Exo 25 | XteSC | STEP | Allah er si Yahwehdi Musa tep pepu.

Exodus 25

Allah er si Yahwehdi, “Ne si eremna ati don keca tep, derinkamrume,” pepu upu

1 Allah er si Yahwehdi Musa tep pepu.

2 Kandi, sun Israel nesala yuma tep upepkurume. “Allahdi upepsere, ‘Sundi akeca-keca yuma bulupra, ne si eremna tep, telep karen keca bulupra, ne Allah damai duyakankamnunge,” pepmasere, peipkurume. Ada, ware nesala do yuma, sun dipru neitamai di, ‘Angeda, ne nai Allah tep ukupra karepkune,’ tenepmenge nengda, ne tep adipapu kareryakankamnenunge. 3 Ada, urasin pio telep gat kunumna keca er sida, emas cap, boun kunumna keca er sida, perak cap, tonda, gat keca er sida tembaga cap, ange yuma doupra kareryakankamnenunge. 4 Tonda, urasin pio telep opkal er sida kain lenan cap, opkal win tapu er sida wol cap kareryakankamnunge. Ada lenan opkal cap, wol tapu capda, singkalumna warna biru cap, mirin ungunge cap, yapi binge cap kareryakankamnunge. Tonda, Kambing potong di wipi opkal cap, doupra kareryakankamnunge.

5 Tonda, jem kambing bisam popra, bol kopra, yapi bi keca likiamenge nge cap, tonda laut mokon pumbon neitamai kuramre keca, er si lumba-lumba, er bol boun telepnge cap, tonda akasia co cap kareryakankamnunge. 6 Tonda, upna lana tep minyak me cap, ila tumi deiki nintong telep kuna tep, minyak me keca ton kareryakankamnunge. Ada, ne pel dona tep, nimi wepra derin taru, sun giso deiki dingdongonkameng minyak me, nintong telepnge, er si rempah-rempah cap, tonda nintong telep keca dinin, uku dongonung nge, er si dupa kareryakankamnunge. 7 Tonda, urasin pio telep kunumna weik gel, er si Krisopras, angeda imam er taram deiki kenengrur opkal deiki dinin, morokyo deiki di palepra derinkamenge. Tonda, yuk kunumna weik urasin telep gel ton tapakra kareryakankamnunge. Ada, ne gispal dona tep, telep karen keca karena tep, ila deiyo ngebo, Imam Agungdi, er nong deiki kenengrur kain lenan opkal cap, tonda angebo er taram deiki teng utopu kenengrur keca, er si Efod cap, akunumna weik gel yuma dopra, adeiki agel palepra derinkamenga tep pepsene.

8 Ange yuma konum kupmengopda, kandi, sun Israel nesala tep pepmempa, ne kunkamne ki dodin opkal tenda ati, pio telep ati dopkamnenge. Ukupmengopda, sun melimna tep, ne Allahda, sun kan-kan neitamaipu, ke taru tep, akati pumbon yanapna, benapna kunkamne. Sun cap, kikiman kunkamna tepa. 9 Ne ati dopkuneng taruda, nedi kan tep, ‘Ange utopu kupkurume,’ lap pepra deipkamkentopu, ukupra dopkamnenunge. Ada akati cap, akati pumbon derinkameng keca yuma cap, akati don keca, yala-yala yuma capda, nedi tenepnedi, ‘Ne si eremna ati donada, angepu kupkamrume,’ pepra, lap peipkamsene ngepu, ne ki tenda opkal bol di, tenda ati dopkamnerume.

