Exodus 21

Co bo deiki di kunumnung nesaladi, Ibrani nesala cap, kikiman dukdongopra kuna tep, pepu upu

1Allahdi Musa tep upepu. Ne Allahdi, ‘Angeda kunkamrume, angeda, pio men kunkamrume,’ pepra deipkusen upuda, Musa kandi sun Israel nesala yuma tep lap perbenkurume. 2Aupuda ake. Sun ati melipra pel dona tep, sun pe mutu nengpu, co bo deiki di, kunumkamrum Ibrani yala nesalada, keteng tamun ngangtan bari deiki dipu, pel donkamnung dinin, keteng tamun yoneitam baringe konum kupyopda, anesala tamkamrume. Tapmumpa, benkuryopda, er adipapu tali lupra bankamrure. Ada er yo pununa tep, kunumna keca ton men karenkamserure. Adipapu tapmumpa, erda telepe dipapu barepa, sundi er tep, ‘Telep dipapu dabeo,’ penkamrume. 3Ukupmantoda, sun ati pel dona tep, nimi ton kaber dipapu co bo di kunupra deiamrumpa, pel doramseryane, keteng tamun yoneitam bari deiki pel doramreyanen, keteng tamun yoneitam bari deiki pel dopseryopda, yoneitam keteng tamun deikida, sundi akaber ngebo tapmumpa, adipapu er yuk bankamrure. Dinin, akati pel dona tep, melimna ngebo ner konum domupane, sundi co bo deiki angebo kunuamrumpa, erdi sun pel doramyanen, tapmumpa, er benkure taruda, er cap, er domu ner cap, kikimanpu bankamrerunge. Er nerda, men tapra benkamrure.

4Dinino, akati deiyo ngebodi, er pel melimna tep, kaber ngebo ton co bo deiki kunupredi, angebo tep ner ton kareprepa, dopra kuramyanen, angebo cap, er ner capdi, sal mi do, ner mi do, deipkamreng nyapuda, akati deiyo ngebo erngepu kunkamenge. Angetopu, sun nin peda, akati deiyo ngebo erngepu kunkamre. Anyapu cap, aner cap akatipu tupa kunkamenge. Akati pel melimna ngebo tapkamrum taruda, er domre ner cap, sun nyapu capda, tapra er yukpu bankamrure. 5Dinino, ukupmantoda, akati pel melimna ngebodi, “Gume, ne ner cap, ne nyapu cap, tonda co bo deiki kunupneu ngebo, akati deiyo ngebo cap tep, bicau tenepra, kange derinuna cadi, sun yuma tep tapra men benkune,” tenepredi, pepyopda, er angebo men bankamrure. 6Ukupre ngeboda, er deiyo ngebodi adipapu doupra, Allah er si eremna ati damai dubankamrure. Konum duberyopda, adeiyo ngebodi, er ati buplan dam ayumnya co ikamengai bena, ‘Aca teko,’ peprepa tekyopda, er deiyo ngebodi, gat keca takkenge dopredi, apel melimna ngebo er amul bon potokamre. Ukupra potokredi, peten keipre pangeda, er apel melimna ngebodi, akati deiyo ngebo tep, pel melipra dona ngebo pio kunkamre. Er gam kunkamre taru yumada, akati ngebo tep, menenga keca ton karena gum dinin, pel melipra donkamre.

