Exo 20 | XteSC | STEP | Allah er pedi pepu upu yumada ake.

Exodus 20

Allahdi ‘Ukunkamrume, angeda men kunkamrume,’ pepra dangol di u karepu deiyo upu

1 Allah er pedi pepu upu yumada ake. 2 “Neda sun nai bo Allah, ne sida Yahweh ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} kunune. Mesir mutu nesaladi ikin pel dopra, sun nong deiki deriramseipa, kange mun kupra kuramrumai, Mesir mutu neitamai di doupra duyanamsisi ngeboda, ne kunune,” pepu. 3 “‘Allah yuk kurura,’ pepra, yuk-yuk keca si eremna pio meme. Allah nepu kununa tep, ne tepapu gispal dopra, ne sipu eremkamnerume,” Allahdi pepu.

4 “Im deiki kapu keca cap, tuai kapu keca cap, me amu kapu keca cap, ange yumada, sun urasin utopu petupra men keteneiprumdi, ‘Akeca si eremkamepe’ tenena pio meme, pepu. Yuk tali keca si eremna tep, yuk-yuk keca urasin utopu kemdina gume.” 5 “Ware keca do yuma, urasin utopu petupra, akeca tep gispal dopra, gutam tu dipdongopra si eremna meme. Sun nai Allahda, ne Yahweh pua. Atep yuk tali keca si eremna meme. Ne nyapudi yuk keca yuma tep, ‘Nun nai’ tenen, si eremengopda, ne mali kange doupra, pio yu kunune. Ne tep ‘Nun songe’ tenen, mali-mali penenge nengda, sun wenepnedi, sundi deipkameng nyapu cap, sun nyapu deipkameng nyapu cap, anyapu peda deipkameng nyapu capda, (keturunan ketiga dan keempat) tupa wenemkamne,” Allahdi pepu.

6 ‘Allah erda nun songe,’ tenenenung neng pio wenemkamne dinin, ne tep kange deipra, nedi sun tep, ‘Ange ukunkamrume, angeda, men kunkamrume,’ pepra, pene upu teka tenepra gekepmengedi, aupu talepra dombanung nesala tep nengeda, bicau tenepnedi, pio melimkamsene. Ato nesalada, pio men tapkamne, pio makunapu kunkamsene,” Allahdi pepu. 7 “Sun nai bo Allah, ne si Yahweh tep nengeda, ne si tali-tali si pena meme. Ware ngebo do, ne si tali-tali si peramre ngebo tep nengeda, ‘Dakwapye,’ men tenenkamne. Ne si tali peptapmenge nengda, tek sisi pio weika di wenepkamne,” Allahdi pepu.

8 “Nedi sun beipye peingne tumi karepsisi ngeda, lumdongona meme. ‘Atumida Allah er si Yahweh, er mambul tumi’ tenen, atumi neitamai tali kuna gum dinin, atumi yuk wepra deipmumdi, ne Allah tep moupra tenepmumdi, dumsisipu kunkamrume,” Allahdi pepu. 9 “Uwe ngangtan bari tumi karepsisi taruda, sun pel dopra kunkamrume.

10 Dinino, yoneitam tumida, er sida Sabat tumi. Atumida, Allah ne mem tumi cadi, atumi deiki di, ne Yahweh teppu tenenkamnerume. Ange tep nengeda, ware pel do yuma, atumi deiki tali pel dona meme. Ada, sun peda, sun nyapu peda, sun ner nyapu peda, sun pel don neng cap, pel don nerapu cap peda, sun peirum keca keledai bisam do, sapi do, ange peda, pel men donkamenge. Tonda, yuk mutu di, sun mutu neitamai tengyakan neng peda, pel dipmumpa pel men donkamenge. Aneng sun pe pel ton men donkamenge. Atumi, Sabat tumida, tali pel yala-yala yumada pel dona meme,” Allahdi pepu.

11 “Ne Allahdi pepne. Ne tumi deiki pel men donkamruma deiyoda ake. Ada ue ngantan bari tumi deiki di, nedi im cap, tu cap, laut mokon cap, akeca neitamai kuramre keca yala-yala yuma cap, ketekepra deipsi. Ukupsa tep, ue yoneitam bari tumida, ne bepe peikamsi. Ukupsa tep nengeda, Ne Yahwehdi atumi tep, telep kupra deipsidi, ‘Atumida ne mawa ila mambul tumi,’ pepra atumi wepra yuk deipsi,” Allah er si Yahwehdi pepu.
12 “Sun nai yapu cap, sun nin yapu cap, ‘Sunda mambule’ tenen, sun upu moupra gekepmumya deiki di, telep kupmum pangeda, keteng tamun weika di ton cap karepkamsene. Pio telep mutu karepsene pangeda, gam tupa kunkamrume,” Allah er si Yahwehdi pepu.
13 “Sun pe kange dipapu yu kupra nimi tali pona meme,” Allahdi pepu.
14 “Nimi do, nerapu do, konum dopdamumnyopda, yuk nerapu do, yuk nimi do, upula nyangdana meme. Ange utopu, ware nesala do yuma, tali-tali nyangdana pio meme,” Allahdi pepu.
15 “Upula dona meme,” Allahdi pepu.
16 ‘Yuk nengdi, angebo mali kupke, tenepkameng’ tenen, sun kayapu tep, mok upu pena meme. Allahdi pepu.
17 “Yuk neng sun keca yuma tep, ‘Uo, nepu doproptene,’ tenena meme. Ada sun ati cap, sun nerapu cap, sun pel melimna neng cap, pel melimna nerapu cap, er sapi bisam cap, er keledai bisam cap, er peirur keca yuk keca cap, uda ware keca do, er talere keca yuma tep, ‘Ne doproptene’ tenena meme,” Allahdi pepu.