Allah pedina upu peti co pum, Peti Perjanjian kipra derina tep, pepu upu

10 Akasia co lase betapra ketenepmumdi, peti co dopra bekine utopu keca keteneipkurume. Apeti co pum betamna tep nengeda, er lyom tep kunumpetepmumdi, 110 sentimeter kepre pangeda, betapra dopkurume. Tonda, er pala adinor derin nge cap, udi dipra, acei tengdin nge cap, kunumpetena tep nengeda, utotopu 66 sentimeter kupkurume. 11 Adopkamrum Peti Perjanjian ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Aco deikida, kunumna weik keca, er si emas dopra palepra deipi. Aco peti pumbon neitamaida, gel pala butene deipi. Ada, Allahdi, “Angeda ukunkamrume, angeda pio men kunkamrume. Ukupmumnyopda, neda sun nai bo Allah pio kunedi, melipra kalengkamsene,” pepra, gel pala deiki sekra deiamu mem upu cap, pedina upu capda, aco pumbon er si Peti Perjanjian dongopra deipi. Tonda, Harundi taleamu maca cap, Allahdi Israel nesala tep kareamu im deiki kwaning, er si ‘mana’ ngeda, metekanun dopra, apeti pumbon dongopi. Apeti co deiki tara buplan singina tep nengeda, kunumna weik emas, pio telepnge di, palepra deipi. Ange deikida, apeti buplan er sida, Penutup Pendamaian pepi ngeda, malaikat urasin utopu keca ton, er sida Kerub, butene di ketenepra deipi. Sun Israel nesalada, ‘APeti Perjanjian deiki, Allah Yahweh, er Sambala cap, er puto cap, er dirine cap, er pio telep kurenge yuma capda, aKerub deiki tara pio akunkamsere,’ tenerami. Tonda, imam neng sun ila deiyo ngebodi, keteng tamun yuma, tenpu tumi deiki dipu, Pio Telep Lengna Ati wekudi, aPeti Perjanjian deiki tara bublan deikida, domba bisam popunge, er yapi dopra, abublan deiki gege pepra deipu. Ada, ‘Allahdi, Israel nesala mali kunge keca yuma kaukepredi, gum kupra deipkamre’ tenen, apel doramu. Akeca gambarda, ayat 21 dinkurume.} coda, ‘Er urasin telep kupkamre’ tenen, pumbon tara pe, bol bura tara pe yumada, urasin pio telep gat kunumna keca, er sida emas, pio telepnge dopra, aco deiki palepra deipkamrume. Ange emas keteneipkamrum taruda, yuk gat keca ton tapangna gume. Emas, pio telep lekngepu ketenepkamrume. Tonda, aco Peti Perjanjian pirimanai urasin telep kuna tep, co petupra derinkameng keca, er sida bingkai peda, emas dopra, akeca deiki palepra deipkamrume. 12 Apeti co betapmum dingeda, er pari, dana-dana yuk-yuk, ton tara butene, ton tara butene, deklopa wiramenga utopu kupra, gat kunumna weik keca emas di betaipmumdi, bona yuk-yuk, potokra deipkurume. Aketeneipkamrum bonda, pela co dongopra, aco pum peti doupra bana tep keteneipkurume.

13 Apeti co, pela doupra bana tep, betaipkumum coda, co si akasia co dipu dopra betaipkurume. Abetapra deipmum co deikida, urasin telep kuna tep, gat kunumna weik keca, er sida emas dipu palepra deipkurume. 14 Peti co bekin konum keteneipmum dingeda, peti co pari dana-dana deklopa utopu kupra, emas di cincin bon utopu betaipmarumaipu, alyom co dopra, abon dongopkurume. Ada, apeti co bekin doupra dubana tep pepsene. 15 Aco peti, er si Peti Perjanjian dana-dana tara cincin bon utopu kupra emas di betaipmum bonda, alyom akasia co konum dongopmum dingeda, ka di ton men gudonkamrume. Alyom coda, abon-abon pumbonpu pio kapkamrure. Ton gudona meme. 16 Ukupmumdi, apeti co pumbon neitamaida, gel pala butene, nedi, “Angeda ukunkamrume, angeda pio men kunkamrume,” pepra, gel pala deiki sekra deiamsisi upuda, aPeti Perjanjian co bekin pumbonpu dongopra deipkamrume.

