Exodus 19

Allahdi Sinai Mutu deiki peten kemdina keca kuramupa dirami upu

1Israel neng Mesir mutu tapra, war weneri deiki di baramyane, konum kupupa, Mesir mutu tapra benami tumipu kupkopda, adipapu Sinai mutu bei. Sinai mutuda, me gumai cadi, yuk nimi men kuramyai bei. 2Ada, men di Rafidim mutu kuramyai tapra, amutu di bisi banmaiyane, amenda taru me gumai cadi, nesala pio men kurami mutu beidi, ila mutu ton Sinai mutu katuai orkupupa epi. Yambul atarapu bena lyom opkal di keana dodin ati bena dopra mapi. Sun urasin tara, Sinai mutu dup katuai orkupupa epi.

3Ataruda Musadi, ‘Allah cap antapkamanem’ tenen, Sinai mutu dup welepu. Allah er si Yahwehdi Sinai mutu dup deiki, Musa tep kongpepudi upepu. “Apepkuken upuda, Yakubdi deipupa, dadeipdanen yakaramyanen, ataru kunge Israel yala nesala tep, kwerepmemdi, perbankamrume,” pepu. 4Nedi Mesir neng tep weneprapsidi, portamamsi ngeda, konum diramrume. Tonda sun peda kaele. Nedi sun tep, ‘Ne mawa nesala’ tenen, Mesir mutu neitamai lyepropsisidi, ukupmantoda, abun ma popmanto keca yuma deiki lakra embaramretopu, abun ma pol deiki deipra, ne damai duyanamsisi.

5Atep nengeda, sundi ne karepsisi upu moupra gekepmumdi, talepmum pangeda, nedi sun tep nengeda, “Ne mawa nesala tenepsenedi, pio kalekra melimkamsene. Ada nedi, ‘Ukunkamrume, angeda men kunkamrume,’ pepra derisene upu gekepra dombarumu pangeda, nedi pio talenkamsene. Mutu ban-ban yumada, nengepu kurure. Tonda, tuai mutu neitamaida, yuk mutu nesala weik akunung dinin, sunpuda ne nyapu utopu kunkamnerume.

6Ange tep nengeda, sundi ne upu moupra gekeprumnyopda, nedi sun tep, ‘Sunpuda ila mambule. Anengda ne si eremna tep, Allah cap, nimi cap antamdina deiyo neng utopu kununge. Sunda, ne amnyo tara bukmumpa, ne anuamsi nesala, sunda pio telepe,’ tenenkamsene.” Allahdi Musa tep pepu.

Upepu dingeda, aupu ton pepu. “Apepmaken upu yuma doupra, sun Israel nesala tep perbenkurume,” Allahdi Musa tep pepu. 7Upepka tep, Musa kange di Sinai mutu deiki di kwerepudi, Israel nesala, sun deiyo neng tep bupra deipudi, sun gekena tep, Allah er si Yahwehdi er tep peipmau upu yuma lap pepupa gekepi.

8Upepupa, Israel nesala yumadi, “Telepe nun Nai Allah, er si Yahwehdi pepmaser upu yumada, angepu kunkamepe,” pepipa, Musadi tamupra apepinge tep, Yahweh er damai perbeu. 9Aperbeu taruda, Allah er si Yahwehdi tamupra Musa tep pepu. “Ne, kan damai yankamnada, ila dua kan-kan yankamne. Dua kan-kan yanedi, kan tep upu peipkenepa, Israel nesala yuma peda gekenkamnenge. Ukunkamna deiyoda, ataruda ne upu kan damai peipkenepa, Israel nesala yuma epmengedi gekepmengopda, kan tep, ‘E Musada, Allah er pel dore ngebo’ tenen, teka tenepra gekenkamkenge,” pepu. Upepupa, Musadi sun Israel nesaladi pepmai upu, Yahweh tep lap pepu.

10Upepupane, Allah er sida Yahwehdi Musa tep pepu. “Atep bememdi, sun tep melipmempa, atumi cap, ambutumi capda, ‘Tali nengpu men kunkamepe, Allah er mawa nesala, dumsisi kunge nengpu kunkamep’ tenen, ketenepkamenge. Tonda, sun opkal yuma, me kupra ketenepkamenge. Kan peda ukupkamrume. 11Sun yuma ange konum kuprumpane, komuni weneri tumi konum kupyopda, akonuma. Atumipu ne Yahwehda, Sinai mutu dup, nimi yuma epmantoai kwerepnedi, Sinai mutu deiki deipkaman peten kemdin keca epkamenge. Atep ue weneri tumi men kupmare taru di, sun adipapu keteneipkamarume,” Allahdi Musa tep pepu. Aupu ton pepu.

