Exo 23 | XteSC | STEP | Sundi, minina upu deiki pepmangepa, gekepmum dingeda, upu tali-tali men pepembankamrume. Tonda mali kupmare ngebo dinin, upu lepsisikra bongdina deiyo nengdi, ‘Erda pio telep kupmara, tenepkamneng’ tenen, mok upu deiki di melipra men penkamrume. Sundi amali kupmare ngebo tep, mok upu deiki di melipra pio men penkamrume.

Exodus 23

“Nimi yuk neng yuma tep, mok upu pena gum dipapu, dumsisipu pel donkamrume,” pepu upu

1 Sundi, minina upu deiki pepmangepa, gekepmum dingeda, upu tali-tali men pepembankamrume. Tonda mali kupmare ngebo dinin, upu lepsisikra bongdina deiyo nengdi, ‘Erda pio telep kupmara, tenepkamneng’ tenen, mok upu deiki di melipra men penkamrume. Sundi amali kupmare ngebo tep, mok upu deiki di melipra pio men penkamrume. 2 Sunda, mali kunmange nesala weika di kunmangepa, epmum dingeda, ‘E, nun peda amali kunmangtopu, nun peda mali kunkamepe,’ tenepra, men kunkamrume. Mali nengdi mali kunmangetopu, sun ton melipra men kunkamrume. Tonda, sun anengdi, mali kupmangepa, upu lepsisikra derina deiyo nengdi, ‘Amali kunmange neng wenepkamep’ tenen, bulupmanga damai berumudi, nimi weika di, “Gume, anengda mali men kupmangu,” pepra, tali upu pepmenga peda, sunda ne nyapu sisa cadi, ange utopu melipra men penkamrume. ‘Mok upu deiki di, telep ngeda mali kupra deiprum,’ tenena tep pepsene. Malinge tep nengeda, ‘Angeda malipu,’ penkamrume. Telep ngeda, ‘Angeda teleppu kurure,’ pepra, dumsisi upupu penkamrume. Minina upu pena gume.

3 Tonda, tali kan-kan nesaladi, tek sisi mali kupmange neng tep, upu bongdina deiyo nengdi, ‘Sun mali kupmange nge tep, upu lepsisikra bongdinkamep’ tenen, ati duyange pangeda, ne nyapu sundi bicau teneprumudi, ‘Gume, amali kupmange nengda, kan-kan neng kununga cadi, dakwapye, malipu dakunkamenge’ tenen, sundi “Gume, anengda tek sisi mali men kunmange,” pepra, mok upu deiki di melipra men penkamrume. Ware neng do yuma tep, sun mali kupmanga utopu kupra, upu lepsisingkamrume. 4 Ukupmantoda, sun podan nengdi, sun peiramenge sapi bisam do, keledai bisam do, wangapmaredi, bura tara kunmarepa, sun mankau bandenkap, epmum dingeda, adipapu doupra, er pe deiyo ngebo damaipu tamupra duyakankamrume. ‘Apein kecada, ne podan nengdi sun talenung keca cadi, dakwapye dawangapkamrure,’ tenena gume.

5 Tonda, sun podan nengdi, ‘Anengda nun songe,’ tenesenung neng dinin, sun keledai bisam bungne keca deikida, ikin keca weika di kipdongopmangepa, dubanmaryane, er ikin pio weik kupmarya tep, lokbarepa epmumnyopda, tamna gume. Adipapu akeledai bisam melipra eremdinkamrume. Sundi, ‘Akeledai bisamda, ne podan nengdi, sun talenung keca cadi, dakwapye, ikin kupmara deiki di dadepkamre,’ tenena gume. 6 Sundi, kan-kan nesala ikin kupmarepa, ‘Upu lepsisikra bongdina neng, sun damai bepepa, dumsisi telep kupra upu lepsisikamasenge’ tenen, yange pangeda, sundi tek sisinge tepapu, upu bokra derinkamrume. ‘Gume, sunda tali kan-kan nesala cadi, dakwapye,’ tenena gume. 7 Tonda, mali nengdi sun upu lepsisikra bongdina neng damai yangedi, tali upu pepmenge nengda, sun upu pio men gekenkamrume. Tonda, amok upu gekepmum dingeda, kaukemtamkamrume. Ada, mali kupmare ngebo telep kupra deipnedi, er mali men kupmare ngebo tep, ‘Mali kupmare,’ peptapra, sun wenemna tep popruma tep, angeda men kunkamrume. Autopunge kupmum pangeda, lumdongona gume. Ne Allah Yahwehdi akeca-keca yuma dinuna cadi, tek sisi mali kupmenge neng tep, ‘Anengda, telep kunmange,’ men tenenune. Mali kupmenge nesala yuma tep, tek sisi wenepkamne ja.

