, atumida sundi, ‘Akwaneng dapra jepkaman,’ tenepmumnyopda, telepe pua. ‘Atumi di me bupu di gapkup,’ tenepmumnyopda, ada telepe pua. Konum jepmamumnya, kwal tupa deipmamumnyopda, ambutumi ipna jena telepe pua,” Musadi pepu. 24 Upepupa Musadi peipmautopu, sundi jen keca jenmaiyanen, weik kupupa tupa tapi ngeda, ambutumi yoneitam tuminge tep, kwal deipi. Sundi kwal deipi ngeda, yoneitam bari tumi jepkami ngeda, tong men pepudi, ku men kupu. Teleppu kupu.

25 Atumipuda, Musadi adipapu dukdongopra pepu. “Ambutumi jen keca bulupmarum ngeda, atumi yoneitam tumi dipapu yuma jenkamarume. Atumida Allah Yahweh, er ila mambul tumi, Sabat tumi kupsere. Atumi deiki, Allah er gispal dona tep, beipye peingna tumi tep, sundi Allah er si erepra kunkamrume. Tonda, ‘Jen keca bura tara tupa akapmar do?’ tenen, dipetepmumnyopda, men epkamarume. Yoneitam bari tumi deikida, im di sangamre kwaneng, er si mana men kupkamara tepa.

26 Yuk-yuk tumi neitamai, ngangtan tumi deiki di jen keca yuma kiprapmumdi, bulupra ati deiki derinkamrum dinin, Yoneitam tumida, beipye peingna tumi kupkamasera tep, atumida jen keca tenpunge pe men karepkamsere,” Musadi pepu.

27 Upepu dinin, ton nengda, yoneitam tumi deiki bura embanmaidi, ‘Jen keca akapmar do, gum do? Akapyopda bulupkamape’ tenen, epterepra embenmai dinin, pio menepi. 28 Dipterepidi, men epipa, Allah er si Yahwehdi Musa tep pepu. “Uda, ‘Yoneitam tumi akeca erbana gume,’ konum pepsisi dinin, ware kuprap taru ton nedi, ‘Angeda ukunkamrume, angeda men kunkamrume,’ pepra derisene upu yuma tep, sundi gekeptapra tali kange doupra kunkamnurum do?

29 Ange tep nengeda, sundi pio moupra tenepkamrume. Allah er si Yahwehdi, beipye peingna tumi sun tep konum keteneipmasere. Atep ue ngangtan tumi deikida, nedi jen keca karesene ngeda, ue butene deiki jenkamarumnge karesenune. Ada, yoneitam bari tumi jenge tepa. Akonuma. Yoneitam tumida, anesala bura tara tenpu ton pio embana gume. Atipu bepe peikrap kunkamrume,” Allahdi pepu. 30 Allahdi upepka tep nengeda, ayoneitam tumi, ayoneitam tumi neitamai yumada, pel pio men doramidi, bepe peingnapu kurami.

31 Allahdi akeca mana kwanengda, co kait utopu keca karepupa, sun Israel nesaladi, ‘Akeca er sida mana kurure’ perami. Akurun kecada, tomat du utopu pio metek kupu. Tonda, mong mokon jepmengepa, tau peramretopu keca kupu. 32 Tonda, Musadi pepu. “Allah er si Yahwehdi upepseu. Akwaneng keca, er sida mana bupra, liter peramengeda weneri cap, neitamainge cap (3.5) liter kiprapmumdi, mawa deipkurume. ^{▼▼Liter sekmepu dinin, Ibrani upu deiki di, ‘omer’ seki. Tenpu omerda, ada 3.6 liter utopu kuamu.} Telepai deipmumnyopda, dapio kunkamre.

Ada, amenda doryankamre taru neitamaida, mana keca deipmarumpa, sundi deiprumupa dadeipdanen, bankameng nesala yumada, sun pedi akeca diryakanmenge. Ada Mesir mutu neitamai, nedi loptapra duyasisi taru, katuai mutu neitamai di mana kwaneng karepsipa, jenmarum ngeda, sun nyapu yuma kael kepkamenga tep, pepsene,” Allahdi pepu.

33 Allahdi upepka tep nengeda, Musadi Harun tep pepu. “Kandi yangdin keca doprapmemdi, apumbonda mana kwaneng dua liter bulupra, akeca pumbon dongopkurume. Konum dongopmem dingeda, buplan dekdongopra, Allah er si Yahweh, er dinai deipkamrume. Ukupkamruma deiyoda, ada doryankamre taru neitamai yumada, nundi deipmepepa dordeipbankameng nyapu yumada, sun pedi akeca diryakankamenge. Akeca cap, Allah cap tep pio tenepra bankamepe,” Musadi pepu.

34 Upepupa, Harundi akeca mau pumbon kipmaunge doprapudi, Allah er si Yahwehdi peiputopu kupra, ‘Allah pendin upu kidongonai deipkurume,’ peputopu ‘Ange pio tenenkamep’ tenen, telepaipu deipu. Ada Allahdi Musa tep peiputopu kupu.

35 Amana kwanengda, Israel nesala denge dumbari 40 keteng tamun deiki neitamai di, akecapu jepra embarami. Akeca jeramidi nimi men kurami mutu neitamai embaramyane, amenda taru yuk mutu bena wengbei. Ada nimi konum ati dopra kurami mutu wengbei. Amutu sida Kanaan mutu. Keteng tamun 40 deiki di, akeca jepbaramyane, Kanaan mutu sirik wilimdonai yai taruda, tupa jenmai dinin, ataru dipu tapi. 36 (Pumun taruda, sun Ibrani nengdi, 2 liter nungna ngeda, ‘tenpu omer’ perami. Tonda, 20 liter nukra deiami ngeda, sundi, ‘tenpu efa’ perami).