Exodus 2

Musa deipidi lyepropi upu

1Ataruda, tenpu Israel ngebo dinin, Lewi yala nengdi deipi ngebo, Lewi yala ner dopu. 2Ukupupa, aner mumun douamnganen, sal mi deipu. Deipudi, ami er kamo epupa, er urasin telep kupka tep, er nindi, ‘Mesir nengdi ne mi popnung’ tenen, ami dopra, war weneri deiki inipra deiamu.

3Ukuramu dinin, ami weik nepupa, tupa men inipmanto kupka cadi, er nindi, ‘Bura tara inipkaman’ tenen, tapu alen wiprapudi, ‘Me mokon jeprur’ tenen, co pe utopu keca dopra, akalen bura tara palepdongopudi, er mi akeca pumbon dongopudi, buplan dekra deipu. Ada, Nil me pirman dinin, kwem palpal neitamai inipra deipu. 4Ukupu taruda, er du ner karenai tekmaudi, ami tep, ‘Wareto kupkamar do?’ tenen, dinapu kunmau.

5Dakunmaupane, Firaun er ner mi, ‘Nil me gengbenkun’ tenen, yau taruda, menmena me men yana gaku. Er melimna nerapuda, me pirman tali embanmai. Firaun er ner mi me gekou taruda, akalen kwem palpal kan-kan akwapmauai yan epu. Epu dingeda, er melimna ner tenpu tep upepu. “Kanda tapu alen orkupmara bena dopra denerume,” pepupa, bena dopra deu.

6Tapke alen pakra dipetepu dingeda, akalen neitamai ami epupa engepu. Engepupa, Firaun ner midi, bicau tenepu. Utenepudi pepu. “Gume, amida tek sisi Ibrani nerdi deipu mi,” pepu. 7Upepu taru, ami er du nerdi, Firaun ner mi damai beudi asipetepu. “Ange mida, moum dinimna tep, Ibrani nerapu damai betenedi, doupra duyanepa, anerdi kan melimna tep, ami moum diniptuada telep do?” pepu. 8Upepupa, Firaun ner midi, “Yo telepe dadoua benkamareme,” pepu. Upepupa, ami er du nerdi, er nin sisa damai bena doupra duyau.

9Sun butene yareipa, Firaun er ner midi ami er nin sisa tep pepu. “Uda, ami doupra moum diniprempa, nedi kan tep maton keca karenkamkene,” pepu. Upepka cadi, aner er mi dopra beudi, moum dinimamu. 10Ange mi konum nepu pangeda doupra, Firaun ner mi damai tamupra bena karepu. Karepupa, ataru Firaun er ner midi ami dopra, er sida ‘Musa,’ pepra karepu. Er si Musa pepka deiyoda ake. Musada, Mesir mutu upu deiki di, ‘Daneitamai di dorona’ tenen, peramya tep, asi pepra karepu. Ada, ‘Nil me pirmanai di dopropsa’ tenena tep upepu.

Musa Midian mutu beu upu

11Musa dakuramupane, orketeng tamun deiki konum nepu taruda, ‘Ne tara nesala ikin pel domengai dirbenkun’ tenen, Israel nesala mambul pel doramyai dirbeu. Dinmau taruda, Mesir mutu ngebo tenpu di, Musa er tara ngebo, Ibrani ngebo tenpu, balena di er nong deiki ponmaupa, Musa epu. 12Epu dingeda, ‘Nimi ton dinmaneng do?’ tenen, dipetepudi gum kupka tep, Musadi Mesir ngebo poprapudi, er nong dopra me wenenga di singipu.

13Mapmaua, bereku pangeda, atumi ton Israel nesala pel doramyai bena dipetepu. Dipetepu taruda, Ibrani neng butenepu podanmareipa, Musa epudi, mali kuna gonga kemna deiyo ngebo tep Musadi upepu. “Kao, sun pe nengpu kuruma cadi, ware keca deiyo tep podanmarerum do?” pepu. 14Upepupa, angebodi Musa tep upepu. “Ware deiyo ngebodi, kan tep erepra deipkeupa, nun upu bongdina deiyo ngebo cap, nun deiyo ngebo cap kupmaserem do? Kanda Mesir ngebo ambutumi popmamumtopu, ne ton popkunerema tep wenepnerem do?” pepu. Upepupa, Musadi, ‘Uo, ne kupmanu ngeda, konum kael kepmanenge,’ tenepudi, kware kupu.

