Exo 22 | XteSC | STEP | Ware ngebodi do, nimidi peiramenge kecada, sapi bisam do, domba bisam do, upula dopropredi, co bo kunupkamre do, agum dingeda, popra jepkamre do, autopu kupmare pangeda, er yo pununa tep nengeda, aupula don ngebodi, sapi bisam tenpu dopropmaryopda, ka di tapakra sapi bisam pamubari karenkamrure. Tonda, domba bisam tenpu upula dopropmaryopda, ange yo pununa tep nengeda, dumbari karenkamrure.

Exodus 22

Yuk nesala keca upula doropmengopda, “Ange kunkamrume, angeda pio men kunkamrume,” pepu upu

1 Ware ngebodi do, nimidi peiramenge kecada, sapi bisam do, domba bisam do, upula dopropredi, co bo kunupkamre do, agum dingeda, popra jepkamre do, autopu kupmare pangeda, er yo pununa tep nengeda, aupula don ngebodi, sapi bisam tenpu dopropmaryopda, ka di tapakra sapi bisam pamubari karenkamrure. Tonda, domba bisam tenpu upula dopropmaryopda, ange yo pununa tep nengeda, dumbari karenkamrure. 2 Tonda ukupmanto, upula don ngebo, ‘Upula dopkun’ tenen, lukunda neitamai yuk neng sun beilya wipdongomenga damai yaredi, abeilya yana dangrepa, epmengedi popmengepa depkamre. Dinino, aupula donmare ngebo popkamre ngebo, er buru deikida, apopre ngebo yapi men kupkamre. Atep angeboda, wenepra men popkamrume. 3 Dinino, ukupmantoda, upula don ngebo keteng komuni taru yakarepa, epmengedi popmengepa depyopda, aupula don ngebo popkamra deiyo ngeboda, er buru deiki yapi akapkamre. Angebo tep wenepkamrume. Aupula don ngebodi dopropmare kecada, ka di tamupra akeca punupra karenkamre. Dinino, akeca-keca yuma gum ngebodi, upula dopropre dingeda, aupula dopropmare ngebo tomopra, ateng koupra deipmumpa, yuk nengdi, ‘Nun pel melimna ngebo kunkamser’ tenen, co bo deiki di angebo kunupkamenge. Kunupmengedi, akarepkameng co bo deiki di, er upula dopropmare keca, kange di kunupra karenkamenge. Ukupmumnyadi, er upula dopropmare kecada, er pe nong deiki dipu punupkamrure.

4 Aupula don ngebodi, yuk neng sun peiramenge keca sapi bisam do, domba bisam do, keledai bisam do, upula doropmaredi, dakunmarepanen, yuk nengdi epetepmengedi, aupula dopropmare keca gam tupa kunmarepa epmengopda, er angebodi akeca pununa tep, ton cap tapakra butene karenkamrure. Ada, gam keca tenpu dopropmare dinin, ka di ton cap tapakrapredi, akeca yo pununa tep, akeca utopu butene karenkamrure. 5 Tonda, ware ngebo do, er domba bisam do, bisam do, kambing bisam do epredi, er wai dam sirikai gerekra deipmaryanen, turya kwaproprepa, bandenkapredi, anggur tapu du wa do, yuk koun keca wa do, yuk ngebo er peamyai bena jepre pangeda, apein keca deiyo ngebodi, awa peamre ngebo tep, er bisam jemare keca pununa tep, pio telep anggur tapu du do, yuk koun keca pio telep ngepu, karenkamkurure. Ada, pein keca deiyo ngebodi, er pe wa neitamai di do, er pe anggur tapu wa neitamai di do, du moupre pangeda, pio telepnge kipra, yuk wa deiyo ngebo tep, punupra karenkamrure.

6 Ware ngebo do, er wai dam bena uku sekmarepane, uku jepbanmankapredi, takke keca do, yuk keca do, jepbanmaredi, awa damai yuk ngebo ton, er jagung utopu keca, gandum wa pepra kouamrenge yuma do, tonda kinmaredi, koupra derinmarenge do, uku di bena jepre pangeda, ange pununa tep nengeda, auku sekmare ngebodi, agandum wa pio telepnge peamyaipu yo pununa tep, kunumna keca karenkamrure. 7 Tonda ukupmanto, tenpu ngebodi, er kabo tep, “Ne kabo, kandi ne kecada, co bo do, yuk keca do, ‘Yuk nengdi upula dopropnenung’ tenena tep, karepkenepa, kan ati ke tep deipmanemempane, amenda taru ka di ton dopropkamne ja,” peprepa, doupra bena deipmarepane, upula don nengdi yana, akecapu dopropmangepa, enmanganen, aupula dopmare ngebo konum epmengopda, aupula dopmare ngebodi, er deiyo ngebo tep punupra karena tep nengeda, akecapu dinin, kange di ton cap, butene tapakra karenkamrure. 8 Dinino, akeca upula dopmare ngebo men epmengopda, “Akecada, ke tep deipneo,” pepmarepa, doupra bena deipmare ati deiyo ngebopu doupra, upu lepsisingna deiyo neng damai ubengepa, asimpetenkamenge. Ada, ‘Akati pumbon deipmau kecada, akati deiyo ngebo, er dipu er buru di talepra deipmaua cadi, akecada er pe dipapu upula dopropu do, gum do?’ tenen, asimpetepkamenge. Ukupkamenga cadi, angebo doupra, Allah si eremna ati damai dubengepa, adeiyo nengdi aupu tep, lepsisikra bongdinkamenge.