Israel nesalada Allah tep, kwar kuramu upu

18 Ataruda perenglang pepudi, kulman ilange cap, bung-bung pena ila di lelim pepunge cap, tonda Sinai mutu deiki di, ila ket kwerepudi yan inipu. Akeca yuma Israel nesala epidi, kwar kupupa, moropsemai. Ukunmai dingeda, kware tep karen-karen tekmaidi, Musa tep pepi. 19 “Kan dipapu nun damai pepsemempa, gekenkamepe. Dinino, Allahdi nun damai upu sisingnada gume. ‘Erdi pepseryopda, nun depnupe’ tenen, kware kunmasere,” pepi.

20 Upepipa, Musadi tamupra pepu. “Sun kwardana gume. Ange yuma kupmara deiyoda, Allahdi kurpetenange kupserepa, kwar tenepmumdi, mali keca men kunkamrume. Allahdi, ‘Ne tep kware kuprepa, mali men kupkamenge’ tenepmasera tep, kunmare,” Musadi pepu. 21 Israel nesala yumada, karenai di bena teka dinmai dinin, Musapuda, ila dua kunukmaua kan-kan, Allah damai beu.

Allah Yahweh tep, karen keca uku dongonai, gel yakra ketenemdina tep, pepu upu

22 Allah Yahwehdi Musa tep, “Israel nesala sun yuma gekena tep, aupu pepkurume. Upepkurum upuda ake. Ada, ne Allah Yahweh im deiki tara kunedi, sun tep, upu pedinun ngeda, sun pedi konum gekepra kael keamrume. 23 Atep nengeda, sun pe kange dipapu tenepra, ‘Akecada, nun nai bo kunkamra tep, er si eremkamep’ tenen, urasin telep keca pio men petupra deipkamrume. Ada, urasin telep kunumna weik keca, er sida emas cap, tonda urasin telep kunumna keca, er sida perak cap deiki di, nimi urasin utopu do, uda, tali gam kuramre keca urasin utopu do, ‘Akeca ton ketenepra deipmepedi, nun nai Allah cap, akeca cap tep, si erepra gispal donkamepe,’ pio men tenenkamrume. Ne Allah Yahweh, ne tenpu tepapu gispal donkamnerume.” Allahdi, sun Israel nesala yuma gekenkameng’ tenen, Musa tep aupu upepra deipu.

24 Upepudi, aupu ton cap dukdongopra pepu. Ne Allah, ne si eremna tep, gam keca popra uku dongonkamrume. Ukunkamrumai tep, sun adipapu tu doprapmumdi, telepra deipmumnyopda, ne si eremna tep, gam keca popnedi karenai ketenepkamrume. Ukupmum dingeda sundi, domba bisam cap, sapi bisam cap, popra yamumdi, ‘Nun mali kupmap ngeda, Allah kau kepseredi, telep kudinkamser’ tenen, uku dongoryakankamrume. Tonda, ‘Allah cap, nun cap telep kupra kikimanpu kupedi, er dipapu melimkamser’ tenen, yuk gam keca popra, tu di keteneipkamrum keca deiki uku dongopmumpa, jepredi siltong telepnge ne damai welerepa gekepnedi, sun tep, ne kange derinkamsene. Ada, nedi sun tep, ‘Acada, sundi ne si eremna tep, ketenepra deipkamrumaida, acapu deipkurume,’ pepnyopda, amutu yumada, ne si kange di ton cap tenenkamnerume. Apepmansentopu konum kumumnyopda, neda sun damaipu yakanedi, sun tep telep kudinkamsene.

25 Uda, sundi, ne Allah karena tep, gam keca popra uku dongonai tep, gel taplakra yakra keteneipkamrumai mesbada, nimi buru deiki di gel paun keca deipra bongopmange gelda, dopra pio men derinkamrume. Tali akapre pala gelpu dopra yamumdi, yakeipkurume. Ange kunkamruma deiyoda, ake. Ada, gel pangna keca di bongopra deiamenge gel di dopra, taplakra yakra deia domengai keteneipmengopda, konum mali kudinmarume. Ada, nimi buru deiki di, gel paun keca deipra bongonmanga deiki di, agel konum mali kudinunge. Atep nengeda, ato gelda, ne si eremna tep, uku dongona kecada, pio men ketenepkamrume. Ato gel deiki, gam keca popra, ne karena tep, uku men dongoryakankamrume.

26 Tonda, ne Allah si eremna tep, gam keca popra gel deiki do, tu deiki do, uku dongonaida, ila lyoma di, men donkamrume. Deiyoda ake. Lyoma di deipra dopmumnyopda, er itara welena tep moromna co doprumdi, aco welerbemumnya deiki di, yuk nengdi, sun nong iriamu tara ton, ali kupmanto ngeda disenunga tep pepsene. Atep, ne si eremna tep uku dongona damai moromna co deipmumdi, moromna co welena pio gume pepsene. Allahdi, ‘Sun Israel nesala gekenkameng’ tenen, Musa tep pepu.