8 Mali kupmare ngebodi, ‘Ne tarapu kepnetu’ tenen, bul kemna tep, co bo karepmenge pangeda, sun upu bongdina deiyo nengdi aco bo dopropmengedi, amali kupmange nesala tep, ‘Sunda telep kupmanga cadi, men wenepkamepe,’ pepra mok upupu pepmengopda, ada pio malipu kununge. Angeda, pio men kunkamrume. Deiyoda, ake. Bul kemna tep karerameng co bo dopropmenga deiki di, asuru telep neng dinin, asuru puna neng utopu kemdidanunge. Tonda, bul kemna tep dopropmenge co bo dopropmamenga deiki di, dumsisi kupmenge keca yuma peda, mali-mali kupra derirume. Ukupmumnya deiki di, mali kupmare ngebo, telep kupra deipmum dinin, telep kupmare ngeboda, mali kupra derirume. Atep, angeda pio men kunkamrume. 9 Tonda, Sundi nimi bo neng tep, ‘Ikin keca sun nong deiki, tali lupra deipkune,’ men tenenkamrume. Ada, sun peda Mesir mutu kuramrum taruda, amutu nengdi ikin pel dimamseipa, doramrum ngeda, sun pio moupra kael keamrume. Ange tep nengeda, lumdongona gume. Sundi nimi bo nesala yuma tep, telep kupra kunkamrume. Ikin keca sun nong deiki deipmumdi, ikin pel pio men dimkamrume. Ukunada meme.

Allah er gisal dona tep, beipye peingna utopunge kunkamenge nge tep, pepu upu

10 Keteng tamun ngangtan bari (6) neitamai yumada, sun wa pepra kounapu kunkamrume. Ukupmumpa, ange yuma nong kupredi, wisipre pangeda, kipra derinkamrume. 11 Dinino, keteng tamun yoneitamnge (7) konum kupre pangeda, men di peiamum wa tuda, kange di ton cap men penkamrume. Yal keca ton awa neitamai men kounkamrume. Awa tu tepapu tamkamrume. Ukuprumupa, awa neitamai men kouamrumu keca dinin, er pe yuk bongopredi, du moupra wisinkamre keca yala-yala yumada, kipra men jenkamrume. Deiyoda, kan-kan nesala cap, bura tara gam kure keca cap, sun tali dopra jena tep tamkamrume. Tonda ange utopu, sun anggur wa peamumnge cap, saitun co du wa peamumnge cap yumada, utopu kupra, keteng tamun yoneitam (7) konum kupyopda, awa neitamai mouramre keca peda, men kipra jenkamrume. Tali tamkamrume. 12 Tenpu minggu neitamaida, sun pe pel donkamrum dinino, ue yoneitam bari (7) tumi konum kupre pangeda, sun kun keca yuma tapmumdi, adipapu beipe peingkamrume. Ukupmum pangeda, sun pel melipra dona tep, co bo deiki di kunumrum nimi cap, nerapu cap, tonda, sun pel melipra donung nimi bo neng cap, tonda, sun pel melipra donung sapi bisam cap, keledai bisam cap, tonda sun peirum keca yala-yala yuma peda, yoneitam bari tumi deikida, beipe peingnapu kunkamenge. 13 Nedi, sun Israel nesala yuma tep, ‘Angeda ukunkamrume, angeda men kunkamrume,’ pepra, mem upu peipmasen nge yumada, pio moupra talenkamrume. Tenpunge peda, men tamkamrume. Tonda sundi, yuk-yuk tali keca tep, ‘Nun nai boda ake, erdipu melimkamser’ tenen, si eremna pio meme. Tonda, yuk nengdi tali keca tep, si eremenge kecada, akeca si sipepra, upuna pio gume. Ne Allah Yahwehdi pepsene.