17 Tonda, apeti co deiki tara buplan singina tep nengeda, kunumna weik gat keca emas, pio telepnge di, dopra deipkurume. Abuplan er lyomda, 110 sentimeter kunupra keteneipkurume. Abuplan er palada, 66 sentimeter kunupra betaipmumdi keteneipkurume. 18 Ukupmum dingeda, malaikat urasin utopu keca, er si Kerub, butene betaipkurume. Ange betaimna tep nengeda, pio kunumna weik gat keca, er sida emas, darapra taikmengepa, pala telep kupreya deiki di betaipkurume. Tenpu ngeda, dumsisi tara deipkurume. Ton ngeda tebalal tara deipkurume. Abutene Kerubda, apeti singina tep, deiki tara dekdongonkamrume ngeda, akeca deiki tarapu deipkurume. Apeti co pum singina keca, er sida, ‘Penutup Pendamaian,’ pepkamrume. Ada, Allahdi sun Israel nesala tep, adipapu poptapsetu dinin, ila di bicau teneseredi, lyemdongonkamsera tep, apeti co pum, Peti Perjanjian, er deiki tara buplanda, er si tep, ‘Penutup Pendamaian,’ pepkamrume.

19 AKerub buteneda, Peti Perjanjian co pum er deiki tara buplan, singina keca dukdongopra tenpu kecapu betaipkurume. AKerub buteneda, yuk-yuk betamdinada gume. APeti Perjanjian co pum, er deiki tara buplan cap, aKerub butene cap, tenpu pala emas di petupra betaipkurume. Tonda, apeti co pum deiki tara singinange deikida, ton Kerub dumsisi tara sirik, ton Kerub ortara tebalal tara sirik betaipkurume. 20 Betapara deipmumpa, aKerub butene sun urasinda, tenpu tara neitamaipu kepra deiprumpa, didankamrerunge. Ukuprengedi, sun pol ereprengedi, daneitamaipu, pol sirik-sirik dukdongopdankamrerunge. Ukuprengedi, sun urasin peda, tenpu tara neitam bisipu keprengedi, didankamrenge. Ada, aco pum peti, er deiki tara buplan, er si Penutup Pendamaian, acapu didankamrerunge. Apeti dengdongon buplan deiki di, sun polda, apeti co pum deiki tara dinin, neitam bisipu, ortara di, atara di, meneng damaipu dipdongopdankamrenge.

21 Aco Peti Perjanjian, er deiki tara buplan, er si ‘Penutup Pendamaian,’ konum betaipmum dingeda, deipkurume. Tonda, aco pum peti deiki tara buplan kapul men dekdongopmum dingeda, apeti co pumbonda, gel pala butene dopra deipkamrume. Ada, nedi, ‘Angeda kunkamrume, angeda pio men kunkamrume,’ pepra deipsidi, gel pala deiki sekra deipsisi ngeda, sundi agel butene dopra, apeti co pumbonpu dongopra deipkamrume. Ukupmumdi, aco pum deikida, adipu moupra er buplan, Penutup Perdamaian dopra, apeti deiki singipdongopmumpa, dakapkamrure.

22 APeti Perjanjian dopmumdi, er deiki tara buplan singina tep, akeca sida Penutup Pendamaian ngeda, betapra deipmumya deikida, malaikat urasin utopu keca, er sida Kerub butene, ketenepra deipmumyai, acapu daneitamai yanepa, ne cap, kan Musa cap antamkamneme. Aca antapneme taruda, nedi ne nyapu Israel nesala tep, kan damai yana upu karepkenedi, ‘Ange kunkamrume, ange men kunkamrume,’ pepra deipkenepa, kandi sun Israel nesala yuma, sun damai bena pepmempa, adipapu ne upu gekepra kunkamenge.

Allahdi Musa tep lap pepu.

