Exo 18 | XteSC | STEP | Uda, Musa er yamal bo Yiteroda, Midian mutu kuramu. Yitero erda, Allah si eremna tep, karen keca uku dongona tep pel talepra, apel dona deiyo ngebo, imam kuramu. Ukuramudi gekeramupa, yuk nengdi, “Musadi, Israel nesala Mesir mutu kuramipa, doupra bisi yakaramu taruda, Allah Yahwehdi Musa cap, Israel nesala cap, sun damai yana, ila mambul pel yala-yala yuma kupyakaramu,” peramipa gekeramudi, ‘Musa cap, ne cap antapnemedi, upu sisikamneme’ tenen, Musa damai beu.

Exodus 18

Yiterodi, Musa kuramngai dirbeu upu

1 Uda, Musa er yamal bo Yiteroda, Midian mutu kuramu. Yitero erda, Allah si eremna tep, karen keca uku dongona tep pel talepra, apel dona deiyo ngebo, imam kuramu. Ukuramudi gekeramupa, yuk nengdi, “Musadi, Israel nesala Mesir mutu kuramipa, doupra bisi yakaramu taruda, Allah Yahwehdi Musa cap, Israel nesala cap, sun damai yana, ila mambul pel yala-yala yuma kupyakaramu,” peramipa gekeramudi, ‘Musa cap, ne cap antapnemedi, upu sisikamneme’ tenen, Musa damai beu. 2 Yiterodi, ‘Musa dirbenkamne’ tenen, beu taruda, Musa er ner Siporada, Midian mutupu tupa dakuramu. Ukuramnga cadi, Yiterodi aner cap, sundi kikiman doupra berei. 3 Musa er nyapuda, butene deiamu. Menmena deiamu mi er sida, Gersom. ^{▼▼Gersom - Ibrani upu deiki di, Gersom peraminge deiyoda, ‘Nimi bo ngebo akurure,’ tenena tep perami. Atep, Musadi asi wepra er menmena deipu mi tep asi karepu.} Tonda weit ngebo er sida, Elieser ^{▼▼Elieser - Ibrani upu deiki di, Elieser peraminge deiyoda, ‘Allahdi ne tep melimnerure’ tenen, perami atep, Musadi asi wepra, er amenda deipu mi tep asi karepu.} Sun anyapu buteneda, sal nyapupu deiamu. Du ngebo er si tep, Gersom pepu deiyoda, ‘Ne amutu yana kununada, nimi bo ngebo utopu kununa’ tenena tep, ami er si Gersom peiyamu. 4 Tonda, weit ngebo er si tep, Elieser pepra si karepu. Elieser pepka deiyoda, ‘Ne co puna neng si eremami ngebo Allah Yahwehdi, konum melipra lyepropneupa, Mesir mutu nesala taleamu ngebo Firaundi, ton men pomneue’ tenena tep, amenda deipu mi tep, asi Elieser pepra si karepu.

5 Musa er yamal bo Yiterodi, Musa er ner Sipora cap, tonda Musa er nyapu butene cap, dopra Musa damai yai. Ada, Musa kuramngai, ila katauai mutu, me gum tep, nimi ton pio men kurami mutu dinin, ila mutu Sinai mutu damai yai. Ada, Allah Yahweh erda, mali keca tenpu peda men kurur ngebo cadi, amutu deikida, yana upu peipka cadi, amutu tep, ‘Pio telep lengna mutu,’ perami. Ataruda, Musadi, keana tep opkal bol di keana dodin ati dopra kuramngaipu yai. 6 Musa damai yankoi taruda, Yiterodi, “Upu kai perberume,” peipu pangeda, yuk nengdi, Musa tep, “Kao, kan yamal bo Yitero cap, kan ner Sipora cap, kan nyapu butene cap yumada, konum yanmange,” pepra, lap perbeipa, Musa gekepu. 7 Aupu Musa damai lap pepipa, gekepu dingeda, ke tep tenda bol di keana dodin ati, bura tamna beudi, ‘Ne yamal boda antapkuneme’ tenen, Yitero yakanmau bisi damai beudi, sun yuma antapdai. Konum antapi dingeda, Musadi, er yamal bo Yitero er damai yaudi, ‘Gispal dopkun’ tenen, giso genepdongopudi, Yitero iripra mutupdaropu. Tonda, Musa cap, Yitero cap, sun pepu asipetepdareidi, “Telep kurum do, pu ton jekerur do?” pepra, asipetepdai dingeda, sun ayuma Musa er tenda bol di keana dodin ati pumbon weki. 8 Ati konum weki taruda, Musadi, er yamal bo gekena tep, Allah Yahwehdi meliamupa, pel doramunge yuma tep lap penmau. Ada, ila nimi deiyo kepra, Mesir mutu nesala taleamu ngebo Firaun damai cap, Mesir mutu kurami nesala sun damai cap, Allah Yahwehdi, nimi men kupmanto keca, yala-yala yuma kupudi, Israel nesala lyepra, doupra yanamunge yuma tep lap penmau. Tonda, Israel nesala Mesir mutu tapra, Kanaan mutu yakarami taru, sun damai kange mun keca yala-yala yumada, yakaramupa ikin kange doupra, kupyakaramipa, Allah Yahwehdi, lyepropunge yuma tep, Musadi nukra deipu.