Allah er si eremna tep, ila tumi keprepa, “Ukunkamrume,” pepra deipu upu

14 Keteng tamun, keteng tamun neitamai yumada, sundi Allah, ne si eremna tep nengeda, ue weneri taru deiki di, ‘Ila tumi konum kupmare’ tenepra, ne si eremkamnerume. 15 War tenpu, awar er sida, Abib neitamaida, nedi, ‘Atumi, atanggal deiki di ila tumi keipkamnerume,’ pepra deiamsisitopu, atumi konum kupre pangeda, sundi, ‘E, Nena Gum Roti Kwaneng jena tumi, konum kepmare,’ tenepmumdi, nedi sun tep, ‘Angepu kunkamrume,’ peiamsisitopu, kunkamrume. Ada, pumun taru dinin, awar neitamai dipapu, sun Mesir mutu neitamai kuramruma tapra, Kanaan mutu yanamruma tep, awar moupra tenepmumdi, ila tumi kemdinkamnerume. Akunkamrum yoneitam bari (7) tumi neitamai yumada, nena deiyo keca, er si ragi di tapakra dapmenge rotida, pio men jenkamrume. Ada, tenpu tumi di dipra, yoneitam tumi yumada, nena roti kwaneng men jenkamrume. Ukunkamrum taruda, atumi-atumi yuma, ne gispal dona tep yakankamrum taruda, buru bananga yakana gume. Sun wa pepra koumumdi, kimum keca neitamaida, telep karen keca doupra, ne si eremna tep, ne ati yana kareryakankamnerume.

16 Tonda, sun wa pepra kouamumnya, konum wisiamrepa weninge yupra kiamum tumi kupre pangeda, ‘Nun wa pepra kouamupkada, wisipupa weninge gonga keap kipkupnge yumada, nun nai bo Allahdi kareserura cadi, er sipu eremkamnupe’ tenen, atumi konum kupyopda, Weni Keca Kina Kailya kalepmumdi, ne si eremkamnerume. Tonda, aketeng tamun konum gawal dakre taruda, sun wa pepra kouamum keca yuma gawal dakra kipkurum taruda, bura tara keana dodin ati donkamrume. Ataruda, ‘E, atumida, ila mambul tumi kepmare’ tenen, wa kin keca dakra yana deipmumdi, Wa Kin Keca Gawal Dangna Kailya kalepra jemumdi, ne sipu eremkamnerume. 17 Keteng tamun tenpu-tenpu neitamaida, ‘Ila kailya deiyo weneri taru ace,’ pepra konum deipmasentopu, ‘Ila tumi ace,’ tenepra kumumdi, kailya kalemkamrume. Keteng tamun yumada, ue taru weneri deiki di, sun Israel yala nimipu yumada, ne damai yana ne sipu eremyakankamrume. Neda, sun nai Allah Yahweh, ^{▼▼Yahweh – Acada Ibrani upu deiki di, yuk mambul upu ton tapakra seki. Indonesia upu deiki di ‘Tuhan’ seki dinin, tek sisi ngeda, Ibrani upu deiki di, ‘Adonai Yahweh’ seki. Aupu ‘Adonai’ er deiyoda, ‘Akeca-keca deiki tara puto kuredi, er teneretopu kurur ngebo’ tenen, aupu perami. Atep nundi ange sekmepu.} akeca-keca deiki tara puto kunedi, ne tenenuntopu kununa cadi, ne sipu eremkamnerume.

18 Ne si eremna tep pepmasen ila tumi konum kuprepa, sundi ne karena tep, yapi keca popra karepkunemum tumida, ware keca do yuma, roti nena deiyo keca tapakra ketenemenge keca yala-yala yumada, akeca cap, gam keca popkamrumnge cap, tapakra pio men karenkamnerume. Tonda ne si eremna tep, kalepmamum bisam galemna dinin, meta pio tupa kwal deipmamum ngeda, akwapmarepapu mapmamumnyane, berekrepa, ambutumi ipna men jenkamrume. Atumi neitamaipu uku dongopmumpa uku di jepropredi gawal dakamre. ‘Akecada, nun mawa’ tenena gume. 19 Aketeng tamun, aketeng tamun kepbankamre taru neitamai yumada, sun wa pepra kouamrum keca, yala-yala yuma neitamai di, menmena weninge, pio telep ngeda, adipapu ne Allah Yahweh gispal dona tep, ne si eremna ati damai kareyakankamrume. Tonda, ‘Popmepedi galepra jepkup’ tenen, kambing bisam mi, er tu dopra gapkumum taruda, sun nin yapu moum tuyung cap tapakra men gamkamrume. Angeda, meme.