Roti kwaneng dapra derinai dona tep, lap pepu upu

(Keluaran 37:10-16)

23 Uda, sun adipapu, akasia co dopra aco di, roti kwaneng dapra, derin meja betaipkurume. Ameja er lyomada, 88 sentimeter, er palada, 44 sentimeter. Tonda, acei tengdin nge, er (tinggi) lyomda, 66 sentimeter kunupetepra ketenepkurume. 24 Ukupmumya deikida, kunumna weik telep gat keca emas di, ameja co deiki palepra deipmumdi, dopkamrume. Tonda, ameja deiki tara sirik-sirikda, ‘Urasin telep kunkamre’ tenen, emas di palepra deipmumdi, gwatepra ongopdongopkamrume. Ange er sida, bingkai betaipkurume. 25 Ameja co betapra deiprumya, er deiki tara pirman leng dana-dana tara yumada, er palada 7,5 sentimeter ketenepra betaipkurume. Ada, nimi buri pala utopunge betaipkurume. Abetaiprumnge, er pirimanaida, telep gat keca emas di gwatepra ongopdongopkamrume. Ange er sida, bingkai betaipkurume. Tonda, bingkai er urasin telep kuna tep, gat keca emas di, palepra dongopkamrume.

26 Ukupra, dopmemnyopda, ameja pela doupra bana tep, adi welepmare co, er pari dana-danada, gat keca er si emas di, deklopa wiramenga utopu, betaipmumdi, bukep utopu kupra, bon dumbari keteneipkurume. Ameja er yan dumbari damaipu betaipkurume. 27 Aemas di bukep utopunge, meja pirman tara wipra bon keteneprumyaida, ameja talena tep, pela co dongopra dubankamrume. 28 Ameja pela doupra bana tep nengeda, akasia co dipapu, dopra betaipkurume. Aco deikida, urasin telep kuna tep, gat keca emasi di palepra deipmumdi, keteneipkurume. Ameja pela doupra bana tep, aco bukep bon utopu keca betaipmumnge pumbon dongopmumdi, ameja doupra bankamrume.

29 Tonda, ameja deiki deipkamrum jen derin piring cap, me gwen mau cangkir cap, lyom me mau kendi cap, tonda mangkok cap, yuma betaipkurume. Akeca yuma betamnada, urasin telep kunumna weik keca emas di, betapra deipkamrume. Abetapra deipkamrumnge yumada, ne si eremna tep, anggur me karepmengepa, gwepra jena tep, ketenepkamrume. Cadi, ameja deiki deipkamrum keca yumada, kunumna weik gat keca emas, pio telepnge dipu betaipkamrume. 30 Ameja betaiprum ngeda, nedi sun tep, pepra deipsisipa, Musadi sekamu upu kipra deiprum Peti Perjanjian, orati pumbon akapmar dinin, lyom opkal gorden kapkopepra deipmaumai di atara, Peti Perjanjian urasin dam tarapu, bena ameja dopra deipkurume. Ukupmumdi, ‘Ne cap, sun cap kikiman kunkamepe’ tenen, petenkemna roti kwanengda, amejapu dopra deriryakankamnerume. Ameja deikipu pio akunkamrure.

Lampu weica deiyo dona tep, pepu upu

31 Sun adipapu, lampu weica deiyo dona tep nengeda, urasin telep gat keca, emas pio telep ngepu dopropkurume. Aemas doropmumdi, weica er deiyonge cap, deiyo di tekredi, weica talenange cap dona tep, urasin telep keca emas dipu betaipkurume. Aweica deiyo tekra deipnedi, taledina tep nengeda, sundi emas dipu dopra, taikmumpa, er urasin telep kurya deiki betaipkurume. Akeca deiki kamo telep kuna tep nengeda, bunga kait urasin telep kuramre utopu kupra, petupra deipkurume. Ada, co ki kapul popkamareya tep, bupu kemtamamre utopunge cap, er bangu utopu nge cap, sundi betapra, aweica deiki palepra deipkurume. Akeca yumada, nong tenpupu kupra betaipkurume. 32 Aweica deiyo keca neitamai di, tenpu lyomnge welepkurure. Awelepreya deiki di, pari danada, kwa weneri welepra dumsisi tara deipkurume. Ange utopu ton, ordana tara peda, kwa weneri welepra tebalal tara deipkurume cadi, ayuma tapakra betaipmumyopda, weica talenange ngangtan bari (6) betaprumdi, ketenepra deipkurume.

