Exo 24 | XteSC | STEP | Allah er si Yahwehdi Musa tep pepu. “Harun cap, Nadab cap, Abihu cap, tonda Israel nesala sun deiyo neng, wisi-wisi neng denge yoneitam bari (70) cap, Sinai mutu welepkurum dinin, sun anengda karenai tekmengedi, ne si erepkamnenge,” pepu.

Exodus 24

Allahdi Israel nesala tep, ‘Ukunkamrume’ pepra deipu upuda, ‘Ila mambule tenenkameng’ tenen, kupu keca tep, pepu upu

1 Allah er si Yahwehdi Musa tep pepu. “Harun cap, Nadab cap, Abihu cap, tonda Israel nesala sun deiyo neng, wisi-wisi neng denge yoneitam bari (70) cap, Sinai mutu welepkurum dinin, sun anengda karenai tekmengedi, ne si erepkamnenge,” pepu. 2 “Musa kanpuda ne damai yana welepkurume. Dinino, Israel nesala sun deiyo neng cap, nimi si pepmaken neng cap, Israel mutu nesala yuma capda, ne damai yakana gume. Tonda, Musa kandi amutu welepmem taruda, yuk neng yumada, amutu men weleptenge,” Allah er si Yahwehdi Musa tep pepu.

3 Musa tamupra beudi, Israel neng tep, Allah er si Yahwehdi ‘Ukunkamenge’ tenen, pepra deipmau upu, mem upu yuma lap pepupa, sun Israel nesala yuma gekepidi, kikiman pepi. “Telepe, nun nai bo Allah, er si Yahwehdi pepmaserenge yumada, angepu kunkamepe,” pepra, tenpu ngebo pereto kikiman pepi.

4 Upepi pangeda, Musadi Yahweh peipmau upu yuma seku. Konum seku dingeda, mapmaiya berekyopda, ortumi ipnada, Musadi Sinai mutu damai amu beudi, gel pala dopra taplakra deipu. Ada, ‘Allah er gispal dona tep, gam keca popra, Allah er karen keca agel deiki uku dongopnedi, er si eremkamepe’ tenen, gel pala doprapudi, pala gel taplakra yakeipu. Tonda, Israel neng tenimdina tep, lyom gel dopra, ayomnya utopu tu palipra ikra tekeipu. Ada amul di utara 12 iku. Ada Israel yala dua belas (12) akuramitopu, amul di uning tenepra 12 gel ikra deipu.

5 Ukupu dingeda, ataru peda Musadi Israel kaber neng wepra deipudi pepu. “Allah er kange telep kemdin keca tep, gam keca popra, uku dongopkurume. Tonda, ‘Yuk neng cap telep kupra kikiman kutepe’ tenen, sapi bisam weike gemnge popra kareprum dinin, uku men dongopkurume. Akeca yumada, nun nai Yahweh tep karerbenkurume,” pepu. 6 Upepupa, sun anengdi gam keca popi pangeda, Musadi agam keca popmainge, yapi dopropudi, yangdin mau pumbon dikdongopra bokra deipudi, buru di buruprapudi, pala gel taplakra yakeipmaua deiki gege pepupa, dorbena palepu.

7 Ukupu dingeda, Allahdi, ‘Ukunkamrum, angeda men kunkamrume,’ peiamupa sekamu buku dopropudi, Israel neng gekenai pepupa gekepidi, sundi tamupra pepi. “Telepe, Allah er si Yahwehdi pepseunge yumada, angepu kunkamepe. Er upu talepra dombankamepe,” pepi.

8 Upepi pangeda, Musadi yangdin mau dikdongopmau yapi buru di burupra, sun nong deiki gege pepupa dorbena palepu. Ukupu dingeda, upepu. “Ayapi deiki di, Allah er si Yahwehdi, ‘Ukunkamrum,’ peiamseu upu cap, erdi, ‘Sun tep melimkamsene,’ peipseu upu cap, betaipsene. Erdi, ‘Sun melimkamsene,’ pepra pedina upu tep peipseu ngeda, tali men peptapseu dinin, erdi, ‘Ukunkamrume, angeda men kunkamrume,’ pepra deipseu upu deiki di kurure. Ayapi deiki di betaipsere,” Musadi pepu.

9 Konum kupu pangeda, Musa cap, Harun cap, Nadab cap, Abihu cap, tonda Israel nesala sun deiyo neng, wisi-wisi neng denge yoneitam bari (70) cap, Sinai mutu deiki welepi. Ada, ‘Israel nesala kalekra melimserur Allah dirbenkup’ tenen, welepi. 10 Welepidi dinmaipa, Israel neng sun deiyo ngebo Allah, er yane amutarada, telep gel pala deiki tekmaupa, er dirinda, im kalum daramra utopu kupmaupa epi.

11 Ataruda, Israel nesala sun deiyo nengdi, Allah atekmaupa epi dinin, Allahdi sun tep derepudi men wenepu. Men derepka tep, sun abenmai nengpu antaprapidi, jen keca cap, me cap kikiman jenmai.

Musadi Sinai mutu dup kange di ton cap welepu upu

12 Amenda taru, Allah er si Yahwehdi Musa tep pepu. “Ne damai welepmumdi, amutu deiki yana kunmaumumpane nedi, ‘Angeda ukunkamrume, angeda men kunkamrume,’ pepra deipsi mem upuda, gel pala butene deiki sekeipsinge karepkenepa, kandi Israel nesala tep perbenkamrume. Ada, ‘Sun kael kepkameng’ tenen, peterep benkamrume,” pepu. 13 Upepupa, adipapu Musa cap, er melimne ngebo Yosua cap, Allah er kunai, Sinai mutu welerberei.

14 Musa cap, Yosua cap, welepkurei taruda, Musadi Israel nesala sun deiyo neng tep pepu. “Sun akunmamumdi, nun tep dinmamumpane, nun tamupra yankamaneme. Tonda yuk neng cap, derepdamumdi, ikin-ikin kupsere pangeda, Harun cap, Hur cap, sun damai tupa kunkamarenga cadi, ato keca akapyopda, sun butene damai lap perbemumpa, upu talepra gawal dangkamrenge,” pepu.

15 Upepudi, Musa Sinai mutu welepu. Welepu taruda, ila dua kwerepudi amutu yuma kepda pepu. 16 Ataruda, Allah er si Yahweh, er dirine weik, Sinai mutu deiki yuma jenek kepupa, komuni ngantan bari tumi di, dua di amutu tupa kepdongomu. Ukuamnganen, yoneitam tumida adua kan-kan di, Allah er si Yahwehdi Musa tep upupu.

17 Ataruda, Israel nengdi Sinai mutu dinmaipa, Yahweh er ila dirineda, amutu dup deiki ila uku bu jeramre utopu kunmaupa epi. 18 Allahdi Musa tep upupupa, Sinai mutu welerbeudi, dua kan-kan wengbeu. Sinai mutu deiki kunmau taruda, komuni lukunda ue denge dumbari, (40) empat puluh tumi di tupa kunmaue.