Allah Yahwehdi, Israel nesala tep, “Ukupra melimkamsene,” pepra, pedina upu pepu

20 Tek sisi, ne pel don ngebo, malaikat tenpu doproipnepa, erdi mepra barepa, sunda, er amendapu, melipra bankamrume. Ada, nedi sun tep, ‘Amutupu benkameng’ tenen, konum wepra keteneipsaipu bana tep, bisi bankamrum taruda, erdi mepra baredi, melipra kalekserepa, sunda er amutarapu, er benkamre bisipu bankamrume. 21 Sun bisi bankamrum taru yumada, ne doproipsene malaikat, erdi pepseretopu moupra gekepmumdi, talepra bankamrume. Ataru neitamai yumada, erdi pepsere upuda, pio men yanitamkamrume. Ada, ne si deiki di, erda wepra deipsi. Atep erdi pepsere upu yanipmum pangeda, sun mali kupmumnge yumada, men kaukemkamsere. Mali kupmum pangeda, sun wenemna tep ikin keca weik sun deikipu derinkamsere. 22 Dinino, sundi er upu pio moupra gekepmumdi, angepu talepra kumumdi, tonda, nedi sun tep, “Angeda kunkamrume, angeda pio men kunkamrume,” pepkamsengepu gekepra kumumnyopda, nedi sun melimna tep, sun podan neng yankameng taruda, ne yu kupnerepa, sun tep kunedi, sun aneng yuma popbisipkamne. Ange utopu, dan mutu neng do yuma, yuk mutu nesaladi, ‘Israel nesala sun nong deiki ikin keca derinkamep’ tenen, yakankameng taru peda, nedi anesala yuma tep, sun nong deiki ikin keca karepkamna deiki di, amutu neng yuma bisbisa kapkamne.

23 Ne pel don ngebo malaikatda, sun damai yana tekredi, mepra barepa, baramumnyanen, abenkamrum mutu yuma kunge nesala tep, Het yala neng cap, Amori yala neng cap, Feris yala neng cap, tonda, Hewi yala neng cap, Yebus yala neng cap, sun kunung mutu neitamai benkamrum taruda, nedi, sun anesala yuma tep, popbisipnedi, gum kupra deipkamne. Ukupnyopda, sun Israel nesaladi amutu talepra kunkamrume. 24 Amutu neitamai bena kumum dingeda, sundi amutu neng sun si eremamenge keca tep, sun peda abena tapakra si eremna pio meme. Tonda, sun amutu neng mali-mali kuramenge nge tep, ‘Nun peda, ton kupetepkupe,’ men tenenkamrume. Dinino, amutu nengdi, nimi urasin utopu kupra, petupra deipidi, sun si eremamenge keca yumada, sun dipapu dakra tapmumdi, gum kupra derinkamrume. Tonda, sundi akeca si eremna tep, ila lyom gel di ikra derinungaida, sun adipapu, agel yuma dakra tapmumdi, gum kupra derinkamrume. 25 Dinino, sun Israel yala nesalada, neda Allah Yahweh tepapu, si erenemumdi, gispal donkamnerume. Ukupra kumum pangeda, nedi sun tep, kange deipnedi, sun tep telep kudinkamsene. Ada, sun jenkamrum keca yala-yala yuma cap, me jenkamrumnge cap, telep kupra deipsenedi, melipra kalengsenepa, amutu neitamai kunkamrum taru yumada, pu jena keca yala-yala yuma, sun damai pio men kunkamsere.