12“Tonda, ‘Israel nesala Sinai mutu dana-dana yuma tali embenung’ tenen, kandi upu sekrume. ‘Ukupnung’ tenen, upepkurume. Amutu taram dam welena cap, amutu deiyo dam bena talena cap peda, pio meme. Ware ngebo do yuma, amutu damai bengedi, amutu nong yanipredi bepyopda, adipapu wenepra poptapmumpa depkamre,” Allahdi pepu. Upepudi aupu ton pepu.

13“Amutu yanipredi bepyopda, angeboda adipapu gel dopra, er nong deiki doprumudi poptapkamrume. Agum dingeda, jen di doupra popkamrume. Apoptapmenge boda, nong bol bena pio meme. Tonda, ware gam kun keca do, nesala pe, yuk yala keca yuma peda, domba bisam do, kam do yuma, amutu damai embana gume. Nun butene di pepmanemai bengopda, gam pio men kunkamenge. Popna pua. Dinino, ne Allahdi pepne pangeda, nimidi jem domba bisam giso takke pumbon di pum pepmengepa, pong pepkamre. Lelim weika peprepa gekepmengedi, aneng yuma amutu damai yankamenge. Yuk taru ton gume,” Allahdi Musa tep pepu.

14Upepupa, Musa amutu dup di kwerepudi, aneng tep melipupa, ‘Allah er mawa nesala, dumsisi kunge neng kunkamep’ tenen, dipru keteneipidi, sun opkal me kupra ketenepi. 15Ukupipa, Musadi sun tep upepu. “Ortumi u weneri tumida, ‘Yahweh cap antapkamep’ tenen, ketenemna tep nengeda, ataru dine, ue weneri komuni aneitamaida, nerapu cap mana pio meme.” Musadi Israel nesala tep pepu.

16Komuni weneri konum kupyopda, atumi ipna perelang pepra, kulman popudi, Sinai mutu deiki ila dua belepu taruda, bung-bung pena ila di pepupa, akurami nesala yuma gekepidi, dudup peap kware daidi, moropsepi. 17Ayuma kupupane, Israel neng cap, Allah cap antamna tep, Musadi Israel nesala yuma doupra beupa, amutu dam amutarapu bentekmai.

18Ataruda dinmaipa, kete di Sinai mutu yuma inipu. Angeda, Allah er si Yahwehdi uku kan-kan kwerepka tep kupu. Aket welepkada, wa uku imna ipmengepa, ila ket jeramre utopu kupudi, amutu yuma weika di long-long penmau. 19Arup taru, jem domba bisam giso takke doupropidi, ila di pung penmai ngeda, lelimda yambulanun penmai. Dinino, ukudi tapakra bung-bung pena ila di lelim penmau. Akunmaupa, Musadi Allah tep pepupa, Allahdi tamupra upu pepkada, kulman poramretopu upu, Musa tep pepu.

20Allah er si Yahwehdi, Sinai mutu dup deiki kwerepudi, Musa tep upupupa, Musa amutu dup welepu. 21Allah er si Yahwehdi Musa tep pepu. “Ka tamupra kwerepmemdi, Israel neng tep ton cap pepkurume, ‘Allah er si Yahweh, er damai bena eptepe’ tenen, balila kupra amutu damai yakana meme. Nun pepnemyai yuma embana gume. Sundi amutu damai yangyopda, adipapu sun ton popnepa, nesala weik depnung tepa,” Allahdi pepu.

22Upepudi, aupu ton pepu. “Tonda Allah cap, nimi cap antamdina deiyo neng peda, ne damai yankungopda, sun kange dipru yuma telep kupra mengne kupra deipmengedi, ne damai yakankamenge. Gum dingeda, anengda wenemna keca weika di karepkamne,” Allah er si Yahwehdi pepu. 23Upepupa, Musadi Yahweh tep tamupra pepu, “Anengda amutu men weleptenge. ‘Amutu deiyoda, damai yakan meme,’ peipsipa konum gekepra kael kepmai. Kandi nun tep peamsemumada ake. ‘Amutu dana-dana yuma peten kepra sekdongopkurume. Amutuda, pio lekai, ila mambulai, tenepkamrume,’ peamsemum ngeda konum tenipmange,” Musadi pepu.

24Upepupa, Allah er si Yahwehdi tamupra pepu, “Kwerepmempa, Harun cap tamupra yankurume. Er cap, kan cap tamupra yankurerum dinin, nedi wepkamne neng, ada Allah cap, nimi cap antamdina deiyo neng, sun imam neng, yuknge capda, amutu damai yakana gume.

Tonda Allah er ati pumbon pel don neng cap, tali nesala yuma cap, ‘Uo Allah er si Yahweh eptepe’ tenen, balila kupra yakana meme. Nedi, “Amutuda memai,” pepsai bisipra yakana gume. Sun yangopda, anengda wenemna keca weika di karepkamne,” Allahdi pepu. 25Allah er si Yahwehdi aupu pepka tep, Musa kwerepudi, Allahdi peipmau upu yumada, Israel nesala tep lap peryau.