7Ibrani yala nerapu ton sun nai yapudi, co bo putaprepa, yuk neng damai bena kunuamenge nerpuda, keteng tamun ngangtan bari konum mapmengopda, yoneitam keteng tamun kupyopda, aca di nimi tali maton gum pel doramenge neng tapmengepa baramenga utopu, anerda men bankamre. Nimi pel doramenganen, keteng tamun yoneitamnge keprepa, tapmengepa baramenga utopu, sun nerapuda tapmengepa men bankamnunge. 8Ukupmantoda, ‘Aner kunupnedi, amenda taru ne dipu dopkamne’ tenen, tenpu ngebodi co bo deiki di kunupra domre nerda, er deiyo ngebo tenepmaretopu, anerdi men kuprepa, adeiyo ngebodi aner tep kange men deipyopda, angebodi aner dopra yuk neng tep kunupkamre. Ada, aner yo pununa tep, yuk nengdi aner kunupkamenge. Dinino, ‘Aner dopkamne,’ teneamredi, aner kunuamya deiyo ngebodi, tali tengyakan neng tep, men kunuptue. Yuk mutu nengdi ato ner men kunumkamnunge. Deiyoda, aner kunuamya deiyo ngebodi, aner tep, ‘Amenda taru dopkamkene,’ pepra pediramrur dinin, aner tep kange men deipka cadi, aner men dopkamre. Atep nengeda, erdi pediramu upu konum yanipya tep, aner dopra, yuk mutu di tali tengyakan neng tep, men kunumkamrure. 9Ukupmantoda, aner kunuamre deiyo ngebodi, ‘Gume, ne deipsi mi tep aner karepnepa dopkamre,’ tenepredi, er mi tep kareprepa, ange midi aner dopyopda, aner kunuamreya deiyo ngebodi aner tep, ‘Anerda ne ner mi sisa utopu kunkamre,’ tenepredi, aner tep telep kupra melimkamre. Ada, angebo er ner mi sisa tep melimamretopu, menop taru di kunupu dinin, er pedi men dopkamre ner tep nengeda, telep kupra melimkamrure. Anerda, er ner mi sisa utopu kupra kunkamre.

10Amenda taru, akati deiyo ngebodi, yuk ner ton cap tapakra doapreya peda, er menmena domre ner tep, tupa melimnapu kunkamre. Ada menmena domre ner, er jen keca cap, opkal cap, tonda yuk keca yala-yala yuma capda, er men di kareramretopu kupra, amenda taru peda tupa karenkamrure. Aner tep, ‘Gume, ukuda yuk ner konum dopmana tep, kanda tupa men melimkamkene,’ pepra, men di domre ner tep, men taptue. Er amenda taru dopkamre ner melimkamretopu, er men di domre ner tep, utopu, telep kupra melimredi, akeca-keca yuma tupa karenkamrure. Anerapu butene cap, angebo cap, telep kupra kikimanpu kunkamnunge. 11Dinino, adeiyo ngebodi, er men di domre ner tep, “Gume, er jen keca cap, opkal cap, nun nerapu tep melimnup keca cap, ange yuma aner tep men melipkamne,’ tenepredi, aner tep tek sisi melipra men karenkamne,’ tenepyopda, angebodi er men di domre ner tamkamrure. Aner taprepa benkuryopda, anerdi er dopmare ngebo tep, ‘Yo pununa co bo ton karepkune,’ men tenenkamrure. Tonda, aner men di domu ngebodi aner tep, ‘Co bo ton karepkunerume,’ men penkamrure.

Allahdi Musa tep pepu.

Ton nengdi, ton neng tep, mali kweipdangepa, ange kunumna utopu kunkameng keca tep, pepu upu

12Allahdi Musa tep pepu.

Ware ngebo do yuma, er yu kuprepa, nimi ton poptaprepa, depyopda, angebo er peda adipapu wenepra poptapmengepa, denapu kunkamrure. Nimi pona deiyo ngebo, er wenemna tep, portamnapu kunkamrume. 13Dinino angeboda, dina di, ‘Angebo poptene’ tenena gum dinin, er mankau di poprepa, depyopda, sundi, ‘Gume, Allah er kange ja,’ tenenkamenge. Ton ngebodi, ton ngebo tep popu ngeda, Allahdi upu men seku. Atep, nimi popmarya deiyo ngebo, kwar kuprepa, ‘Yuk nengdi ne wenemna tep, popnunung’ tenen, bura saka, ‘Dan mutu benkun do?’ tenen, bisi tep, er giringre pangeda, ne Allahdi, “Er telep kupra kunkamrumaida ake. Abisi beyo,” pepra, lap pepkamne ja. Ukupnyopda, er abena kunkamre mutu peda, nedi kalekra melimkamemene. 14Dinino, ware ngebo do yuma, er kabo tep, ‘Angeboda, ne song cadi, ware kuprap di poptene do?’ tenenapu kupredi, yu kange doupredi, tulum kuprepa, er kabo poprepa, depyopda, angeboda, nedi kalekra men melipkamne. Gume, ato ngebo tep nengeda, yu di er kabo poptapre pangeda, angebo doupra ne damai di dubemumdi poptamkamrume. Ada, sundi, ‘Nun nai Allahdi, nun mali kun keca kaukepseredi, daepkamser’ tenen, yapi keca popra, pala gel taplakra keteneipmamuma damai dubemumdi, er tep wenepra popmumpa, depkamre. Deiyoda, er dina di, yuk ngebo poptapka cadi, ato ngeboda, nedi men lyepkamne.