9 Musadi, ange yuma konum nukra deipupa, Yitero gekepu dingeda, pio ila di kange deipu. 10 Ukupu dingeda, aupu pepu. “Sun Mesir mutu nesala yuma tep, taleamu ila nimi deiyo ngebo Firaun, er buru deiki di, sun Israel nesala taleamudi, ikin keca sun nong deiki deiamu dinin, Allah Yahwehdi lyepropseunge cap, tonda Mesir mutu nesala sun kan-kan di, ikin pel dimamseipa, kange mun kange dopura, ikin weik pel doramrumpane, Allahdi melipra lyepropseunge cap yuma tep nengeda, nedi, sun nai bo Allah Yahweh tep, ila di telepe pepne.” 11 Yiterodi upepu dingeda, aupu ton pepu. “Ukutaruda, kandi aupu pepmanerema deiki di, tek sisi ne konum kael kepne. Sun nai bo Allah Yahwehda, tek sisi ila puto ngebo kurure. Yuk nesala yumadi, tali keca yala-yala yuma tep, “Nun nai bo,” pepra, si eremnung keca yumada, tali tepapu si eremnunge. Asi eremnung keca yala yumada, Allah Yahweh er amutarapu kununge. Allah sun deiki tara kurura cadi, er puto weik kurur dinin, sunda tali kecapu kurure. Tonda angeda, ne konum kael kepne. Mesir mutu nesaladi, ‘Nunda puto weik kunupe,’ tenepra, sal nong-nong kamamidi, sun dipru eremna nengpu kuramidi, Israel nesala tep, ikin keca weik sun nong deiki derirami dinin, Allah Yahwehdi, Mesir mutu neng tep popra gawal daku. Ange yuma kupka tep, ‘Erda ila puto weik ngebo kurure’ tenen, konum kael kepne,” pepu.

12 Upepu dingeda, Yiterodi, Allah Yahweh tep, ‘Telepe,’ pepnedi ‘Uku dongopkun’ tenen, Allah er karena tep, yapi keca popra ketenepu. Ada, gam keca popra, uku dongonange cap, yuk yala karena keca cap doupra, Allah Yahweh er damai duyau. Ataruda, Harun cap, Israel nesala sun deiyo-deiyo neng yuma cap, Yitero damai yaipa, bulupra bukrapidi, Yahweh er si eremna tep, kikiman roti kwaneng jenmai.

Musadi nimi upu bongdina deiyo neng wepra deipu upu

13 Mapmaiya konum bereku pangeda, Musadi, sun pe Israel nesala tepapu, yu upu deiki pangdaramidi, wilim didaraminge tep, upu moupra talepra lepsisingdinmau. Apelda ipna taru di gonga kepra donmaupane, sintara kepmauanen, ipdongopu. 14 Ataruda, Yiterodi Musa apel donmaunge yuma, epra kael kepka tep, Musa tep, asipetepu. “Kandi anesala tep pel donkamremada, wareto kupra pel donkamrem do? Tonda ange yumada, kan tenpu ngebo dipapu anesala yuma tep, upu lepsisingna pel donkamrem do? Ada abukmamempa, anesala yuma yana tekmengedi, upu pepmengepa, kan tenpu ngebo dipapu, upu lepsisikra bongdinkamrem do? Aupu bongdina tep nengeda, kan tenpu dipapu, ipna taru di apel dona tep, gonga kepra tekmamempane, sintara kepredi inipkamre do? Akunmaremada, ware keca deiyo tep kunkamrem do?” pepra asipetepu.