9 Tonda sapi bisam do, keledai bisam do, domba bisam do, agum dingeda, opkal do, uda, yuk yala keca yuma do, akeca yuma, yawaramrepa, dopropre dingeda, nimidi, “Gume, angeda kan keca gume. Angeda nengepu kurure,” pepra, pedanmarenge pangeda, sun adipapu aneng butene doupra, Allah Yahweh er si eremna ati damaipu dubengepa, akati upu lepsisingna deiyo nengdi, “Gume, Allah er dipapu epre dingeda, ‘Tek sisi akecada, angebo ernge kurure. Angebo ernge gume,” pepra upu bongdinkamenge. Sun adeiyo nengdi, “Angebo ernge gume, erdi tali upupu penmare,” pepmenge ngeboda, erdi er kabo tep kunumnada, weika di ton cap, adipapu tapakra, akeca utopu butene kepra karenkamrure. 10 Ukupmantoda, tenpu ngebodi keledai bisam do, sapi bisam do, domba bisam do, yuk pein keca do yumada, er kabo er melimna tep, tamrepa, keana peiramrepane, depkamre do, susi dila dopkamre do, uda upula don nengdi dopropkameng do, ukupmenge ngeda, yuk neng sun asuru di men epmengopda, ukupkamrume.

11 Ukupra menepmenga tep nengeda, apein keca keana tep dopropmare ngeboda, adipapu Allah si eremne atipu beredi, Allah Yahweh damai bere dingeda, upenkamre. “Gume, Allah Yahwehdi dinmanerpapu, ne tek sisi pepne. Ne kabodi ne tep, ‘Kandi, ne keca keana peinkamnerume,’ pepra moropneupa, peiramsi ngeda, ne buru di upula men dopropsi. Tonda, nedi men popsi,” penkamrure. Upepyopda, abisam deiyo ngeboda, aupu gekepredi, ‘Tek sisi pepmare,’ tenenkamre. ‘Akupmar do, gum do?’ tenen, pio tupa-tupa men tenenkamre. Akeca keana tep peiramredi, kalengamre ngebodi, “Ne gume,” konum pepre pangeda, akonuma. Abisam keana tep peinmare ngebodi, abisam deiyo ngebo tep, akeca pununa tep, kunumna keca men karenkamrure. Sun yumadi, ‘Akonuma,’ tenenapu kunkamenge. 12 Dinino, upula don nengdi, apein keca keana dopropmare ngebo, er ati di, tek sisi upula dopropmangopda, abisam keana pel dona tep peiramre ngebodi, apein keca er deiyo ngebo tep, ange yo pununa tep, adipapu kunumna keca karenkamrure.

13 Dinino, akeana tep dopropmare ngebodi, apein keca peiramrepanen, adomba bisam do, cap bisam do, bura tara kure gam keca, pio yu weiknge di, abisam yana popra jepmaredi, bululungsingina cap, yo totosesektapmare ngeda, ‘Tek sisi kupmare’ tenen, kael kemna tep, adipapu asesektapmare keca doupra yare pangeda, abisam deiyo ngebodi, akupmarenge, er konum epre pangeda, akeana peiramre ngebodi, abisam deiyo ngebo tep, kunumna keca tamupra men karenkamre. Akecada men punupkamrure. 14 Tonda, tenpu ngebodi, er kabo tep, “Ne kabo, kan domba bisam ne keana tep doupkamakene,” pepra moropredi doupmare ngeda, er adomba bisam deiyo ngebo aca men kunmarepapu, yo copmare do, depmare do, ange konum kupmare pangeda, er ke doupmare ngebodi, adeiyo ngebo tep, pununa ngeda, adipapu kunumna keca karenkamrure.