15Ware ngebo do yuma, er nai cap, er nin cap tep, poprepa deprengopda, angebo er peda, adipapu wenepra popmengepa denkamrure. 16Ware ngebo do, ‘Co bo dopropkamne’ tenena tep do, yuk deiyo tep do, nimi ton tomopra ateng kouprapredi, er puto di yan tomopredi, doupra yuk neng damai bena kunupyopda, er amali kupre ngebo, er wenemna tep poptamkamrume. Ange utopu, ‘Co bo dopropkamne’ tenen, nimi ton tomopra ateng koupra, dubenamredi, dabena kuramrepanen, sun deiyo nengdi amali kupmare ngebo epmengedi, tomopmengopda, er wenemna tep popra tamkamnunge. Ada, er tomopmare ngebo gam tupa kunmatua peda, amali kupre ngebo er wenemna tep nengeda, ponapu kunkamnunge. Ukupre ngeboda, er adipapu wenepra popmumpa, denkamrure.

17Ware ngebo do yuma, er angebodi, er nai do, er nin do, sun tep, ‘Ikin kuptue’ tenen, mali upu pepra wenemdongoramre ngeboda, adipapu angebo er wenemna tep, popmumpa denkamrure. 18Ukupmantoda, nimi tenpu-tenpudi, podanmanka tenpu ngebodi, gel dopra er kabo tep, poprepa, men depyopda, er apopmare ngebo tep, wenepra men popkamrume. Ange utopu, nimi podanmankapmengedi, tenpu ngebo, er buru di getepra, er kap poprepa, men depyopda, er apopmare ngebo tep, wenepra men ponkamrume. 19Dinino, er kabo poprepa, tuai saka dourberedi, tali embenmanto men kuptupa, er ati pumbonpu maramyanen, amenda taru er maca talepredi, ati bura tara embenmanto kupyopda, er apopmare ngebo tep, wenepra men poptapkamrume. Dinino, er apopmare ngebodi, er kap pel men dopmanto kuramre taru pununa tep, co bo ton bulupra karenkamrure. Tonda, ‘Ne kap popmanupa, dila kupka cadi, ange yuma telep kupra kaiktue’ tenen, ‘Ukuda teleppu kunmar do, gum do?’ tenen, pio melipra dinapu kupredi, er kabo tep pio melimkamre. Konum kaikrepa, telep kupyopda, akonuma.

20Ware ngebo do yuma, er pel melipra dona tep, co bo deiki di kunupra duyakarur ngebo dipapu, nimi do, nerapu do, balena di sun nong deiki poprepa depyopda, apel melimna nesala balana di popre ngeboda, adipapu wenepmumdi, angebo er nong deiki ikin keca derinkamrume. 21Dinino, apel melimna nesala dinin, tenpu ngebo do, ner do, popmare ngeda, komuni tenpu do, butene do, mapmare dinin, adipu men depyopda, er popmarya deiyo ngebo tep nengeda, ikin keca er nong deiki men derinkamrume. Deiyoda, anesalada er pel melimna tep, co bo deiki di kunupra yana deiyamrura cadi, anesalada, erngepu kununge. Erdi tenepretopu kupkamre ja. Atep, er popmare ngebo men depyopda, adeiyo ngebo tep, ikin keca er nong deiki men derinkamrume. 22Ukupmantoda, nimi ware kuprap neng do yumadi, sun podanmankapmengedi, mundu douamre ner, er nong deiki popdongopmengepa, aner er nong yuma pu men jepkamre dinin, er mi mundu pumbon di menmena deiprepa, ami cap, er nin cap men deprengopda, apopmare ngebo tep, men poptapkamrume. Dinino, aner er domre ngebodi, ‘Gume, ne ner popmanuruma cadi, co bo ukupra karepkunerume,’ pepra moropyopda, amutu upu lepsisikra derina deiyo nengdi, ‘Telepe, er pepmaretopu, co bo ukupra karenkamrume,’ pepmengopda, aner popmare ngebodi, ange utopu kupra karenkamrure.

