Exo 17 | XteSC | STEP | Ataruda, Israel nesala yuma Allah er si Yahwehdi, “Angeda ukunkamrume,” peiputopu, mutu-mutu yuma embarami. Embaramyane, me gumai cadi, nimi men kurami mutu, mutu si Sin mutu di goprapidi, mutu si ton Rafidim mutu benapidi, lyom opkal di keana dodin ati, bena dopi. Ati dopi dinin, amutu neitamai peda, me pio men kwamupa, sun Israel nesaladi me men jenmai.

Exodus 17

Musadi ila gel popupa, me pakra yau upu

1 Ataruda, Israel nesala yuma Allah er si Yahwehdi, “Angeda ukunkamrume,” peiputopu, mutu-mutu yuma embarami. Embaramyane, me gumai cadi, nimi men kurami mutu, mutu si Sin mutu di goprapidi, mutu si ton Rafidim mutu benapidi, lyom opkal di keana dodin ati, bena dopi. Ati dopi dinin, amutu neitamai peda, me pio men kwamupa, sun Israel nesaladi me men jenmai.

2 Israel nesalada, me men jenmaiya tep, sun anesaladi Musa tep, ila di mali penmai. “Ukutaru kandi nun me karepsemempa jeptepe,” penmai. Upenmai pangeda, Musadi tamupra pepu. “Sunda ware keca deiyo tep, ne tep mali upu penmanerum do? Tek sisi Allah er si Yahweh tep kurpetena utopu kunmarumada, warya tep do?” pepu. 3 Upepu dinin, Israel nesala me pio putana kunmaua cadi, Musa tep ila di mali penmai. “Kandi ware keca deiyo tep, Mesir mutu di doupra yasemum do? Ukupsemumpa, amutu me pio guma tep, nun cap nun nyapu cap, nun peiramep keca cap yumada, pio depkamepe. ‘Dadepkamenge’ tenen, duyasemum do?” pepra mali penmai.

4 Upepra mali penmaiya tep, Musadi Allah er si Yahweh ^{▼▼Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf YHWH angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} tep pepu. “Uo naio, anesala tep nengeda, nedi ware kupkun do? Dipetepo, sunda, ‘Gel dopra Musa popkupe,’ tenepmanenga tep, ne mambul kupnere,” Musadi Allah tep pepu. 5 Upepu pangeda, Yahwehdi Musa tep pepu. “Ukuda kanda sun urasin tara mepra bankurume. Tonda, kandi Israel nesala deiyo neng upupmempa, yana dinmangai di, pumun taru kandi me si Nil me bongopmum maca doupra bankurume. Ada, Israel neng doupra duyakamom taru, duyakamem maca doupra bankurume.” Allahdi pepu.

6 Upepudi, aupu ton dukdongopra pepu. “Uda, bisi banmamemyane, mutu si Horeb mutu bemem pangeda, ne Allahdi ila gel deiki dinin, sun urasin tara tekamane. Agel damai yamem dingeda, kan doupmum maca di, ila gel bongopmempa, agel pumbon neitamai di, me pakra sakrepa, Israel nesaladi jenkamange,” Allahdi pepu. Ange yuma peputopu, Musadi Israel deiyo neng dinmaiyai, er maca di ila gel puto di bongopupa, me pakrap sakupa, gwepra jenmai.

7 Ukupu pangeda, Musadi amutu si tep, Meriba mutu pepra deipu. Amutu si pepka deiyoda ake. Ada, sun Israel nesaladi Musa cap, Allah er si Yahweh cap tep, mali penmaidi, “Yahweh tek sisa nun cap kunup do, gum do?” penmaiya tep, amutu si Meriba pepi. Sun upu deiki di, Meriba pepya deiyoda, ‘Mali pena’ tenen, penunge. Ange utopu, amutupu dinin, Musadi yuk si ton pepu. Ada Masa mutu ton pepu. Ange pepu ngeda, Israel nesaladi Allah tep, mali peprapidi, Allah tep kurpetena utopu kunmaiya tep, amutu si tep Masa ton pepu. Sun upu deiki di, Masa deiyoda, ‘Kurpetena’ tenen, penunge.

Nimi yala Amalek nengdi Israel nesala tep, popterepi upu

8 Israel nesala Rafidim mutu neitamai tupa kunmai taruda, Amalek yala nengdi, ‘Israel nesala popkamep’ tenen, amutu yana warekmaidi, Israel neng tep mar popterepmai. 9 Sundi, ‘Aneng popterepkup’ tenen, yakanmai taruda, Musadi Yosua tep pepu. “Kandi nimi wepra deipmempa, Amalek neng cap podana tep keteneipkurume. Ambutumida, Amalek yala neng cap mar podamem taruda, ne mutu deiki weleprap tekmanedi, Allahdi karepneupa, doupra embane macada, ne buru di erepra doupkamane,” Musadi Yosua tep pepu.

10 Upepu pangeda, Yosuada Musa peputopu, nimi doupra Amalek neng porbeu. Ukupu pangeda, Musa cap, Harun cap, Hur cap, amutu deiki welepi. 11 Welepi dingeda, Musadi er maca doupra, er buru pio erepra tekmau taruda, Israel nengdi Amalek neng popbisipi dinin, Musa er buru erepmaua tapupa, buru tapu taruda, Amalek nengdi Israel neng popbisipi.

12 Ukunmaipane, Musa er puto boun kupupa, Harun cap, Hur cap, sundi gel pala dopra deipreipa, Musa agel deiki buku. Buku pangeda, Harun cap, Hur capdi, ‘Er buru erepmaryada, men tapkamar’ tenen, Musa er buru dana-dana talepra erepropreipa, Musa er buru tupa puto di erepra doupmarei taruda, er maca dimpepra talepmaupane, Amalek neng cap, Israel neng cap, mar pio podanmaipane, keteng asuru wekrou. 13 Ukupmaiya tep nengeda, Yosua cap, Israel neng cap, sun parang ya di, Amalek yala neng popra gawal daki.

14 Konum popra gawal daki pangeda, Allah er si Yahwehdi Musa tep pepu. “Akupmau keca yumada, yuk taru yuma, ‘Ukuami’ tenen, tenimna tep, domba bol gelal sepunge dopra, sengna keca deiki di abol deiki sekurume. Ada lumdongona gum, Israel nesala pio tenenkamenga tepa. Tonda ange yuma Yosua er gekena tep penkamrume. Deiyoda, Amalek nengdi Israel nesala popbisipterepya tep, ‘Amenda taru yuk nesala yumadi, Amalek nesala sun si kange di ton cap men tenenkameng’ tenen, sun si gum kupra deipkamne,” Allahdi Musa tep pepu.

15 Upepu pangeda, Musadi acapu gel pala doprapudi, gel taplakra yakeipu. Deiyoda, ‘Akeca deiki Allah er si Yahweh, er gispal dona tep, gam keca popra, uku sekra dongopkamepe’ tenen, deipu. Tonda amutu si karepu. Amutu si tep, Allahdi ne ereipneu mutu pepu. Asi deiyoda, ‘Allahdi melipneupa, mali neng gawal dakra popmepu’ tenen, asi pepu. 16 Tonda Musadi pepu. “Allah er si Yahwehda, ila ngebo bungna keca deiki bukra, er dipu melipkamser’ tenen, ne buru erepsi. Yahwehdi sun Amalek nesala tep, tamna gum, doryankamre keteng tamun yuma deiki di, pio sun Amalek nesala popnapu kunkamre,” Musadi pepu.