15 Yiterodi Musa tep, upepra asipetepu pangeda, Musadi tamupra pepu. “Gume, anesala yumada, ne damai yangedi, sun upu lap pepra deipnengepa, Allah Yahwehdi, ‘Ukuptenge, tonda telep ngeda ukupkamenge,’ tenerurnge yumada, nedi, sun aneng damai lap penune. 16 Tonda, sun pe Israel nesalapu yu kuprepa, upu deiki di pedankamenge nge yuma peda, ne damai yangedi, lap pengepa, nedi, ‘Angeda, ukupkurume, angeda pio men kupkurume,’ pepra, upu lepsikra bongdinune. Tonda Allahdi, ‘Angeda, kunkamrume, angeda pio men kunkamrume,’ pepra, er mem upu peipseungepu, nedi, sun anesala gekenai lap pedinune,” Musadi er yamal bo Yitero tep lap pepu.

17 Musadi upepu dinino, Musadi, apel donmaunge yuma tep, er yamal bo Yiterodi pepu. “Gume, apel donmarem ngeda, telep pel kurur dinin, kan tenpu ngebo dipapu ato pel yumada, telep kupra men dopmanto tep, tek sisi mali kunmarume. 18 Ada tali tep men pepkene. Deiyoda, kan tenpu ngebo dipapu, ato pel donkamremada, puto boun kupkeredi, puto gum kunkamkere. Utopu tonda, kan upu gekena tep, yakankameng neng peda, sun puto boun kupredi, dabal kunkamre. Adonmarem pelda, ikin pio weik pel kurura cadi, kan dipapu apel telep kupra men doptume. ‘Apel donmamempa, kan puto boun kupkerur’ tenen, pepkene. 19 Atep, ataruda, Musa kanda, ne pepkuken upu yumada, pio moupra gekepkurume. Ada, nedi, ‘Telep kunkamrum ngeda ake,’ pepra lap pepkukene. Tonda, ‘Allahdi kan tep, melimkamker’ tenen, Allah tep morokenune. Tek sisi kandi Israel nesala yuma, sun melimna tep, Allah cap, sun cap antamdina deiyo ngebo kunkamrume. Ada, sun mali kupmange nge yumada, kandi doupra, Allah er ila puto ngebo damai dubankamrume. 20 Sun Israel nesaladi, kan damai yakankameng taruda, kandi sun kael kemna tep, ‘Allahdi, “Ukunkamrume, ange pio men kunkamrume,” pepra peteremkamrume. Tonda, Allahdi, ‘Ange telepe, ange mali,’ peipseunge ton lap penkamrume. Tonda, ‘Telep bisi benkamrumada ace, pio men benkamrum bisida ake,’ pepra, lap penkamrume. Ange utopu, kandi, ‘Telep pel donkamrume ngeda, ake. Pio mali kun keca tep, apelda men pel donkamrume,’ pepra, Israel nesala tep peteremkamrume.

21 Dinino, ukunkamrem taru yumada, ‘Ne upu bongdina pel tep, ne melimna neng kunkameng’ tenen, kan adipapu, nimida ware kuprap neng do, nimi ton wepra deipkurume. Sun anengda, kange moupra tenepmengedi, upu sisikmanto nengpu wepkamrume. Ada, ‘Telep kupra pel dopmanto nengda ace,’ tenepmemdi, ato nengpu wepra deipmempa, upu lepsisikra bongdina pel talepra kunkamenge. Ada, sun aneng neitamai di bokra deipmempa, ton deiyo nengdi, nimi dengeda, pio weik, seribu (1.000) neng tep, upu lepsisikra talenkamenge. Ton deiyo nengdi, nimi dengeda, 100 neng tep, upu lepsisikra talenkamenge. Ange utopu, ton deiyo nengdi, 50 neng melimna tep talenkamenge. Ton deiyo nengdi, nimi 10 neng melimna tep, upu lepsisikra talenkamenge. Kandi, ‘Upu lepsisingna pel talepra donkameng’ tenen, adeiyo neng wepra deipkamrume. Tonda, kandi awepra deipkamrum nengda, tali neng men wepra deipkamrume. Ange gum dinin, ‘Mali kupmepepa, Allahdi wenepkamser’ tenen, Allah tep, kwar tenepra, er tep teka tenepra kunge nengpu wepkamrume. Ange utopu, ‘Anengda mawa di mali upu men penunge. Sunda, ‘Co bo weik dopropkup’ tenen, bul kemna co bo ton, pio men dorongedi, pio dumsisi kunge nengpu wepra deipkamrume. Tonda, yuk nengdi, sun aneng tep nengeda, ‘Sunda, dumsisi kunung neng cadi, aneng tep tek sisi teneptepe,’ tenenge nengpu wepra deipkamrume.