23Dinino, aner er popmange ngeda, ila di ikin kupyopda, er apopmare ngebo tep, aikin kupmaretopu er tep wenemkamrume. Ada, aner popmare ngebo er nong peda, poprumupa, er aner er nong dila dopmaretopu, angebo er peda dilapu donkamrure. Angetopu, aner popmangepa, aner do, er mundu douamre mi do, depyopda, apopmare ngebo ton, tamupra poptapkamrume. 24Ange utopu, tonda aner er asurupu luktapmangopda, apununa tep, aner popmare ngebo, er asurupu lungtamkamrume. Aner er si luktapmangopda, er aner popmare ngebo peda, er sipu lungtamkamrume, Tonda aner er buru copmare pangeda, er pununa tep, aner popmare ngebo, er burupu comtamkamrume. Utopu aner er yan copmare pangeda, er pununa tep, aner popmare ngebo utopu, er yanpu comtamkamrume. 25Angetopu, aner er suse dila dopmaryopda, apununa tep, aner popmare ngebo, ‘Er peda susu dilapu dopkure’ tenen, dilapu dodinkamrume. Ange utopu, nimi podanmankapmengedi, aner er nong bol deiki uku jen suse kupyopda, akupmare topu, ange pununa tep nengeda, aner popmare ngebo, er peda uku jen suse utopungepu doronkamrure. Tonda aner popmangepa, er nong bol deiki nepmaryopda, akupmarya pununa tep, aner popmare ngebo, er peda popmengepa, nenapu kunkamrure.

26Ware neng do yuma, ‘Ne pel melipra donkamner’ tenen, er co bo deiki di kunupra deriryakanung neng, ada nimi do, nerapu do, sun asuru tulupra popmengepa, er asuru konum mali kuprepa, men epmanto kupyopda, ange kunumna tep nengeda, er deiyo ngebo, er pel tupa melipra men donkamrure. Akupmare ngebo, er asuru pununa tep, er pelda taprepa pel melimna gum di, talipu kunkamrure. Er deiyo ngebodi, asuru mali kweipmare ngeboda, taprepa, pel dona gum di, telep kupra talipu dakunkamrure. 27Ange utopu ton, er deiyo ngebodi, er pel melipra doramre ngebo tep ponmarepane, si du copra, luksakre pangeda, akuprenge pununa tep nengeda, angeboda, er deiyo ngebo tep pel melipra men donkamrure. Dinin, er si du pununa tep, adeiyo ngebodi, apel dore ngeboda, taprepa, tali kange doupra dakunkamrure.

Nimi pein keca kuna tep, pepu upu

28Jem sapi bisam giso deiki takke beleramre ngedi, nimi nong deiki lukra poprepa depyopda, ukunkamrume. Angebo konum depmarenge wenemna cap, pununa karena cap tep nengeda, asapi bisam adipapu gel di dopra, popmengepa denkamrure. Gel di yarepra popmengepa, konum depre pangeda, er tuda nimidi dopra, men jenkamrume. Tonda, asapi peiramya deiyo ngebo tep, ikin keca pio men derinkamrume. Angebo er sapi bisamdi popmare ngeda, er deiyo gum tepa. 29Dinino, ajem sapi bisam er giso takke di, nimi tupa-tupa poramyopda, yuk nengdi, asapi deiyo ngebo tep, “Ware keca deiyo tep kan sapi bisamda tapmumpa, nimi weika di tupa porur do?” peramengepapu, asapi deiyo ngebo gekena gum di, moupra men kalengamya deiki di, er sapidi nimi ton cap popyopda, ajem sapi bisam pe, ajem sapi bisam deiyo ngebo peda, gel di poptapkamrume. Ada, sun wenemna tep, nimidi gel dopra yangedi, popmengepa, sun kikiman denapu kunkamrenge.