15 Dinino, adomba bisam deiyo ngebo, er cap tonpa kunmarengedi dinmarepane, apein keca yo copkamre do, depkamre do, konum kupyopda, keana tep doupmare ngebodi, akeca yo pununa tep, kunumna kecada men karenkamrure. Dinino, akeana dopmare ngebodi, er kabo tep, “Kao, kan domba bisam do, sapi do, co bo karepkenya deiki di, abisam ke doupmakenyanen, karepkamakene,” pepmarepa, dounmareanen, ataru neitamai di, yo copkamre do, depkamre do, konum kupyopda, abisam ke dopmare ngebodi, abisam deiyo ngebo tep, men di co bo konum kareamya cadi, yuk kunumna keca ton, tamupra adoupmarenge pununa tep, co bo tapakra men karenkamrure. Ada, keana dorona tep, co bo konum karepka cadi, ton cap tapakra men karenkamrure.

Nimidi mali tenenange, konum kupmengopda, “Angeda Kunkamrume, angeda pio men kunkamrume,” pepu upu

16 Ukupmantoda, nimi cap antamna gum ner, pio kaberpu kuramrepane, nimi yuk nengdi, ‘Aner dopkamne,’ pena gum di, aner tep mun men penmangepapu, ton ngebodi, aner naproprepa, sun tonpa mapmarengopda, anerda, adipapu er nerpu kunkamre. Ukupyopda angebodi, aner tappa tep, adipapu karenkamrure. 17 Dinino, aner er nai bodi, “Angeboda, ne ner mi pio men dopkamre,” pepyopda, aner napropmardi, sun tonpa mapmareng deiyo ngeboda, aner cap antapmarengenge tep nengeda, adipapu pio telep kunumna keca karenkamrure. Ada, nimi cap kapul men mapmare kaber ner, er tappa tep kareramengtopu, kunumna weik keca co bo karenkamrure. Ada, er cap, aner mi cap ke mapmarenge nge pununa tep, kunumna keca karenkamrure.

18 Isok pel dona tep, asuru kwakrepa, ila di kael kemrur ner, tek sisi amali pel tupa-tupa doredi, sun damai akure pangeda, adipapu aner popra tamkamrume. Isok pel do, ker dona ^{▼▼ker dona – Nun kaele, Ketengban tara neitamaida, tulum kupre nengdi, nerapu tep mali men kupmangepapu, mok upu deiki dipapu, ‘Anerda ker don ner kurure,’ pepra tali minina upupu penunge. Atep nengeda, yuk Allah upu neitamai peseretopu, anerapu tep adipapu tali lupra popmumdi, sun mutu neitamai men eneproptume. Tek sisi, aner pel doprepa, nimi ker dona keca nong akapmarepa yuk nengdi epmengopda, ‘E, tek sisi anerdi mem pel dorure,’ teneptume. Utopu, anerdi nimi ker don pel dopre taru, yuk butene neng ton, sun asuru di eprengedi, katuai dipu, ‘Nun epmanem kecada ake, ake,” pepra lap peptengopda, adeiki dipu teka teneptume. Bukti cap, saksi butene cap men kapyopda, aner men poptume. Tonda, sun mutu neitamai di, aner men eneproptume.} ner do, sun cap kikiman men kunkamrure.

19 Ware ngebo do, tali gam kure keca cap, tonpa tapakra mapmare ngeboda, adipapu wenepra poptapmumpa depkamrure. Nimi cap, tali gam kure keca cap antapra manada, pio meme. 20 Ware ngebo do yuma, ne Allah Yahweh tepapu, ne si eremna tep, gam keca poprumudi, uku dongonkamrume. Dinino, ware ngebo do yuma, sundi tali keca tep, “Ne nai bo,” pepra, atali keca tep si eremna tep, yapi keca popra karepredi, akeca tepapu si eremre ngeboda, adipapu poptapkamrume. Ada, ne Allah Yahweh tep, tamnurur ngebo kurura cadi, adipapu, er tep poptapkamrume. 21 Nimi bo neng, sun damai akunkameng neng tep nengeda, ikin keca pio men derinkamrume. Ange gum dinin, melimnapu kumumdi, aneng tep dumsisipu kunkamrume. Akunkamruma deiyoda, ake. Ada, sun Israel nesala peda, Mesir mutu neitamai kuramrum taruda, sun peda, nimi bo neng utopu kuramrumpa, Mesir mutu nesaladi, sun nong deiki ila ikin keca weik deriramidi, mali kudiramseiya tep, pepsene.