15Amenda taru, Musadi Mesir ngebo popmau ngeda, Firaundi konum kael kepu dingeda, ‘Ae, angeboda, warya tep do? Er poptapkune’ tenen, piripterepu dinin, Firaun tenepu ngeda, Musa kael kepudi, adipapu yuk mutu sepdaro bendopu. Ada, mutu si, Midian mutu neitamai bena, me bungna damai bena bukmau.

16Ukupmau taruda, Midian mutu ngebo tenpu, er ner nyapu yoneitam bari nerapu kurami. Angeboda, er sida Yitero kuramu. Er pelda, Allah gispal dona tep, gam keca popra karena deiyo ngebo kuramu. Angebo, er ner nyapu yoneitam bari di, sun domba bisam me karena tep, abunkwan mokon damai me gweryai. Ada, ‘Me gwepmepedi, me derinai dikdongopmepyopda, nun nai bo er domba bisam jepkunge’ tenen, me bunkwan mokon dam yai.

17Ukupi taruda, domba bisam talepra pein neng, yuk neng yaidi, akaber nerapu tep yan enepipa, me men yana gwepi. Ukupipa, Musa epudi, tekra sun nerapu lyemna tep, sun yu neng enepu. Ukupu dingeda, anerapu makuna tep, me gweprapudi sun domba bisam karepu. 18Ukupupa, anerapu sun ati menmena tamupra beipa, ataruda sun nai bodi asipetepu. “Warya tep atumi menmena tamupra ati yarum do?” pepra asipetepu.

19Asipterepupa, sun er ner nyapudi upepi. “Gume, domba bisam peina neng, yu nengdi enepmasengpa me men gwepmap dinin, nimi tenpu Mesir mutu ngebodi makupra lyepmasudi, me gwepra nun domba bisam karepmasere. Adeiyo tep menmena tamupra yanmape,” pepi.

20Upepipa, sun nai bodi, “Uo, sun warya tep angebo tali tapra yanmarum do? Sun tep melipmaseu ngeboda, dan kunmar do? Sundi er dopra duyanmatumpa, er cap jena tonpa jeptepe. Atep, er yakana tep tamupra perberume,” pepu. 21Bena upepipa, Musa yau pangeda, kikiman kunmai. Kikiman kuramipane, amenda taru akati deiyo ngebo Yiterodi, er ner mi Sipora karepupa, Musadi aner dopu.

22Dopudi, kikiman dakuramreianen, aner Siporadi sal mi deipu. Deipupa, Musadi, ami er sida Gersom pepu. ‘Ami er si Gersom,’ pepka deiyoda ake. Ada, Ibrani upu deiki di, Gersom gekenada, yuk upu dinin, er upu deiyoda, ‘Ortara nimi bo ngebo kurure,’ lelim utopu kurure. Asi karepra Musadi upepu, “Ukutaruda, yuk mutu neitamai, neda tengyakan ngebo, nimi bo ngebo konum kunune,” pepu.

23Ataru neitamaida, keteng tamun weik, Israel nesala kikiman amutu dakuramipane, amenda taru Mesir mutu ila nimi deiyo ngebo, Firaun depu. Tonda, ataru neitamaida, Israel neng keteng tamun weik deiki di, ikin pel pio talipu pel doramidi, ila mambul kange douamidi engerami. Sun ikin pel dona cap, mambul kange cap tep engeramidi, “Uo, nun nai Allah makupra lyepseo,” pepra mororamipa, Allahdi gekeramu.

24Israel neng Allah tep mororami ngeda, gekeramudi utenepu. Gume, Israel nesala, sun co puna neng Abraham cap, Isak cap, Yakub cap tep nedi, “Tek sisi ukupkamsene, sun ton ange kunkamrume,” pepra deipsi pedina upu ngeda, men luprosi, tupa tenenune. 25Allahdi, “Sundi ukunkamrume, nedi sun makuna tep, ukupkamsene,” pepra deiamunge tep, tupa teneramnga cadi, sun Israel nesala tep, pio bicau teneramudi, ‘Sun makuna tep, ware kupkun do?’ tenepu. Utenepka tep, Allahdi, ‘Israel nesala, sunda nedi dina cap, makupra kalengna cap tupa kusenune,’ teneramu.