30Dinino, sun adepmare ngebo er tara nengdi, ajem sapi bisam deiyo ngebo tep, “Uda, kan men depkureme. Dinino, ange yo pununa tep nengeda, nundi kan tep moropkepetopu kupra karepserume,” pepmenge pangeda, asapi bisam deiyo ngebodi, er pe yo pununa tep, sundi pepmengetopu co bo bulupra karepyopda, akonuma. Angebo er wenemna tep, men poptapkamrume. Ada, sundi er tep, “Ware kuprap do?” pepra moropmenga peda, karenapu kunkamrure. 31Apepmantopu, ajem sapi bisamdi, er deiyo ngebo, er sal nyapu do, ner nyapu do, utopu poprepa depmengopda, asapi bisam pe, adeiyo ngebo peda, sun wenemna tep gel di dopra ponkamrume. Dinin, yuk nengdi, “Gume, er men depkamre dinin, co bo ukupra karepkusere,” pepmengepa, erdi karepyopda, akonuma. Erda men popkamrume.

32Ukupmantoda, nimi melimna tep, co bo deiki di kunupra deipmengepa, menenga keca ton dorona gum dipapu, tali pel melipra dona tep, pel doramre nimi do, nerapu do, asapi bisam er giso deiki takke keca dipapu lupra poprepa, depyopda, asapi bisam deiyo ngebodi, gel uang weiknge tiga puluh perak dopra, apel melimna ngebo, apopmarya er pununa tep, ‘Pel donkamner’ tenen, co bo di kunupra deiyamre ngebopu, karenkamrure. Karepyopda, asapi bisam deiyo ngebo men popkamrume. Dinino, ajem sapida, adipapu gel dopra poptapmumnyopda, denkamrure. 33– 34Ware ngebo do, er me jena tep, bunkon mokon palipyopda, abunkwan me palipra deiamyaida, singidongonkamrure. Tonda, yuk nengdi, bunkon mokon paliamenge nge, epredi, sundi singipdongomenge buplan dangapra dopropmare dingeda, abuplan bon tamupra singidongonkamrure. Dinino, apumbon buplan men singiamre pangeda, jem sapi bisam do, ner sapi do, tonda keledai bisam do, mangkau bandenkapredi, abon pumbon sakyopda, bunkwan mokon paliamre ngeboda, wenemkamrume. Tonda, abon buplan men singidongopmare ngebo wenepkamrume. Ada, adepmare bisam pununa tep nengeda, co bo doprapredi, abisam talepra peiramya deiyo ngebo tepapu, karenkamrure. Co bo konum karepyopda, abon sakmare bisamda, er co bo karepre ngebopu, adepmare sapi nongda, doronkamrure.

35Tonda ware ngebo do, er kabo jem sapi bisam giso takke di, yuk ngebo er jem sapi bisam ton, lukra poprepa depyopda, apopmare sapi bisam nong doupra, er tu galepra, sun butene bongdonkamrenge. Tonda, gam tupa kupre sapi bisam doupra, yuk neng tep, kunuproprengedi, aco bo doupra, sun abutene nengda, kikiman bongdonkamrenge. 36Dinino, yuk neng sapi bisam, men di er giso deiki takke weik beleramre ngedi, lukra popyakaramyanen, yuk nengdi, ‘Kan sapi bisam kalengna tep, beilya wipra dongopkamrume,’ pepra wenepmange dinin, abisam dipu, ton cap poprepa, epmengedi, “Gume, ada men di yuk neng nge popyakaryanen, atumi peda popre. ‘Ajem sapi bisamda, beilya wiprapredi, abeilya pumbon men dongopredi, moupra men kalengrura deiki di, ukupmare’ tenen, kael kepmengopda, angebo wenepkamenge. Ada, apopmare jem sapi bisampu, er yo pununa tep, gam kepman sapi deiyo ngebo, erdi depmare sapi deiyo ngebo tep, co bo karenkamrure. Depmare sapi pununa tep, gam kunmare sapi deiyo ngebodi, co bo konum karepyopda, er dipapu adepmare sapi bisam tuda, galepra jenkamrure.