22 Utopu tonda, sun damai kunge solu nerapu cap, lyan nyapu cap tep, ‘Sunda tali nesalapu kununga cadi, dakwapye’ tenepra, sun damaida, ikin keca deiprumudi, sun tep mali men kudinkamrume. Sun damaida, kange mun keca men derinkamrume. 23 Ada tali tep men pepsene. Deiyoda, sundi anesala tep, ikin keca sun nong deiki deiprumudi, mali kudimumpa, sun solu nerapu cap, lyan nyapu capdi, ne Allah tep, “Uo, nun naio, nun kange mun kusere ngeda, melipserume,” pepra, ila upu deiki di, “Melipseo,” pepra, moropnenge pangeda, nedi sun upu tek sisi gekepkamne. 24 Sundi solu nerapu cap, lyan nyapu cap tep, mali kudirumupa ngeda, sundi ne tep, “Naie, melipseo,” pepra moropnengepa, aupu yuma gekepne dingeda, ne yu weik kupnerepa, nedi peipnepa, yu nengdi parang ya dopra, sun damai yangedi, yana poptamkamsenge. Popsengepa, sun nerapu yumada, solu nerapu kunkamenge. Tonda, sun nyapu yuma peda, lyan nyapupu kunkamenge.

25 Ne nyapu sisa, sun Israel nesalada, sun talerum co bo neitamai di, kan-kan nesala tep, ketenepra keana karepmamum ngeda, sun kan-kan nesala, aco bo tamupra karepkameng taruda, ‘Yuk co bo ton itara cap tapakra karepnerume,’ men penkamrume. Ada, yuk neng, sun co bo weik talengedi, ataru-ataru yuma neitamaida, kan-kan nesala tep keana taru tep, karerameng nengdi, ‘Ne keca kareamkesi ngeda, tamupra karepkunerum dinin, menmena co bo weikanun ton, uang bunga ton tapaknememdi, tamupra karepneo,’ pepra peramengtopu, ne nyapu sisadi ange men penkamrume. 26 Ukupmantoda, kan kabodi co bo putaprepa, kandi aco bo keana tep karepmemdi, er tep, ‘Akeca tek sisi tamupra karepkamnerem’ tenen, “Kan telep keca, lyom opkal, bupu kemna ngeda, ke tep dopropnedi deipmanyanen, kandi ne co bo ton tamupra karepkamnerem taruda, alyom opkal ton tamupra karepkamkene,” pena meme. Angeda men penkamrum dinin, er opkal keana tep dopropmamemnyopda, atumipu keteng kapul men bena dakdongopre tarupu, adipapu tamupra karenkamrume.

27 Angebo er lyom bupu opkal keana tep dopropmemdi, ue weika di pio men derinkamruma deiyoda, ake. Angebo er lyom opkal bupu kemna ngeda, er nong bol leliprepa bupu kunada, angepu kurura cadi, kandi er opkal tamupra men karepmem pangeda, er mapkutu taru peda, ware keca di er nong lelipra maptupa, bupu kuptu do? Er tali maptupa, bupu men kuptu pangeda, angebodi ne Allah tep, ‘Melipneo,’ pepra, ila upu deiki di, mali pepra moropnere pangeda, nedi er upu tek sisi gekenkamne. Ada, ne Allah Yahwehda, nimi tep bicau tenena deiyo ngebo kununa tep pepsene.

Akeca-keca yuma kuna tep, “Angeda kunkamrume, angeda pio men kunkamrume,” pepu upu

28 Allah Yahweh tep, mali-mali upu pepra, er deiki di pio men penkamrume. Tonda, amutu neitamai nimi deiyo kepra talenung neng tep, “Sunda, tek sisi mali nengpu kurume,” pepra, men penkamrume. 29 Sundi talepra koumum kecada, anggur tapu du mokon cap, jagung utopu keca, er si gandum cap, minyak saitun co du me cap, ange yumada, neitamai di bokra, ne sun nai bo Allah Yahweh, ne tepapu bokra, kareryakankamnerume. Tonda, sun sal nyapu menmena weni derirumnge yumada, tamna gume, adipapu ne Allah Yahweh tepapu kareryakankamnerume. 30 Ange utopu, sun sapi bisam cap, domba bisam cap, kambing bisam cap yuma neitamai di, menmena nyapu weni deiprenge, jemnge yumada, uwe, yoneitam bari tumida, sun nin yapu damaipu kunkamnunge. Dinino, ue banbari (8) tumi konum kupyopda, adipapu ne si eremna tep, aweni gam keca yuma doupra, ne damai kareryakankamnerume. 31 Sunda tek sisi, ne nyapu sisa, pio dumsisipu kunkamruma cadi, sundi talepra peinkamrum gam keca yumada, bura tara gam kure yu kecadi, poptapmare ngeda, men jen kamrume dinin, angeda, adipapu doropra, sundi peirum kam tep karepmumpa, kamdi jenkamrure.