33 Angangtan bari upna kwakamreya yuma deikida, urasin telep kuna tep nengeda, bunga Badam kait urasin telep kuramra utopu kupra, tenpu kwa deiki di, Badama kait urasin utopunge yuk-yuk weneri petupra deipkurume. Ada, er bangu utopunge cap, soki popkuredi, bupu kemamre utopunge cap, akwakamreya yuma deikida, deipkurume. Upna kwakamre ngeda, deiyo dana tara weneri deipmumdi, deiyo ordana tara weneri ton deipmumdi, aweica talenange ngantan bari (6) kupra ketenepra deipkurume. 34 Aweica talenange, deiyo neitamai welepkamre ngeda, kwakamrai talena tep nengeda, bunga Badam kait urasin utopunge telep kuramra utopunge, gum-gum dumbari betaipmumdi keteneipkurume. 35 Ngangtan bari kwa kwakredi, welepkamrai yumada, gum-gum betapra deipkurume. Akait urasin utopunge yuk-yuk keteipkurume. Ada, co kait kapul popkamreya tep, bupu kepkuredi, gum-gum ketenemamre utopu kupra deipkurume. Cadi, aweica talenange deiyo di neitamai welepkamrenge deiki, gum-gum dumbari betapra deipkurume.

36 Lampu Weica lana tep, kwa kwakredi welepkamrenge cap, deiyo cap, Badam kait urasin utopunge cap yumada, kunumna weik gat keca, emas di betaipkamrume. Betaipmum dingeda, akwakamrai er gu tenpu-tenpu derina tep betamnada, co ki kapul bupu kemamre utopu kupra, betapra ketenepkamrume. Ada, gat keca emas pio telepnge dipu, taik-taik pepra betaipmumdi, tenpu nongpu dopra deipkamrume. 37 Lampu Weica deiyoda, tenpungepu welepkamre dinin, dana-dana tara weica talenange weneri-weneri kupra welepkamre. Aweica talenange deiki tara, weica lanaida, yoneitam bari betapra keteneipkurume. Ukupmumpa, weica uku lapredi, nimi din tara yumada, dirinepu kupkamre. 38 Tonda, aweica uku dinipmengepa jepredi, gama dokoteprenge sekra, telep kemdina tep nengeda, aweica tapu sengna keca peda, kunumna weik gat keca emas di ketenepkamrume. Tonda, aweica iriamu tara ‘Minyak di, meja deiki saka beprur’ tenen, yambul pala derinung keca, er si talam penge keca peda, emas di keteneipkurume. Ada gat keca emas di, taik-taik pepra betaipmumdi, keteneipkurume.

39 Alampu weica er deiyo cap, neitamai welepkamrenge cap, kwa kwakredi welepkamrenge ngantan bari cap, weica derinai cap, weica iriamu tara pala keca deipkamrumnge cap, weica tapu sengna keca cap, ange-ange yuma betamna tep nengeda, kunumna weik keca emasda, tiga puluh lima kilo (35 kg) dopra, ange di akeca betapra ketenepkamrume. 40 Alampu upna deiyo cap, pel don keca cap yuma, betaipkumum taruda, nedi kan tep Sinai mutu deiki di, ‘Aweica talen kecada, ukupra betapra ketenepkamrume,’ pepra, lap pepkesitopu kupra, angepu tenepmumdi, betaipkamrume.