26 Ne sipu eremrumu pangeda, nedi melimsenepa, sun kunkamrum mutu neitamai kunkameng nerapu yumada, telep kupra nyapu derinkamenge. Nerapudi mundu douamenge dinin, yapi bulumnange yuma sakroprepa, mi ton pio men deriramengto ngeda, sun damai ton men kunkamre. Tonda, amutu kunkamrum taruda, sun Israel yala nerapu neitamaida, you nerapu ton pio men kunkamenge. Nyapu telep kupra derinkamenge. Ataruda, nedi melimsenepa, sun gam kunkamruma tep nengeda, keteng tamunda, lyom weika di ton cap, go karenkamsene. 27 Amutu neitamai embankamrum taru yumada, ne puto sun deiki deipnepa, sun amutu nesala yumada, ila kwar kupkamre. Ukupkamna deiki di, sun anengda, nedi kange yawarapra deipnepa, sun yuma kange wang-wang pepkamenge. Ukupne pangeda, ‘Sun Israel nesala popra bisbisa kapkamep’ tenen, sun damai yakankameng nengda, kwar kuprepa, tamupra amnyo bisi dipu, bendopkamenge. 28 Sun podan neng damai benkumum taruda, ukupmantoda, ila Lusi mongdi nimi topmengedi, enepra dombangepa, nimi sepdaro baramengtopu, ne puto deiki di, sun damai dopra deipnepa, Hewi mutu neng cap, Kanaan mutu neng cap, Het mutu neng cap, kware weik kuprepa, sun yumada, sun kunge mutu di tapra, bura saka sepdaro bendopkamenge.

29 Ukupnepa, sun benkamrum mutu neitamai kunung nesala bendopkameng dinin, sun amutu kunung nesalada, tenpu keteng tamun neitamai dipapu, enepra men donokamne. Deiyoda, amutu neitamai, nimi men kungopda, bura tara gam kunge keca yala-yala yuma yangedi, sun kunkamrumai yana elepropsengepa, sundi ange yuma men poptume. Tonda, amutu neitamai, tenpu taru dipu nesala yuma gum kupmengopda, pio katuai mutu, nimi men kuramengai utopu, ‘Amutu yuma dimbulung pepserur’ tenen, sun anengda adipapu men enepronkamne. Ton keteng tamun di, ton yala neng, yuk keteng tamun di, yuk yala neng enepra donokbankamne. 30 Amutu kunung nengda, adipapu men enepronkamne. Dinin, ton taru di, ton enepronmanyanen, kange di ton enepronmanyanen kemkamne. Ukunkamne taruda, sun damai dipapu enepra donongkamne. Ukupbaramnepapu, sundi deipmumpa, dadeipdanen bankameng nesala, weik ton cap tapakmumnyopda, sun yumadi amutu yuma talepra kunkamrume.

31 Sun kunkamrum mutu cap, tonda, yuk neng kunkameng mutu cap, wilimdodana neitamai tep nengeda, nedi peten keipkamsene. Ada, ila laut mokon, er si Teberau, laut mokon dam tara di dipra, adinin Filistin neng kunung mutu damai kurur ila laut mokon dam tara di sekra, adinin me gumai tep, nimi men kunge mutu, pio ila katawai tara di dipra, adinin Efrat me embarurai yumada, nedi sun tep karepkamsene. Ukupsenedi, amutu neitamai kunung nesala yuma peda, karepsenepa, sun damai di anesala yuma enepropmum dingeda, sunda amutu yuma dopropmumdi, talepra kunkamrume. 32 Sunda, amutu bena kunkamrum taruda, amutu neitamai kunung nesala yuma tep, “Nun cap, sun cap telep kupra kikiman kunkamepa tep, nundi sun tep, ukupkamsepe,” pepra, pedina upu ton, pio men penkamrume. Tonda, sun amutu nesaladi, “Nun nai bo,” pepra, er si eremnung keca tep, sun Israel nesaladi, atali keca, si pio men eremkamrume. Angeda pio meme pepsene. 33 Sun Israel nesaladi, akarepkamsen mutu kunkamruma neitamai yumada, sun anesala tep, go ton tupa tapmumpa men kunkamnunge. Angeda, sun amutu neitamai tupa kungopda, ‘Sun Israel nesala peda, sun amutu neng si eremnung keca tep, ‘Nun nai’ tenen, si erepmumnya deiki di, ne Allah Yahweh tapnemumdi, ne damai mali kweipnerum’ tenen, pepsene. Ada, amutu nesaladi si eremnung keca, si erepmumnyopda, ukupmantoda, sun pedi pena pepmangepa, jena mankau di apumbon wekrepa, youramretopu kudaruma tep, ‘Amutu nesala cap, sun Israel nesala cap, kikiman kuna meme,’ pepsene.