22 Sun aneng wepra deipmem dingeda, kandi, ‘Ukunkamrume,’ pepra, sun damai lap pepmempa, sundi, Israel yala nesala yuma tep, upu lepsisikra bongdina deiyo kemne neng kunkamenge. Tonda gung yuk-yuk bongdinkamrume. Ukupra sun pel karepmem pangeda, betapra donkamenge. Ukupmengedi, Israel nesaladi, ila mali kupmange keca tep, kan dipapu upu bokra lepsisikra penkamrume. Kan melimna nengdi gume. Kan melimna tep, wepra deipkamrum nengda, Israel nesaladi yambul kanam di mali kupmenge ngeda, sun dipapu lepsisikra upu penkamenge. Ikin weiknge, sun anengdi men lepsikmanto kupmenge ngeda, kan damai duyangepa, kan dipapu dumsisikra lepsingdinkamrume. Dinino, yambul kanam ngeda, sun aneng dipapu, upu talepra dumsisingdinkamnunge. Ukupkamenga deiki di, kan pel donada, kanampu kunkamkere. 23 Apepmakentopu kupmemnyopda, Allah Yahwehdi, ‘Musadi ukupre pangeda, Israel nesala telep kupra kunkamenge,’ teneptudi, aupupu pepra deipsetuopda, adeiki di, Israel nesala yuma, sun ikin-ikin keca, tonda mali kupdankamenge keca, kandi apel dopra, dumsisikra deipkamrem taruda, puto boun men kupkamkere. Telep kupra pel donkamreme. Tonda, sun Israel nesala yuma, kan cap, kan melimna tep wepra deipkamrem deiyo neng capdi, upu dumsisingdinkamrum upu gekepmengedi, kange telep kuprepa, ‘Telepe akonuma,’ tenepmengedi, sun pe kuramengaipu, kange di tamupra bankamenge.” Yiterodi, Musa tep pepu.

24 Upepu pangeda, Musadi er yamal bo Yiterodi, ‘Ukunkamrume,’ pepka utopu, angepu kupu. 25 Ukupka tep, Israel nesala sun kankan neitamai, Musadi, ‘Anengda lepsisikra upu bongdina deiyo neng kupmengedi, Israel nesala sun deiyo-deiyo neng kunkameng’ tenen, dumsisi telep kupra kun nengpu dipetepudi, weprapudi erepra deipu. Israel nesala yumada, nimi dengda, seribu (1.000) neng ton bokra deipudi, sun upu lepsisikra bongdina deiyo ngebo ton wepra deipu. Utopu ton, Israel nesala ton, seratus (100) neng bokra deipudi, sun deiyo ngebo ton wepra deipu. Utopu ton, lima puluh (50) neng tep, sun deiyo ngebo ton wepra deipu. Tonda 10 neng tep, sun deiyo ngebo ton wepra deipu. 26 Musadi, sun aneng wepra deipu pangeda, Israel nesala kankan neitamai kuramidi, Israel nesala sun mali kunge keca kanamnge kuramu taruda, sun aneng dipapu gekepidi, upu bongdirami dinin, ikin weik kwamu ngeda, anesala doupra, Musa er damai deriramipa, Musa er dipapu aikinge yumada, upu lepsisikra bongdiramu. Dinino, Israel nesaladi, sun yambul kanam mali kurami ngeda, adeiyo neng damai yana lap peramipa, sun adeiyo neng dipapu, upu talepra lepsisikra bongdirami. 27 Sun yuma dakuramipanen, amenda taruda, Musadi er yamal bo Yitero tep, “Telepe kan pe mutupu, tamupra dabenkurume,” pepupa, Yitero er pe mutupu tamupra beu.